بارتـات يومنـا قراءه ممتعه 👆🏻😍
#يسعدلي_اوقاتكم 😍❤

📚
#ظلمـات_أب_وقسـوة_زمــن 😖
البارت(الـ⓸)
وفـي اليوم التالي تشرق الشمس حاملة معها الكثير قد تغير فـي اقدار ابطالنا

استيقظت ملاك متأهبة على ان تحضر مالذ وطاب لبراق الـذي ينام فـي بيـتهم

بعد ان انتهت وضعت الاكل في الحجرة وذهبت توقظ ابوها وبراق بعد ان اكملوا الاكل
براق: ما شاء الله تسلم يدش ياملاك

ملاك بخزا: الله يسلمك
سعد: ما شاء الله قد كبرت بنتي وقدي عروسة قد بيجننوني عليها خيرات وبيني وبينك يابراق المرة مالها الا بيت زوجها

يشعر براق بوجع شديد في بطنه ويقول: يلا انا استأذن واعذرونا على الازعاج
يقول له عمه مستنكر: اين ازعاج صلي على النبي انت ابني وبعدين اين عتسير اجلس عندنا
براق : شاخرج اشم هواء قدنا طافح من جو البيت
سعد: يلاه بالخير وانا شاقوم اسير صلا ابوك هه

ينهيان حديثهما ويغادر كل واحد منهما الى وجهته

عند صالح::''

يقوم صالح غاضبا : مااهو ياسعد مابتقل انا مابين استرش اربي جهالي
سعد بعتاب: الله المستعان عليك ياخي انا بين اقل لو انت تخليهن يسيرين عند اخوهن نايف مشهو احلا لهن قدو في المدينة وانت داري كم نفس امة الرزاق في التعليم وانت ماخليتهاش تتم الدراسه هانا بحجة الاختلاط في المدينة به مدارس مخصصه للبنات

صالح: لاخر مرة اقلك انك ماتتدخلش في عيالي وبعدين مارادت القراية تجلس ترعى الغنم احلا لها والا تحطب وتبسر ماينفعها
سعد : كان قلي ان هذا كله علاميد يجسين يشقين على مرتك الي مابش منها مهرة

بعد ان قال سعد هذا الكلام يشتعل صالح غضبا ويقول .....
بعد ان قال سعد هذا الكلام يشتعل صالح غضبا ويقول: قد تعديت حدودك كثيير اخرج من بيتي خرجت نفسك ولاعد انت اخي ولا اعرفك وعيالي تنساهم وابعد لك من عين الشمس انك تقلبهم عليا
يقول سعد بيأس من حال اخوه : حسبنا الله ونعم الوكيل  ويخرج وهو حزين على حال اخوة الذي يزداد تعقيدا
بعد ان دار هذا الحديث الذي كانت كلا من انتصار ويسرى وامة الرزاق وسعاد يسمعنه تقول امة الرزاق بيأس: اصلا محد عيفكنا من ابي الا الموت يارب اموت وارتاح واسير بعد امي قد انا فاقدة لها تقول ذلك وتشعر بغصة لم تخفى على خواتها
تحاول سعاد ان تغير الجو هذا وتقول : مارايكن بعد الغدا نخرج نلوي قدلنا خيرات من الخرجة
يتفقين الخوات انهن يسيرين للمزرعة يغيرين جو ولكن لايقولين لا لخالتهن ولا لابوهن لانه من الاكيد انهم ماعيسمحوا لهن بالخروج

بعد ذلك يسمعين صوت همس خفيف ويخافين منه وتذهب سعاد للنافذة وتتفاجأ...
بعد ذلك يسمعين صوت همس خفيف ويخافين منه وتذهب سعاد للنافذة وتتفاجأ بخالد(الذي يدرس في دار القرآن) يحاول اخافتهن وتصرح بفرح : خااالد

يفرحن الخوات كلهن بحضور اخوهن خالد الذي اشتاقين له بشدة وذلك بقول امة الرزاق: ياعايب ولاعاد بسرناك غيبتاها

