«یحیی شیدا»

گلمز يئره آرخام  كي ائليمدن داياغيم وار

داغ تك دورارام  هرنه آغير دل ده  داغيم وار

داغلاردان ئوز ايلهاميمي آللام ياشاديقجا

بير كوهنه چينارم كي  اوزون قول-بوداغيم وار

تاريخ بويو  ائللرده آديم سسله نه جكدير

تا شانلي ائليم   نازلي ديليم   شن تيفاغيم وار

هر بيراثريم  هرديله ييم  فيكروخياليم

ائل دن دئيه جك تاكي ديليم وار  دوداغيم وار

يول آزماميشام  آزمارام عالمده بيليرسن

اوءتگم آنا بير ديل كيمي نورلو ماياغيم وار

ائل قايغي سيني من چكرم جانيما منت

چون دويغولو  هرسينه ده  سوءنمز اوجاغيم وار

ائلدن گوج آليب  سئللره فرمان سوره رم من

سئللر-سولار آتلانسادا  ائل تك داياغيم وار

ياخشي تانيرام ساغ-سولومو  ائللر ايچينده

مكتبده توتاق كيم   نه سولوم وار نه ساغيم وار

فرعون زماني چكه رم  نيل هلاكه

موسي كيم  دوشمان قوغان  الده چوماغيم وار

يوردوم چمنين پاك ائده رم  هرزه علف دن

الده قلم تك  ايتي-كسگين اوراغيم وار

سئيرانه چيخاندا   بو يانار سينه مه بير باخ

باشدان باشا گوءر: لاله لي سونبوللو باغيم وار

فيكر ائيله مه بابك لر اوءلوب  بيرده ديريلمز

مين لرجه بوگون  اوءلكه ده  بابك  سوراغيم وار

آز سوءيله : حقيقت اولاني قانما ! دوشونمه !

داري دوءشورن  حقي  سئچن بير قولاغيم وار

شيدا  مني مين رنگه بوياندير مادي دوءران

هر دوءرده ده اولسامدا  همان بير بوياغيم وار

 
https://t.me/Adabiyyatsevanlar

«حمیدسخامهر»

گـــــئجه گؤردوم يوخودا شهر چراغــــــان اولدو

                              گـــــــؤردوگوم يــــــــئر،نظريمده يئكه ميدان اولدو

گؤرمــــــه ميشديم من او ميداني باخيرديم،بيردن

                              آنامـــــــــين قامــــــتي ميــــــــداندا نمايـــــان اولدو

نئــــچه ايلدن سورا گؤرسندي، ايشقلاندي گؤزوم

                              يــــــئتيشيب روحــــــو، منيم روحوما مهمان اولدو

آنامـــــــــين روحـــــــو منيم روحومولا بيرلشدي

                              ائــــــله بيل بير دانــــــــا جسميمده ايكي جان اولدو

چوخ سئوينديم اونو گوردوم اوره گيم چــيرپيندي

                              والـــــــه اولـــدوم، اودا گؤرچك مني  شادان اولدو

دئـــــــديم اي گـــؤزلريمين نورو آنا! هاردايدين؟

                             غــــــم هــــــــــجرينده اينان كي اوره گيم قان اولدو

اونـــدا كي سن واريـــــدين آنلاماديم قدريوي من

                              ســــــن گئـــــــده نــــدن سورا دنيا منه زندان اولدو

ده گـــؤروم توختـاميسان، ايندي يئرين راحتدير؟

                              دوداغــــــي قاچـــــدي باشين توولادي خندان اولدو

گــــؤزلريـن تيكدي منـــــــه حســـرتيله آه چكيب

                              پـوزولـــــوب حالــــــــــــي قهرلندي، پريشان اولدو

دئــــــــدي: من راحــــــــتم! آمما نــگرانم سنده ن

                              ســــــؤزو آغـــزيندا ،دولوب گؤزلري گيريان اولدو

آغـــــلايا - آغــــــلايا  دؤنــــدو ابــــــديت يولونا

                             يـــــولا دوشــــــــــدو او قدر گئتدي كي پنهان اولدو

قــــيشقرانـــدا: آنـــــا گئتمـــه مني يالقيز قويـــما!

