ادبیات سئونلر

اوشاق ادبیاتی

۲۴ساعات یوخو و آییقلیق
یازار:« صمد بهرنگی»
چئویریب، حاضیرلایان:«ویدا حشمتی»

اویونچاق ساتان دوکانین قاباغینا چاتدیم.
ماغازالار تکه-توک آچیق ایدی. منیم دوه‌م دوکانین ایچه‌ریسینده دورموشدو. جامی چالیب، اونو یوخودان اویاتماغا، یوخوسونو حرام ائتمه‌یی اوره‌ییم گلمه‌دی. یولا دوشوب گئتدیم. خییاوانلار مدسه اوشاقلاری ایله دولویدو. ماشینلارین ایچینده بیر-ایکی اوشاق آتا-آنالاری ایله اوتورموش، مدرسه‌یه گئدیردیلر.
گونون بو ساعاتیندا تکجه احمد حسین منی یالقیزلیقدان چیخاردا بیلردی. نئچه خییاواندان کئچدیم‌. توستودن، پیسلیکدن آرینمیش بیر گؤزل خییاوانا چاتدیم. اوشاقلی- بؤیوکلو تر-تمیز گئیینیب، پار-پار پاریلدایان اوزلری ایله کئچیب، گئدیردیلر. قیزلار و قادینلار، گول دسته‌سی کیمی الوان-الوان گئیملری ایله ایشیلداییردی. ائولر-ماغازالار آینا کیمی‌ ایدیلر. من هر دفعه بو خییاواندان کئچه‌نده بئله بیلیرم سینمادا اوتوروب، فیلمه باخیرام.
بو اوجا ائولرین ایچی نئجه دؤشه‌نیبدی؟ اونلارین ایچینده‌کی‌لر نئجه یئمک یئییرلر؟ نئجه یاتیرلار؟ نئجه گئیینیرلر؟ سن آنانین قارنیندا اولاندا، نئجه یاشادیغینی بیلردین‌می هئچ؟ مثلا نئجه یئمک یئیردین؟ یوخ... هئچ زامان بیلمزسن. من ده اصلا بیلمیردیم.

بیر ماغازانین قاباغیندا اللرینده چانتالاری ایله نئچه اوشاق دورموش، جامین آرخاسینداکی‌لارا باخیردیلار. من ده اونلارین آرخاسیندا دوروب، ساچلاریندان قالخان خوش عطری بورنوما چکیردیم. ایسته‌مه‌دن اوشاقلارین بیرینین بوینونا بورنومو یاخینلادیب، قوخلاماغا باشلادیم. بیردن اوغلان دؤنوب، منه قاش- قاباقلا باخدی. سونرا یولا دوشوب، گئتدیلر.
اوزاقلاشارکن، ائشیتدیم کی، بیری دئدی:
-پوف..‌‌. نه پیسلیک قوخویوردو او اوغلان!
بیر آن اؤزومو ماغازانین جامیندا گؤردوم. ساچلاریم اوزون و داغینیق ایدی. گلیب قولاقلاریمین اوستونه چیخمیشدی. سانکی توکلو بیر پاپاق باشیما کئچیرتمیشم. بئز کؤینه‌ییم باتیقلیقدان باشقا رنگه چئوریلمیش، آچیلا قالمیش یاخاسیندان، یانمیش بویون-بره‌م گؤزه ووروردو. شالواریم قیسا دورموشدو و یالین آیاقلاریم باتیق و دابانلاریم سا درین چاتلاقلار ایله سئویلمه‌ین بیر گؤرونتونو اورتایا قویموشدو. نه دن سه اؤزومو جامدا گؤردوکدن سونرا، او اوشاقلارا نفرت‌له باخدیم.
یوخسا اونلارین اوزوندن من بئله یاشاماغا مجبور اولموشام گؤره‌سن؟!
اؤزومدن سوروشدوم.
بو حالدا ماغازانین صاحابی الی ایله گئتمه‌ییمی ایشاره ائله‌ییب، دئدی:
-یئری چیخ گئت گؤروم. سحری دشت ائله‌مه‌میشم کی سنه ده بیر شئی وئرم.

من ترپه‌نمه‌دیم، نه ایندیم نه ده دیندیم.
گئنه الی ایله ایشاره ائدیب، سؤیوش دئدی. گئنه دایانیب، دوردوم. دئدیم:
-من دیله‌نچی دییلم کی!...
کیشی سوروشدو:
-آهاااااا باغیشلا بی! نه ایش گؤررسیز جناب؟
من اوزولموش حالدا دئدیم:
- بیر ایش گؤرمه‌رم. دورموشام باخیرام فقط.
سونرا یولا دوشدوم. دؤنوب باخاندا، کیشی ایچه‌ری کئچیردی. قنوودا دوم-دورو سویونون ایچینده بیر تیکه آغ کاشی واریدی. هئچ معطل ائتمه‌دیم...

آردی وار

https://t.me/Adabiyyatsevanlar