اوشاق ادبیاتی
اوشاق ادبیاتی هر هفته پنجشنبه گونو ادبیات سئونلر کانالیندا .
اوشاق ادبیاتینا دایر یازیلارینیزی بیزه گوندرین .

https://t.me/Adabiyyatsevanlar

اوشاق ادبیاتی
ویدا حشمتی
آنامین اللری


آنامین اینجه الی
هر گون بیر چیچک آچار
قیزیل گول، سؤیود، لالا
قرنفیل عطری ساچار

ساچلاری قیوریم-قیوریم
سانجاقلا، اونو بزر
داراقلار تئللرینی
او اولدوزلارا بنزر

اؤپورم یاناغینی
مئهریبان، گول بنیزی
بیر بنؤوشه چیچه یی
هم محبت دنیزی

آغ آپ آغ اته یینده
باهاردان سئوگی دریر
آسلان آتاملا بیرگه
دونیاما اومود سریر.

https://t.me/Adabiyyatsevanlar

‏اوشاق ادبیاتی
طنز


https://t.me/Adabiyyatsevanlar

اوشاق ادبیاتی

الیفبا (اوشاق ناغیلی)

یازان: آنار_رضا

کؤچورن: سهند_شهبازی ( ۱۳ یاشلی)


من بالاجا ایدیم. هله مکتبه گئتمیردیم. نه یازا، نه ده اوخویا بیلیردیم. هئچ اؤز آدیمی دا اوخویا بیلمیردیم. چونکی حرفلری تانیمیردیم. آنجاق پاییزدا مکتبه گئده‌جه‌یم.
عمیم منه بیر نئچه قشنگ کیتاب گتیردی. دئدی کی، بیرینجی صینیفه گئدنده بو کیتابلاری اوخویاجاقسان. هله‌لیک شکیل‌لرینه باخ. من بیلمیردیم هانسی کیتابدان باشلاییم. بو واخت بیر سس ائشیتدیم.

–مندن باشلا، مندن باشلا.
تعجب لندیم. گؤره‌سن بو کیم‌دیر؟
–منم دانیشان، کیتابام. من الیفبا کیتابی‌یام. منی ورقله، هر صحیفه‌مده سنه تزه-تزه سؤزلر دئیه‌جه‌یم. من ان بؤیوک کیتابام. اگر اوشاقلار صحیفه‌لریمده‌کی ۳۲ حرفین هامیسینی اؤیرنسه بوتون آدلاری، بوتون سؤزلری، بوتون کیتابلاری اوخویا بیلرلر. منیم هر حرفیمدن، بیلیرسن نئچه سؤز باشلاییر. مثلاً، آ حرفی ایله باشلانان سؤزلری سایماقلا قورتارماز. اینانمیرسان، اؤزوندن سوروش.

–آ… – دئیه حرفی سؤزه باشلادی. – البته، من الیفبانین بیرینجی حرفی‌یم. اونا گؤره نئچه-نئچه گؤزل سؤزلر مندن باشلاییر! آتا، آنا، آداملار. آذربایجان. منیم چوخلو دوستوم وار. آذرلر، عادیل‌لر، عاریف‌لر، عاکیف‌لر، آفتلر، آلتایلار، آسلانلار. هر ایل پاییزدا من اونلارا چوخلو آلما، آرمود، آلچا آلیرام.

–باغیشلا، باغیشلا دئیه کیمسه آ-نین سؤزونو کسدی.
– بلی، باغیشلا. من ده ب حرفی‌یم. بلی – ب. دوغرودور. الیفبادا آ حرفی بیرینجی‌دیر. آنجاق ائله بیرینجی سؤزو ده منیمله باشلاییر.
بی-رین-جی. بلی… ائله، بلی سؤزو ده ب-نان باشلانیر. بئله‌دیر.
بونا گؤره ده من هئچ واخت "یوخ" دئمیرم، همیشه "بلی" دئییرم. بلی، من آ-نین باجی‌سییام. آ دئدی کی، آتا سؤزو اونونلا باشلانیر. منیمله ایسه آتانین آتاسی، یعنی بابا سؤزو باشلانیر. بلی، بابا. بیزیم دوغما شهریمیزین آدی باکی‌دیر.
باکی دا منیمله باشلانیر. منیم دوستلاریم بیر بالاجالاردیر، بیر ده بؤیوکلر: بدیر، بکیر، بشیر، بیکه، بیلقئیس…
آ دوستلارینا آلما، آرمود، آلچا آلیر. من ایسه اونلارا بوتون باغلاری باغیشلاییرام. بلی، بیز آ حرفی ایله باجیییق. آ. ب. کیمینسه سسی ائشیدیلدی:

