ادبیات سئونلر

اوشاق ادبیاتی

🧑‍🦲قوشباز کل اوغلان
یازار:« صمد بهرنگی»
چئویرن:«منیژه جم‌نژاد»

🕑 ایکینجی گؤیرچین دئدی: نیه قویلاییر؟ بیرینجی گؤیرچین دئدی: سنجه نه ائتسین؟ ایکینجی گؤیرچین دئدی: بیز قالخاندا دورد یارپاق آیاغیمیزین آلتیندان دو٘شه‌جک. اولاری کئچیسینه یئدیردیب اونون سودوندن قوشلارینین بویون بوغازینا سو٘رترسه، قوشلاری دیریلیب، ائله ایشلر گورجکلر کی ایندیه‌جن بیرجه قوش گورمه‌ییب. بیرینجی گؤیرچین دئدی: کئشگه اوغلان بیزیم سؤزلریمیزی ائشیده. گؤیرچینلر اوچدولار. دورد یارپاق آیاقلارینین آلتیندان قوپوپ دو٘شدو. کل اوغلان اولاری گؤیده توتوب ائله اوردا کئچیسینه یئدیردی. کئچینین دؤشلری سو٘تله دولدو. کل اوغلان بادیا گتیردی. کئچینی ساغیب، سو٘دوندن قوشلارینین بویون بوغزینا سورتدو. قوشلار ال آیاق چالیب، دیریلیب، کل اوغلانی دؤوره‌له دیلر. قوجا آرواد قوشلارین قاناد سسینه ائشیه چیخدی. کل اوغلان اولانلاری اونا دئدی. قوجا آرواد دئدی: اوغول دا قوشبازلیقدان ال چک. بو گز داما چیخسان پادشاه اؤلدورر سنی. کل اوغلان دئدی: ننه دا منیم قوشلاریم، گؤردویون قوشلاردان دئییللر. باخ...
کل اوغلان قوشلارینا دئدی: گوزل قوشلاریم، بیر ایش گؤرون او٘ره‌ییمی شاد ائدین، ننه‌می ده راضی سالین. قوشلار گیرده‌لنیب، پیچیلدالدیلار. بیردن گؤیه قالخیب گئتدیلر. کل اوغلان‌لا ننه‌سی قالدیلار باخا باخا. بیرآز کئچدی، قوشلاردان خبر اولمادی. قوجا آرواد دئدی: بو دا سنین قوشلارینین وفاسی!...
قوجا آروادین سؤزو آغزینداکن قوشلار گؤروندولر. بیر کئچه بؤرک اؤزلریله گتیرمیشدیلر. بؤرکو کل اوغلانا وئردیلر. قوجا آرواد دئدی: نه ده باهالی سوقت گتیریبلر سنه. باخ گور باشیوا گلیر یا یوخ. کل اوغلان کئچه بؤرکو باشینا قویوب دئدی: ننه، یاراشیر منه هن؟ قوجا آرواد سانغی‌لا دئدی: اوغلان هارداسان؟ کل اوغلان دئدی: ننه ائله بوردایام. قوجا آرواد دئدی: بورکو منه وئر گوروم. کل اوغلان بورکو گؤتوروب ننه‌سینه وئردی. قوجا آرواد باشینا قویدو. کل اوغلان چیغیردی: ننه هارا گئتدین؟ قوجا آرواد دینمه‌دی. کل اوغلان چاشقین، آغزی آچیق، یان یؤوره‌سینه باخیردی. بیردن گوردو ننه‌‌نین جهره‌سینین سسی گلیر. اتاغا قاچیب گؤردو جهره اؤز اؤزونه فیرلانیر یو٘ن اییریر. دا بؤرکون اؤزه‌للیینی بیلدی. دئدی: ننه دا اینجیتمه منی، بورکو وئر گئدیم بیرآز یئر یئمک تاپیم. آجیمدان اوره‌ییم گئدیر، اؤلورم. قوجا آرواد دئدی: آند ایچ حرام مالا ال وورمیاجاقسان، بورکو وئریم. کل اوغلان دئدی: آند ایچیرم منه حرام اولان شئیلره ال وورمایام. قوجا آرواد بورکو کل اوغلانا وئردی، اودا باشینا قویوب گئتدی. نئچه محله اویاندا پارچا کرخاناسینین اییه‌سی حاجی علی یاشاییردی. نئچه کرخاناسی، نئچه یوز ایشچی‌سی، نوکر کولفتی واریدی. کل اوغلان گئده - گئده اؤزونه دئییردی: یاخچی کل‌اوغلان، حسابلا گور حاجی علی‌نین مالی سنه حلالدیر یا یوخ. حاجی علی پوللاری هاردان گتیریر؟ کرخانالاریندان؟ اؤزو ایشله‌ییر؟ یوخ. او الین آغ‌دان قارایا وورماز. یالنیز کرخانالارین قازانجینی آلیب یئییب ایچر. ائله ده کیم ایشله‌ییر قازانج وئریر کل اوغلان جان؟ بئینینی ایشه سال. سندن بیر سؤز سوروشورام، دو٘ز جواب وئر. دئ گؤروم آداملار ایشلمسه‌لر، کرخانا نه‌جور اولار؟ جاواب: ایشدن دو٘شر. سورغو: اوندا کرخانالارین گئنه قازانجی اولار؟ جاواب: البتده کی یوخ. سونوج: اوندا کل اوغلان جان، بو سورغو جاوابدان بئله سونوج آلیریق کی ایشچی‌لر ایشله‌ییر، گلیرین هامیسینی حاجی گؤتورور. ساده‌جه بیر آزین اولارا وئریر. ایندی کی حاجینین واری اؤزونونکو دئییل، منه حلالدی.
کل اوغلان راحاتلیقلا حاجینین ائوینه گیردی. ایشله‌ینلرین نئچه‌سی ائشیک حیطده گئت گل ده‌ ایدیلر. کل اوغلان آرالاریندان کئچدی، کیمسه بیلمه‌دی. ایچری حیطده حاجی‌علی آروادلارینین نئچه‌سی له، حووض باشیندا اوتورموش، آخشام یئمه‌یی یئییردی. بال قئیماق، بوروشته چورک له چای ایچیردیلر. کل اوغلانین آغزی سولاندی. قاباغا کئچیب، یئکه بیر تیکه گؤتوردو. حاجی علی باخا باخا گؤردو بال قئیماغین یاریسی یوخدو. باشلادی دوعا اوخوماغا، بسم‌الله دئییب تسبیح چئویرمه‌یه. کل اوغلان چایی حاجی علی نین قاباغیندان گؤتوروب ایچدی. بو دؤنه حاجی علی له آروادلار قورخوب چیغیردیلار. هر شئیی قویوب اتاقلارا قاچدیلار. کل اوغلان بال قئیماغین هامیسینی یئییب، نئچه چای دا او٘ستوندن ایچیب، اتاقلارا باخماغا گئتدی.
آردی وار...

https://t.me/Adabiyyatsevanlar