ادبیات سئونلر

رسول قدیری

یاغیش یاغیر
گاهدان لام-لام،
گاه شیدیرغی
بیر آن کنده اوچور خیال
أسکی یئرلری یادا سال
تورپاق یولدا درسه گئدن اوشاقلارین باشماقلاری،
پالتارلاری زیغا باتیر
اوشاقلاری شهره کؤچموش بیر قارینین،
سوواق دامی ایسلانیب‌دیر
تاوانیندان دامجی-دامجی آغی یاغیر
تورپاق قوخان سودور دامیر
قاب-قازانین سریب یئره
یاغیش کسسه بئله کسمز اوردا یاغیش
هله-هله داماجاق‌دیر...
*
یاغیش یاغیر
أکینچیلر سئوینیرلر
یاغیشلی ایل أکینچی‌یه موشتولوق‌دور
نئچه ایل‌دیر یوردوموزدا قورولوق‌دور
سوسوزلوق‌دور
یانغی تورپاق دویور سودان
یئر آلتیندا قاچان-قاچان
قویولارا دولور اوردان
*
یاغیش یاغیر
داغدان دوزه،
دوزدن چایا
أل أله وئریب دامجیلار
یوخوشلاردان ائنیشلره زوی گئدیرلر
بیر-بیرینه چییین ووروب سئوینیرلر
گولوشورلر
چایلار سودان دولوب داشیر
ایرماقلاردا سئللر آخیر
خان ظولموندن قاچان بیر قیز،
ظالیم خاندان قورتولماق‌چون،
قاچیر،
قاچیر،
چایا چاتیر
کؤرپو اوسته یئتیشینجه
اؤزون اوزه‌ریندن آتیر
خانین ألی،
تاریخ بویو، آخیدیلان قانا باتیر
«سئل سارانی آلیب قاچیر»
هر آن یاغیش یاغدیغیندا،
خان‌چوبانین گؤزلریندن سئللر آخیر
یاغان یاغیش یویوب ایتیریر ایزینی
*
قاییدیرام شهریمیزه
أردملی،
شانلی تبریزه
هله یاغیش کسمه‌ییب‌دیر
یئنه یاغیر
بیری دوروب پنجره‌نین آرخاسیندا
پرده‌سینی یانا وئریب
گؤزلرینی یولا تیکیب
دامجیلارا باخا-باخا
چوخ داریخیر
دیل‌آلتی بیر ترانه‌نی اوخوماقدا
«یاغما یاغیش،
یاغما یاغیش،
من گؤروشه تلسیرم»
بیر آن چاتیر قولاغیما ناله سسی
جان اوسته بیر مظلوم گؤلون سون نفسی...
قولاغیمی یاتیردیرام
او دا سانکی حزین سسله اوخویور کی:
یاغ ائی یاغیش،
یاغ ائی یاغیش،
سئل اول یاغیش،
گور آخ آی سئل!
من ده یئنه جانلانماغا،
جانلانیب چالخالانماغا،
کوکره‌ییب دالغالانماغا تلسیرم...
پنجره‌نین هئره‌سینده،
قانادلاری ایسلاق سئرچه،
تیر-تیر أسیر
زاغ-زاغ تیتریر
سئرچه‌لر ده دامجیلارین کسمه‌سینه تلسیرلر...
*
یاغیش یاغیر
گؤلوموزو قوروتماغا چالیشانین اوره‌یینه،
سانکی دولو، بوران یاغیر
نییه بیزیم داغلاریمیز،
داشلاریمیز،
چایلاریمیز،
ناکسلرین اوره‌یینه بونجا آغیر درد اولوب‌دور؟!
باشلارینا داش اولوب‌دور؟!
نه یاخشی‌دیر آمما بو گون،
یاغیلارین عینادینا،
طبیعتین یئلی أسیر،
داغی گولور،
بولودلاری کیشنه‌یه‌رک سیخیر پامبیق کؤینه‌یینی
کولکلرله آغ بولودلار
گلیب‌دیرلر داغا قوناق
بیرجه او اوجا داغا باخ!
اوزادیبدیر أللرینی،
پامبیق رنگلی بولودلارین دؤشلریندن توتوب ساغیر
کولک أسیر،
گونش باخیر...
*
یاغیش یاغیر
اوره‌کلره یاغیر یاغیش
سیغاللاییر، یویور بوتون اوره‌کلرین قابیغینی
آمما سانما یاغیش ده‌یمیش اوره‌کلرین هامیسی دا گؤزل اولور!
یاغیش بوتون اوره‌کلری تمیزله‌میر
اوره‌کلرین گئرچه‌یینی ده‌ییشمه‌ییر
کؤنوللرین هامیسینی عزیزله‌میر
یالنیز سیلیر قونان توزو اوره‌کلردن
توز گئدینجه،
کؤنوللرین گئرچکلری چیخیر اوزه
آغ اوره‌کلر پاریلداییر
کاس اوره‌یین لکه‌لری،
داش اوره‌یین قارالیغی باتیر گؤزه...
*
یاغیش یاغیر
اؤزومون ده اوره‌ییمی اونوتمادان
اونو پایسیز بوراخمادان
توزون سیلیر، سیغاللاییر
توز آلتیندان،
بورونه‌رک حسرت ایچره، دالدالانمیش
عؤمروم بویو تونقال-تونقال توپلاشاراق تلل قالانمیش،
آل‌قیرمیزی نیسگیللریم اوزه چیخیر
بیله‌یدینیز بو آیریلیق آجیلاری،
نئجه عاشیق بیر اینسانین ائوین ییخیر،
جانین سیخیر
یاغ ائی یاغیش
یاغ ائی یاغیش
اوزه چیخار گئرچکلری
ایسلات بوتون نیسگیللری...

https://t.me/Adabiyyatsevanlar