خالد: والله اننا فاقد لكن قووي لوتبسرين المهم ماهو غداش يانتصار انتي دارية انو مايعجبني الا طبخش

انتصار : يوو انا فدا لك قلي الي تشتي وانا افعلك
نخليهم يتخوروا على راحتهم ونسير لاعند براق الذي طلع راس جبل وهو مهموم وشايل هموم على اكتافه ويسترجع كلام عمه (قد جننوني عليها خيرات والمرة مالها الا بيت زوجها)

ويقول محدثا نفسة : آه يا ملاك لو تبسري كم بين احبش ونفسي اخطبش اليوم قبل بكرة بس اين اديش عند ابي وخالتي يجننوش يارب تكون من نصيبي فكر وفكر  وتوصل الى قرار وهو ....

عند براق

طلع راس جبل وهو مهموم وشايل هموم على اكتافه ويسترجع كلام عمه (قد جننوني عليها خيرات والمرة مالها الا بيت زوجها) ويقول محدثا نفسة : آه يا ملاك لو تبسري كم بين احبش ونفسي اخطبش اليوم قبل بكرة بس اين اديش عند ابي وخالتي يجننوش يارب تكون من نصيبي فكر وفكر  وتوصل الى قرار وهو انه بعد ان تظهر نتائج الفحوصات يذهب لخطبتها من ابيه

بعد ذلك يذهب الى منزلهم ويجد اخوه خالد فـي البيت ويستقبله بحرارة وهو يقـول : وحشتناا ياخي ماتصدقش كم انـا فارح بك


يقول خالد:  وانا اكثـر واللـه لكن انـت داري انهـو باقـي لـي شهـر واخـتم ان شـاء الـله واروح مـن مرة


براق: الـله يجعـله تـاج وقـار ويثبـت لك حفـظه

خالد: اميـن

براق: اشتي اجـابرك بـس لوما يتمين خواتي يصلحين العشـاء وانـا شاجابركـم جمعة

خالد: خير مابـه

براق: كـل خيـر لاتقلقش


يقـاطع كلامهم نداء
انتصـار : هياا قوموا عشـا عتتجابروا بعدين

يذهبان للعشـاء وبعد ان اتمو الاكل

براق: هيا جو للمكان اشتي اجابركم

يستغربوا اخوته مـن طلبه ويذهبوا خلفة الى المكان

براق: اسمعوني اشتي اقلكم حاجة بـس لاتخافوش

سعاد بخوف: ايش فـي

بـراق: الحاجة هـي انني ......

براق: اسمعوني اشتي اقلكم حاجة بـس لاتخافوش
سعاد بخوف: ايش فـي

بـراق: الحاجة هـي انني بعد ماخرجت هذك الساع حين صيح ...

📚
#ظلمـات_أب_وقسـوة_زمــان😖
الـبـارت(الـ⓹)

فوقي ابي سرت بيت عمي ومرضت واسعفوني
تقاطعه امة الرزاق قائلة: يووة جعلي مكسر وماحصل ماقالوا
براق: لاتقوليش هكذا ياختي ماقالوا شـي

يسرى: كيـف ماقالوا شـي
براق: فعلنا الفحوصات وعتطلع بكرة باذن اللـه
سعاد: اللـه يستـر
يقول خالد للتسلية: لاتخافوش مابش شـي غر بيتـدلع علينا
براق: باقي موضوع ثاني
خالـد : ايش هـو لاتقلش انك تشتي تتزوج
براق: والـله انك دريـت مافي النفـس

سعاد: منهي سعيدة الحظ
خالـد ممازحا: قصدش تعيسة الحظ

امة الرزاق: دعيت لهـا امهاا الـي عيتزوج بها اخي
براق: ناهي خلوني اتحاكا
خالد: ناهي سكتنا هـه ووضع يده على فمه
براق: اشتي ملاك بنت عمي

