شاعیر: رسول یونان
سس: سون باهار
https://t.me/Adabiyyatsevanlar

شاعیر : رسول یونان
سس : سالاربی
https://t.me/Adabiyyatsevanlar

شاعیر : رسول یونان
سس: پریسا حیدری ( گونش )
https://t.me/Adabiyyatsevanlar

شاعیر : رسول یونان
سس : خانیم دباغی
https://t.me/Adabiyyatsevanlar

🔴🔴🔴🔴سایین کانالداشلار
بو گئجه 96/06/21ساعات 22 دن ساعات 23/30 قدر ادبیات سئونلر گروپوندا اوستاد دوکتور رحمانی دونیا ادبیاتیندان دانیشاجاق بو دانیشیق عینی زاماندا ادبیات سئونلر کانالینداندا یایلاجاق عزیز دوستلاری سیجاق قاتیلماغا دعوت ائدیریک .
https://t.me/Adabiyyatsevanlar

آی آغالار قانادلاناق یئل کیمی
اؤزوموزو گؤیده گونه یئتیرک
آلاق اله آیدین لیغین چاخیرین
قارانلیغی اورکلردن گؤتورک

بولاق کیمی داش ایچیندن داشلاناق
آغاج اولوب یاشیل لاناق یاشلاناق
سعادتلی بیر یاشاملا باشلاناق
اومود تاغین باغچامیزا بیتیرک

سازالدیقجا چالاق دوزگون هاوالار
کونوللرده سالسین سؤزلر جادالار
سوروب گئتسین اوزاقلارا قادالار
شنلیک لری یوردموزا گتیرک.

"فیروز سیمین فر"
https://t.me/Adabiyyatsevanlar

ایسته دیم آناما بیر شعیر یازام
اویاندی شیرین یوخودان شعریمین گئجه یاریلاری
قولاق سانجیسینا
قونداق قوخوسونا
سیزیلدادی شعریمین سوت سوز دؤشلری آجیقمیش دوداقلاریما
ایسته دیم آناما بیر شعیر یازام
پیچاق کسدی بارماغیمین کؤرپه لیگین
سارقی ائتدی بارماقیما ساچلارینی شعریم
ایسته دیم آناما بیر شعیر یازام
قیزیلجا چیخاردیب سپدی اوشاقلیقیم
کوت گئتدی شعریمین یاناقلاری تندیرینین اوره گینده
آیاقیم بودره مه میش دامین قیرناسیندان
اوچوقلادی شعریمین دوداقلاری
ایسته دیم آنامین سون شعرین یازان
یومدو گؤزلرینی خاطیره لردن
گئییب آغ پالتارین
یوخ اولدو شعریم...

"ارشد نظری"
https://t.me/Adabiyyatsevanlar

دونیا ادبیاتی ادبیات سئونلر گروپوندا 96/06/21
دانیشیغی آپاران : کریم قربانزاده
https://t.me/Adabiyyatsevanlar

دونیا ادبیاتی : دانیشیر اوستاد دوکتور رحمانی-1

https://t.me/Adabiyyatsevanlar

دونیا ادبیاتی : دانیشیر اوستاد دوکتور رحمانی -2
https://t.me/Adabiyyatsevanlar

دونیا ادبیاتی : دانیشیر اوستاد دوکتور رحمانی -3
https://t.me/Adabiyyatsevanlar

دونیا ادبیاتی : دانیشیر اوستاد دوکتور رحمانی -4
https://t.me/Adabiyyatsevanlar

دونیا ادبیاتی :دانشیر اوستاد دوکتور رحمانی-5
https://t.me/Adabiyyatsevanlar

دونیا ادبیاتی : دانیشیر اوستاد دوکتور رحمانی -6
https://t.me/Adabiyyatsevanlar

دونیا ادبیاتی : دانیشیر اوستاد دوکتور رحمانی -7 96/06/21
https://t.me/Adabiyyatsevanlar

باغلی قالمیش پنجره
اینجیدیرمنی اینجدیر
کئچن آجی خاطره لر
اینجیدیر منی اینجدیر

قولاغیمدا یئل نفسی
شامین تیتره ین کولکه سی
چیرپدیغین قاپینین سسی
اینجیدیر منی اینجدیر

سن گئتدیین سویوق گئجه
ایلانا چئوریلن کوچه
یوخومداکی اولو سئرچه
اینجیدیر منی اینجدیر

گوزوندن باشلانان قیشی
قاری بورانی یاغیشی
اونودماق المور کئچمیشی
اینجیدیر منی اینجدیر...

