اوشاق ادبیاتی
ویدا حشمتی
گؤی قورشاغی

بولودلار یوموش-یوموش
هردن بیر شیمشک چاخیر
الوان-الوان بیر کامان
اوزاقدان بیزه باخیر

داملالار آخا- آخا
سئوینجک یئره چاتیر
گونشین قیزیل تئلی
گول -چیچکلره باتیر

بیر جوت گؤی قورشاغی وار
باخیرلار بیزه ساری
#بنؤشه، #نیله، #ماوی
#یاشیل #نارینجی#ساری

اوشاقلارلا مینیریک
بو قورشاغین بئلینه
زویوب، #قیرمیزی رنگین
آسلانیریق تئلینه

بو گؤزل گؤی قورشاغی
بویالاردان یارانیب
گونشین ایشیغیندان
یئددی رنگه بویانیب

https://t.me/Adabiyyatsevanlar

اوشاق ا بیاتی هرهفته پنجشنبه گونو ادبیات سئونلر کانالیندا


عاریف_نیهات_آسیا

منیم ده بیر آنام اولسا، آنامین
بئشییینی سئوه سئوه ساللاردیم؛
گولسه گول‌لر آچیلیردی ایچیمده
و آغلاسا اینجی اینجی آغلاردیم.
ایشیلدا ائی ماوی سارای ایشیلدا:
پاریل پاریل شه‌نیشین‌لر، قاپیلار...
سنین قیرخ گون، قیرخ گئجه‌لیک دویونون
منیم قیرخ گون، قیرخ گئجه‌لیک یاسیم وار.
سس‌لر گلیر تانکئرلرین دیبیندن:
چیخالیم می، چیخالیم می؟ چیخ دا گؤر!
بیر ییخیلمیش، بیر ییخیلمیش یئرده‌ییک...
داها نه‌لرییخاجاق‌سان ییخ دا گؤر!
چاغلار اوسگوک دولوسویموش و حیات
ایکی ایینه بیر چووالدوز بوْیو یول...
سؤیله آنا: نه‌یه یارار نؤشون‌دیر
دمیر چاریق، دمیر چلیک، دمیر قول؟
اوغلون اولدوم ائی آنالار آناسی...
تورکو‌جه* دئ ماسالجا دا بیلیرم
شه‌نیشین‌دن ساللایارسان ساچینی
ساچلارینا دیرماناراق گلیرم

*تورکو: تورکجه یئرلی ماهنی.

