ادبیات سئونلر

512 views15:05

داغ باشماغیم
نریمان ناظیم

https://t.me/Adabiyyatsevanlar

319 viewsedited 02:00

داغ باشماغیم
نریمان ناظیم

بیر الیمده چؤره‌ک، بیرینده بیر پاکات مئیوه، قولتوغومدا ایسه گونده‌لیک، چیینیم‌له قاپینی ایته‌له‌ییب ایچری کئچیرم. سوپورگه الینده، ائیواندا دایانمیش آروادین توز-تورپاغا بویانمیش اوز- گؤزونو گؤرجک دویورام کی ائوده کؤهنه ایلین هیسی آلینیر. ائو یئنی ایلی قارشیلاماغا حاضیرلانیر. آرواد یورغون- آرغین منه یاناشیر. الیمده‌کی‌لری آلیب، باشی ایله بیر نئچه زیر- زیبیل ییغیلمیش کارتونا اشاره ائده‌رک «دای واللاه منده اینجار قالماییب؛ زحمت اولماسا بولاری قوی ائشییه.» – دئییر.
کارتون‌لاری بیر به بیر داشییب، قاپی قاباغینا قویورام. قاپینی اؤرتر- اؤرتمز گؤزوم زیبیل ایچیندن بویلانان «داغ باشماغی»ما ساتاشیر. قیناییجی باخیش‌لا منی سوزور. شماتت ائدیجی گؤزلریندن دیکسینیرم. گوناهکار بیر اوشاق تک ال- ایاغیمی داغیدیرام. بیر آن، قاپینی اؤرتوب اؤزومو اونون باخیشیندان قورتارماق ایسته‌ییرم، آمما اووسونلانمیش ایلان کیمی ترپنمه‌یه امکان تاپمیرام. دایاندیغیم یئرده قورویوب قالیرام. باشماق اوزون زامان منی سوزور. من گؤزومو یئره تیکیرم؛ سونرا اونون آجی – آجی گولومسه‌ییب، دیله گلمه‌سینی دویورام؛ قهرلی سسینی ائشیدیرم:
«سنین بو قده‌ر وفاسیز اولماغینا هله‌ده اینانا بیلمیرم. نئجه اوره‌ییندن گلیر منی زیر- زیبیله قاتیب چؤله آتاسان؟! کئچمیش‌لری، بیرلیکده کئچیرتدیگیمیز گئجه – گوندوزلری نه تهر اونودورسان؟! آخی ایستی‌ده، سویوقدا، قاردا، یاغیشدا من سنه یول یولداشی اولموشام؛ من شاختادا، بوراندا دؤنه – دؤنه دونوب آچیلمیشام؛ آمما سنین ایاقلارینی قورویوب ساخلامیشام. سهندده، ساوالان‌دا، توچال‌دا …. هانسیسینی دئییم، هاراسیندان دانیشیم؟! بیرجه منه باخ! اؤتن اون – اون ایکی ایلده یاغلانمادان قورویوب قاخا چئوریلمیشم. آی‌لار ایل‌لر گؤزوم قاپی‌یا تیکیلیب کی هاچان گله‌جکسن؛ هاچان منی یئنی‌دن یاغلاییب، گئییب یولا چیخاجاقسان. بس سن بئله گله‌جکمیشسن؟! اؤتن گون‌لری بیر داها خاطیرلا!، او اوچوروم‌لاری، او سیلدیریم‌لاری … من داش‌لاری، قایالاری جایناقلایا – جایناقلایا هر آددیم باشی مین کره اؤلوب دیریلمیشم؛ آمما سنی ذیروه‌ده گؤرجک یورغونلوق دویمادان، باشی اوجالیغیندان غرور دویموشام؛ سئوینجیندن سئوینمیشم. من سنه تکجه باشماق دئییل، یول یولداشی اولموشام. بیلمیرم … آخی باشماقسیز، یولداشسیز یولچو دا اولارمی؟ آآه آغیزیمدان وار گلمیر. نئجه دئییم یوخسا… یوخسا، سن یولوندان …»
داها تابلاشا بیلمیرم. دیزه چؤکورم. الیمی باشماغین آغیزینا قویوب، گؤزومدن اله‌نن داملالارلا توزغون یاناقلارینی یویورام. اونو گؤتوروب باغریما باسیرام. آیاغا قالخیرام. اوره‌ییمین دؤیونتو سسی اونو کؤورلدیر. یئنی‌دن دیللندیریر. حزین نغمه‌سینی ائشیدیرم:
قالانین دیبینده ییخیلدیم یاتدیم
آینالی توفنگی دولدوروب آتدیم
وطنین یولوندا …..
نغمه‌دن سیلکه‌له‌نیرم. قوشولماغا چاغیریر. سسیمی سسینه قاتیرام. قایناییب یئنی‌دن قوووشورام. سس گئت- گئده اوجالیر. نغمه گورلاییر. باشیمی قالدیریب قاباغا باخیرام. یوزلرله داغچی گؤرورم الوان چانتالار کورک‌لرینده، سیرا ایله بیر – بیری‌نین آردینجا قاتارلاشیب، بیر جیغیری توتوب، سارسیلمادان اوزو یوخاری ذیروه‌یه دوغرو آغیر – آغیر آددیم‌لارلا ایره‌لی‌له‌ییرلر. دؤنوب آرخاما باخیرام. سایسیز – حسابسیز داغچی گؤرورم. سینه گریب، گؤزلرینی ذیروه‌دن چکمه‌دن بیرگه آغیزدان، بیرگه بوغازدان اوخویورلار:
یاشا داغچی، یاشا، سن مین‌لر یاشا!
داغیتدین دؤیوشچو ….
مؤحتشم ذیروه قارشیمیزدادیر. آغیر آرخایین، متانت‌له دایانیب، داغچی‌لارین قوووشماسینی گؤزله‌ییر…

آرواد قولومدان یاپیشیب سیلکه‌له‌ییر. «به سن نییه بئله ائدیرسن؟» – دئیه منی اؤزومه قایتاریر. قیزدیرمادان آلیشان گؤزلریم هئچ نه‌یی گؤرمور. آستانادا اوتوردورلار منی. اوشاق‌لار دؤره‌می آلیر. اونلارین سورغو – سووالینا جاواب وئره بیلمیرم. نهایت قهردن بیچیلمیش بوغازیمدان آنجاق بیر جومله‌نین چیخماسینی دویورام: «منی کئچمیشیمدن آییرمایین، آییرمایین …!»

قایناق: ایشیق سایتی

https://t.me/Adabiyyatsevanlar