ادبیات سئونلر

آی شنبه گؤزله ینلر
حافظ خیاوی

یئنی یئتمه لیگده، جاوانلیق دا، هاچان آتام منه« بالا نیه ناماز قیلمیسان؟» دئیردی، دئیردیم شنبه دن قیلاجیام! درسه باخماقدا ایسته ینده، قالانیب قالمیش، باخمادیقیم درس لرین اوخوماسینا هوس للنده، دریندن اوخوماغی، کیتابلارین آچیب قوشماسینا تصمیم توتاندا، برنامه یازاردیم، او آغیر برنامه نین باشلانماسینادا شنبه نی گؤزلردیم.
شنبه لرده گلیب چیخاندا، ناماز قیلماییم دئیین، درسلره باخماییم دئیین، اؤزومو آلدادیب بهانه آختاراردیم. او چوخ تاپیلان، او تئز تاپیلان بهانه ده همیشه تئز تاپیلاردی.
دؤره برده، تانیدیغیم آداملاردادا، ایشلرین باشلانماسیندان قورخوب قاچماغی، مین بیر بهانه تاپماغی، بهانه یونماغی چوخ گؤرَردیم. ائله ایندیده گؤرورم. کیتاب اوخوماقا چتین لیک چکنلرین، کیتاب اوخوماق گؤزلرینه دورانلارین بهانه آختارمالارین، بهانه یونمالارین دا چوخ گؤرورَم. « ایستیرم کیتاب اوخویام آمما اوخوماقا واقتیم یوخدو» سؤزون چوخ دئییرلر، چوخلاریندان ائشیدیرم. دئییرلر یاخجی بیر فرصتیم اولسایدی، چوخلو اوخومادیغیم کیتابلاری، ییغیلیب قالان کیتابلاری اوخویاردیم. کیتاب اوخوماماقا بهانه آختارانلار، منیم او زامانیم کیمی شنبه لری گؤزله ییرلر؛ او هئچ وَده گلیب چیخمایان شنبه لری.
شنبه نی گؤزله ینلره، کیتاب اوخوماقا واقت تاپمایانلارا همیشه دئییرم شنبه نی گؤزله مه یین، یاخجی بیر واقت تاپماقا چالیشمایین. مندن"نه ائله ییم؟» دئییب سوروشانلارا، چاره آختارانلارا، نئچه ایل قاباق گئتدیگیم بیر سفردن دئییرم، او دوققوز نفرله گئتدیگیمیز سفردن. من او سفرده، اولارین بیریندن سورا، آیریلاریلا تانیش دئییلدیم. دانیشماغا چوخ سؤزوم یوخودو او آداملارلا؛ نه مشترک خاطیره م واریدی، نه حتی تزه بیر خاطیره یاراتماقا علاقم. بیر کیتاب منی او چتین لیگدن قورتاردی، او آداملارلا هئی گؤز گؤزه اولماقدان، دانیشماقا سؤز آختارماقدان. بیر«جیبی کیتاب»، بیر دوستون سفردن قاباق منه پای وئردیگی کیتاب. او سکگیز گونون هامیسیندا جیبیمدئیدی او کیتاب. هاردا یانیمداکیلا سؤز تاپمیردیم، هاردا بئکارچیلیقدان بیلمیردیم نه ایش گؤره م، یئمه ی بیر آز بئواخت گلیردیسه، اوچاقین گئجیشمه سی اولوردوسا، کیتابی جیبیمدن گؤتوروب آچیب اوخویوردوم. او کیتاب منه تسبئح کیمین بیر شئی اولموشدو او سگکیز گونده، جدول دولدورماسی کیمین. او کیتاب او گونلرده منیم جانیمی قورتاردی، واقتیمی دؤلدوردو. اوندا بیلدیم، او سفرده اؤرگه شدیم کیتاب اوخوماغی، شنبه لری گؤزله مدن، اؤزل بیر واقت آییرمادان. گؤردوم آدام بئله کیتاب اوخوسا هئچ بیلمز کیتابی هاچان باشلادی، هاچان قورتاردی.

✅قایناق : پینار درگیسی

https://t.me/Adabiyyatsevanlar