https://t.me/Adabiyyatsevanlar

اوشاق ادبیاتی
ایش اوشاقلاری
یازار : سحر خیاوی

https://t.me/Adabiyyatsevanlar

اوشاق ادبیاتی

مانکن(مظلوم ایش اوشاقلارینا سونولور)
✍سحرخیاوی

کسیب توءکَن شاختا بو ایل داها ائرکن دوشموشدو.آبان آییندا بو سویوق تاریخه یازیلمالی ایدی و ایتی قیلینجی کَسَن؛اوءنده کی سَرت قیشدان خبر وئریردی.
اوغلان همشه کی یئرینده پاساژین گیره جک قاپیسی نین بویرونده دورموشدو.قاباقیندا بیر آغ تَرَزی(ترازو)و قفس ایچینده بیر طوطو قوشو واریدی.بیر قوتو ایچینده ده فال کاغیذلاری بویرونده ایدی.
بو سویوقدا اَیین-باشی تونوکویدو.ایستی پالتار گئیینمیش خوشبخت آداملار چوخلوق سایمازجاسینا اوءنوندن سووشوردیلار.بعضن ده تفرئح اوچون توخ قارینلارینی اونون ترزه سی ایله اولچوب،یوخسا قوشون آغزیندان بیر فال آلیردیلار.نئچه قارا پول اوغلانین کاساسینا آتیردیلار.شَهَرین آدلیم پاساژی همشه کی کیمی او گون ده چوخ گَل-گئتلی ایدی.
چتین اون-اون‌بیر یاشی اولاردی.سویوقدان بالاجا اللرینی قوینوندا گیزلتمیشدی.امما دیشی-دیشینه دَییردی.نازیک بولوز و نیمداش کُت‌و شووه‌رک اَینینی توتموردو.باشیندا بورک یوخویدو. سویوق، نازیک ایدمان تومانیندان کئچیب آریق قیچلارینی اوشودوب ایلیک‌لرینه یئریییردی.هردن آرخین قیراغینا گئدیب وانت دالیندا میوه ساتان ایکی کیشی نین قوردوغو تونقالدا بالاجا اللرینی قیزیشدیریردی.اوتون ایستیسی بیر نئچه آندا اولموش اولسا سولموش یاناقلارینی آلما کیمی قیزاردیردی.
کئچن ایل آداملارا، سوروجولره گول ساتان کیچیک باجیسی گوزونون قاباقیندا ماشین آلتینا گئتمیشدی.اونون بالاجا و مظلوم اوءلومو بیر قاریشقا اوءلومو کیمی سویو-سودان ترپتمه‌میشدی و بیر پیشیک‌بالا اوءلوسو سایقیسیزلیقیلا سویوق تورپاغا تاپشیریلمیشدی.کیمسه اونا یانیخیب؛آغلاییب؛کوورلمه‌میشدی.
بو بویدا وطندن و بوتون نعمتلریندن اونا بالاجا اوءزو بویدا بیر غریب مَزار پای دوشموشدو.یئر کوره‌سی "اولدوز" یوخویموش کیمی گردیشینه داوام ائتمیشدی.امما اوغلانین اوره‌ییندن مکتبدن قاییدان اوشاقلارا؛باجیسی‌نین حسرتلی باخیشلاری هئچ واخت سیلینمیردی.او بالاجا یاشدا اوره‌کدن داغ داشی یاندیران آلاولی "آه"لار چکیردی.

اربابلاری اوءکسوز اوشاقلاری ساخلاسادا،بیر تیکه یئمک و سقفی اولان بیر داخما اونلارا وئردیگینه گوءره اوشاقلاردان اوءلونجه ایش چکیردی.هانسی اوشاق وئییل دولانیب آخشام پول گتیرمه‌سیدی شام یئمه‌ک یئرینه چوبوق و شاللاق یئییردی.
اونون رویا توخوماق حاققی یوخویدو.الینی بیراز قیزدیراندان سونرا بوساطینا طرف قاییتدی.
بیرآن گوءزو پاساژین بویرونده اولان پالتار توکانی قاباقینداکی "مانکن"ه دوشدو.توک وورموردو دوز اونلا یاشیدیدی.امما شیق-گورکملی و یاراشیقلی.آغ اوزو،ساری تئلی و ماوی گوزلری واریدی.اینینده زرشکی باهالی اوزون چرم کاپشئنین زیپی سیخ باغلانمیشدی.آلتیندا یاخا‌ایسکی دوم- آغ بولوزو ایشیلداییردی. معلومیدی کاپشئنین ایچی یون‌دیر و چوخ سیجاق.باشیندا کِرِم رنگی کاموا بورک؛ بوینوندا شال؛اللرینده الجک واریدی.بیر دسته گویچک ساریشین تئلی بورکون آلتیندان ایشیقلی آلنینا توکولموشدو.قیچینادا باهالی؛ چوخ جیبی اولان قالین شالوار گئیمیشدی.
اوغلان حسرت ایله مانکنه دونوخوب قالدی.اوشاقیانا آجی گولومسه‌ییب؛امما سن کی اوشومورسن دوستوم!!دئدی.
بیر آن اوءزونو او پالتارلارین ایچینده حیس ائتدی.سولقون دوداقلاری گولومسه‌ییب جانی قیزیشدی.امما بو یالنیز بیرآن چکدی. داها درین تیتره‌دی.
آخشام داخمالاریندا باشقا خاطیره‌سیز و آرزوسیز اوشاقلارلا بیرگه بیر تیکه یئییب -یئمه میش؛دانیشمادان؛گولمه دن؛ اوینامادان؛یورغونلوقدان خورولتولاری کوهنه دام_دوواری تیتره دیردی.بعضیلرینین ائله تیکه الینده قالیب یوخلامیشدیلار.
یاشارین دوداقینا آنجاق کیمسه گورمه دن؛شیرین و دَرین بیر گولومسه قونموشدو.نه بیلیم بلکه یوخوسوندا اوءزونو او سیجاق و یوموشاق پالتارلار ایچینده گوروردو.بلکه ده اوزونو خوشبخت و آتا-آنالی گوروردو.بلکه باجیسینی دیریلمیش گوروردو.بلکه ده....گوروردو بیر "مانکن"اولوب!!

