ادبیات سئونلر

موسی موسوی

فرشته بیر حالداکی بیر کاسا شوربانی قویوب قاباغینا سوغانینان یئییردی دئدی :
+گئچن سری دئدیم شوربایا نوخود آل دئدین نوخود باهادی شوربا نوخودسوزدا اولار . اوندان قاباق دئدیم یئرآلما آل دئدین خانیم ایضافه هزینه ائلمه ،شوربا یئرآلماسیزدا اولار. دوننده دئدیم ات آل دئدین ات؟!!!خانیم ایندی بیز ات آلساق دولت یارانه میزی کسر، قوهوم قونشودا بیلسه ات آلمیشیق بیزی نظرلیه ر گوءزه گلریک .حتما گله ن سریده دیه جکسن رب وورما ائله سویون اوءزون قاینات سوغانینان یه ،بو نه یاشاییشیدی سن منه سوءز وئرمیشدین منی خوشبخت ائلیه سن آخی
ساری گوللو تومانیمی اینیمه چکه چکه دئدیم :
خانیم من سنه قول وئرنده اتین کیلو 25مینیدی، تویوقون بیری 12مینیدی ،دویونون تایی 50مینیدی دلار اوچ مینیدی، هله بو بیشرف ترامپدا رئییس جمهور اولمامیشدی

+هه بو ترامپ چیخاندا من ائله گرک سندن بوشانایدیم بیر گون منی لوزان مذاکراتینان آلداتدین دئدین نتیجه وئرسین سنه قیزیل آلاجام ،کی نتیجه وئرمه دی سونرا ایکی اوچ ایل برجامینان آلداتدین دئدین برجام تصویب اولسون قیزیل اوقدر اوجوزلاشاجاق باشیندان آیاقینا کیمی قیزیل توتاجام

گلیب خانیمین قاباغیندا اوتوروب دئدیم:
خانیم نه بیلیدیم بیشرف ترامپ برجامی جیراجاق

فرشته دئدی:
اروپانی نه دئییرسن ؟دئدین اروپا بیزینندی پالتار اوقدر اوجوزلاشاجاق هر تویا سنه بئش دست پالتار آلاجام اوست اوسته گییه سن
دئدیم:
-خانیم نه بیلیدیم اروپا آمریکادان قورخاجاق آخی

خانیم شوربا کاساسینین دیبین چوءریینن تمیزلییب تیکه نی زورونان آغزیندا یئر ائلییب دئدی :
نه بیلیم نه بیلیم ائلمه کی منی بوشا من گئدیرم ددم ائوینه

دئدیم:
خانیم سن ایستیرسن 500گرم اتدن اوءترو بوشاناسان؟!شوربادی بیر گون اتی اولمادی نه اولار؟

فرشته سوغانی قویدو میزین اوستونه بیر موءحکم یوموروق ووردو سوغان دوءرد بوءلوندو
حیرصلی حیرصلی باخیب منه دئدی :
ات ؟! تک ات دئییلکی قیزیل دئیبسن آلماییبسان پالتار دئیبسن آلمامیسان
هله ایکی ایلدی منی بیر آرایشگاها گوءندرمه میسن کیشی

دئدیم :
خانیم آرایشگاه چیرکین خانیملاریندی سن ائله بئله سیده گوءزلسن
سوغانی آغزینا قویوب دئدی:
قیزیلینان پالتاری نه دئییرسن هه؟
دئدیم :
خانیم هله بیر ایلده گوءزله cft_نن FATF قراردادی اجرا اولونسون اوندا دای کئفیمیز ساز اولاجاق هله ائشیتمیشم عربستاندا گلیر بیزه طرف
لاپ شاهلار کیمی گئچینه جییک واللاه، بو دولت اوقدر بیزه ات یئدیردجک کی پارتدایاجاییق
قیزیلداکی اصلا دئمه ،قاب قاشیقیمیزدا قیزلدان اولاجاق ، اصلا ات ندی کیشینین قیزی، شوربا ندی؟!!! او قدررررررر ائومیزده "رونق اقتصادی" اولاجاق گونده صبحانه ،ناهار ،شام پیتزا ییه_جییک
هله هئچ کیمه دئمه بلکه بیر باشدا گئتدیک اروپانی دولانماقا
فرشته بیر رضایت حالتی اوءزونه توتوب دئدی :
دوغرودان؟؟؟؟مطمئن_سن FATF اجرا اولوناجاق؟
دئدیم:
هه بابا یالانیم ندی

رحمتلیک قوجا ننه مین روحونون سسی بخاری لوله_سیندن چیخدی شیطانسل گوله گوله دئدی :
"هاح هاح هاح هاح ،ائششه ییم اوءلمه یونجا بیته جک ،بالا یالان دئییرا ایستیر سنی آلدادا سوءزلرینه اینانما "
باشیمدان بیر کاسا سسی گلدی گوءزلریم قارانلیقلادی ییخیلدیم یئره
گوءزومو آچدیم گوءردوم گئجه اولوب فرشته_ده چیخیب گئدیب

https://t.me/Adabiyyatsevanlar