ادبیات سئونلر

اوشاق ادبیاتی
جانلی لارلا مئهریبان اولاق

https://t.me/Adabiyyatsevanlar

241 viewsedited 03:51

488 viewsedited 04:02

اوشاق ادبیاتی

👩‍🦲قوشباز کل اوغلان
یازار:«صمد بهرنگی»
چئویرن:«منیژه جم‌نژاد»

🕐 کئچمیش زامانلاردا بیر کل اوغلان قوجا ننه‌سی له یاشایاردی. ائولرینین بالاجا بیر حیطی واریدی، بیرده توت آغاجی، کل اوغلانین قارا کئچیسی اونون آلتیندا یئییب، گوه‌له‌ییب، ساققالین ترپدیب، یئری دیرناقلاری‌له قازیب، ملردی. اتاقلاری رو٘به‌قبله ایدی، بالاجا بیر پنجره سی، آرادا بیر تندیر، اوستده بیر سککی، بیر باجادا تاواندا گویه ساری، توستودن، ایشیقدان، هاوادان زاتدان اوتری. پنجره‌یه شوشه یئرینه کاغاذ یاپیشدیرمیشدیلار. دووارلار سوواخدان، دووره‌سی ده تاقچایلا رف ایدیر. کل اوغلان سحرلر چؤله گئدردی، تیکاندان اوتدان دریب، توپالاییب، ائوه گتیریب بیرآزین کئچیه وئریر، قالانین دامدا قالاردی، قیشدا ساتسین یا دا کئچیسینه وئرسین دئیه. گون اورتادان سونرا دا قوش اوچورداردی. ائیی بیر قوشبازیدی. اون _ اون‌بئش قوشو واریدی. فیشقا دا گوزل چالاردی. قوجا آرواد سحردن آخشاما جهره‌سینین دالیندا اوتوروب یو٘ن اییرردی. آنا اوغول خرجلرین بئله چیخاراردیلار. پادشاهین ائوی بولارین ائوینین قارشیسیندایدی. چوخ گوزل بیر سارای ایدی، باخانین هوشو باشیندان چیخاردی. پادشاهین قیزی کل اوغلانا وورولموشدو. کل اوغلان داملاریندا قوش اوچورداندا قیزدا باخیجی، کلفت لریله ائیوانا گلیب کل اوغلانین قوش اوچورتماسینا باخیب فیشقا چالماسینا قولاق آساردی. هردن‌ده قاش گوزویله کل اوغلانا بیر سوزلر دئیردی. کل اوغلان ایسه سایمازدی. قیزی گؤرمزدن گلردی. حال بوکی کل اوغلان دا آمانسیزجا پادشاهین قیزینا کؤنول وئرمیشدی. قیزین بیلمه‌سینی ده ایسته‌میردی. بونو بیلیردی کی پادشاه هئچ واخت قیزینی، وار یوخو بیر کئچی، اون - اون‌بئش قوش بیرده قوجا ننه‌سی اولان کل اوغلانا وئرمز. وئریرسه‌ده پادشاهین قیزی اونلارین توستولو هیسلی ائوجیکلرینده دایانیب قالا بیلمز.
پادشاهین قیزی نه ائدیب کل اوغلانی دانیشدیرا بیلمیردی. بیرگون بیر قویون اوره‌یینی دلیک دلیک ائدیب، پنجره‌سینین قاباغینا آسدی، کل اوغلان سا او٘زونه گتیرمه‌دی. تیکان کول‌لارینین دیبینده قوشلارین اوچوردور، فیشقا چالیر، ننه‌سینین جهره‌سینین سسینه قولاغ آسیردی.
سونوندا پادشاهین قیزی ناخوشلاییب دو٘شدو. دا ائیوانا گلمیر، پنجره‌دن کل اوغلانا باخمیردی. پادشاه بوتون حکیملری قیزینین باشینا گتیردی. هئچ بیری اونو توختادانمادی. بوتون ناغیل دئینلر بئله یئرلرده دئیللر " پادشاهین قیزی اوره‌یینین سیررینی کیمسه‌یه آچمادی". قورخودان یادا اوتانجدان، حیادان. من ایسه پادشاهین قیزی اوره‌یینین سیررینی پادشاها آچدی، دئییرم. پادشاه قیزینین کل اوغلانا وورولدوغونو ائشیدنده سینیرلنیب، چیغیردی: بیرده بو پاساناغین آدینی دیلینه گتیرسن، شهردن قوغارام سنی. آدام قیتلیغی‌ایدی بو پاساناغا وورولموسان؟ سنی وزیرین اوغلونا وئره‌جه‌یم. والسلام. قیز دینمه‌دی. پادشاه گئدیب تختده اوتوروب وزیری چاغیریب دئدی: وزیر! ائله بوگون گرک کل اوغلانین قوشلارینین باشینی کسیب اونون داما چیخماسینی یاساقلایاسان! وزیر نئچه ایدمانچی نوکرلریندن کل اوغلانین ائوینه یوللادی. کل اوغلان دونیادان خبرسیز قوشلارینا دن وئریردی، ایدمانچی نوکرلر ائوینه توکولوب، گؤز قیرپیمیندا قوشلارینین باشینی کسیب، کل اوغلانی کتک آلتینا سالیب، هر یئرینی شیریم شهره ائدیب قاییتدیلار. قوجا آروادین جهره‌سینین بیر چرخینی ده سیندیریب، پنجره لرین تامام کاغاذلارین دا جیریب، قاییتدیلار. کل اوغلان تام بیر هفته ترپشنمه‌دی. ائوجیکلرینده یاتمیش زارییردی. قوجا آرواد دا یارالارینا مرهم قویوب، قارغیش ائدیردی.
هفته باشی کل اوغلان گلیب توت آغاجینین آلتیندا اوتوردو بیر آز هاوا یئسین، اوره‌یی آچیلسین دئیه. دوشونوردو قوشلارینی هاردا قویلاسین، باشینین اوستونده بیر سس ائشیتدی. باخیب گوردو ایکی گؤیرچین توت آغاجینا قونوب دانیشیرلار. گؤیرچینلرین بیری دئدی: باجی جان، سن بو اوغلانی تانیرسان؟ اوبیری دئدی: یوخ باجی جان. بیرینجی دئدی: بو هامان اوغلاندی کی پادشاهین قیزی سئوگیسیندن خسته‌له‌نیب دو٘شوب، پادشاه دا وزیرینه امر ائدیب، وزیر ده نوکرلرین گوندریب اونون قوشلارینی اؤلدوروب، اؤزونو ده دؤیوب بوگونه قویوبلار. ایندی ده اوغلان قوشلارینین هاردا قویلاماسینی دو٘شونور.
آردی وار...

https://t.me/Adabiyyatsevanlar