https://t.me/Adabiyyatsevanlar

اوشاق ادبیاتی
اوشاق و یئنی یئتمه ادبیاتی نین ییرمی قارلارقی کیتابی
حاضیرلایان ادبیات سئونلر
چئویرن : سحر خیاوی

https://t.me/Adabiyyatsevanlar

اوشاق ادبیاتی

اوشاق و یئنی یئتمه ادبیاتی‌نین ییرمی قالارقی کیتابی

حاضیرلایان :ادبیات سئونلر
چئویرن : سحر خیاوی

انگلیسده چاپ اولان تلگراف قزئتی بیر فهرست ده اوشاق ادبیاتی‌نین ییرمی قالارقی کیتابلارینین آدلارینی چاپ ائتدی:
ا)کولَک‌ده سویود/کنت گراهام
بو کیتاب"دوستلوق و اخلاق"باره ده یوزمین دن آرتیق نوسخه ده چاپ اولوب و هر ایل مین لر دفعه عائیله‌لر وریندن اوشاقلارینا آلینیب.گراهامین چکیجی و آخیجی نثری اوچ یئنی یئتمه مول،رتی و باجرین ناغیلی دیر.بو اوچ اوشاق یاشاملارینی چوخلوق آوانتوراچیلیق(ماجراجویی)ایله کئچیردیرلر.و قالان واختلاریندا گمی‌لرینده سووشدورورلار.بو اوچ نفر تصمیم توتورلار خطرلی سفرلرینده بیر قورباغایا کومک ائتسینلر.بو ماجرادا دوستاقدان قاچیب و آرابا سورمَک یاریشیندا مشارکت ائله ییرلر بلکه قورباغانین ائوینی آلسینلار...

۲)حلقه لرین اربابی/جی.آر.آر تالکین
تالکین‌ین حماسی حیکایه‌سی اسکی بیر یوردا(اورتاق یوردا)غلبه چالماقی روایت اولور و چوخ ساواشلار یاخشی-پیس قووه‌لری آراسیندا اوردا اوز وئریر.۱۹۵۴دن ایندییه‌جن تقریبن۱۵۰‌ میلیون نوسخه بو کیتابدان ساتیلیب و اوچ قیسمت ده سئریالی اُسکار اودول‌لرینین چوخونو قازانیب.داستان فورودو هابیت‌لردن اولان بیر اوغلان اوشاقی باره‌ده دیر.او وفالی دوستلاری ایله بیرگه خطرلی حلقه‌نی "فنا"داغینا آپاریب اوردا آرادان آپارماق ایسته‌ییرلر.بو یولدا اونا و دوستلارینا بیر حادیثه‌لر اوز وئریر.بو حادیثه‌لرین هامیسی ایشیق قووه سی و سایرون لشکری یا همن قارانلیق اربابی‌نین قارشیلاشماسینا شامیل اولور.