–بس هئچ منی یاد ائتمیرسینیز؟… و.آ.ب و و یعنی من.
من ۵-جی-یم. ۵-جی-نی اونوتمایین. وطن سؤزو منیمله باشلانیر. "ب"نین بختی وار. منیم ده واختیم… من هامی اوچون واجیبم، وفالییام، وارلییام. بوتون واحیدلر، والیده‌لر، واقیفلر، وجیهه‌لر منیم وفالی دوستلاریم‌دیر.

–قویمارام، قویمارام منی اونوداسینیز. من ق-یام.
قورخورام، قئیدیمه قالمایاسینیز. قویون، من ده دئییم. من ده سیزین قارداشینیزام. قلمیم ده وار، قیلینجیم دا.

–دوستلار! دوستلار! من ده "د" حرفی‌یم. دوستلوق سؤزو منیمله باشلانیر. دئییرم دوست اولاق. دئییرم دالاشمایاق.
دئییرم دانیشماق اوچون سؤزو "س" حرفینه وئرک. آخی سئنتیابرا آز قالیب. درسلر باشلایاجاق. داها نه دئییم؟ هه اونو دئییم کی، درسلر مندن باشلانیر. درسلر سؤزونو دئییرم. دوستلوق اولسا، درسلرینیزی یاخشی اوخویارسینیز. دفترلرینیزی سلیقه‌لی ساخلایین.
–اوندا همیشه بئش آلارسینیز – دئیه ب د-نین سؤزونو کسدی.

دئدی:
–سؤزو س حرفینه وئرک. بوگون-صاباح سئنتیابرین بیری‌دیر. سؤز سنین‌دیر، آی س.
س دئدی:
–سالام. سالام سئویملی اوشاقلار. سئنتیابرین بیرینده سحر ساعات سککیزده مکتبلر سیزی صبیرسیزلیکله گؤزله‌یه‌جکلر.
من الیفبا کیتابی ایله بئله تانیش اولدوم. عزیز اوشاقلار، بو کیتابی ورقله‌سه‌نیز، او سیزه ده چوخلو ماراقلی ناغیللار، حکایه‌لر دانیشار، شعر اوخویار.

ایول، ۱۹۶۷

###
یوخاریداکی ناغیلی اوغلوم #سهند کؤچوروبدور. آراسیرا اونا کؤمه‌ییم اولدوسا، ایشین عهده‌سیندن یاخشیجا گلدی. وورغولاییرام کی ناغیلدا آ حرفینه نمونه وئریلن عادیل، عاریف کیمی کلمه‌لر لاتینجه‌ده #A کیمی سسله‌نیر.
بو گون #دونیا_اوشاق_کیتابی_گونونده سیزلرله پایلاشدیم.

قایناق : دوشرگه
https://t.me/Adabiyyatsevanlar

✅ هانس کریستین اندرسن ین دوغوم گونو ، دونیا اوشاق کیتاب گونو قوتلو اولسون.

❇️ ۲ آوریل روز جهانی کتاب کودک مبارک باد.

https://t.me/Adabiyyatsevanlar

مسابقه کتابخوانان کودکان

مجله نامه صدیق به مناسبت روز جهانی کتاب کودک، مسابقه کتابخوانی ویژه کودکان 4 الی 12 سال را برگزار می کند.
این مسابقه به صورت روزانه تا 20 فروردین برگزار می شود.

⭕️ چگونگی شرکت در مسابقه:

1. از فرزند خود بخواهید یکی از کتاب هایی را که اخیرا خوانده است انتخاب کند.

2. کتاب را معرفی نموده و یک پاراگراف از آن را بخواند. شما نیز با موبایل خود این بخش را فیلمبرداری نمایید.

3. با ارسال فیلم ضبط شده به همراه عکس کودک خود با کتاب معرفی شده به من یکی از برندگان این مسابقه باشید. @eldarmsadik

💢 شایان ذکر است این مسابقه با حداقل 20 شرکت کننده به صورت روزانه تا 20 فروردین قرعه کشی خواهد شد.

