ادبیات سئونلر

اوشاق ادبیاتی

اولدوزلا قارغالار
یازار:«صمد بهرنگی»
چئویرن:«منیژه جم‌نژاد»

اون‌یئدینجی بؤلوم:
⚡️قاچماق سؤزو
✨قاییتماق او٘چون قاچیش

ناهار باشی‌‌ایدی. بابا اولدوزو اؤز یانیندا اوتورتموشدور. اولدوزون گؤزلری یاش ایدی. هیچقیریردی. اؤگئی‌ننه دئدی: کؤتک گؤیلو ایستیر. شورون چیخاردیب. بابا دئدی: قیزیم، سن‌ کی سؤزه باخان اوشاغیدین. سوزون نه‌دیر؟ اولدوز دینمه‌دی. هیچقیردی. اؤگئی‌ننه دئدی: دئییر تک قالماقدان دیغلیرام، گرک قویاسیز گئدم یاشارلا اوینایام. بیردن اولدوز دئدی: هه، یولداش ایستیرم. تک‌ قالماقدان دیغلیرام. بیر آز چکیش بکیش دن سونرا، بابا قرار قویدو اولدوز هردن یاشارین یانینا گئدیب، تئز قاییتسین. اولدوز چوخ سئویندی. ناهاردان سونرا بابایلا اؤگئی‌ننه یاتدیلار. اولدوز دوردو، داما چیخدی. اوردا اوتوروب قارغالاری گؤزله‌مک ایستیردی. بیردن گوزو یاشارا دوشدو کی شیرین یاتمیشدیر. ایستی گون ایشیلداییردی. اولدوز گئدیب یاشارین باشی او٘سته اوتوردو. الین توکلرینه چکدی. یاشار گؤزلرین آچدی. گولدو. اولدوزدا گولدو. یاشار دوروب اوتوردو. کوینه‌یین گئییب دئدی: اولدوز بیلیرسن نه یوخو گوروردوم؟ اولدوز دئدی: یوخ. یاشار دئدی: گوروردوم بیربیریمیزین الین توتوب، بولودلارین او٘ستونده اوتوروب، قارغاخانیمین تویونا گئدیریک، باشقا قارغالاردا دالیمیزجان گلیرلر. اولدوز بیرآز قیزاردی. سونرا دئدی: قارغا خانیم دا کیمدیر؟ یاشار دئدی: سنه دئمه‌دیم؟ اولدوز دئدی: یوخ. یاشار دئدی: قارغالاری گؤردوم. دانیشدیم دا. اولدوز دئدی: ناواخ؟ یاشار دئدی: مدرسه دن قاییداندا. قارغا‌بَیین باجی قارداشییدیلار. قراردی ایندی گله‌لر. اولدوز دئدی: دده قارغادان نه خبر؟ یاشار دئدی: دئییرلر خانیمینین کدریندن اؤلدو. بو آن ایکی قارغا آغاجلارین دالیسیندان تاپیلدیلار. گلیب گلیب داما یئتیشدیلر. یئره اوتوردولار. سلام وئردیلر. اولدوز اولاری بیربیر توتوب اؤپوب قوجاغینا قویدو. بیرآز خوش بئش و تانیشلیقدان سونرا قارغابَی دئدی: اولدوز قارغالار هامیسی دئییرلر سن گرک بیزیم یانیمیزا گله‌سن. اولدوز دئدی: یانی بو ائودن قاچام؟ قارغابَی دئدی: هه، گرک قاچیب بیزیم یانیمیزا گله‌سن. بوردا قالسان دیغلاییب اؤلرسن. بیز بیلیریک کی اؤگئی‌ننه سنی چوخ اینجیدیر. اولدوز دئدی: نه جور قاچا بیلرم؟ بابایلا اؤگئی ننه قویمازلار. عمی ده ایتی اؤلندن آیاغینی بیزیم ائوه قویمور. قارغا خانیم دئدی: ایَر سن ایسترسن، قارغالار سنی قاچیرتماغی باشارار. یاشار بوراجان دینمه‌میشدیر. ایندی دئدی: یانی گئدیب داها قاییتماسین؟ قارغا خانیم دئدی: بو اؤزونه باغلیدیر. سن نه دوشونورسن یاشار؟ یاشار دئدی: سیزه قاتیلیرام. بوردا قالسا الدن گئدر و هئچ ایش ده گؤرنمز. آما ایَر قارغالارین شهرینه گئتسه... من بیلمیرم نه اولار. قارغابَی دئدی: صاباح گلیب گئنه دانیشاریق. اولدوز سنده صاباحاجان فیکیرلرینی ائله...قارغالار گئتدیلر. اولدوز دئدی: سن‌جه من گرک گئدم؟ یاشار دئدی: هه، گئت، آما گئنه قاییت. سؤز وئریرسن قاییداسان؟ اولدوز دئدی: سؤز وئریرم یاشار!

👵🏻 بویوک ننه قاچماغین یول یؤندمین اؤیره‌دیر.
صاباح گون‌اورتاچاغی قارغالار گلدیلر. بیر قوجا قارغا دا اولارین یانیندایدیر. قارغا خانیم دئدی: بودا "بویوک ننه" دیر. "بویوک ننه" اولدوزلا یاشارین یانینا گئتدی. سونرا اولارلا او٘ز به اوز اوتوروب دئدی: قارغالار هامیسی سیزی تاپماغیمیزا سئوینیرلر. قیزیم سیزدن چوخ دانیشاردی. اولدوز دئدی: " آنا‌قارغا" سیزین قیزینیزیدیر؟ بویوک ننه دئدی: هه. یاخجی قارغایدی. اولدوز ایچین چکیب دئدی: منه گوره اؤلدورولدو. بویوک ننه دئدی: قارغالار بیر دنه ایکی دنه دئییللر. اؤلوب اولدورولمکله قورتولمازلار. بیری اؤلسه، ایکیسی دوغولار. یاشار دئدی: اولدوز سیزین یانینیزا گلمک ایستیر. بویوک ننه‌ دئدی: نه یاخجی. دئمک گرک ایشه باشلایاق.
آردی وار...
https://t.me/Adabiyyatsevanlar