يسرى: والله اننا كنت حاسية
انتصار : حاليـة والله اللـه يتمم على خير

براق بهم : معـي مشكلتين معرقلات لـي الي هن ابي وخالتي فـي جهه ومرضي فـي جهه

سعاد: ماعيقع شـي باذن اللـه هـو مابش اب الا ويشتي يبسر ابنه مستقر او ما قلتوا
تقول امة الرزاق بسخرية : الا ابي

خالد: عيب  ي امة الرزاق هـذا ابوش

براق: سهل ابي وعنقنعه الا المرض انـا خايف يكون فيني شـي خطير لاسمح اللـه

تقول سعاد: ولاعيكون الا كـل خير ذلحين تـأخر الوقت قوموا ارقدوا لاا

يقااطعها صوت ابوها وخالتها وهم يصرخون عليهم

الاب: هيا مابه للسمرات وبعدين انـا قلتلك يابراق لاعد تجيش بيتي

يقول خالد: ايش هـذا الكلام يابه كلنا جهالك وسهل لاغلط براق هـو يستسمح منك

يقوم براق بتقبيل راس ابوة (حتى وان الاب الغلطان ضروري الابن يعتذر مـن ابوة مهما كان)

تقول الخالة : وانتين قومين ارقدين والاتشتين تتكيسلين غطوة ولمن العمل غطوة  ياا امة الرزاق سيري ادي حطب مـن الوادي

تقول سعاد: انـا شاسير بدلها

تقول جميلة بحزم : انـا قلت هـيه يعني هيه ومشتيش نقاش وقومين ارقدين احسن لكن

تقول ذلك وتمسك بيد صالح وتذهب لغرفة نومهم وهي فـي قمة غضبها وتقول: عجبكك جهالك مابيفعلوا بي

يقول صالح مستغربا: مابيفعلوا بك

تقول جميلة فـي نفسها(والله مابسر جهالش ياسيدة مرتاحين والله لاا الحقهم بش): قدك معاهم ماعادك فـي صفي وتغير نبرتها للبكاء : انـت هكذا دايما تصددقهم وتكذبني

يقاطعها صالح متاسف : لااا مش قصدي هكذاا كله ولازعلش انتـي غر قليلي ماتشتي وانا افعله

تضحك بمكـر وتقولـ: ......

يقاطعها صالح متاسف : لااا مش قصدي هكذاا كله ولازعلش انتـي غر قليلي ماتشتي وانا افعله

تضحك بمكـر وتقولـ: ابسر ابنك خالد جالك بكلمتين وصدقته والا ليش مايجس يشقى معك قدك عتموت هـه ماحد بيعاونك فـي العمل والزراعة
تدخل الفكرة رأس الاب ويقول:
صدقتي والله مامعه وحفظ القران يجلس يعاون ابوه اولى

جميلة: ايوة وزيد هـذا الي بيتملق لك لاقد حب راسك قدو كسب رضاك ضروري تأدبه اكثـر

صالح: كيــف افعل!? 

جميلة : انـا سمعته وهو بيحاكي اخوته انه يشتي يخطب

صالح: من يخطب وانا اخر مـن يعلم
جميلة : ابسر كيـف مابيحسبوا لك حساب

صالح: والله لا اربيه
جميلة: او عتخطب له هذك الشوعه
صالح: من هيه
جميلة: ملاك بنت سعد
صالح: عاده يشتي يدي لي بنت سعد والله ماسبرت
جميلة : ايوه وبعدين سعد يتحكم فينا مايسبرش الصدق

صالح : والله مايتزوجها وراسي يشم الهواء

امة الرزاق: امة لاتفلتينيش هـه امسكي يدي باقي شوية بـس
سيدة : قرييب يابنتي قرييب انتـي وبراق
امة الرزاق : امااااه امااه

سيدة بدأت تختفي وتختفي

امة الرزاق : امااااه
سعاد بخووف : امة الرزاق صلي على النبي مالش
امة الرزاق وهي تستعيد وعيها:
سعليش ارجعي ارقدي غر بين احلم لاتخافيش

سعاد: يلا ارقدي غطوة معش عمل

امة الرزاق : تمام


وضلت تفكر فـي الحلم ونامت وهي تدعي ان يجمعها اللـه ب  امها  عن قريب


وتمضي تلك الليلة محملة غدا اخبار قد تحرم ابطالنا الكثير الكثيير .....

