ادبیات سئونلر

«رسول قدیری»

أریتمه بؤلومونده ایشله‌ییر
1500 درجه ایستی‌ده!
او درجه‌ده آلووون داورانیشی شاشیرتیجی‌دیر
دمیری یومشادیب أریدیر
اونون آمما سویونو آلیب جانینی برکیدیر
اورادا،
دمیری داها آرتیق أزدیریرلر
آیلیغی،
یوخسوللوق خططینه اوچ قات قالمیشدا،
یئرآلتی قاتلاردادیر،
خورتلامیش اؤلولر سایاق!
گون‌به‌گون،
قازانج یاپیسی‌نین قاتلاری آرتیر
هم اوسته قالخان قاتلاردا،
هم یئر آلتینا ائنن قاتلاردا!
یوخسا بو یاپی چوخ زامان اؤنجه ییخیلاردی بلکه
فصیللردن آسیلی اولمادان،
ایشدن چیخاندا همیشه اوشویور
همیشه تؤوشویور
گونشدن هئچ خوشلانماز
ایسوئچده یاشامیر کی، گونشی گؤرونجه سئوینسین
گونش همیشه گؤزونون اؤنونده‌دیر
و ایش یئرینده‌کی گونش داها قیزغین‌دیر
ائوینه قویون پاچاسی آلا بیلمه‌سه ده،
تویوق آیاغی آلا بیلیر هله‌لیک
کئشکه تویوغون کلله‌سی ده ساتیلایدی
اونو دا آلا بیلردی سانیرام
ایری‌باش حئیوانلارلا أصلا باش‌باشا قویا بیلمز
۲۵۰ قرام تویوق آیاغی،
و بئش دنه چؤرک آلیب تلسیک ائوه قاییدیر
ایکینجی تئلئکانالدا،
20:30 خبرلری‌نین واختینا چاتدیرمالی‌دیر اؤزونو
یاخشی کی،
هئچ نه‌لری اولماسا دا،
باشلارینی قاتاجاق تیلویزیونلاری واردیر
یئتیشجک آلدیقلارینی یولداشینا وئریر
پالتارلارینی ده‌ییشمه‌دن، تیلویزیونون کانالینی ده‌ییشیر
اوشاقلار قاش‌قاباق ساللاسالار دا دینمیرلر
خبر اوخویان خبرلری اوخویور:
- هر شئی یاخشی‌دیر
دونیا داغیلماقدادیر
آمما بیزده هر یئر آرام‌دیر
بیز چوخ خوشبختیک- دئییر
او دوز دئییر
همیشه‌کی کیمی اینانیر
نئجه اینانماسین؟!
ایسلامی اؤلکه‌نین رسمی تیلویزیونوندا،
یالان خبر دئمزلر کی!
اوسته‌لیک،
چوخ زامان اؤنجه گؤزل بیز سؤز ده ائشیدیب‌دیر:
- هئچ ایستکان بؤتوو بوش دئییل
بوش حیصصه‌سی ده وار، دولو حیصصه‌سی ده
اوسلو اینسان،
همیشه ایستکانین دولو حیصصه‌سینه باخار-
بو سؤز یامان عاغلینا باتیب
او چوخ اوسلو اینسان‌دیر
آنجاق،
بیرجه،
هاچان ایستکانین دولو حیصصه‌سینده بوغولاجاغی بللی دئییل!...

https://t.me/Adabiyyatsevanlar