                             هـــــاراييمدان،يــــــوخودان جمـــله هـــراسان اولدو

آييلاندان سورا گؤردوم كي گئديب يوخــدور آنام

                              وصل رؤويـــــاسي قوتولـــــدو يئنه هــــــجران الدو

قبر ائـــــوينده اؤلـــــــولرده نــگران دير بيزده ن

                              فلــــــــكين چــرخي چونوب گؤر نئجه دوران اولدو

منــــي دؤنياده هئچ آرواد سئوه بيلمز آنــــــا تك

                              بيـــــر دانايـــــدي آنــــام، افســوس اودا بيجان اولدو

يادينا جمـــــــــعه گؤنـــو دوشدو«سخا»نين آناسي

                             بـــــاشلاييب بو غـــــــــــزلي يازدي غزلخوان اولدو


https://t.me/Adabiyyatsevanlar

ایندی
سعید مغمومی – چئویرن: مسعود آذر

منیم نه‌ییم بیر آغاجدان اسگیک‌دیر کی
بو سئرچه‌لرین بیریسی ده چیینیمده اوتوروب،
یووا سالمیر.
منیم نه‌ییم بیر داغدان،
بیر آرانلیقدان،
بیر اورماندان اسگیک‌دیر کی
باشیم اوسته بولودلار دایانیب،
یاغمیر.
بلکه ایسلانام،
پالتارلاریم
یاپیشا جانیما.
بلکه بیر آلووون آردینجا
گلیب سیغینام گؤزلرینه
قایناق:ایشیق

https://t.me/Adabiyyatsevanlar

«حسین رزمی»

ائی گئجه یاریسی باغیران سوکوت
ائله سپ یاراما دوز اینجیمه سین
ائله گل ، ائله گئت اودلو سینمدن
دوداق کؤزه رنده ، سؤز اينجيمه سين.

*

ائله یاخ قارانی ، آغ دؤزه بيلسين
ائله باخ باغمانا ، باغ دؤزه بيلسين
ائله چک داغلاری ، داغ دؤزه بيلسين
ائله کئچ دره دن ، دوز اینجیمه سین.

*

دورما گل بیزیم له، شعرین دالین گل
بوراخ آییق لارین قالماقالین، گل
گلنده شعریمه آیاق - یالین گل
ائله آیاق گؤتور ايز اينحيمه سين.

*

بيز داردان گونه شه یوللار چکمیشیک
آنجاق چاخیر بیلیر نه لر چکمیشیک
دانیلیب - دانیلیب گئرچک لشمیشیک
ائله ایته ریک کی توز اینجیمه سین.

*

تانری بیزدن سونرا بورایا چاتدی
بیزدن ایلهام آلیب بیزی یاراتدی
سونرا اؤزون بيزله درد ايچره آتدی
دئدی: شاعیر گرک آز اینجیمه سین.

https://t.me/Adabiyyatsevanlar

✅✅✅سایین کانالداشلار
یکشنبه گونو: 99/10/21
ساعات : 21
ادبیات سئونلر کانالیندا ائتیمولوژی درسلیک لری اولاجاق .
اوزمان : دوکتور ارشد نظری

https://t.me/Adabiyyatsevanlar

دلبر

‏https://t.me/Adabiyyatsevanlar

«ویدا حشمتی»

