ادبیات سئونلر

اوشاق ادبیاتی
پاشا_موغانلی

‍ ‍ 🔸آخماق تولکو (منظوم ناغیل)

باغیشلایان مهربان
گؤزل تانری آدیلان

آخماق تولکو وارایدی
گؤزلری چوخ دارایدی

منم منم دئیَردی
تک اؤزون ایسته‌یردی

یایلاقدا گزردی تک
تاپیب یئیردی یئمک

بو تولکونون یایلاغی
اوت واری، هم بولاغی

هر ایل قوناق گؤرردی
اورا کؤچ تؤکولردی

یای فصیلی یئتیشدی
کؤچ گلیب اورا دوشدو

یئییب، ایچیب، یاتدیلار
اوچ آی یایی قالدیلار

یای فصیلی کی کئچدی
گئتمک چاغی یئتیشدی

حاضیرلانیب نهایت
قاییدالار سلامت

بیر قوجا آت آخسادی
چوبان اونو بوشلادی

ک‍ؤچ گئدیب ائوه چاتدی
آت‌دا بولاق‌دا یاتدی

تولکوده آتی گؤردو
اوتوردو فیکره گیردی

آخماق تولکو:
یئتیشمز منیم زوروم
اونو نئجه اؤلدوروم؟

بیردن خیالا قالدی
قوردو یادینا سالدی

داغ- داشی چیخدی دوشدو
تاپیب اونلا گؤروشدو

آخماق تولکو:
سالام منیم شیر داییم
پنجه‌سی شمشیر داییم

اگر باخسا شیکارا
ائیله‌یر پارا پارا

قورد:
علیکوم آی تولکو بئی
سؤیله تئز هارا گئدک

آخماق تولکو:
بو یایلاق کی گؤرورسن
اوندا گون کئچیریرسن

دوروست بونون ایاغی
کی بولاق دی قیراغی

بیر آت اوردا تک گزیر
اوت یئییر، سودان ایچیر

گلدیم داییما دئیه‌م
اینصاف دئییل تک یئیه‌م

گئدک اونو اؤلدورک
دادلی اَتیندن یئیه‌ک

یولداش اولوب گئتدیلر
گئدیب آتا یئتدیلر

قورد:
تولکو ائشیت دئییرم
گؤرکی نه سؤیله‌ییرم

هرنه دئسم دوزون دئ
اؤلدوروم آتی سن یئ

گؤزلریم قیزاریبدیر؟
توکوم بیزبیز دوروبدور؟

اگر سینه‌م شیشیب‌دیر
آت آماده‌لشیب‌دیر

آخماق تولکو:
پنجه‌ینن یئر قازیرسان
خان‌دایی‌جان حاضیرسان!

قورد سورعت‌ایله گئتدی
آتا بیر هجوم ائتدی

بوینون آغزینا سالدی
ساخلاییب جانین آلدی

آت اؤلدو یئره آشدی
تولکوده اورا قاچدی

باشلادیلار یئمه‌یه
یئییب، گولوب، دئمه‌یه

قورد گؤتوردو بیر قولون
گئری قاییتدی یولون

تولکو تک یئدی یاتدی
یئمه‌یی سونا چاتدی

بیر ایل تامام سوووشدو
کؤچ یئنه گلدی دوشدو

آخماق تولکو شاد اولدو
گؤردو یئمه‌یی بولدو

کناردان گؤزله‌ییردی
صوبح، آخشام ایزله‌ییردی

کؤچ‌ده اوچ آی دولاندی
آخیردا توپالاندی

یئنه قاییدان زامان
بیر آت آییردی چوبان

قوجا آتی بوشلادی
تک بوراخدی، اوتلادی

تولکوده گؤردو اونو
تئز آختاردی دوستونو

خئیلک گزیب یایلاغی
داغ-داشی، هم بولاغی

اما تاپا بیلمه‌دی
اؤز- اؤزونه سؤیله‌دی

قورد داییم حتما گئدیب
بو یایلاغی ترک ائدیب

گرگ باشقا فیکر ائدم
بیر آیری کسدن گئدم

بیراز گزیب آختاریب
بیر کیچیک تولکو تاپیب

اونا سؤزون سؤیله‌دی
ایشدن آگه ائیله‌دی

تولکولر بیرلشدیلر
تئز آتا یئتیشدیلر

کیچیک تولکو:
تولکو عمیم اولاندا
منی یادا سالاندا

من قاباغا گئتمه‌رم
آتی شیکار ائتمه‌رم!

تولکو تئز هاوالاندی
بیراز آتی دولاندی

آخماق تولکو:
آی سنه قوربان عمین
اولماسین اصلا غمین

من نه دئسم دوزون دئ
آتی شیکار ائدیم یئ

باخ گؤر گؤزوم قیزاریب؟

کیچیک تولکو:
اتفاقا آغاریب!

آخماق تولکو:
بیزبیز دوروبدور توکوم؟

کیچیک تولکو:
یاتیبدی من گؤردوکوم!

آخماق تولکو:
دئیه‌جکدین قیزاریب
توکون‌ده بیز بیز دوروب

گؤر یاتیب قالخیر سینه‌م؟

کیچیک تولکو:
من کی اصلا گؤرمورم!

آخماق تولکو:
بو کی بئله سؤیله‌ییر
منی تحقیر ائیله‌ییر

گوجومو گؤسته‌رَرم
بیللم آتا نئیله‌رم!

اورک وئردی اؤزونه
آلداندی اؤز سؤزونه

آتین اوسته آتیلدی
آت بیر تپیک؛ ییخیلدی

ییخیلدی آنجاق هارا
آلتی مئتیر کنارا !!!

چیققیلی تولکو قاچدی
آخماغین گؤزون آچدی

کیچیک تولکو:
تولکو عمی نه اولدو؟
گؤزلرین نیه دولدو؟

آخماق تولکو:
من داها اؤلمه‌لییَم
دونیادان گئتمه‌لییَم

اما سنه سؤزوم وار
گؤزلریم دارایدی‌دار

بو ایش گلدی باشیما
اؤلوم چیخدی قارشیما

چوخ لعنت اولسون منه
تجربه اولسون سنه

سن منم- منم دئمه
گؤر کی نه اولدو منه

ائتمه بیر آن خیانت
سور حیاتینی راحت

اولسا سنین گؤزون توخ
اولاجاق یئمه‌یین چوخ

https://t.me/Adabiyyatsevanlar

.