🛑🛑🛑 چند نکته مهم

1. فیلمبرداری حتما به صورت افقی و در محیط خانه یا حیاط خانه باشد.

2. عکس کودک و کتاب معرفی شده را نیز جداگانه ارسال کنید.

3. امکان معرفی کتاب به هر یک از زبان های ایرانی امکان پذیر است.

🎁 جوایز:

پس از قرعه کشی از فیلم های ارسالی جوایز ارزنده ای به شرکت کنندگان اهداء خواهد شد.
🔴🔴🔴 ارسال عکس و فیلم به @eldarmsadik

@nameyeseddigh


https://t.me/Adabiyyatsevanlar

نیگار خیاوی

یاشاسین کرونا!
چوخداندی بیر-بیریمیزدن قورخماغا باشلامیشیق، آرامیزدا یاییلمیش اولان بو قورخو یازییا آلینمامیش بیر متنه چئوریلرک آرامیزدا شیشمه¬یه باشلادی یاواش-یاواش. اؤز آرامیزدی کرونا گلیب بو چیرکین متنین اوستونه چکدییمیز اؤرتویو گؤتوردو و، هه! ایندی اوزه قالمادان، اوتانمادان بیر-بیرینیزدن آیریلین! دئدی. آداملار بیر-بیرینین گؤیلوندن چوخدان کؤچوب گئتمیشدیلر، قالمیشدی گؤزدن گئتمه¬لری، اونو دا کرونا گلیب چؤزدی.
گیزلی-گیزلی، ان ایچده بئجردییمیز ویروسلاری بیر-بیریمیزین اوزونه-گؤزونه اؤکسوردوک هر گون. سونرا اوستونه گولوشدن بیر اؤرتوک چکدیک. چوخداندیر هم اؤزوموز هم ده بیر-بیریمیزدن اوزاق قالمیشلارین ان چیرکینینه دؤنوشموشوک، اؤزو ده فرقینده اولارکن. آنجاق اوزه چیخارما جسارتیمیز اولمادی.
اؤنجه انسانین آرخاداش، قارداش، سئوگیلی، بیر-بیرینه عدالتلی، مهربان اولماسی قرارا آلینمیشدی، آنجاق اولامادیق، داها دوغروسو اولمادیق. بو ویروس ان باشدا اولان رهبرلردن توتدو تا توپلومون ان کیچیک عضوی اولان عایله¬یه قدر داراشمیش هامیمیزا. دنیا رهبرلری عدالتی تپیکله¬دیلر سونرا دا اوزلرینه عدالت ماسکاسی تاخدیلار. تپیکلمه ویروسو بیز آدام سورولرینه ده داراشدی. بیر-بیریمیزین حاققیندا اولمازین انسانلیق دیشی حرکتلری روا قیلا-قیلا مهربانلیق ماسکاسی تاخدیق، سانکی جانلیلار سینماسیندا ایکی¬اوزلولوک، مین اوزلولوک رولو آداملارا تاپشیریلمیشدی، هر بیریمیز بو رولو ان اوستا آکتیور کیمی جانلاندیرماقدا جاندان باشدان کئچدیک.
آداملار آراسیندا داریخیرام
بیلمیرم احساسلار نه بیچیمده دیر
ماسکالار دنیاسیندا کاریخیرام
بلکه ده چاشقینلیق اؤز ایچیمده دیر...

https://t.me/Adabiyyatsevanlar

خزر سلیمانی

يوخومو گؤزومدن اوغورلايان قيز
آغ گۆنه چيخديمى قارا گؤزلرين؟
ائله آغلاديم كى آرخانجا سنين
يويولدو يوللاردان آياق ايزلرين...