رسول یونان .
https://t.me/Adabiyyatsevanlar

توْزلو آياغيم
شعر: همت شهبازی


ايسته‌ييرسن
باخيشيمين پاسلي آياغيني
سارماشيقلي اته‌يينه سريم؟!
گؤزلري‌نين اؤنونده
باشماق تاخسام آياغيما
داباني جيريق
و موردار قوْخولودور.
باشماق‌سيز دوْلانسام
ايز سالاجاق گؤزلرينه
تؤزلو آياغيم.
قوْي ديرچلسين اوره‌ييم سنينله.
دنيزله ساحيلي قوْووشدوران
دالغالاردير.
سينيق قاناديمدان دوت،
سينيق قاناديندان دوتوم.
دالغالاردير
دنيزله ساحيلي قوْووشدوران.
ايسته‌ميرم
ايسته‌ميرم
دووارلارا سووانسين
يام‌ـ ياشيل خوْل ـ بوداغين.
گؤزلريمين يوموشاق اوزانماسينا باخ
اينانميرسان اگر.


همت_شهبازی
https://t.me/Adabiyyatsevanlar

دده قورقود

دوكتور حسين محمدزاده صديق
«دده قورقود» آدي آلتيندا، دوققوز بؤلومده 300 صحيفه ليك جاذيبه لي بير اثر، حؤرمتلي چاغداش عاليميميز «عزيز محسني» طرفيندن نشر اولموشدور.

مجموعه نين بيرينجي حيصه سي «دده قورقود دونياسي» آدلانير. بو حيصه ده اصلينده موليف، « آنار رضايف» اليله يازيلان بديعي بير اثرين اليفباسين دييشيب، همده نثرينده بعضي تغييرلر ايجاد ائديب و بير چوخ چتين و آغير آنلاشيلان سؤزجوكلري ده اتك يازيلاردا معنا ائديب، 180 صحيفه يه يئرلشديريبدير. همين حيصه ني 1356 ـ جي ايلده آقاي ابراهيم دارابي فارسجايا چئويريب تهراندا « حماسه ي دده قورقود» عنواني ايله نشر ائتديرميشدير. آقاي محسني ايسه ، توركجه متنين ايران اوخوجولاري اوچون ساده لشميش فورماسيني ، آغير امك صرف ائدرك ، حاضيرلاميشدير.

بو حيصه ده دده قورقود بويلارينين جوغرافي محدوده سي، آبيده نين ديلي و شيوه سينين تاريخي و توصيفي ديل بيلگيسي حاققيندا بحثلر گئدير و بويلارين اساس آپاريجي ايده يالاريندان دانيشيلير. ايسارتدن، مطيعليكدن، كؤكونه ـ سويونا دؤنوك چيخماقدانسا اؤلمگي داها اوستون توتماق كيمي سجيه لردن دانيشيلر. ها بئله بو حيصه ده اورخون آبيده لري ، قوتادغو بيليك و ديوان لغات الترك كيمي كيتابلاردان صؤحبت گئدير. كؤچورتمه ايشينين بعضي جزئي سهولرينه باخماياراق، منجه موعاصير اوخوجو خصوصيله گنجلريميز اوچون چوخ لازم اولان بير متني حاضيرلانميشدير.

اثرين ايكينجي حيصه سينده « باساتين تپه گؤزو اؤلدوردويو بوي» ون اصل و اسكي متني 3 ـ جو حيصه ده ايسه همين متنين چاغداش فورماسي وئريلميشدير.

دؤردونجو و بئشينجي حيصه ايسه عئيني شكيلده «دوخا قوجا اوغلو دلي دومرول» بويونو احتوا ائدير. بو دؤرد حيصه ايسه « فرهاد زينالزاده» و «صامت عليزاده» نين ترتيب ائتديكلري متنلرين اليفباسي كؤچؤروله رك حاضيرلانميشدير.

يئنه ده حؤرمتلي مولف بو كؤچورتمه ايشينده چوخلو ديقت صرف ائدرك، موعاصير اوخوجو اوچون تميز و ساغلام متن حاضيرلايا بيلميشدير. گنج اوخوجو، بويلارين اسكي متنلريني ساده لشديريلميش متنلر ايله موقايسه ائديب بير چوخ سؤزجوكلرين معنالاريني منيمسه ييب آنلايا بيله جكدير . بو دؤرد حيصه 183 ـ جو صحيفه دن 242 ـ جي صحيفه قدر يئر آلميشدير.

