ادبیات سئونلر

يرلر، هامي بير آغيزدان دانيشيرديلار.

اونلارین دانیشمالاریندان دوغان اوغولتو منه نارلي باغچادان يوکسه‌لن سسلري خاطيرلاديردي.
دوکتور مانوکون کيتابخاناسيندا نارلي باغچانين اولماسي احتيمالي‌نين هيجاني اوزومه عکس اولونموش اولمالي کي، دؤنوب منه باخديلار. 'سن گئت' دئديلر. 'خئير، سيزلر منيم بؤيوکلريمسينيز' فيلان دئمه‌يه جهد ائتديمسه ده مني سوسدوردولار. 'سونسوزا قدر نارلي باغچاني آختاراجاق دئييلسن، هله بير تاپ آختارديغيني...' دئديلر. سؤزلرينده، سسلري‌نين تونوندا ايشاره ائتمک ايسته‌ديکلري بير شئي وار کيمي گلدي منه، آمما اوستونده دايانماديم.
آيلاردير کيتابخانالاردا کيتابلارا باخيرديم، رف‌لردن ائنديرير، کؤهنلميش صحيفه‌لريني قوجاقلايان مهريبان و قورويوجو جيليدلريني آچير، اوزون اوزون قاريشديرير، چوخ واخت اوخوماغا داليب گئديرديم. کيتابي آرتيق تانيشيم سانيرديم. ايريلي خيردالي، آغير يونگول، رنگلي سولغون، دورغون حرکتلي اولوشلارينا؛ ايضاح ائتديکلرينه، گؤسترديکلرينه، خيال ائتديرديکلرينه، دوشوندوردوکلرينه آليشديغيمي سانيرديم. آمما دوکتور مانوکون کيتابخاناسي‌نين قارشيسيندا چاشماقدان اؤزومو گؤتوره بيلمه‌ديم. قارماقاريشيقديلار؛ رف‌لرده،کيچيک استوللاردا، پنجره ايچلرينده، ديوار ديبلرينده، استول اوستلرينده ايديلر، سانکي جانلي ايديلر. دوکتور مانوک اول اوزون اوزون قاريشديرماغیما ايجازه وئردي. سونرا نه آختارديغيمي سوروشدو.
'کيچيک‌کن اوخودوغوم بير ناغيل،' دئديم، 'نارلي باغچا. اوزون ايدي. چوخ جاذيبه‌دار و بير او قدر ده قورخودوجو ايدي. ناغيلي خاطيرلايا بيلميرم، بير قروپ اينسانين بير باغچايا سورتولموش اولدوقلاريني، اورادا اؤزلرينه بير دونيا قورماغا چاليشديقلاريني خاطيرلاييرام يالنيز. بير اوشاغين اوووجونا سيغاجاق قدر کيچيک بير کيتاب ايدي، قارا دريلي ايدي. هاميسي بو.'
دوکتور مانوک ديقتله دينله‌دي. 'نارلي باغچا ها!' دئدي يوکسک سسله. 'نييه قورخوردون؟' 'خاطیرلاميرام و اصل آختارديغيم شئي يقين بو. نييه قورخدوغومو آختاريرام، نييه قورخدوغوم حالدا چوخ جاذيبه‌دار تاپديغيمي.' 'حيات!' دئدي دوکتور مانوک بو دفعه، اوتوردوغو جيريلدايان مئبيليندن قالخدي، بير قروپ کيتابي قالديردي، باشقا بير يئره قويدو، بير باشقا قروپو باشقا بير يئره اوست اوسته دوزدو، بير رفي بوشالتدي. آختارميردي، آختارديغي‌نين يئريني بيلير، اونا چاتماغا چاليشيردي.
بو قدر کيتابين آراسيندا کيچيلميشديم، کيچيجيک قالميشديم. دوکتور مانوکومو ايزله‌مه‌لي‌یم، کيتابلاريمي قاريشديرمالييام، قرار وئره بيلميرديم هئچ جور.
دوکتور مانوک منه طرف دؤندو، اوووجومدا ايته‌جک قدر کيچيک بير کيتاب اوزالتدي. 'آختارديغين کيتاب بو،' دئدي. 'آلماق ايسته‌ديیندن امين‌سن‌مي؟'
اليمي اوزالتميشکن دايانديم.
'خئير،' دئديم. 'نارلي باغچا اوخوياجاغيم سون کيتاب اولمالي.'
تاپديغيم ايينه‌ني تکرار سامانليغا آتديم بئله‌جه.

https://t.me/Adabiyyatsevanlar