داها تۆكنميشَم داها بيتميشَم
سنين نه خبرين راحت ياتيرسان
من سنه حقيمى حلال ائتميشَم
سن نييه يوخوما حرام قاتيرسان؟

قاييتماز او گۆنلر بيليرم ايندى
قوياردين باشينى سينه‌مه هردن
گئجه نى ايكييه بؤلورم ايندى
اويانيندا سن يات بويانيندا من

نه دئسن حقلي‌سن، منم گناهكار
اۆزونه باخماغا اوتانيرام من
نييه آند ايچيرسن؟ نه احتياج وار
سن يالان دئسن ده اينانيرام من


دئمه كى خوشبخت اول چات آرزو_ كاما
چيلغين گنج ليگیمين سؤنن دمى دير
بو سانكى گؤزو كور اولان آداما،
"گؤزون آيدين اولسون" دئمک كيميدير

داها اؤز سسيمده منه ياد اولوب
هارداسا آغلايان كؤرپه سسى تک
منيم گؤزلريمده حسرت ايز ساليب
كؤرپه لر ائوينين پنجره سى تک


https://t.me/Adabiyyatsevanlar

آغلامازدیم
✍افروز خانیم

آغلامازدیم بو نت آغلاتدی منی
سوپوروب زیر-زیبیله قاتدی منی
سارییب لاپ جوجولو بارماغینا
اوینامازدیم بو نت اویناتدی منی

لاپ‌ شیرین چت ائلییه‌ن واختی گئدیر
کاسیبین باختی کیمی باختی گئدیر
دییه‌سن باش-گوتو چوخ لاخدی گئدیر
آغلامازدیم بو نت آغلاتدی منی

سئله امر ائتدی تاری آغلامادیم
حقوقوم اولدو یاری آغلامادیم
وارلییا توکدو واری آغلامادیم
آغلامازدیم بو نت آغلاتدی منی

ائله کی اینستاگرام دوشدو چَنه
لایوا باخماق دا حرام اولدو منه
نئجه دوشمَز اوره‌ییم گوءر مُحَنه
آغلامازدیم بو نت آغلاتدی منی

بحث ایچینده گوروسَن گوت-باش آتیر
آدامین هئکیلینه مین داش آتیر
نازلی قیزلار کیمی‌دیر، گوز-قاش آتیر
آغلامازدیم بو نت آغلاتدی مَنی

دَیقادا هئی قاچیری نت ماوالا
آبالام سانکی دوشوب‌دیر ایسالا
پاول آنجاق قاباغین بلکه آلا
آغلامازدیم بو نت آغلاتدی منی


توشدو بو سالدیری افروز تورونا
اولدو لاپ ضربه‌ی فنّی کورونا
قویمادیم بو دَلی چاپسین زورونا
آغلامازدیم بو نت آغلاتدی منی

داریخیر کونلو بو گونلر وطنین
اوسکورک-قیزما آلیب جان و تنین
میللتین لاپ چیخادیر نت ده جینین
آغلامازدیم بو نت آغلاتدی منی


https://t.me/Adabiyyatsevanlar

سارای-م

بورجودور
چیلپاق باهار
پنجره آکواریوموندان
اوزور , اوزور
اوزولور اندامی

هاوالانیر
قیوریم- قارا
تئللو تئللو!
شریتده یوخ,
پالتارلاریمیز!

اویسا اوره یی قان اولور
چایدانیمیزداکی,
نه الدّین
و التین
و الزیتون تئللر

اؤز آرامیزدی,
نه آیاق دؤیور!
آرخایین جانلی,
اؤه
اؤه اؤلوم,
قییناغینا گلمیش باهار!

https://t.me/Adabiyyatsevanlar

رامیز_روشن

نه پیس یوخو توتدو منی
گونون گون اورتاسیندا.
بو شهرین، بو کوچه نین،
بو عؤمرون اورتاسیندا.

بیر پیس گون یاتدیم، آنجاق
دوروب گؤردوم پاییزدی.
بو کارتلاری دییش آللاه
من بو عؤمرو اودوزدوم.

گئجسینی، گوندوزونو
گؤتور بیر ده قاریشدیر
دوش، گؤزومون قاباغیندا،
بوردا یئرده قاریشدیر

قارا گونلر آراسیندان
بلکه بیر آغ گون چیخا.
یا چیخا قتلیمه فرمان،
یا اؤلوم حؤکمون چیخا.