5 ـ جي حيصه ني (ص278 ـ 243 ) عزيز محسني اؤزو يازميشدير. بورادا، او ، دده قورقود كيتابينين هر 12 حماسه سيني خلاصه ائديب، ييغجام شكيلده آخيجي و روان بير اسلوبدا قلمه آليب و هر حماسه اوچون قيساجا «ايضاح و شرح» ده يازميشدير .

اثرين سونكو بؤلومونده « ديوان لغات الترك» حاققيندا معلومات وار و « ايضاحلار» بؤلومونده ايسه اليفبا سيراسي ايله كيتابدا گئدن اؤزل آدلار حاققيندا علمي بيلگيلر وئريلير
(ص290 ـ 280 ) .

اثرين سون حيصه سي ( ص 302 ـ 291) ، « خلاصه و نتيجه» آدلانير. بو بؤلومده دده قورقود حماسه لري حاققيندا ييغجام بيلگي وئريلير. توركلرين اسكي اينانجلاري ، اثرين ايسلامدان قاباق يازييا كؤچورولمه نظريه سي ، بويلاردا قادينا موناسيبت ، عشق و سئوگي موضوع و بو كيمي مساله لر بحثه قويولور. موليف حاقلي اولاراق دئييركي «كتاب دده قورقود» چيچكلري سولماق بيلمه ين ، ابدي قالان، زامان ـ زامان نسيللري حئيران قويان بير سؤنمز اينجه صنعت گونشي دير.

مجموعه چوخ قيمتلي و گنجلريميز اوچون فايداليدير. گرچه بعضا جزئي و حتي جيدي سهولره ده راست گليريك. ميثال اوچون بير يئرده اوغوزلارين آذربايجاندا مسكون اولمالاريني 11 ـ 10 ـ جو عصرلره باغلايان موليف ، جيدي بير سهوه قاتيلير. بيز بيليريك كي اوغوزلارين و آذلارين بيزيم تورپاقلاردا يئددي مين ايلليك مسكون اولما تاريخلري واردير. يئني تاپينتيلار بو مساله ني داها موباحيثه سيز حالا گتيريبدير. آذربايجان تورپاقلارينا تاريخ بويونجا هر عصرده تورك آخيني باش وئرميشدير. و لاكين هئچ بير آخين توركلرين بورايا گلمه لرينين باشلانغيجي ساييلمير. آذربايجان اساس و اصلا تورك يوردودور. باشقا قووملار هر زامان آزينليق تشكيل ائتميشلر و يا سياسي حاديثه نتيجه سينده يئرلشديريلميشلر. اگر قبول ائتسك كي اوغوزلار 11 ـ 10 ـ جو عصرلرده آذربايجانا گلميشلر، اوندا بئله بير سوال قاباغا چيخاجاق كي بس اوندان قاباق بو تورپاقلاردا كيملر و هانسي ميلتلر ياشاييرديلار؟

اوغلارين و آذلارين يئددي مين ايل بوندان قاباقدان قالميش ماغارالاري، يئر آلتي آوادانليقلاري، داش يازيلاري و كتيبه لري ايندي علم عالمينه معلوم اولان بديهي و آيدين بير ثبوتلارديرلار. باشقا ميلتلر سونرالار توركلره، داها دوغروسو آذربايجانليلارا پناه گتيريب ، سيغينيب، ياشاما ايمكاني تاپا بيلميشلر. تاسفله بئله جيدي سهولر، تدقيقاتچيلاريميزين بير چوخونون اثرلرينده گؤزه دَيير كي گنجلريميزين تربيه لنمه لرينه پيس تاثير بوراخا بيلر.

هر حالدا حؤرمتلي عاليم و اديب و تنقيدچي اولان آقاي «عزيز محسني» نين ترتيب ائتديگي « دده قورقود» آدلي مجموعه ني من علمي باخيمدان يوكسك درجه ده دَيرلنديرمگه اؤزومه حق وئريرم.
https://t.me/Adabiyyatsevanlar

