ادبیات سئونلر

ونا فیکیرلشمیردیم.اوءز آیاق ایزیمه فیکیرلشیردیم.اوزومه قاخینج ائدیردیم:" گورورسن؟گورورسن آخماق کیشی! هامیسی خوش و ایستی دیرلر.آغیزلاری آت کیمی بوغلانیر.گورورسن آیاقلارینی نئجه برک یئره قویورلار؟امما سن....سنین سویوقدان جانین چیخیر.آیاق ایزین ده هئچ یئرده قالمایاجاق.هئچ یئرده.نه قار اوستونده.نه یئرده.باشا دوشورسنمی؟حتا قار اوستونده بئله ایزین قالمایاجاق!"
مئیداندا اولان سود ساتانین شوشه سی ایچریدن بوغلانمیشدی.توتقون بیر ایشیق چوله چیخیردی.اونون ایشیغیندا قار ایچینده اوزانان پیاده یولو گوروکوردو.آیاق ایزلری یولو آچمیشدیلار و بیربیرلرینی آیاقلامیشدیلار.ساغدا دابانی یئییلمیش بیر باشماق ایزی،بیر قادین باشماغینین قیسا ایزی،دورد یالین آیاق بارماقلاری ایزی،بیر بویوک کیشی گالوشی ایزی،هر جوره آیاق ایزلری داریسقال یولاقدا بیربیرینین یانیندا اوتورمیشدیلار.بیربیرینین اوستونه دوشموشدولر.بیربیرینه قاریشمیشدیلار.
من لاپدان باشقا بیر فیکیره دوشدوم:"گورورسن؟ هئچ کیمین آیاقینین ایزی ساغلام قالماییب.کیمین کی قالیب سنین کی ده قالسین؟لازیم دئییل آیاق ایزلری قالسین.آیاق ایزلری یالنیز یولو آچماغا لازیم دیر.اونملی یولون آچیلماقی دیر.توتالیم آیاق ایزین ایتسین.یولاقدا ایتیب.عوضینه یول آچیلیب.قار ایچینده بیر یول.."
بو سوزلرله اوره گیم اییسیندی.امما یئنه باشقا بیر فیکیرلر ذهنیمی جولقادی:"یول آچیلماق اوچون سنین آیاق ایزین ایتسین؟اوزوده بیر آداملارا کی سانکی حامامدان چیخیبلار، نفسلری ده آت کیمی بوغلانیر؟ اصلن یول نئیه آچیلسین؟قاردا یئریسینلر.باشماقلاری یوخدومو؟شیل دیرلر؟ سنین آیاق ایزین نه دن ایتسین آخی؟"
ات اورپدن فیکیرلریمه گولدوم.امما ائله دیشلریمین آراسیندا گولدوم.بو گولوش نه دوداقلاریما قوندو نه اوره ییمه.اولسایدی بو گولوشو آیاقلاریمین آلتینا آتیب ازردیم.
پیادا یولو قارانلیغیدی.من ازیلمیش قار اوستونده یئریییردیم.هله پالتونون آلتیندا تیتره ییردیم.کوچه یه دوندوم.بیر چیراغ کوچه میزی ایشیقلاندیرمیشدی.قار دنه لری قوش باشیلاییب یونگوله میشدیلر.یون آتانلارین آتیلمیش پامبیغی کیمی.
چیراق تیرینین آیاقیندا،دونموش بیر قارا پیشیک لئشی اوزانمیشدی.اوره ییم توکولدو."اولمایا بو بیزیم پیشیک دیر؟.."
ایره لی گئتدیم.باشماغیمین اوجویلا ترپتدیم.قارا یاپیشمیشدی.ترپنمه دی.اوءز پیشیگیمیز ایدی.قارا، تنبل، و سئومه ملی.یالنیز باجاریردی قارانلیقدا آیاقینین آلتینا قاچسین یوخسا قاپی آراسیندان اوغورلوق اوتاقلارا بویلانسین.
بو پیشیک له دوست اولماغا چوخ چالیشیب امما اوغور قازانمامیشدیم.همشه قورخوردوم دهلیزده آیاقیم آلتیندا قالیب اوءلسون.اوره ییم توتولدو.اوره ییمی گورولمه ین بیر غم یوموروغو سیخدی.تامام عقده لریمی بو یازیغین باشیندا چارتلاتماق ایسته ییردیم."نیه چوءله چیخدین آخی؟بو سویوق هله آداملاری چوکوردور".
پالتونون آلتیندا تیتره یرکن، پیلله کن قارانلیغیندا سویوغدان قاچیردیم.اوتاغیمین آچاری بیر تیکه بوز کیمی الیمده قالمیشدی.اوره ییم داریخیردی.اوزومو دانلاییردیم.قورخوردوم:"آیاق ایزیم قالماسین....یئر اوستونده قالماسین..."

https://t.me/Adabiyyatsevanlar