بولاق اوتولارین دوم-دورو اینانجی
اللری‌نین دادین وئریر سئوگیم
یوللادیغین اؤپوشلرین اوچاغی
هله اوتورماییب تامارزی لیمانیمدا
ننه‌مین گؤزلری کؤهنه خالچادیر
آتامین ماهنیلاری ساری قوران
بوراسی آوروپا دییل
من ایسه
هئیوا کؤلگه‌لی عصریمیزین پاییز قارانقوشو.
زیروه‌مده یاللی گئدن سرخوش تانریملا
دان یئرینده پییانلاشدیم
سؤیود کؤلگه‌سینین مزه‌سی ایله
کونده‌لن کوره‌میزین ائمپئرییاللی هده‌لری
وئجیمه ده دییل
نه‌یی الدن وئره‌جم به‌یه!؟
سئویرم اللریمی کی
لکه‌سیز چینارلیغیمی
آلچاق تیکانلارا ساغلیق وئرمه‌دی...



https://t.me/Adabiyyatsevanlar

اوشاق ادبیاتینین سئویملی امک داشی سرکار خانیم «محمودی»

کسب عنوان چهارمی از جشنواره ملی یه میراث معنوی لالایی ترکی را به شما وبه همه دوستداران ادبیات کودک تبریک می گوئیم.

ادبیات سئونلر.


https://t.me/Adabiyyatsevanlar

شعیر:«مریم_پاییزی»
سس:«بهروز_صدیق»


https://t.me/Adabiyyatsevanlar

یئنه دیلیمیز، ادبیاتیمیز

«همت_شهبازی»