مریم
کریم قربانزاده
بوگون ائوه گئتمه‌یه یامان تلسیردیم؛ آخی، دوز اوتوز ایل بوندان اوول بیر پاییز آخشامیندا, شاه‌گؤلونون پیلله‌لرینی ائنه- ائنه مریم‌له بیر- بیریمیزه جان دئییب, جان ائشیتمه‌یه سؤز وئرمیشدیک. یئلین, یارپاقلاری اویناتماغینا باخمادان، قارقالارین تر- تلسیک گل- ‌گئت‌لرینی گؤرمه‌دن، لپه‌له‌نن گؤلون کناریندا عهد و پیمان باغلامیشدیق. یوواسینا سیخیلان بیر قوش کیمی قلبینین دؤیونتوسونون سسینی ائشیدیردیم. شیمشک‌لی, دلی بولودلار های‌-کوی‌ایله باشیمیزین اوستونده گل- ‌‌گئت‌ده‌‌ایدیلر؛ سانکی بیزیم سئوگی پیچیلتی‌لاریمیزا قیسقانیردیلارماسامین اوستونو تر-تلسیک ییغیشدیردیم. ایش یئریندن ائشییه چیخدیم. بازارا گئتمه‌لی‌‌ایدیم. بیرآی اؤنجهبیر زاد نیشانلامیشدیم. اورک شکیلینده بیر قوتو. آچیلاندا گؤزل بیر پیانو آهنگی چالیردی. قوتونون قاپاغی‌نین ایچ اوزونده شکیل سالماغادا بیر یئر وار‌یدی. شکیلمیزی اوره‌ک کیمی کسیب, اورا سالاجاغیدیم. سوروجونون سسی‌له اؤزومه گلدیم:
- آغا ! تربیت آغزی‌دیر.
آمانسیز یاغیش باشلادی. قاچا- قاچ دوشدو. اوتوز ایلدن سونرا همان گونده، همان ساعات‌دا، یئنه یاغیش یاغیر. دوداقلاریم قاچیر. یاغیش سن نه ظالیم‌میش‌سن. بو گون سحر بیر سؤز دئمه‌دن بیربیریمیزدن آیریلساقدا, آمما بیلیردیم اودا نه‌قده‌ر بو آخشاما تلسیر.
ساعات بئش میزانی‌‌ایدی. تک-‌توک باشماقچی‌لار ویترینلری‌نین چیراقلارینی یاندیرمیشدیلار. تربیتین آخیرینه قده‌ر پیادا گئتمه‌لی‌ایدیم . هله بیر آز یول گئتمه دن گؤزوم خیاوانین او بیری طرفینده مریمه ساتاشدی. هرزامان اولدوغو کیمی چانتاسی قولوندا, باشی آشاغادا, یولونا دوام وئریردی. ائله‌بیل دونیانی وئردیلر منه؛ دئدیم نه یاخجی اولدو؛ گئدیب بیرلیک‌ده او سئو‌ن هدیه‌نی آلاریق. بیلمیرم نه‌دن شیطانلیغیم توتدو. یوخ, دالینجا گئدیب, نه آلدیغینی اؤیره‌نیب بیله‌جه‌یم، ائوده منه نه آلدیغینی دئیب, اونولاپ شاشیرداجام.
او گئتدیکجه من‌ده آردینجا گئدیردیم. دایاناندا، دایانیردیم. بیر آزدان باشا دوشدوم یاشیل تی‌شرت گئین گنج بیر اوغلان مریمین دالیجا گزیر. هردم ده اوغلان ائله یاخینلاشیردی کی دوز چی‌یین به‌چی‌یین گئدیردی‌لر. بعضاً ده اوغلان مریم‌دن قاباغا دوشوردو؛ مریم اونون آردینجا گئدیردی؛ مریم هارا, اودا اورا.
گوره‌سن بو کیمدی ایلاهی!؟ مریمین دالینجا نه دولانیر؟ گؤزلریم دؤرد اولموشدو. اؤز- اؤزومه دئییردیم گئچیم قویوم قولاغی‌نین دیبیندن. سونرا دئییردیم یوخ, نه اولوب‌کی؟ خیاوان‌دیر, او دا گئدیر دا. هئچ بیلمه‌دیم کیهان چاپخاناسینی نه زامان کئچدیم. روزنامه ساتان کیوسکون کناریندا بیر قیرمیزی یاماها موتور دایانمیشدی. یاشیل تی شرت گئین اوغلان مریم‌دن بیر آز آرالاندی. موتورچویا یاخینلاشیب، نسه پیچیلداشیردیلار. فوری اوندان آیریلیب, یئنه‌ده مریمین آردینجا یولا دوشدو. الیم گیرمیشدی اوره‌ییمه. آی آللاه بو نه ایشدی من راست گلمیشم؟ گؤره‌سن بس بو آرواد هارا گئدیر؟ اولمایا مریخ‌دن بیر شئی آلاجاق. بابا دؤن بیر طرفدن بیر زاد آل قورتار. لاپ زور- زوراکی اؤزومو ساخلامیشدیم.
-یوخ بو ایشه سون قویمالی‌یام!
خیاوانی آتلاییب, اؤزومو مریمه یئتیرمک اوچون بیر آز یئیین‌لدیم. هله خیاوانی کئچمه‌میشدیم کی همکارلاریمین بیرینه راست گلدیم.
-هن, ایداره‌ده او جور تلسیردین, ایندی تربیت‌ده دولانیرسان؟
آقای نجاتی دن نئجه آیریلدیغیمی دویمادیم. بو دفعه‌ده اوغلان قاباغدا گئدیردی, مریم اونون دالینجا. من اؤزومه گلینجه اوغلان بیر بوتیکه سوخولدو. مریم‌ده اونون دالیجا . بوتیک دولویدو آرواد اوشاق‌لا. بیر لحظه‌ده اونلاری گوزدنقاچیرتمیردیم. بیر اوندا گؤردوم مریم اوغلان‌لا شیرین-‌شیرین دانیشیرلار. گؤزلریمه اینانا بیلمیردیم. گولوش‌لری زهرلی پیچاق کیمی قلبیمی پارچالاییردی. آز قالیردی باغریم چاتلاسین؛ اوره‌ییم یئریندن چیخسین. اوغلان تئز- تئز چی‌یینلرینی آتیردی. مین ادا- اطواردان چیخیردی. گؤره‌سن مریم منی بو حالدا باشقا بیر قادین‌لا گؤرسه‌یدی نه اولاردی؟ نئیلردی؟ کاش کور اولایدی گؤزلریم. آز قالیردی روحوم بدنیمدن چیخسین. قولاقلاریم کؤز کیمی یانیردی؛ یقین کی قیپ‌-قیرمیزی قیزارمیشدیلار. صوراتیم اود ‌توتوب, یانیردی. قلبیمین گوپ‌هاگوپ سسینی ائشیدیردیم. دیزلریم تیر-تیر تیتره‌ییردی. هردم ایچیمدن بیر سس گلیردی. بودا سنین طالعین؛ سئوگینه چوخ گووه‌نیردین؛ بیر نفر یوخودو سنه دئسین کیشی, بو زمانه‌ده نه سئوگی‌بازلیغی‌دیر.
دیل- دوداغیم قوپ‌- قورو قوروموشدو. ائله‌بیل قاینار قازانلاری باشیمدان آخیتمیشدیلار. دئییردیم به توکان- ‌بازار اهلی هامی منه باخیر. شیطان اؤلمه‌ییب کی, ایندی بو صحنه‌لری حتماً بیری گؤروب, گئدیب بوتون دونیایا جار سالاجاقدیر. اوندا گؤره‌سن اوشاقلاریم نئیله‌یه‌جکدیلر؟

