ادبیات سئونلر

اوشاق ادبیاتی

اولدوزلا دانیشان قولچاق
یازار: صمد بهرنگی
چئویرن: منیژه‌ جم‌نژاد
آلتینجی بولوم: اوزلرین بیه‌ننلر نه‌جوردولر؟
یاشارین بارماغینین آغریسی بترلشمیشدیر. قولچاغین الین توتوب دئدی: بارماغیم یامان آغرییر، بیر چاره قیل. قولچاق دئدی: لاپ اونودموشدوم. یاخجی یادیما سالدین. بیر یئکه قولچاق گلیب دئدی: یارالانمیسان یاشار؟ یاشار دئدی: بلی قولچاق خانیم. بارماغیمی پیچاق کسیب. اولدوز آرتیردی: فرش کرخاناسیندا. یئکه قولچاق دئدی: گل مئشه‌یه گئدک، من بیر مرهم تانیرام کی یارانی نئچه ساعاتا توختادار. سونرا یاشارین الیندن یاپیشیب چکدی. دانیشان قولچاق دئدی: گئت یاشار، مئهریبان قولچاقدیر. اود علف درمانلارین یاخجی تانییر.
ایکی یاندان قولچاق‌لارین آراسیندان کئچیب، آغاجلارا یئتیشدیلر. مئشه‌نین حئیوانلاری یول وئردیلر. بیر آغ دوشان بیر گویرنتی‌نین زوغونو چئینه‌ییردی. قولچاق اونا دئدی: دوشان یولداش، گئدیب مئشه‌نین اوباشیندان منه بیر‌ایکی دنه ائنلی یارپاقدان گتیره بیلرسن؟ دوشان دئدی: بو دفعه کیمین یاراسین باغلاییرسان؟ قولچاق دئدی: یاشارین یاراسین. بوردا چینار آغاجینین آلتیندا اوتورموشوق. دوشان داها بیرسوز دئمه‌ییب آتیلیب قاچدی؛ مئشه‌نین بوروقلاریندا یوخ اولدو. قولچاق جوربه‌جور گؤی گویرنتی‌لردن ییغیب، چینار آغاجینین آلتیندا اوتوردو. بیر گئنیش داش قویوب اوت علفلری دویمه‌یه باشلادی. اوبیری قولچاقلار گورونموردولر. آنجاق بیرآز اودون آلوولاری آغاجلارین آراسیندان گورونوردولر. یاشار دئدی: قولچاق خانیم سن طاووسو تانیرسان؟ قولچاق دئدی: چوخدا یاخجی تانیرام. پوز وئرر، فیس ایفاده ساتار. یاشار دئدی: دانیشان قولچاق بیزی اونون یانینا آپاردی اونونلا دانیشاق، آما او آنجاق اوزوندن دانیشدی. قولچاق دئدی: دانیشان قولچاق سیزی اونون یانینا آپاریب گوره‌سیز اؤزو٘ن بیه‌ننلر نه جور اولارلار. یاشار دئدی: بیرایکی دنه قانادینین توکوندن ایسته‌دیم، قویام کیتابیمین آراسینا، وئرمه‌دی. دئدی کی قانادلاری من ساندیغیم تک اوجوز دئییل. یئکه قولچاق گوی گویرنتینی دویه‌رک دئدی: بیخود دئییر. بوگونلر بوتون قانادلارینین تو٘کو٘ن تؤکه‌جک. اوندا نه قدر ایسترسن گوتوره‌ بیلرسن. یاشار دئدی: دوغرودان؟ قولچاق دئدی: طاووس ایلده بوگونلر توکلرین توکر. یاشار دئدی: اوندا نه‌جور اولار؟ قولچاق دئدی: چیرکین بیر شئی اولار. اوزللیکله ده چیرکین ایاقلارین داها گیزله‌دنمز.

https://t.me/Adabiyyatsevanlar