۳)هری پاتر/جی کی رولینگ
۱۹۹۷ ده هری پاتر داستانلاری توپلوسونران هری پاتر و سئحیربازلیق مکتبی و جادو داشی بازارا گله‌ندن ایندییه‌جن بو انگلیس یازارینین حیکایه‌لری ۶۷ دونیا دیلینه چئوریلیب و دونیانین باشاباشیندا ۴۰۰میلیون نوسخه دن آرتیق ساتیلیب.بو توپلومون داستانلاری هری‌پاتر و ایکی یولداشی رون‌ویزلی و هرمونی‌گرانجری روایت ائله‌ییر.اونلار لُرد وُلدومورتون جادو قووه‌سینی دایاندیرماق ایسته‌ییرلر.وُلدومورت هر کیتابدا باشقا بیر شکیلده ظاهیر اولوب هَری‌نی اولدورمه‌یه نقشه چکیر.

۴)اَش‌ین شیطانی قووه‌سی/فیلیپ پولمن
بو کیتابلار بیر توپلوم خیالی داستانلاردیرلار.بو کیتابلارین یازاری فیلیپ‌پولمن دیر.بو کیتابلار سیرایلا:
گونئی سحری،ظریف خنجر،کهربا دوربینی دیرلر.بو کیتابلار ۱۹۹۵،۱۹۹۷ و ۲۰۰۰ اینجی ایللرده چاپ اولوبلار.ایلکین کیتاب آمریکادا آلتون قطب‌نما تانینیب و ۲۰۰۷ده بو عنواندا بیر فیلیم دوزه‌لیب.بو فیلیم ۲۰۰۸ده اسکار و بافتا اودولونون آپارانی اولدو(اوزل گورکملرینه سبب).اوچونجو کیتاب۲۰۰۸ده ایلین "آق قوش"اودولونو آلدی.بو اودول اعتیبارلی ادبی اودول دیر.

۵)نارنیا ناغیللاری:شیر،جادوگر و پالتار ایشکافی/سی‌اس لوئیس
پیتر،سوزان،ادموند و لوسی شیروانی آلتینداکی اوتاقین پالتار ایشکافینا کئچیرلر و غریبه بیر یورددان باش چیخاردیرلار.او یئرین اهلینی"نارنیا"چاغیریرلار.اصلان بیر شیردیر.او سئحیرباز و سویوق ملکه سی نین دوشمانی دیر.بو دورد یئنی یئتمه اوشاغا اوز وئرن حادیثه لر بو داستانلاری روایت ائدیرلر.بو کیتاب اوزوندن ایندییه‌جن بیر سری فیلیم دوزه ‌لیب.۸۵میلیون نوسخه ساتیلیب و ۲۹ دونیا دیلینه چئوریلیب.

۶)آج قورد/ایریک کارل
بو حیکایه بیر ایپک قوردونون آجلیق روایتی دیر.اونون یاشامی بیر سودگونو یارپاق اوستونه دوشَن بیر توخومدان باشلانیر و او بیریسی هفته بیر گوزل کپه نه‌یه چونور.دوزگونو او بیر آلما یئییر امما یئنه آج و بالاجا قالیر.آراگون ایکی آرمود یئییر،بیرآز یئکه‌لیر امما یئنه آج‌دیر.چرشنبه گونو اوچ آلو یئییر یئنه آج دیر.جومعه آخشامی دورد توت‌فرنگی یئییر بیرآزدا یئکه‌لیر امما یئنه آج‌دیر.جومعه بئش پرتقال یئییر،یئکه لیر امما آج دیر.شنبه چئشیدلی شئیلر ساندویچ،سوسیس،بستنی و باشقا شئیلر یئییر.بو گونون سونوندا بیر گویچک کپنک اولور.
قیرخ ایل بوندان اونجه ۱۹۶۹دا بو تاثیرلی حیکایه یازیلدی و دورد اون ایللیک میلیونلار اوشاقی دونیانین باشاباشیندا حئیرتلی قویدو.
میلیونلار نوسخه ساتیلان بو کیتاب یالنیز ۲۲۵سوزجوک دیر.بو داستاندا اوشاقلار هفته نین گونلری،عددلرین ساناماقی و لاپ اونملی یاشام چرخه سی ایله تانیش اولورلار.بو داستاندا ایپک قوردو گوزل و ایستکلی شکیللریله چکیلیب.بو ساده اوزللیک لر بو کیتابی بیر دونیالیق کلاسیک شاه اثره چئویریب.

