ادبیات سئونلر

اوشاق ادبیاتی
چئویریب حاضیرلایان:«ویدا حشمتی»

منیم قهرمانیم سنسن
ایکینجی بؤلوم

سارا سوروشدو:
-سن نه‌جور بیر یارادیق‌سان؟
او جواب وئردی:
- منیم آدیم "آریو" دو .
سارا دئدی:
-من آریو آدیندا بیر یارادیق تانیمیرام.
آریو جواب وئردی:
-من همیشه بورادایام، سنین قلبینده.
سارا دیدی:
-یانی ایندی کی سن منیم‌‌له‌سن، دونیانین اوشاقلاری‌لا کرونا ویروسو قونوسودا دانیشا بیله‌جه‌یم؟ من قهرمان اولاجاغام؟ بیراز صبر ائله گؤروم! کرونا ویروسونون اولدوغو حالدا، بیز یولچولوق(مسافرت) ائده بیله‌ریک؟

آریو دئدی:
-منیم یانیمدا اولسان، اولار. بیز بیرلیکده اولساق، هئچ بیر شئی سنه توخونا بیلمز سارا!
سونرا آریونون آرخاسیندا اوتوروب، اوتاغین پنجره‌سیندن چیخیب، قارانلیق گؤیده اوچماغا باشلادیلار. اونلار اولدوزلارا ساری گئدیب، آیا سلام وئردیلر.
گونش چیخدی. سارایلا آریو گؤزل بیر چؤللوکده «اهرام»ین قیراغیندا ائندیلر. اورادا نئچه اوشاق اویناماغا مشغول ایدیلر. اوشاقلار سئوینجک سارا گیله ال ساللادیلار( ترپه‌تدیلر).

اوغلانلارین بیری اوجا سسله دئدی:
-خوش گلیبسیز. منیم آدیم «سلیم‌»دیر. سیز بوردا نه ایش گؤرورسوز؟ باغیشلایین سیزه یاخین گله بیلمیرم، گرک سیزدن بیر مئتر آرالی دورام.

سارا جواب وئردی:
-منیم آدیم سارا دیر، بونون دا آدی آریو. هیچ بیلیردیز؟ اوشاقلار، ائله‌یه بیلرلر یولداشلارینین، آتا-آنالارینین، بؤیوک آتا-آنالارینین، قونشولارینین، خسته‌لییی‌نین قاباغین آلسینلار؟ بیز هامیمیز گرک...

سلیم گولر اوزله دئدی:
- بیلیرم. گرک مرتب اللریمیزی سو و صابونلا یویاق، خسته‌ اولدوغوموزدا، آسقیراندا و اؤسگوره‌نده، آغزیمیزی دیرسه‌ییمیزله توتاق. ال وئرمک یئرینه، اوزاقدان ال ساللایاق. باجاردیقجا ائوده قالاق. اما بیز بؤیوک بیر شهرده یاشاییریق. هامی ائوده قالماییر.

آریو دئدی:
- بلکه من سیزه یاردیم ائده بیلدیم. آداملار ویروسو گؤره بیلمیرلر، آما منی گؤره بیلرلر. ایندی ایکینیز ده قانادلاریما چیخین. لطفا هره‌نیز بیر قانادیمدا اوتورون.
اونلار آزیندان بیر مئتر آرالی‌ اوتوردولار.

آریو سارا و سلیمی قانادلازینا آلیب، گؤی اوزونه ساری اوچدو. اونلار شهرین اوستوندن اوچوردولار. آریو گورولداییب، آواز اوخویوردو‌.

سلیم خییاوانداکی اوشاقلاری هارالاییب، دئدی:
-آی اوشاقلار! گئدین آتا-آنالاریزا دئیین، ائولریز داها گووه‌نلی‌(امنیت)دیر. هامی ائوده قالماق‌لا، عاییله‌سینی داها یاخشی قورویا(محافظت) بیلر.

آداملار گؤردوکلری شئیدن چاشمیش‌دیلار‌. ال ساللاییب، ائوده قالماغی قبول ائتدیلر.

آریو گؤیه ساری اوچدو. سلیم سئویندیگیندن باغیریردی. بولودلارین اوزه‌رینده اوچارکن، بیر اوچاق اونلارین یانیندان کئچدی. یولچولار اوچاغین پنجره‌سیندن بونلاری گؤروب، تعجب‌له باخدیلار.

سلیم دئدی:
-آداملار بوندان سونرا گرک یولچولوغا (مسافرته) چیخماسینلار. ایندی یولچولوق (سفر ) ائتمه‌یین تهلوکه‌سی چوخدور. بوتون اؤلکه‌لرین سرحدلری(مرزلری) باغلانیر. هر کس اولدوغو یئرده عزیزلری ایله بیرلیکده قالمالی‌دیر.

سارا دئدی: ائله‌بیل چوخ شئی‌لر دییشیلیبدی. بو منی قورخودور.

آریو جواب وئردی:
- بیر شئی دییشیلن زامان آدامی قورخودار. من قورخاندا آستا نفس چکیرم، آغزیمدان اوت چیخیر.

بیر اوت توپو آریونون آغزیندان چیخدی.

آریو سارا و سلیم‌دن سوروشدو:
-سیز قورخاندا نه ائدرسیز؟

آردی وار
https://t.me/Adabiyyatsevanlar