بئله نظره گلیر کی بو گونکو دیلیمیزی قورویوب ساخلاماق یاواش-یاواش چتین‌لشیر. دیلیمیزین الینده، قوروما جیهازلاری (مثلن: #مدرسه، #مئدیا، #تلویزیا و...) اولمادان یاری جان حیاتا داوام ائدیر. بئله اولدوقدا #دیل اؤز کؤکونو، اؤز اوریژینال‌لیغینی ایتیریر؛ بو دا ادبی یارادیجیلیقدا تاثیر قویور. دیلیمیزین کلمه احتیاطلاریندان (ذخیره) اوزاقلاشان اوخوجوموز، ادبیاتیمیزین دا دیلینی باشا دوشمه‌یه‌جکدیر. داها دوغروسو، بو گون #ادبیاتیمیز بیر دیل یاشاییر، کوتله آراسیندا یاشانان دیل ایسه، باشقا بیر دیل حساب اولونور. بو سؤز، ائله آلینماسین کی عمومیتله بو ایکی دیل حقیقتن ایکی فرقلی یابانجی دیل ساییلیرلار. بو سؤزدن مقصد دیلیمیزده اولان گئدیشاتا اولتیماتوم وئرمکدیر.
دانیشیق دیلیمیز صنعی و ساختالاشیر. اونا گؤره کی هم قراماتیکاسی (نحوی) یادلاشیر هم یئرلی و دوغما سؤزلریمیز باشقا دیل‌لردن گلن سؤزلرله قاریشیر. بعضی‌لری بونو آل-وئر حساب ائدیرلر. منجه بونو او زامان آل-وئر حساب ائتمک اولار کی آلیش-وئریشده اولان ایکی دیل آراسیندا بوتون واریانت‌لار آربا و برابر، یعنی منیم دیلیمی تبلیغ ائدن مئدیا، یازی، اوخوجولوق، مکتب و ... آلیش-وئریش‌ ائتدییم دیلین جیهازلار ایله باشا باش اولسون. بیز بونون ترسینی گؤروروک.
بیر طرفین خئیرینه سونا چاتان دیلده اولان سؤز آلیش-وئریشی‌نین آدی یالنیز #قوماردیر. بو قومارین بیر اوجوندا اودان، بیر اوجوندا ایسه اودوزان واردیر. چونکی جیهازلاردا برابرسیزلیک حاکیمدیر. بس دیلیمیزه داخیل اولان یاد بیر دیلین کیملییی برابر دورومدا آلیش-وئریشه کئچه بیلر. عکس حالدا ایسه زیان گؤرن کیمسه، بو مسئله‌یه یئترینجه قایغی گؤسترمه‌ین طرف اولاجاقدیر.
بوردا ایسه صحبت بیزیم #آنا_دیلیمیزدن گئدیر. مسئله‌نین هر طرفینه یاناشدیقدا ان آزیندان دانیشیق و یا کوتله دیلیمیزده اودوزان طرف ده ائله بیزیک. قالیر ادبیات دیلیمیز. بو دا هر ایکی طرفدن قیسقیدادیر. یعنی بیر طرفدن باشقا دیل‌لرین هجوم گتیرمه‌سی، بیر طرفدن ده یوخاریدا دئدییم او دانیشیق دیلینی باشقا دیل‌لرین خئیرینه اودوزان واریانت، ادبیاتیمیزین دیلینی باشا دوشمه‌مکده سوچلاندیریر؛ بونون آردیندا ایسه ادبیاتیمیز اوخوجوسوز قالیر. ادبیاتچیلاریمیز، یالنیز بیر خاص ادبیاتچیلارلا دانیشیغا و دیالوگا کئچه بیلیر.
بو دورومدا نه #ادبیاتچی و نه #اوخوجو اؤز توتدوغو یولدان گئری چکیله بیلمیر. ادبیاتچی گئری چکیلدیکده اونون تکجه سیلاحی اولان دیلی‌نین آرادان گئتمه‌سی‌نین شاهیدی اولور. بونا گؤره ده اوغراشدیغی دیل، دوشونو‌لمز اولسا دا قورویوب ساخلاماسینا فیکیرلشیر. داها دوغروسو او، بو گونکو یازدیغی اثره گله‌جکده، تاریخی #دیلچیلیکده، موزئی‌لره باش ووران آرخئولوقلار (باستان‌شناس) گؤزوندن یاناشیر. بئله کی ان آزیندان بو دوشونجه‌ده‌دیر کی، بو گون اونون دیلینی باشا دوشمه‌سه‌لر ده، گله‌جکده اونون بو گونکو یازیب یاراتدیغی دیلدن بیر دیل اؤزه‌یی کیمی استفاده ائده بیلرلر.
ديل چئشيدلي موضوعلارلا ياناشي چئشيدلي سجييه قازانير. سياست، شعر، ادبيات، فلسفه، بيليم و گونده‌ليك ديل‌لرين هر بيريسي‌نين اؤزونه مخصوصلوغو وار. بو قونولار، اؤزونه مخصوص ديل‌لري بيربيريندن سئچيلير و اؤزو اوچون سجييه قازانير.
مدرن دونياميزين دايم حركتده اولماسي طلب ائدير كي اونو عكس ائتديرن صنعت ده حركتده اولسون. صنعت ده بو حركتي گؤسترن شئي، ديل و اونون اوزرينده ياراديلان صنعتكارليقلاردير. ديل آنلاييشلاري‌نين گئنيشلنمه‌سي نتیجه‌سینده صنعتكارين دا گؤروش‌لري گئنيشله‌نير.

#یئنه بو مسئله‌یه قاییداجاغیق....

قایناق: دوشرگه

https://t.me/Adabiyyatsevanlar

«شریف_مردی»