۷)اوجقارداکی آغاج
بو کیتاب ایلک دفعه ۱۹۴۳ده چاپ اولدو.اوچ یئنی یئتمه جو،بسی و فانی نی روایت ائله ییر.اونلار بیر بویوک آغاجی تاپیب و بیر افسانه‌وی ساواشدا آغاجدا یاشایان جانلیلاریلا تانیش اولورلار.بو ناغیل اوشاق و یئنی یئتمه لرین ماراقینی قازانیر.او غریب امما مهریبان و ایستکلی جانلیلار یاراتماقلا بو آغاجین داستانلاری و اونون اهلینین مخالیف دوشمانلاریلا ساواشی‌؛ائله بیر هیجان اوشاقلاردا یارادیر کی قیرخ ایلد

ن سونرا هله ده اونلارین آراسیندا دیری قالیب.

۸)بابار/ژان دی برونوف
بو داستان ایلک کره یوخاری تیراژدا فرانسه لی یازارین سو‌بویاسی رسیملری ایله بیرگه چاپ اولدو.بی‌بی‌سی شبکه سی کارتونونو پخش ائدندن سونرا انگلیسی نوسخه سی عزیزلندی.بو کیتابین داستانلاری بیر فیل عائیله‌سینی روایت ائله‌ییر.بو عائیله‌یه چوخلو حادیثه‌لر اوز وئریر.بابار کارتونلاری ایلک دفعه۱۹۸۹دا پخش اولدو و ۱۹۹۱جن داواملاندی.۲۰۰۰اینجی ایلده ۱۳ مجموعه ده اونا آرتدی.
بابار بیر گون بیر شهره گئدیر.اوردا بیر مهریبان قاری ایله دوست اولور.اونلا یاشاییر.او اینسانلارین کناریندا یاشاماقلا چوخلو تجروبه لر اله گتیریر.امما همشه مئشه یه قاییتماق و باشقا بالاجا فیل‌لر و میمونلارلا اویناماقی آرزولاییر.
او ایکی بالاجا فیل‌ایله تانیش اولور.اونلار عم‌قیزی و عم‌اوغلوسو دیرلار.اونلارلا مئشه‌یه قاییدیر.بابار عمقیزیسی سلست‌ایله ائوله نیر و اینسانلاردان اویرندیکلری سببه فیل‌لرین پادشاهی عنواندا سئچیلیر.

۹)گنج آداسی/آر ال استیونسون

قوجا گمی‌چی بیر موسافیرخانادا اوءلور."جیم"آدیندا بیر یئنی یئتمه آناسی ایله قوجانین صاندیقچاسیندا،بیر گنج نقشه‌سی تاپیرلار.
جیم و دوستلاری گنج تاپماغا اوزاق بیر آدایا سفر ائله‌ییرلر.امما دنیز اوغرولاری دا گنج گزیرلر.هانسی اوغور قازاناجاقلار؟جیم و دوستلاری آغاج قیچلی "جان سیلور"ه اعتیماد ائده بیلر لر؟
ایندییه‌جن ۷۴ سینما فیلیمی و تلویزیون و رادیو برنامه لری بو کیتاب اوزوندن دوزه‌لیب.بو کیتاب لاپ قالارقی اوشاق ادبیاتی اثری دیر.