فـي صباح اليوم التالي تذهـب امة الرزاق الى الجبل لتحضر الحطب كما امرتها خالتها وهي تشعر بالارهاق لعدم قدرتها على النوم وذلك بسبب الحلم


ويستيقظ براق مبكرا ويذهب لعمه سعد لكي يذهبوا الى الدكتور


براق: السلام عليكم يادكتور

الدكتور : وعليكم السلام

سعد: هيا مه يادكتور طمنا طلعين النتايج

الدكتور وقد تغيرت ملامح وجهه الى الحزن: ايوة طلعين

براق : وايش النتايج

الدكتور: انتووا اكيـد مؤمنين بقضاء اللـه وقدره وانت يابني ماشاء اللـه شكلك قـوي وعتقدر تتخطى المرض
بعد صمت لمدة خمس دقايق يقول الدكتور: للاسف يابني انـت عنـدك سرطان فـي المعدة وهو فـي مراحل متقدمة قـوي لو انـت بتفحص اول باول كنا قدرنا نساعدك لكن

يقول سعد مقاطعا: كييف يادكتور مابش له علاج

الدكتور : الا العلم قد تطور بـس عندنا فـي اليمن عادو ماقد وصلتش التقنيات الحديثة لذلك انصحكم تسفروه مصر يتعالج ولو اني انصحكم انو ماعد يتعالجش لانه فـي مراحل متقدمة ومالكم الا الدعاء

📚
#ظلمـات_أب_وقسـوة_زمــان😖
البـارت(الـ⓺)
يصمت براق والالم يحرق قلبة ويقوم بتشتت ويخرج خارج المستشفى ويذهب الى مكانه المعتاد ويقول وهو مهموم : الحمدلله احمدك ياربي على كـل حال لكن حلمي تبخر كيـف شاواجه ملاك كيـف اخطبها وانا يعلم الـله ايحين شاموت ليـش اعلقها فيني واموت وافلتها خلاص مالي الا حل واحـد اني انساها وربي شايعوضها بالي احسن مني يقوم مهموم ويذهب لعمه ويخبره بان يضل الموضع سر بينهم بحجة انه لايريد لاحد مـن اخوانه ان يقلق عليه وهو يعلم حالتهم المادية التي لاتسمح لهم بالسفر للعلاج ويقتنع العم بذلك ويدعوا له بالشفاء العاجل

فـي الوادي تنظر امة  الرزاق الى الاسفل مـن الجبل وتقول : ياربي ساعد
ني بين اسوم قـوي بين احس ان قد شادوخ لكـن باقي شويه وارحلي اسير ادي هولاك الي فـي الطرف

تقترب مـن حافة الجبل و تشعر بدوار قـوي مما ادى الـى فقد توازنها وسقوطها مـن اعلى الجبـل
.
.

لحظــات صمــت عارمة ... القــدر دائمـا يفـاجئ  ... المــووت لـا يفـرق بـين صغيـر ولـا كبيــر ...

