ادبیات سئونلر

اوشاق ادبیاتی

«سحر_خیاوی»
سوخولجان(یئنی یئتمه‌لر اوچون)

اؤز گومانینا دونیانین ان کئفلی گونلرینی یاشاییردی. قاپ-قارا ماغاراسینا گونش ایشیقی دوشمه‌سین دئیه بوتون جیغیرلاری اسگی ایله، کاغیذلا، الینه گله‌ن هر شئی ایله برکیتمیشدی. آخی او ایشیقی سئومیردی.
دووارلارا هوپان روطوبتدن، نَمیش تورپاق اییسی باش چاتلادیردی.بؤجک‌لر، قارا قوردلار یووانین ایچینده جولان گئدیردیلر. هردن یوواسیندان ساللانا- ساللانا چیخیب، دووار دیبی آلا، هئچ بیر کسله سالاملاشمادان شیکارا گئدیردی. بیر نئچه آوارا قاریشقادان، میلچکدن تورا سالیب، ماغاراسینا گتیریردی. ان بویوک تفرئحی قارنی اوستونده اوزانیب خیریم- خیریم شیکارلاریندان یئییب، اوستدن گَییریب، آلتدان توستوله‌مک ایدی.
یوخ. ائله فیکر ائله‌مه‌یین. او بو ماغارادا چوخ دا یالقیز دئییلدی. فیکرینیز ائولنمه‌یه گئتمه‌سین، چونکو بیزیم بو سوخولجان آروادی باشین بلاسی بیلیردی و جانینا، مالینا اود ووران شریک.
اونون یولداشی بیرجه اوغلو ایدی. بو اوغلان بس هایاندان گلمیشدی؟ بیر گون سوخولجان اؤزونو ایکی یه بؤلوب بو اوغلانی اؤز بدنیندن آییریب، یاراتمیشدی.
اونو دا اؤزونه تای ائتمک ایسته‌ییردی. آخی یاراماز اؤزونو چوخ بیه‌نیردی.
-آتا پنجره‌نی آچ گؤره‌ک ائشیکده نه وار؟
آمما سوخولجانین قولاغینا بو سؤزلر کئچمیردی.
گونَشین شعاعلارینین نه قَدَر بدنه ضررلی اولدوغوندان دانیشیردی. قوشلارا دا سفئه و کلله دَبَنَک وارلیقلار، آخشاماجا بوش یئره اوردان-اورا، بوردان-بورا اوچوشوب جوککولده‌ین دئییردی.
قوشلاری اوولانمیش گوردوکده اوره‌کدن سئوینیب شاققا چکیب گولوردو:
"ائله گویده گزمه‌یین جزاسی بودور دا. نئجه یاشاماغی مندن اویره‌نین"-دئییردی.
-آتا بیر گون منی ده بو یووادان ائشیگه آپار گؤروم آخی بیزیم بو نَمیش دووارلارین آرخاسیندا نمنه وار؟!
- هئچ نمنه یوخدو جان قاداسی. هئچ نمنه. بیر تیکه تاپدیغیمیزی یئه شوکور ائله. باشقا هئچ نمنه اؤنملی دئییل.
یازیق اوشاق بو سؤزلری ائشیدن خوره‌کینی یئییب آخشاماجا قارانلیق ماغارالاریندا قارنی اوسته اورا- بورا سورونوب دام- دیوارا باخیردی.
گونلر هئچ بیر دییشیکسیز بئله‌سینه سووشوردو.
بیر گون آتا سوخولجان یئنه خوره‌ک تاپماق اوچون ساللانا- ساللانا یووادان چیخدی. دووار دیبی سییه- سییه، سانکی اوغرولوغا گئدن کیمی گئدیردی. آمما چوخ گؤزله‌سه ده، قضا گلدی، بیر آغیر باشماقلی آدامین پوتونو آلتیندا قالدی و یئره یاخیلدی.
بالاجا سوخولجان اونو چوخ گوزله‌دی. آخشام دا آج یاتدی.
صاباح آتاسی گلمه‌دیکده بیلدی نه ایسه باشیندا بیر ایش وار.
بالاجا اوره‌یی توتولدو. کؤوره‌لدی. اوره‌یی اریییب داملا-داملا گؤزوندن آخدی. آمما سونرا اؤزونه دایاناتلی اولماغیم گره‌کیر دئدی. گؤزلرینین یاشینی سیلیب،
گون اورتایا یاخین دیوارا سوزولوب پرده‌نی قالدیردی. آل گونش ایستی شعاعلاریلا یووانین ایچینه دوشدو. پنجره‌نی آچدی.
وااا...ی نه گؤزل، نه بؤیوک دونیا واریمیش!! هله گؤر بو دیوارلارین آرخاسیندا نه‌لر وار!!
من نه دن ایندییه‌جک بو گؤزللیک‌لر‌دن محروم قالمیشام؟!
آخشام یاغان یاغیشدان آغاجلارین یارپاغی تیتره‌شیب، گونون ایشیقی آلتیندا آلخی- بالخی ووروردولار. آللی- گوللو کپنک‌لر پاریلدایان داملالاردان ایچیردیلر. سئرچه‌لر سئوینجک اویان- بویانا اوچوشوردولار.
رنگ به رنگ گوللرین عطیری پنجره دن ایچری جوموردو.
هله هر نمنه‌دن گؤزل، فاطما ننه ایش اوزاتمیشدی. یئددی بویالی اولان گؤی قورشاغی، تزه گلین‌لرین جئهیز خالچاسی کیمی ماوی گؤیون اورتاسینا سریلمیشدی.
بالاجا سوخولجانین گؤزلری بو گوزللیک‌لردن دؤرد اولموشدو. اوره‌یی گوپ-گوپ گوپبولده‌ییردی.
او گون آخشاماجا پنجره‌نی آچیق قویدو.
گونش ایستی‌سینی اسیرگمه‌دن ایچری شاخییب دیوارلاری قوروتدو. نمیش و پیس قوخو یووادان چکیلدی. حیطه چیخیب بیر یئکه دسته گؤزل-گؤیچک گوللردن باغلاییب، گتیریب گولدانا قویدو.
آچیشقانین هئره‌سینه سئرچه‌لر اونا قوناق گلسین دئیه، دَن تؤکدو.
بالاجا سوخولجان گونشه و بوتون دوغال گوزللیک‌لره سؤز وئردی آتاسی کیمی یاشاماسین.
او ان گؤزل یاشاماغا فیکیرلشیردی.

https://t.me/Adabiyyatsevanlar