۱۰)دمیر یولونون اوشاقلاری/ای نسبیت
روبرتا، پیتر و فیلیس آتالارینا گوزله‌نیلمز حادیثه اوز وئردیینه گوره،آنالاری ایله ائولرینی ترک ائتمه‌یه مجبور اولوبلار و بیر کیچیک ائوده دمیر یولو کناریندا یاشاییرلار.آنا اوشاقلارین حادیثه دن خبرسیزلیگی‌نی ایسته‌ییر امما اوشاقلار چوخ ماجرالاردان سونرا حادیثه دن خبردار اولورلار.
دمیریولو اوشاقلاری بو اوشاقلارین چالیشماسی یاشامین موشکوللری و مسئله لری‌ایله دیر.یوخسوللوق،آتا اوزاقلیغی، آنا ناراحاتلیغی اونلارین یاشامین چتین ائله‌ییب.امما دمیریولونون کناریندا یاشاماق اونلارا هیجانلی دیر.قطارلارین تاماشاسی،موسافیرلره ال قووزاماق اونلارین لذتلی و باش قال ائدن ایشی دیر.ادیت نسبیت "دمیریولو اوشاقلاری"‌نی ۱۹۰۶دا چاپ ائدیب و ایندییه جه همشه چاپ اولوب...

آردی وار...

https://t.me/Adabiyyatsevanlar

اوشاق ادبیاتی

▫️...اما كي آرزوم بؤيوك

شعر: بهروز_صدیق
اوخویور: آتیلا_فیروز.


https://t.me/Adabiyyatsevanlar

ادبیات سئونلر کانالینین دیکلمه یاریشماسی نین شرط لری

1-یالنیز مونصوفلر هئیئیتینین وریندن سئچیلمیش شعیر ،یاریشمایا داخیل اولاجاق .
یاریشمایا قاتیلانلارین بیرینجی اعلاندان اوچ گون سونراواقتلاری وار کی یاریشمایا قاتیلسینلار دیکلمه لرین ادبیات سئونلر اویه لریندن ، مونصوفلر هئیئتینیه ، یاریشمایا اعلان اولان ادرسه گوندرسین لر.

تعیین اولونموش زاماندان سونرا الیمیزه چاتان دیکلمه لر یاریشا داخیل اولمایا جاق
2- یاریشما ، ساعات‌21ده باشلاناجاق ساعات 22 دن سونرا الیمیزه چاتان دیکلمه لریارشمایا داخیل اولمایاجاقلار .
3-یاریشمایا تکجه بیردفه دیکلمه گوندرمک اولار،
4- دیکلمه نین غالیب لری مونصوفلر هئیئیتینین وریندن تعیین اولاجاق ( قازاندیقلاری بال اساسیندا تعین اولاجاق ).
اوچ نفر غالیبه ،ادبیات سئونلر وریندن لووح سونولاجاق .
5-اوزمانلار دیکلمه لرین باره سینده نظرلرین یئکونلاشدیریب بیرلیکده واحید نظر اعلان ائده جک لر .
6-یاریشمایا قاتیلماق آزاد و اختیاری دیر .
بوتون قوروپلارین کاناللارین ،...اویه لری یاریشمایا قاتیلا بیلرلر.
7-الیمیزه چاتان دیکلمه لرین سایی چوخ اولسا، غالیب لرین تعیین اولونماسی اوچ گوندن سونرا اعلان اولاجاق.
8-مونصوفلر هئیّتی نین نظری عموما اعلان اولاجاق .

9- یاریشمانین اوزمانلاری : سرکار خانیم میر حسینی ، دوکتور احمد ستاری ، جناب مهدی سمساری وکریم قربانزاده اولاجاقلار.
( دوکتور ارشد نظری سئچیلن شعیرلرین فنی مسئولودولار )
10-یاریشما هئیئتینین داخلی بولگولری اولاجاق
موسیقی بولگوسو ، شعر بولگوسو ، اودول بولگوسو ،روابط عمومی بولگوسو ...
11-مونصوفلر هئیئتی یاریشمانین هر اون آیتئمینه موستقیل بال وئره جک لر.
12-غالیب لر، مونصوفلر هئیئتینین اکثریتنین حاضیر لیغی و سسیله تعیین اولمالی دیر.

