ادبیات سئونلر

اوشاق ادبیاتی

اولدوزلا قارغالار
یازار: صمد بهرنگی
چئویرن: منیژه جم‌نژاد

اون‌او٘چونجو بؤلوم:
عاغیللی اوشاقلار، عاغیلسیز آتا آنالاری اله سالارلار

اوشاقلار گوزلرکن اوتورموشدولار. بیردن های کو٘ی قووزاندی. اولدوزون باباسی چیغیر باغیر سالمیشدی. باشقا سسلرده واریدی. یاشارین ننه‌سی یوخودان دوروب حیطه قاچدی. سونرا قاییدیب چادرا اؤرتوب، داما گئتدی. اولدوزون باباسی دلی‌لر کیمی اولموشدو. هئی باشینا دؤیوب چیغیریردی. وای! وای! یازیق اولدوم! ...ائویمه " بیزدن یئرلر" آیاق آچیب!...دادیما یئتیشین! ...آجان‌لا نئچه آیری کیشی اونو دوره‌لییب، آراملاتماق ایسته‌ییردیلر. اولدوزون باباسی ایتین اؤلوسونو گوستریب باغیریردی: باخین، بونو کیم گتیریب آتیب بورا؟ داشی کیم گؤتوروب آپاریب؟ ... قانی کیم یویوب؟ ... " بیزدن یئرلر " ائوه یول تاپیبلار! ... اؤنجه گلیب ایتی اؤلدوردولر ... سونرا ...وای! ... وای! ...
اولدوزلا یاشار پیلله‌نین قاباغیندا دوروب قولاغ آسیردیلار. یاشارین ننه‌سی داما گئتمه‌یه قویموردو. بیربیرلرینه گوز ووروردولار و اورکده بابانین و اوبیری آداملارین نادان‌لیقلارینا گولوردولر. بئله بیر تئز اینانان آدامی اله‌ سالمالارینا سئوینیردیلر. بابانی چکن چکن له اُتاغا آپاردیلار. آما بیردن هامیسینین قورخو چیغلیقلاری قووزاندی: وای ... آمان آللاه ! ... بیزدن یئرلر! ... بابا گئنه حیطه قاچیب، دلی‌لر کیمی چیغیریب، اویان بویانا گئتمه‌یه باشلادی. او٘زو قویلو دولچا هامینی قورخوتموشدور. بیر قوجا کیشی دئدی: "بیزدن یئرلر" ائوه آیاق آچیبلار. ائوی آختارین. بیرنفر جین‌گیر دالیسی‌جان گئتسین. بیرنفر دوعایازان گتیرسین. بابا چیغیردی: یاردیم ائدین! ... ائویم ییخیلدی! ... بیرنفر " سیدقلی جین‌گیر"ی گتیرمه‌یه گئتدی. بیریسی ده سید میرزا ولی دوعایازانین دالیسی‌جان گئتدی. بیر قوجا آرواد جین‌لری قاچیرتماق اوچون ائویندن " بسم‌الله" گتیردی. " بسم‌الله " بوروق یئکه چیزگی‌له یازیلمیشدیر و بیر کوهنه قابا توتولموشدور. کیشی‌لرین ایکیسی قابی توتوب، بسم الله دئیه دئیه، ائوین بوربوجاغینی آختارماغا گئتدیلر. بیردن میتباخین آراسیندا گوزلری یئکه، قانا بلشمیش بیر داشا دوشدو. قورخا قورخا داشی گوتوروب، حیطه گتیردیلر. بابا داشی گورجک گئنه باغیردی: وای! .. وای! ...بو داش اوردا نه ائدیردی؟ کیم بونو آپاریب قویوب اورا؟ "بیزدن یئرلر" منیم‌له دالاشیبلار ...منی اینجیتمک ایسته‌ییرلر... وای! .. منیم نه گوناهیم وار آخی؟ اولدوزلا یاشار دووار دیبینده دورموشدولار. بو سوزلری ائشیتدیکده گولماقلاری توتدو. تئز اُتاغا تپیلدیلر کی دامداکی لار اولاری گورمسین. یاشار دئدی: حله قوی اؤگئی‌ننه‌ن گلسین، گور نئجه باشینا کول اله‌یه‌جک. توی بورنوندان گله‌جک. ایکیسی ده اورکدن گولدولر. یاشار الینی اولدوزون آغزینا قویدو، سسینی ائشیتمه‌سینلر دئیه. بیری اؤگئی‌ننه‌یه خبر وئرمیشدی کی تلسیک اؤزونو ائوه یئتیردی. ارین گورونجه باییلیب حیطین آراسیندا ییخیلدی. خانیملار اونو چکن‌چکن‌ له ساغ الده‌ کی قونشونون ائوینه آپاردیلار. قوجا آرواد دئییردی: اؤنجه گرک جین‌گیر له دوعا یازان گله، جین‌لری ائشیه سالا. سونرا بویلو‌ خانیم ایچریه گئده‌ بیله. قیسا‌جا، باش آغری اولماسین، یاریم ساعاتدان سونرا جین‌گیر له دوعایازان یئتیشدیلر. جین‌گیر بیر تشتی ترسینه قاباغینا قویوب، عجیب غریب سوزلر دئدی، آینا ایسته‌دی، اؤزوندن و تشتین آلتیندان عجیب غریب سسلر چیخارتدی و سونوندا دئدی: ای "بیزدن یئرلر" سیزی آند وئریرم بیزدن یئرلرین پادشاهینا، بو مسلمان کیشینین ائویندن اوزاقلاشین، اونو اینجیتمه‌یین. سونرا قولاغی سسده گوزونو آینایا زیلله‌ییب اولدوزون باباسینا دئدی: بوگون سوفته ائتمییبلر، اللی تومن وئر، یولا سالیم گئتسینلر. اولدوزون باباسی اوتوز تومنه دانیشدی. جین‌گیر پولو آلیب، الینی تشتین آلتینا آپاریب، چیخارتدی. سونرا گئنه دئدی: ای " بیزدن یئرلر " بو مسلمان کیشی‌نین ائویندن اوزاقلاشین، اونو اینجیتمه‌یین. سیزی آند وئریرم بیزدن یئرلرین پادشاهینا! بیرآز سونرا، دوروب گوله گوله بابایا دئدی: اینجه‌وارا ( خوشبختانه) سندن ال چکیب تئز گئتدیلر. داها دا قاییتمازلار، بو شرط‌له کی منی راضی سالاسان. بابا راحات بیر نفس آلدی، بیر اوتوز تومن داها جین‌گیره وئریب و یولا سالدی. دوعا یازانین نوبه‌سی یئتیشدی. ایری او٘یری، قره نارنجی مرکب‌له بیر شئیلر یازیب، هر تیکه کاغاذی بیر بوجاقدا گیزلدیب، ایرمی تومن آلیب گئتدی. اؤگئی‌ننه نی گتیردیر. آجانین ناواقت قویوب گئتمه‌سینی کیمسه بیلمه‌دی. گئجه یاشارین ننه‌سی اولدوزو اؤز ائولرینه آپاردی. بابایلا آروادی ائله قورخوب چاشمیشدیلار کی او واقتاجان اولدوزو دوشونمه‌میشدیلر.

https://t.me/Adabiyyatsevanlar