ادبیات سئونلر

ايران ادبیاتیندا بيرينجي دفعه علي اکبر دهخدا (دخو)، ميرزه جليل محمدقلی زاده نين فیلياتونلارينين تأثيري آلتيندا بير نئچه حکايه يازيب، "صوراسرافيل" و ساير غزتلرده چاپ ائتديرميشدير کی، سونرالار بو اثرلر "چرند و پرند" آدلي بير کتابدا توپلانميش، اوخوجولارا چاتديريلميشدير.
دونيا شهرتي قازانميش يازيچي، صادق هدايت فارس ديلينده گئنيش يايئلميش حکايه لر يازدي. صادق هدايت ايران معاصر ادبياتينا و اؤزوندن سونراکي يازيچيلارين ياراديجيليغينا چوخ گوجلو تاثير باغيشلادي. اونون يولونون داوامچيلاري بزرگ علوي، محمود اعتمادزاده (م.ا.ب.آذين)، صادق چوبک، سیمین دانشور، غلامحسين ساعدي و باشقالاري اولموشدور.
معاصر ايران حکايه يازانلارين هر بيريسينين اؤزونون مخصوص يئري واردير، آنجاق غلامحسين ساعدي بونلاردان فرقله نير. فرقي بوندادير کي ساعدي بير چوخو کيمي تقليدچي بير يازيچي اولماييب، بلکه فورما و مضمون جهتلريندن يئنيليک گتيرميشدير.
اگر معاصر ایران آذربايجان ادبياتيندا حکايه و رمان ژانريني تدقيقاتچي گؤزو ايله نظردن کئچيرسک، غ. ساعدینين ياراديجيليغي بيرينجي نؤبه ده گؤز قارشيسيندا جانلاناجاق، مخصوص بير آبيده کيمي قارشيميزدا دوراجاق.
دکتر حسن حاجي سيد جوادي "معاصر ايران ادبياتيندا تدقيقات و آراشديرمالار" آدلي اثرينده يازير:
" اونون (ساعدينين) حکايه لرينين اوريژنال خصوصيتلري واردير کي، باشقا يازيچيلاردان سئچيلير. ساعدي شهر و کند جمعيتيني، آهالي نين دولانيشيغيني رفتارلاريني ائله مهارتله قلمه آلير کي، بؤيوک فرانسيز رئاليست يازيچيسي اونوره دو بالزاکين ياراديجيليغيني يادا سالير. بئله ليکله، اگر دئسک کي، ايرانين کندلي، شهرلي آداملارينين عقيده لريني، ايستکلريني، ايناملاريني بيلمک اوچون ساعدينين اثرلريني اوخوماق کفايتدير، هئچ ده مبالغه ائله مه ريک. " (بررسی و تحقیق در ادبیّات معاصر ایران، حاج سیّدجوادی حسن، ص 249)
يازيچي 1314- جي ايلده تبريزده اؤزو دئميشکن پالچيق اوستونه دوشوبدور. (شناخت نامه ی ساعدی، مجابی جواد، ص 449) اؤز حاققيندا فرانسه ده 1363- جي ايلده مصاحبه ده دئييبدير:
"من 1314- جو ايلده بير آز يوخسول عايله ده دوغولموشام. پزشکی دانشکده سینی بيتيرديکدن سونرا، تخصّوصومو تهراندا روان پزشکی رشته سینده باشا چاتديرميشام. دانشکده ده من خسته لري يالنيز بيولوژي جهتلريندن يوخ، بلکه جامعه شناسليق باخيميندان دا آراشديريرديم. منيم بو جور باخيشيم چوخلارينين خوشونا گلميردي، اونا گؤره ده حکومت طرفيندن تعقيبلره معروض قاليرديم." (شناخت نامه ی ساعدی، مجابی جواد، ص 173) بير آيري يئرده يازير:
من اگر بير پزشکی کتابي اوخويوردومسا، عوضينده اون کتاب دا حکايه و رمان اوخويوردوم. يوخومدا دا کتاب و يازيچيلار منيمله ياشاييرديلار. من يوز دفعه چخوفو اوتوردوغوموز اوتاقدان گورموشم کي، پله لرين اوستونده آغاجين آلتيندا اوتوروب، ديوارا سؤيکه نيب منه باخير. آيا، من رؤيادا ياشاييرميشام؟ اؤزوم دئیيرم، يوخ....منيم بيرينجي و ايکينجي کتابيم ايندي منه چوخ مسخره گلير، ائله بيل کي، کتابسيزليقدان بونلاري چاپا وئرميشم. منيم سونراکي کتابلاريم غيرعادي بير وضعيتده يازيليب، ائله دئیيرسن، بلکه، بونلاري قاچا- قاچا يازميشام. بونا گؤره ده من اؤز اثرلريمله باريشا بيلميرم. چوخلاري دئييرلر، من تواضعکار آدامام، آما من باشي آشاغي دينج بير آدام اولسام دا، هئچ ده تواضعکار دييلم. اگر عمروم اولسا - بيليرم چوخ اولماياجاغ- بير يئرده اوتوروب يازاجاغام کي، سسيمي هامي ائشيتسين." (شناخت نامه ی ساعدی، مجابی جواد، ص452)
چوخ تأسفلر اولسون کي، يازيچي بو سؤزلري دییندن سونرا - 1364- جي ايلده پاريس شهرينده دنياسيني ده ييشدي و ايران معاصر داستانی ادبياتينين بنوره سين قويانلارين بيري ايله - صادق هدايتله - پرلاشيز قبرستانيندا ابديت قونشوسو اولدو.
ايران معاصر ادبياتينين بانيلريندن بيري اولان بزرگ علوي بويازيچينين اؤلومونه داير اؤز دوستي باقر مؤمني يه يازير: "ساعدينين اؤلومو چوخ دهشتليدير. هئچ واخت اونو اونودا بيلميرم. بو يازيچي وطندن اوزاق قالماغا تاب گتيره بيلمه دي. من اؤزومون گؤنو قالين اولماغيمدان چوخ تعجبلیيم. بيزيم حاليميزي راحاتليقدا ياشايان آداملار هارادان بيله جک؟ ايسته ديم قلم اليمه گؤتورم اونا داير بير شئي يازام، آنجاق اليم گلمه دي. چتين بير ايشدير. ايکي اللي باشيما چيرپيرام کي، من نيله یيم، نه يازيم؟" (نامه های بزرگ علوی به باقر مومنی ، ص 72)
(دکتر رحمانی)
https://t.me/Adabiyyatsevanlar