ادبیات سئونلر

«حسن رحمانی»

قارلـــــــــــــــــــــــــــــــــــــــــــــــــــی آینا

گؤزونو پنجره دن چک ، او گئدن گلمه یه جک
او دومانلاردا ایتیب ، چنلی چؤله چنگ آتاجاق
تئزی گئجله قاتاجاق
موتلو، موتسوز یاتاجاق
گؤوده سین سیبریه دوغرو چئوریب
لوت چولون حسرت چکه جک
قیشی قارقیش ساناجاق
منیم آدیم دوداغیندا دوناجاق
اؤز آدین زحمت ایله اودقوناجاق
من ده بوردا ( اوشودوم ها اوشودوم
داغدان آلما داشیدیم)
...
بللی اولماز کیم اکیب کیم دره جک
کیمی جاندان گئچه جک ، کیمسه کیمه جان سره جک
گؤزونو پنجره دن چک ، او گئدن گلمه یه جک
یا دئمیش داش گله جک
بوشلا گئدسین داشا داشلیق یاراشار
آز قوجاخلا ایکی اللی دیزینی
آز سوروش هر یارامازدان ، داش اوره کلر ایزینی
ائله بیل سنده چاشیرسان قاداسی
هانی شیروان جاداسی؟
هانی گل گئت ؟
هانکی یول؟
باشی داشلی نه خومار گؤز
هانکی کؤز؟
هانکی اوجاق؟
ایکینیزدن بیر اووج کول قالاجاق
عالیم عالملره یایمیشدیر اونو
بوشلا گئدسین هم اونوهمده مزار بویدا دونو
ناغیلین یوخدو سونو
شورو چیخدی بو میراث مرثیه نین
شورسنین کسمه شیکسته آتانین
آنا جان بیر بایاتی چک یازیرام
(عزیزیم مرنده گل
گوللری درنده گل
بیر گلدین خسته گوردون
بیرده جان وئرنده گل)
گل دئمک یوردو قاراتدی قانیمی
نه اولار، گل ان آزی آل جانیمی
قوی دئسینلر، بو یورولموش بو گئجه دینجه لئجک
گؤزونو پنجره دن چک ، او گئدن گلمه یه جک
او ایتب باتدی ناغئیل بوغدو اونو
اوتن ایللرده نئچه دونلو نازیم
یاد اولان یار جیغازیم
ایندی اونسوز داها قارقیشدی یازیم
ایندی گؤز یاشلاریمی ایلا یاریشیر خان آرازیم
آخ اونوندا ایتیریب بوغماق ایشینده الی وار
سن ده ایت بات ، بو ناغیلاردا عاغیلسیز آیازییم
عاغلیوا شعر یازیم
پنجره اسگی زمانلاردا ایشین سنله گؤروب
آلدادیر ایندیسه آیدینجا سنی
منجه او دوغرو یاناشمیر سنی ایله
دون - قاییت - تاخجاداکی گوزگویه باخ ، تاپ دوزونو
بیر داها گؤر اوزونو
گؤر به بک سیز گؤزونو
گؤر نه قارلار یاغیب ایللر باشینا
زمانین ظولمونو گؤر
گؤر نه خنجر چکیب او اوز گؤزونه
بیر قولاخ وئرسؤزونه
اللرین آوکالئیب ، آلت دوداغین چئینه یه جک
اما بیرگرچگی محکم دئییجک
گؤزونو پنجره دن چک ، او گئدن گلمه یه جک

https://t.me/Adabiyyatsevanlar