تر باسمیشدی. آز قالیردی بوغولام. هر آن مین فیکره دالیردیم. کیمسه بو قئیرتسیزلییه دؤزه‌بیلمز. یوخ، نه شیکایت‌بازلیغی. ایشی ائله بوردا بیتیرمه لیدیم.
بوتیکه طرف جلد یولا دوشدوم. ایکی خائین بوتیک‌‌دن چیخیب منه طرف گلیردیلر. بیرآن هئچ بیلمه‌دیم نه اولدو. بتر های-‌کوی قوپدو. جاماعات توکانلاردان ائشیه تؤکولدو. آغا توتون … آغا قویما … آغا …، بیر ایکی نفرده خیاوانا طرف گؤتورولدولر. سس‌لری بیر- بیریندن یاخچی آییرا بیلمیردیم. دونیا گؤزومون قاباغیندا قاپ- قارا قارالمیشدی. توکان‌- بازار باشیما فیرلانیردی.
بیر قادین بوتیکین قاباغیندا یئره سره‌لنمیشدی. چانتاسی قولوندا ده‌ییلدی. پارتلاق بیر هدیه قوتوسوندان پیانو سسی گلیردی. بیر جوت تانیش گؤز سس‌سیز- سمیرسیز منه باخیردی.
آینالارین قاققیلتی سسی شه‌هری بوروموشدو. یاغیش یاغماغا باشلامیشدی. چیراقلار بوتون خیاوانی ایشیقلاندیرمیشدیلار…

https://t.me/Adabiyyatsevanlar