نئچه گون اؤنجه #همت_شهبازی « #یئنه_دیلیمیز، #ادبیاتیمیز» باشلیقلی یازی تلگرام کانالیندا یایدی؛ اوخویاجاغینیز یازی همن یازی‌یا قاییداراق بیرپارا گؤروشلر و نوتلار اؤنه سوردورَرک، سایین همت شهبازی اؤتورن سؤزو چؤزمک ایسته‌ییر.
آقای شهبازی اؤز یازیسیندا «بوگونکو دیلیمیزی» آماجلایان بیرنئچه سورونو چؤزوب آچاراق، «ادبیات‌چی» و «اوخوجو» آراسیندا یارانان چات‌دان سؤز آچیب، دیلیمیزین «قورویوب ساخلاماق»ینین «یاواش-یاواش» چتین‌لشمه‌یینی اورتایا قویماق ایسته‌ییر.
یازارا گؤره بیر طرفدن «دیلیمیزین الینده، قوروما جیهازلاری (مثلن: مدرسه، مئدیا، تلویزیا و...) اولمادان یاری جان حیاتا داوام ائدیر» دیگر طرفدن ایسه هر دیلین گلیشمه‌سینده و باشقا دیللرله تعامل‌دا نورمال پروسه اولان «آل-وئر» بیزیم دیله گلدیکده ایکی طرفین یارارلانان بوتون جیهازلار «آربا و برابر» اولمادیغیندان بو «آل-وئر» دئوریلَرک بیر «قومار» اولور؛ و طبیعی کی قومارین بیر یانی اوتماق اوبیر یانی ایسه اوتوزماق‌دیر. جناب شهبازی «بوگونکو دیلیمیزی» انگل‌لَین ایکی عاملی وورغولایاندان سونرا «دانیشیق دیلیمیز صنعی و ساختالاشیر. اونا گؤره کی هم قراماتیکاسی (نحوی) یادلاشیر هم یئرلی و دوغما سؤزلریمیز باشقا دیل‌لردن گلن سؤزلرله قاریشیر» دئییر.
«ادبیات دیلیمیز»ـه گلدیکده ایسه، یازارا گؤره، «باشقا دیل‌لرین هجوم گتیرمه‌سی» و گئت‌گئده «ساختالاشان» دانیشیق دیلی «ادبیات‌چی» ایله «اوخوجو»نون آراسیندا «باشا دوشمه‌مه» سورونو یارادیر. ایکی دسته ایسه اؤز قونوملاریندان گئری چکیلمک ایسته‌میر (یوخسا ائده‌بیلمیر) یازارا گؤره. بئله‌لیک‌له سایین شهبازی‌نین اؤزت اولاراق ایلک باشدان اؤتوردویو «بئله نظره گلیر کی بو گونکو دیلیمیزی قورویوب ساخلاماق یاواش-یاواش چتین‌لشیر» سؤزو دوغرولور.

آردی اولاجاق یادداشت‌دا سایین همت شهبازی بعضی کلمه‌لردن یارارلاناراق آماجلادیغی قاورامی ائله‌بیل اوقدر ده دقیق نظرده توتماییب یوخسا اونلارا دقیق یاناشماییب‌دیر. «دیلیمیز»، «اوخوجوموز» و «ادبیاتیمیز» کیمی کلمه‌لره اوقدر گئنیش میدان وئرمک‌له یا آنلامدان سالیر یا دا کلی‌گویی اولور سونوندا. «دیلیمیز» دئدیییمیزده ایران اؤلکه‌سینده قوللانان آذربایجان و باشقا تورک شهرلرده دانیشیلان دیل اوقدر ده بیر یئره سیخیشان دیل دئییل‌دیر؛ بونا باخمایاراق هامیمیزین ذهنینده جانلانان تورک دیلینی نظرده توتساق دا، و داها دا قاپسام‌لی اونو بیر دیل و بیزیم اولاراق « #دیلیمیز» آدلاندیرساق دا، یئنه «بیر» دیلین اوقدر واریانتلاری اولابیلر کی چئشیت‌لی دسته‌لرین قوللاندیغینی باشقاسینین آنلاماماسینا دا گتیریب چیخاریر. یقین کی جناب شهبازی‌نین آماجی بئله بیر آنلاشمامالار دئییل‌دیر هرحالدا و چتین توتماییب دا داها چوخ ال‌اوستو قاورامی ایله دانیشیلان و یازیلان دیلین آراسیندا یارانان چات‌دان سؤز آچیر. سؤز ائتدیییم چئشیت‌لی دسته‌لرین بیربیرلرینین آنلاشیلمامازلیغی هئچ زامان سؤزقونوسو اولمور دا ترسینه داها اؤزللیک وئریر اونلارا؛ «بیزیم» بوردا ایسه بئله بیر شئی اولور! نه‌دن بئله بیر سونوجا واریرام؟ (حاقلاییرام؟) ائله بوردان باشقا ایکی «اوخوجوموز» و «ادبیاتیمیز» کلمه‌لرینه گلیب چاتیریق. «اوخوجوموز» کیم‌دیر؟ «ادبیاتیمیز» نه‌دیر؟ بو ایکینی بیر دسته‌ده تانیتدیرا دا بیلریک بیزده. سؤزگلیمی «بیزیم دیل»ین گئنیشله‌نمه و گلیشمه‌یه امکانی اولمایان و یوخ اولان «جیهازلار» نَدنیندن دولایی «اوخوجوموز» همن «ادبیات‌چی‌میز»دیر. بوردا «اوخوجو» هاردایسا بللی بیر گروه اولابیلر؛ تلاشا قاپیلیب اولمایان جیهازلاری اؤزونه یارادان، ایسته‌ییب اؤرگه‌شن و سونوندا اوخویا بیلن کیمسه. یانی سایین همت شهبازی‌نین آماجلادیغینین ترسینه بوتون اینسانلارین آنادیلی تورکجه اولان کیمسه «اوخوجو» دئییل‌دیر، نئجه‌کی باشقا دیللرده ده. «دیلیمیزین کلمه احتیاطلاریندان (ذخیره) اوزاقلاشان اوخوجوموز، ادبیاتیمیزین دا دیلینی باشا دوشمه‌یه‌جکدیر».

