ادبیات سئونلر

اوشاق ادبیاتی
🍑 بیر هولی، مین هولی
یازار:«صمد بهرنگی»
چئویرن:« منیژه جم‌نژاد»

🕔 صاحابعلی منی طؤوله‌یه آپاریب، بیر گوشه ده پئیین‌لرین ایچینده قویلادی. قارانلیق لا پئیینین آجی قوخوسوندان باشقا بیر شئی بیلمدیم. نئچه ساعات اوردا اولدوغومو دا بیلمیرم. پئیینین ایتی ایییندن آز قالا خفه‌لنیردیم. سونوندا پئیینلرین اوستومدن گؤتورولمه‌سینی دویدوم. صاحابعلی ایدی. منی چیخاریب، بیرایکی یول اللرینده اؤوکه‌لییب، شالوارینا چکدی؛ تمیزله‌نیم دئیه. گلدیییمیز یولدان قاییدیب پولاد گیلین ائوینین دامینا یئتیشدیک. پولادین آناسی‌له باجیسی یاپما یاپیر، قونشونون خانیمی‌‌له دانیشیردیلار، او دا قوروموش یاپمالاری دوواردان قوپاریب اوست اوسته قالاییردی. صاحابعلی پولادین آناسیندان اونون هاردا اولدوغونو سوروشدو. پولادین آناسی دئدی: پولاد کئچینی چؤله چیخاریب، ائوده دئییل. پولادی تپه‌نین باشیندا تاپدیق. قارا کئچی‌نی تپه‌نین دالینا بوراخمیش، اؤزو ده ایتی‌‌ ایله بیزی گوزله‌ییردی. من بیردن پولاد لا صاحابعلینین دریسی دوز منیم قابیغیم رنگده‌ اولدوغونو سئزدیم. بس کی ایکیسی ده لوتو پوت گون قاباغیندا دولانمیش، قاپ قارا قارالمیشدیلار. پولاد صبیرسیزلیکله دئدی: یاخچی، نقشه نی دئ. صاحابعلی دئدی: ایستیرسن بیر هولو آغاجین اولسون؟ پولاد دئدی: دلی‌ام میر ایسته‌مه‌یم! صاحابعلی دئدی: ائله‌ده گئده‌ک. پولاد دئدی: کئچینی نه ائده‌ک؟ صاحابعلی دئدی: ائوه بوراخاریق. پولاد دئدی: آنام دئییب گون باتمادان اونو قایتارمیام. صاحابعلی دئدی: اوندا ایتی کئچینین یانیندا قویاریق. پولاد الینی ایتین باش قولاغینا چکیب دئدی: من گلینجن کئچیه گٔوز اول، یاخچی؟ اوچوموز قاچا - قاچا گئدیب باغین دووارینا یئتیشدیک. صاحابعلی دئدی: آتیل اوسته. پولاد دئدی: نقشه‌نی گیزلتمه‌یه گرک یوخدو. اؤزوم بیلدیم. هولوموزون چرده‌یینی اکمک ایسته ییریک. صاحابعلی دئدی: ائله دی. چرده‌ییمیزی باغین دیبینده تورپاق قالاغینین دالیسیندا اکه‌ریک. نئچه ایل دن سونرا اؤزوموزون هولو آغاجیمیز اولار. نیه آیری یئرده اکمه‌دییمیزی اؤزون بیلیرسن. پولاد دئدی: تپه باشیندا، داشلارین ایچینده کی هولی بیتمز، آغاج سو ایستر، یوموشاق تورپاق ایستر. صاحابعلی دئدی: داها ماللا کیمی مرثیه دئمه کی، من چیخیرام او٘سته گورم باغوان قاییتماییب. باغوان حله شهردن قاییتمامیشدی. پولاد لا صاحابعلی باغین خلوت بیر گوشه‌سینده، تورپاق قالاغینین دالیسیندا، یئری قازیب منی قویلادیلار، او٘ستومه ده بیر ال چکیب قویوب گئتدیلر. قارانلیق، سویوق تورپاق منی قوجاقلاییب سیخیب، گووده‌مه یاپیشدی. البتده من هله گویرنمزدیم. گویرمک اوچون گوجلنمک، بیرآز چکردی. سویوق، تورپاغین آلتینا کئچدیینه گوره، قیشین گلمه‌سینی، قار تورپاغین او٘ستونو توتماسینی آنلادیم. تورپاق منه بیر قاریش قالاناجان دوندو. آما تورپاغین آلتی ائله ایستی ایدی کی من اوشویوب دونمازدیم. بئله سینه من ایندیلیک ترپنیش دن دوشوب تورپاغین آلتیندا شیرین یوخلادیم. یاتیردیم کی باهاردا سازلانیب، داها گوجلو اویانیب، گویرم؛ تورپاقدان چیخیب پولاد لا صاحابعلیه بول مئیوه‌لی آغاج اولام. ایری، سولو، گوزل، اوتانقاج قیزلار کیمی قیرمیزی یاناقلی هولو آغاجی. قیشدا گوردویوم یوخولاردان بیر شئی یادیما گلمیر آنجاق بیر یول یوخودا گوردوم بویوک بیر آغاج اولموشام، پولاد لا صاحابعلی منه دیرماشیب بوداقلاریمی سیلکه‌له‌ییرلر، کندین بوتون لوت اوشاقلاری ییغیشیب منیم هولولاریمی گویده قاپیر، لذت‌له یئییرلر؛ آغیزلارینین سویو آخیر، لوت گؤیسلری، قارینلاری، گؤبک لری ایسلانیر. کچل بیر اوشاق هئی پولادی سسله‌ییب دئییردی: پولاد، بو یئدیییمیزین آدینی دئمه دین؟ آخی من ایستیرم ائوه قاییداندا بویوک ننه‌مه نه یئدییمی دئیه‌م. چوخ دا یئدیم، ائله لذت‌لییدی کی هله ده دویمامیشام. حاضیرام گئنه ده یئیه‌م. باغلاشیرام گئنه دویمایاجاغام. ایکی بالاجا اوشاقدا واریدی کی اَیینلرینده پالتار یوخویدو. آغیز بورونلارینین دؤره‌سینه ده چوخلو میلچک قونموشدو. اوشاقلارین هره‌سینین الینده ایری بیر هولو واریدی، لذت‌له دیشله‌ییب به‌به دئییردیلر. بو منیم یوخولاریمین بیری ایدی. سون گز بادام گولونو یوخودا گوردوم. ناخوش بایقین دوشموشدوم، بیردن یوموشاق بیر سس قووزاندی، ائله دویدوم کی سسله بیرلیکده چوخلو تانیش قوخولار تورپاغین آلتینا گیردی. سس دئدی: بادام گولو، قاباغا گل، قوخونو گوزل هولونون او٘زونه وور. گئنه اویانماسا الینی او٘زونه، گؤده‌سینه چک، قوی گولون قوخوسونو یاخچی آلسین. قیساجا، اونو تئز اویات، گؤیریب تومورجوقلانما واختی دیر. چردک‌لرین هامیسی اویانیرلار...
آردی وار

https://t.me/Adabiyyatsevanlar