13-مونصوفلر هئیئتینین اکثریتینین نظریله یاریشمانی، معین دلیللره گوره دایاندریب ، وحتتا لغو ائتمک اولار.
14-یاریشمانین دایاندیرماغی نین دلیللری

الیف -مونصوف لر هئیئتی اکثرییته چاتمایالار
ب-یاریشمادا ائله بیر یانلیشلیقلار اولا کی یاریشمانین نئجه لییینه و غالیب لرین سئچمه سینه نوقصان یئتیره و عدالتی آرادان آپارا .
15-یاریشمانین اوُدوللرین بیر آی موددتیندن سونرایا قدر غالیب لره سونولمالی دیر .
یاریشمانین و ( اودلوللرین ) خرجی هله لیک ادبیات سئونلر کانالینین بوینونادیر .
ادبیات سئونلر اسپانسر توتماغا ، ادبیات سئونلردن ، یاریشمایا قوشولانلاردان یاردیم آلماغا آزاددیر.
16- یاریشمایا عایید خبر لر ، بیلدیریشلر ، غالیب لرین تعیین ائتمه سی ادبیات سئونلر کانالیندا اولاجاق دیر .

https://t.me/Adabiyyatsevanlar

صابرجهانگيری(سوسقون)

پنجره لر

سازاقلی بير قيش الينده دونوبدو پنجره لر
ياديرغاميش كوچه لردن دؤنوبدو پنجره لر

بلا ياغيرگؤيه يئرده ن ، بوترسه ایش لره باخ
اودوركي آرخاسي اوسته چؤنوبدو پنجره لر

آداخلي سيرسيرالاردان كوسوب قارانقوشلار
دمير تيكانلارا چون كی دؤنوبدو پنجره لر

اوقدري يوللارا حسرتله گؤز تيكيب من تك
كئدرلي چرچووه سينده يونوبدو پنجره لر

ياشيل گؤيرچينه داش وورديلار، وورولموشلار
اودور دووارلارا قوش تك قونوبدو پنجره لر

لال اولمادان نه دئييرلر يانيخلي بيربيرينه
بوجوركی سن كيمی سوسقون سؤنوبدوپنجره لر

https://t.me/Adabiyyatsevanlar

✅خبر

🔸 «رقیه کبیری» برنده جایزه بخش داستان اقتباسی جشنواره فیلم کوتاه تهران شد

▫️سی‌وششمین جشنواره بین‌المللی فیلم کوتاه تهران با شناخت برگزیدگان در بخش‌های مختلف به کار خود پایان داد.

▫️رقیه کبیری، نویسنده آذربایجانی توانست در بین ۶۵۰ اثر راه یافته به بخش "داستان های کوتاه برای اقتباس" این جشنواره با "پاسبان‌های بطنم" مقام دومی این جشنواره را کسب بکند.

https://t.me/Adabiyyatsevanlar

✍سحر_خییاوی
گئدیرسن‌سه؛
اللرینین بولودلوغونو؛
سَر بو شَهَرین قیسیر گؤیونه؛ خاتین!
ساختادیر بوز بولودلار
سووارمیر یانقین کؤنلومو
باخیشلار شاختا
دوداقلار لابراتوار اسکلتی کیمی گولور
اللر سینیق کؤرپودو؛ آیاقلاریم سویروشور
یاندیر شعرینین شومینه‌سینی
منی ده آل قوینونا
من اوره‌ک‌لرین سورکلی قیشیندان قورخورام!!