دیگر یاندان دیل دورغون بیر وارلیق دئییل ده گل‌گله جانلی جانلی قول‌قاناد آچیب گئنیشله‌شن وارلیق‌دیر؛ باشقا سؤزله زامان سوره‌جی اؤزونو یئنیله‌ییب گلیشدیرمه‌سه اؤلومه سورونن نعش اولور. بو گلیشمه و گئنیشله‌نمه‌نین بیر یانی سایین شهبازی‌نین سؤز ائتدییی «آل-وئر»دیر. آنجاق «دیل اؤز کؤکونو، اؤز اوریژینال‌لیغینی» ساخلاماقلا یئنی قاوراملاری، اوفق‌لاری یئنی سؤزجوک‌لر و تئرمین‌لرله اؤنه سوردورمه‌سه قورویوب یوخ اولماغا محکوم بیریسی‌دیر. دیلین گلیشمه‌سی یالنیز گئری‌یه دؤنوب آرخئلوق کیمی ایچینده دئشینمه دئییل‌دیر؛ بیر یؤنو گئری‌یه باخاراق قالان یؤن‌لر اؤنه دؤنوک‌دور گلیشن دیلین. بو اوزدن بیزیم دورومدا «اوخوجو» بوتون کوتله‌دن ایسترایسته‌مز آییریلیب ایره‌لیلَمه‌لی‌دیر (باشقا دیللر و میللت‌لر کیمی البته). سانمیرام #جیمز_جویسون یولیسس و Finnegan awakes رومانینی یوخسا #ویرجینیا_وولفون