آمما جیغاللیق ائله‌مه،
دوز اوینا تمیز اوینا.
من گئدیرم جهننه‌مه،
ایلاهی، منسیز اوینا...!

https://t.me/Adabiyyatsevanlar

شعیر: ودود دوستی‌(ایلقار)
دکلمه: بهزادبیات‌فرد
تنظیم: فاطمه‌محمدپور
استودیو: کینگ‌موزیک

https://t.me/Adabiyyatsevanlar

آراز باری سمفونیاسی
بسته کار: اوزئیر حاجی بی اوف

https://t.me/Adabiyyatsevanlar

"دومان_سفراوغلو"

اورییمده بیتن سئوگی ماهنیسی
پاییز بیداغیندا یازیلی قالدی
سسین یاییلمادی دار کوچه میزدن
آدین دوداغیمدان آسیلی قالدی.

گئدیردین، گیزلیجه گؤزوندن ایراق
اوخشادیم آغلادیم سنه بیر أتک
ألیندن یاپیشیب آپاریردیلار
یایلیغا بوکولن بایرام پایی تک.

گئدیردین یوللاردا باهار سولوردو
بولود گؤزلریمده یاشا دولوردو
شافاق قان قوسوردو چیچک لر گولوش
بنووشه ساچلارین سازاق یولوردو.

قلبیمده بیر آرزی آه چکیر منیم
سنسیز اوزاقلاردا بیته جیم من
داها یوواسیندان کوسن قوش کیمی
تانرینین گؤزوندن ایته جیم من.

الوداع هر گئجه یازدیغیم شعیر
سنی بالتالاییب مندن آلدیلار
من ائله پاییزدا تورپاغا دوشدوم
کفن لنمه ییمی قیشا سالدیلار.

https://t.me/Adabiyyatsevanlar

"سحر خیاوی "

سئوگی‌یه اینان

بلکه گوزلرین پنجره‌سینی باشقادان سیلمک گره‌کیر.بلکه باشقا بیر‌ گوزلوک لازیم دوستوم.
هر اینسان بیر آدادیر،تنهالیغی دولماز دئدین،دوغرو.آمما بیزه ساری اوزانان اینسان اللری بوتون خیانت الی و ویروس الی دئییل.من اینسانلار گورموشم اوره‌کلرینده آلتون گونش گیزله‌نیب.تک باشینا باشقا بیر دونیادیرلار،اوره‌یین آچیلار گزیب دولانسان.
پاییزدا خزللیکلرینده قدم وورارسان.قیشدا اوره‌کلرینین شومینه‌سینده قیزیشارسان.یازدا قرنفیل‌لرینین عطریندن کئفله‌نرسن.یایدا آپ-آرخایین، آغاجلیقلاریندا کولگه‌له‌نرسن.
اوره‌کلریندن آخان دوپ-دورو بولاغلاردان ایچرسن.
هردن اینامین پاسینی آلماق گرک.
بو سَرت دونیادا هئچ نه‌ییله دولمایان یالقیزلیغیمیز،هئچ بارماغیلا چوزولمه‌ین فلسفی دویونلریمیز،بلکه بیربیریمیزه سیغینماقلا بیرآز چکمه‌لی اولار.
هاوا آغیردیر قورقوشوم کیمی،اللرینی گوءندر منه.
سنه اوزانان دوستلوق اللرینی توت،اونلار هامیسی ویروس اللری دئییل.

اینامسیز، قارلی-بورانلی قطب اولار اینسانین اوره‌یی.

اینامسیز، تنهالیق ماغاریندا گوءمولَر اینسان،‌ هارایینی کیمسه ائشیتمز.

اینامسیز، هورومچه‌یه چونَر اینسان،تورلاری گون به گون قاتیلاشار.اوزو اوزونده بوغولار.

اینامسیز، پنجره‌لر بوسبوتون دووار اولار.قاپ-قارا یالقیزلیق کوله‌یی اَسَر.گونش بیزدن کوسَر.

صاباحین ایشیقلی یوللاری بیربیریمیزه اینام و دوستلوقدان کئچه‌جک.
اللریمی توت،صاباح سالدیریسیز،خسته‌لیکسیز دونیادا، یئنی دونیادا یئنی دن دوغولاق.
اوره‌یینی سیل.اوره‌ییندن اوره‌کلره کوءرپو وور.گئرچک سئوگیلره اوره‌کدن اینان دوستوم.

https://t.me/Adabiyyatsevanlar

ساری بولبول
اوخویور : ودود موذن


https://t.me/Adabiyyatsevanlar

‏باغچامیزا گلدی باهار


https://t.me/Adabiyyatsevanlar