فـي اسفـل الوادي كـان هنـاك مجموعة من الرجاال يحرثون الارض عندما سمعوا صوت صراخ وسقوط شي مـن اعلى الجبل يذهبون بسرعة ليتأكدوا مـن مصدر الصـوت
محمد: لااحول ولاقوة الا بالله
صادق: انّا لله وانّا الية راجعون
محمد: هذة بنت العم صالح ضروري نبلغهم
صادق: الـله يصبرهم يارب
وغطاها بالشال حقه وسار يبلغ الناس


{وهكـذا نهاية معاناة طفلة بريئة ..امة الرزاق.. *ملاحظة قصة موت امة الرزاق حقيقية  }

انتشر خبر موت امة الرزاق بين الناس وحالة اخواتها فـي الحضيض

مضـى على وفاة امة الرزاق شهر
جميلة: ايوة واخيراً تخلصت مـن واحدة والدور الجاي على الباقيين ماشفتهن ي سيدة الا بعد مالحق جهالش بعدش

سعاااد سعااد
سعاد بتعب : ماهو

جميلة: انـتي وخواتش قلي لهن ماعبش جلسة واكل طول اليوم اول واخر مـن ماتت اختهن قومين سبرين الغداء

سعاد : تمام
يقطع عليهن صوت سيارة

جميلة : منهو هـذا
سعاد: هـذا اخي نايف
جميلة : عادو ذكركن صباح الخير
سعاد: انتـي دارية انهو مابشهو فـي اليمن

جميلة: مابعدتش السعودية يجي فوق طيارة قد الناس تطوروا المهم مرته الحية جت
سعاد بعتاب: الـله يسامحش ياخالة هـي مسكينة
جميلة:  المهم انهـي ماجتش وانتي وخواتش اخطين بعد عملكن لااوريكن الطريق
تنهي كلامها وتذهب الى غرفتها
سعاد وخواتها يستقبلين اخوهن

نايف: كيـف انتـين
سعاد: الحمدلله

نايف: مالكن هكذا ضابحات وين امة الرزاق

(للعلم نايف ماقد دريش انهي ماتت لانو فـي السعودية ومحد اتصله مايعرفوش رقمة مثل ماقلت انه مايختلطش باهله قـوي بـس مرته اصرت علية يجي يزورهم)
سعاد بحزن ودموعها على خدها: امة الرزاق عند امي
نايف بصدمة : كيـف عند امي؟!
سعاد: ادعي لها بالرحمة
نايف بحزن لانه كان يحب امة الرزاق لانها مـن ريحة الغالية : كيـف وقع قلين لـي
حكين له خواته مـن اول ماضاعت لليوم
نايف بصدمة : كيييف وانا اخر مـن يعلم

انتصار: انـت مابتتصلش ولابتزورنا وحنا مادرانا برقمك
نايف بتحسر: قد خليت واحدة تسير لكن انتين والله ما افرط فيكن
سعاد بحزن: اين عتشلنا وانت فـي السعودية
نايف: انـا قد رجعت اليمن قبل اسبوع وقد شاجس ماعد شارجعش السعودية وشاشلكن معـي
يسرى: ماعيرضاش ابي وخالتي
نايف بتصميم : اعلى مافي خيلهم يركبوة وخواتي شاشلهن يعني شاشلهن ماشتفرجش عليكن هكذا

يصمم نايف ان ياخذ اخواته معـه ويذهب ليستشـير براق

لكنة ينصدم عندما يدخل على براق بـ....

انتظرونا في البـارت الاخيره ما رئيكم ننزلها غدوه او نتاخر ليوم الاثنين على حساب تفاعلكم بنزل🙂✨

بارتـات يومنـا 👆🏻😍
#دمتم _بخير 😍❤

📚
#ظلمـات_أب_وقسـوة_زمــن 😖
الـبارت (⓻)

يصمم نايف ان ياخذ اخواته معـه ويذهب ليستشـير براق

لكنه ينصدم عندما يدخل على براق حيث يجد براق يتالم بقووة

نايف: برااق مالك
براق: اهلا نايف كيف انت انـا غر تاعب شويه

نايف: كـيف تاعب شويه ابسر كيـف قدك سع الاموات
براق: اسمع الحمدلله حين قد جيت اشتي احملك امانة

نايف : ايش هذه الامانـة
براق:الامانة هـي
.
.
.