رومانلارینی و بئله یؤنتم‌لرده اولان باشقا #رومانلار یوخسا #شعرلری بوتون اینگیلیس دیللی کوتله اوخویوب باشا توشه بیلسین؛ یوخسا #هاروارد یونیئورسیته‌سینده #فلسفه آنلاتان فیلسوفون سؤزلرینی وال‌ستریت‌ده‌کی دللال! (هر حالدا سایین شهبازی یازی‌سینین سونوندا بیرجور بو سؤزلری دئمک مجبوریتینده‌دیر ده!)
باشقا دیللره گؤره «بیزلر» دیل قونوسوندا ائش دورومدا اولمادیغیمیزدان بئله بیر چابا (اؤیره‌شیب یارارلانماق) داها چتین اولور و اوخوجو کوتله‌سی دارالیر، نه ایسه همن بو دارالان دسته‌دن داها کیمی‌لرینی «ادبیات‌چی» دئیه آییرا بیلریک. چونکو اؤیرنمه چتینلییینه قاتلاشیب دا «دیل»دن یارارلانماغی باجاران یارادابیلر یالنیز. هرحالدا «اوخوجو» دسته‌سینه گیره‌بیلمه‌ین تورک، نه‌قدر قولای دا توتساق، اؤز دیلینده ساوادسیزدیر بیرجور. بئله‌جه «بونون آردیندا ایسه ادبیاتیمیز اوخوجوسوز قالیر. ادبیاتچیلاریمیز، یالنیز بیر خاص ادبیاتچیلارلا دانیشیغا و دیالوگا کئچه بیلیر» سؤزو (یازینی و اؤزللیک‌له ادبیاتی هامی اوخویوب باشاتوشه گرک آلینیر بو سؤزدن، باشقا سؤزله اوخوجو همن تورک‌دور دئییر!) بیرجور لاخلاق نظره گلیر اؤز یئرینده.
البته کی آقای شهبازی‌نین پیغمبرانه سؤزو «داها دوغروسو، بو گون ادبیاتیمیز بیر دیل یاشاییر، کوتله آراسیندا یاشانان دیل ایسه، باشقا بیر دیل حساب اولونور» مضیقه‌ده اولان بیزیم دیل‌ده داها کوبودجا اؤزونو گؤستره‌بیلر، نه ایسه بئله بیر دوروم یوموشاق دا اولسا باشقا دیللرده ده وار. یئنی سؤزجوک‌لر بیر یاندان، قراماتیکا اوبیری یاندان، دونیایا و داها دوغروسو دوشونجه دونیاسینا یئنی‌جه آیاق باسان قاوراملار وس. باشقا یاندان آرادا یارانان چاتی (باشقا دیللره گؤره اولوشان چاتی دئمیرم هله!) آیدینجا گؤرستره‌بیلر. نه‌دنسه یازارین «اولتیماتوم» وئرمک ایسته‌یی کیمی توشلامیشی (بوراکیمی) بللی اولمور.


https://telegram.me/dusharge :قایناق
https://t.me/Adabiyyatsevanlar

✅✅✅سایین کانالداشلار
یکشنبه گونو: 99/10/21
ساعات : 21
ادبیات سئونلر کانالیندا ائتیمولوژی درسلیک لری اولاجاق .
اوزمان : دوکتور ارشد نظری

https://t.me/Adabiyyatsevanlar

ائتیمولوگییا درسلری ۲۱ / ۱۰ / ۹۹
چوغان
اوزمان: دوکتور ارشد نظری

https://t.me/Adabiyyatsevanlar

ائتیمولوگییا درسلری ۲۱ / ۱۰ / ۹۹
باز
اوزمان: دوکتور ارشد نظری

https://t.me/Adabiyyatsevanlar

ائتیمولوگییا درسلری ۲۱ / ۱۰ / ۹۹
سوُیود ، چینار سیمگه لری
اوزمان: دوکتور ارشد نظری

https://t.me/Adabiyyatsevanlar

حمیده رئیس زاده(سحر)

کرم قیل بیر نظر واریوخ نه وار دنیاده کئفله‌نسین
عدم یوردوندا یوخلار باشلاسین ایجاده کئفله‌نسین

یئته‌نلر وصلینه وصل عالمیندن باشقا حال بولسون
مقام وصله گؤز تیکمیش منیم تک ساده کئفله‌نسین

جانیم قربان سنه باخ دالغالاندیر باده دریاسین
بوغولسون جنبه‌سیز پیمانه‌لر دریاده کئفله‌نسین

اجابت وعده وئردین اولموشام حاجت اجابت قیل
یول اوسته گؤز یاشیندان ایسلانان سجّاده کئفله‌نسین

