ادبیات سئونلر

من و قاینانامین ماجرالاری ۷
جمعیتین چوخالماسی😂
✍افروز_خانیم

یئرینیز بوش یاز آخشام‌ اوستوسونون سَرین هاواسیندا قاینانامین حیطینده پالازی سَریب، سیماواری قورموشوق، دوزلو خوی گونه‌باخان تومو، لیمولو چای ناباتلا بتر یاپیشیر، ائله بئله هر دره‌دن گول دئییب گول ائشیدیریک.
دئمه‌یین ها بس غیبت ائلیریک، استغفروللاه ایکی مؤحترم خانیما بو مارکالار یاپیشماز. بیز گول دئییب گول ائشیدنده ده مملکتین موشکوللرینی حلّ و فصل ائدیریک.
بلی، صوحبت قیزیشدی، سوز هارا چکدی، جمعیته.
من دئدیم: خبرده یازمیشدی ایران جمعیتی‌نین حالدا یوزه اونو یانی اون درصدی قوجادیر، بئله گئتسه ییرمی ایله مملکتده بیر جاوان تاپیلمیاجاق. مملکت قوجالار مملکتی اولاجاق. باشقانلار بویوروبلار: گنج عائیله‌لر بوللوجا دوغوب دولدورسونلار.
قاینانام دئدی: قادانی آلیم گلین، ایندی داها قورت- قوش، مال- حئیوانلار زاد دا دئیه‌سن اینترنت اهلی اولوبلار. هر نمنه‌دن خبرلری وار.
تعجوبلو سوروشدوم: نئجه؟!
بارماغیلا سکی‌نین آشاغیسیندا بیر توم سامان اوستونده غضبلی یاتان چیل تویوغا ایشاره ائله‌ییب، دئدی:
- بو جانی یانمیش چیل تویوغو گورورسن؟! او یازیق خوروزو دیغلاتدی یان- یؤره‌سینه قویمادی. آخیر بیر شیکیل جوتلشدیردیم کوت دوشوب.
ایندی ایسه نمنه فالا یومورتا آلتینا قویورام سیندیریب ایچیر. جوجه چیخارتماق ایسته‌میر!!
او گون معنا عالمینده گؤرموشم آق فَره ایله دانیشیر:
-باجی گؤرورسن بو افروزون قایناناسی گؤهری، سویوموزدان، دنیمیزدن کسیب، آد آچماق اوچون، هامی اونا (حاجی خانیم) دئمک اوچون، مسجید- مینبرده دده- باباسینا یاغلی صالاواتلار چئویرتدیرمک اوچون بیزیم بوغازیمیزدان کسیب، اولانین قاپی- قونشویا پایلاییر، یوخسا احسان وئریر. دئیه‌ن یوخ آی حاجی خانیم، قوربانین اولوم اوّل مسجیدین ایچی اوندان چؤلو. سن اؤز اهل- عیالینی آجیندان سوسوندان اؤلدوروب نه دن قاپی- قونشویا پایلاییرسان آخی؟!
ائوینده ده بیر گون سو کسلیر، بیر گون برق قطع اولور.
منیم او یازیق حیات یولداشیم، خوروزون قارانلیقدا اوره‌یی سیخیلاردی. او شوم آخشام ائرته‌دن برق گئتدی صوبحه‌دک گلمه‌دی، باشی بلالی خوروزومون باغری چاتلادی، اؤلدو. تکی من بیلدیم او قارانلیقدان قورخدو انفارکتوس (سکته) کئچیرتدی.
ایندی بو آرواد اوتانماز- اوتانماز هئی منیم آلتیما فالا یومورتا قویور، من ده آجیغیمدان فالالاری ایچیرم. جوجه‌نی نئینیرم آخی؟!
اؤزوم نه گون گؤرورم جوجه‌م ده گورسون؟!
- هه بالا بو چیل تویوق دا بئله جمعیتین چوخالماسی‌نین قاباغینی آلیر.
من تعجوبلو آروادین سؤزلرینی ائشیدیرم و جمعیت چوخالماسی‌نین هاردان هارا چکیلمه‌سینه فیکیرلشیب، باشقانلارین سؤزونو آلت- اوست ائلیرم. بو تمثیل له ایلگیلندیریرم.
لاپدان قاینانام چیینیمی سیلکه‌له‌دی:
- آی گلین نه یامان فیکیره گئتدین؟!!
- بو بتر سوژه‌دیر. صاباح یازاجاغام آناجان.
- افروز آمانین بیر گونودو منیم سؤزلریمین قویروغونو اویان- بویانا باغلاییب، بو یاشدا منی پوخا وئرمه ها.
تومانیما دَله اؤتوررلر قورتارا بیلمه‌رم قادانی آلیم.😂
سیز یازارلارین عادتی دیر باخ بو دووارین جیریغینا دا مین سؤز قوشوب اورا بورا باغلاییرسینیز. جمعیتدن سؤز دوشدو من دیلی قوروموش دا بیر سؤز ایدی دئدیم دا. ائشیتمزدن کئچ.
اوره‌ییمده دئدیم: " آنانین خوروزو اؤلسون قاینانا، اصلن...اصلن بو سؤزلرین هئچ بیر کسه، هئچ بیر یئره باغلیلیغی یوخدو. سن دئدین افروز دا ایناندی، سن اییره‌نی افروز چوخدان توخویوب».

https://t.me/Adabiyyatsevanlar