سورکلی: دیرپای
بوز: خاکستری

https://t.me/Adabiyyatsevanlar

ویدا حشمتی

بوتون پای-بؤلوشلردن
منه قالان اؤزلم اولدو .
سانکی
کیلسه لر خاچیندان آسیلان من دییلمیشم
سانکی
بارماقلاریمدان امیزدیرمه میشم بو ارکک دونیانی .
اته ییمده دالغالانان چین دوواری
گؤزلریمدن داشلانان هئراکلیت چایی
یاناغیما سوزولن باش ساری تئل
"سانکی
بیر حئکایه دیر" قادین ، قودا ، خودا
قینامایین آلچاق دوواریمی
اوُگئی دوغولموشام بلکه !
آزغی سوزولموشم دئیه سن
دونیانین جینسل باجاسیندان !
بوتون آیه لر منسیز
کؤیسومده اوچوشان گؤیرچینلر دنسیز
من کی گؤبه لک یئریکلمه میشم مین ؛ مین ؛
شاباشیمدا دا یوخویدو هیروشیما باشینا سپیلن تویلوق
منه باخ !!!
آی باشیندان بیر دیش قیرتیب گیزله دیرم
گیزلی آغریلاریما
گونه باخان تاباغینا چئوریلمک ایستیر اللریم
لالا دونونا گیرمک ایستیر ساری گوللریم .
قویولاردا باتمیش بیر سسم
سویوق دادی وئریر بوتون فصیللریم .



Bütün pay-bölüşlərdən
Mənə qalan özləm oldu.
Sankı
Kilisələr xaçından asılan mən dəyilmişəm
Sankı
Barmaqlarımdan əmizdirməmişəm bu ərkək dunyanı.
Ətəyimdə dalğalanan Çin duvarı
Gözlərimdən daşlanan Heraklıt çayı
Yanağıma süzülən baş sarı tel
"Sankı
Bir hikayədir" qadın, quda, xuda
Qinamayın alçaq duvarıml
Ögey doğulmuşam bəlkə!
Azğı süzülmüşəm deyəsən
Dunyanın cinsəl bacasından!
Bütün ayələr mənsiz
Göysümdə uçuşan göyərçinlər dənsiz
Mənki göbələk yerikləmişəm min, min,
Şabaşımda da yoxuydu Hiroşima başına səpilən toyluq
Mənə bax!!!
Ay başından bir diş qırtıb, gizlədirəm
Gizli ağrılarıma
Günə baxan tabağına çevrilmək istir əllərim
Lala donuna girmək istir sarı güllərim.
Quyularda batmış bir səsəm
Soyuq dadı verər bütün fəsillərim.

Vida Heşməti

https://t.me/Adabiyyatsevanlar

اوزه ل دانیشیق تانینمیش شاعیر : وصله هدایت قیزیله .
آپاریجی ؛ کریم قربانزاده
https://t.me/Adabiyyatsevanlar

اوزه ل دانیشیق تانیمیش شاعیر : وصله هدایت قیزیله .
آپاریجی ؛ کریم قربانزاده
https://t.me/Adabiyyatsevanlar

اوزه ل دانیشیق تانینمیش شاعیر : وصله هدایت قیزیله .
آپاریجی ؛ کریم قربانزاده
https://t.me/Adabiyyatsevanlar

اوزه ل دانیشیق تانینمیش شاعیر : وصله هدایت قیزیله .
آپاریجی ؛ کریم قربانزاده
https://t.me/Adabiyyatsevanlar

اوزه ل دانیشیق تانینمیش شاعیر : وصله هدایت قیزیله .
آپاریجی ؛ کریم قربانزاده
https://t.me/Adabiyyatsevanlar

اوزه ل دانیشیق تانینمیش شاعیر : وصله هدایت قیزیله .
آپاریجی ؛ کریم قربانزاده
https://t.me/Adabiyyatsevanlar

اوزه ل دانیشیق تانینمیش شاعیر : وصله هدایت قیزیله .
آپاریجی ؛ کریم قربانزاده
https://t.me/Adabiyyatsevanlar