اوزاخلاردان گلن واردیر باخیب گیزلین گولن واردیر
کرم قیل اؤیله کی ایثار الیندن باده کئفله‌نسین

اگر من‌لیک داغی یول کسسه باخ داغلار داغیلسینلار
دلالت اهلی باخسین تيشهٔ فرهاده کئفله‌نسین

دولاندیر بیر باخیش رطلین، قارانلیق بور-بوجاقلاردا
سحر تک دردینه اووسارلانان آزاده کئفله‌نسین



https://t.me/Adabiyyatsevanlar

«کریم_احمدیان_شاهید»

بیزدن آیریْ قالان بیر کیمسه‌لیک وار
ایتیبدیر روزگاریْن یامانلیْغیْندا
تامارزی قالیْبدیْر دۇیغولاریْمیْز
یوْخ اوْلۇب شهرین دۇمانلیْغیْندا

آچدیْقجا دورانیْن قابار ایزلرین
ایلان تک سانجاجاق هر کسین گؤزۆن
بیریسی قانماسا کئچه‌جک نه‌دی
ایه‌جک باشینی کسه‌جک سؤزۆن

اؤفکه‌سیز، غصه‌سیز، بیر کیمسه یوْخدۇ
دالغالار سیْناغا چکیر سۇلاریْ
باغیْرماق گئجه‌نین کامان سلاحیْ
آتیرسا سؤکه‌جک بوْغۇنتۇلاریْ

بۇلۇدلۇ اینسانلار ، دردلی اینسانلار
قصه‌سی کدرله دوْلۇ اینسانلار
زامانلا، چؤره‌یی چیی پیشنلرین
نیسگیلی شله‌یله بوْللۇ اینسانلار

یئکلدیر آرزونو سرحدسیز باخیْش
کوچه‌دیر، شهردیر یا بیر اؤلکه‌دیر
اۇجالدیْر بۇ باخیْش اینسانیتی
قارادیْر ، بیاضدیْر ،سانماییْر نه‌دیر

بیزی «شاهید» چکن قارانلیْقلارا
دۆشه‌جک گئجه‌نین آیاقلاریْنا
سۆرۆنۆب یوْلاغیْن چیرکین سۇیۇنا
سۆرته‌جک لجنی دوْداقلاریْنا

بیزلری سیْناغا چکن روزگار
هم ساغا هم سوْلا سیْخاجاق یقین
سئوینجلی گۆنلره آیدیْن باخماساق
سالاجاق قۇیویا درین‌سه درین


https://t.me/Adabiyyatsevanlar

غوغای ستارگان...

https://t.me/Adabiyyatsevanlar

نرمین کمال ایله دانیشیق دانیشیغی آپاران: آقشین
آقشین: نرمين خانيم، بوگونکو آذربایجان گنج يازارلارين فرقلی جهت لريندن بيری اودور کی، اوشاقليغی ايمپئرييا دؤورونه، گنجليیی ميللی موستقيل ليک دؤورونه دوشوب و آللاه بيلير قوجاليغی هانسی دؤوره دوشه جک. سنجه، طالعين بو هفته بئجرليیی اونلارين ياراديجيليقلاريندا دا اؤزونو گؤستريرمی؟
- نرمین کمال: عينی طالعيی روسلار، گورجولر، ائرمنيلر و باشقا ميلتلردن اولان يوزلرله ياراديجی گنج ده ياشايير. بيزيم هاميميزين اوزرينده دؤورون زوراکيليغی وار. اوشاقليغيميزدا ان چوخ ائشيتديیيميز بئش سؤزدن ايکيسی "اويونجاق" و "ناغيل"ديرسا، قالان اوچو "چؤرک نؤوبه سی"، "ساواش"، "کئچيد دؤورو"دور. اؤزونه مخصوص دؤور ياشاميشيق،
بو یازینین آردینی ادبیات سئونلر کانالیندا اوخویون.
https://t.me/Adabiyyatsevanlar