جميلة : وانا ماعيقع بي اخليهن يسيرين علاميد تسهل عليا المهمة الاولة تخلصت منها وهولا اخوهن احق بهن ضروري اقنع ابوهن


جميلة: صالح اشتي اقلك حاجة

صالح: ايش قولي انتـي ءامري وانا انفذ

جميلة: اممم غر قلت لـو تخلي البنات
يسيرين عند نايف اخوهن مشهو احلا

صالح: للمه يسيرين خليهن يجسين يعاوننش

جميلة: ليش يعاونني خليهن يسيرين لاطلب منك نايف

صالح: كـيف يسيرين وبراق وخالد بيجي ويسير لاهانا مـن عيخدمهم

جمييلة : العيال سهل شافعلهم انـا الي يشتوا
صالح باستغراب: كيـف خبرش هـذا

جميلة: براق خلية يتأدب انـا شادبه لك وخالد قد قلتلك تخليه يجس يشقى معك مايفعل بالدراسة

صالح: تمام مشتيتي

خالد بيحسب كم عاد باقي له ويرجع يدرس فقد الدار : باقي يوم اسير احاكي ابي اني شاسير غطوة

وقام يحاكي ابوة

خالد : اباه
صالح : خيير ماقد به
خالد: غر جيت اقلك اني قد شاتكمل اجازتي وارجع غطوة

صالح بكل برود :ماعدبش سيرة

خالد بصدمة: كيييف
صالح : قلت ماعدبش سيرة وخلاص لاتناقشنيش
يقول خالد غاضبا: يابه لاتدمرش مستقبلي وحلمي
صالح : اين القران الي بتدرسة القران بيقل انك لاتعصيش ابوك

خالد: يابه انـا ماقد عصيتك ولاشاعصيك لكن الا هذه يابه الا هذه
صالح بغضب: مابش خلااص اجلس عاوني فـي الشقا تعبت وحدي
خالد بحزن : ماشتيتوا يابه ويذهب الى رفيق دربة(القرآن) ويامحلااه مـن رفيق يخفف عنة الحمل

فـي صباح اليوم الثاني

ملاك وهـي بتفكر: يعلم اللـه مالك يابراق متغير ماله ماعد بيحسسنيش انو يشتيني ساع زمان انـا ضروري احاكية ضروري

تفكـر وتفكـر وتجــد خطة

.
.
.

نايف: يـا ابه اشتي احاكيك فـي موضوع

صالح : بين اسمعك

نايف: كنت اشتي اقلك انني اشتي اشل خواتي عندي حرام يابه ابسر كـيف بعد موت امة الرزاق وامي قدهن تاعبات نفسيا
صالح: عتهجعني مـن هرمهن وصرفتهن شلهن لك
نايف بفرحة: تسلم  يابه

صالح: ويحين عتتحركوا

نايف: بعد الغدا
صالح: سابر وفي نفسة<روحة بلا ردة>

انتصار بفرحة: واخيررا ابي وافق

يسرى: مادراش وانتي
انتصار : سمعت نايف بيقله وهو وافق

سعاد: لـو اسمعه باذني ماصدق
يسرى: يعلم اللـه ماقد قالت له خالتي لوما وافق

انتصار: المهم وافق مـن قله قله

نايف : تجهزين يابنات عنرحلنا بعد الغدا
تجهزين البنات وسارو بعد الغدا

**مسكينات مشهن داريات بكيد خالتهن ماخلتهن الا لمصلحتها اكـيد

عنـد ملاك : اناا لازم اوصله خبر يجي لاورا البيت القديم ضروري احاكيه والا شاجنن
شازلج له ورقة مـع بنت الجيران هـي عتنفعني
كتبت له رسالة وقالت له بالموعد  انه يجي اليوم بعد العصر لاورا البيت القديم
.
.
.
.
عند براق بسر بنت صغيرة جيه صليه ومعاها ورقة استغرب
البنت: هذه الورقة ادتها ملاك بنت عمك

يزداد  استغراب براق ويفتحها ويفاجأ بانها تطلب منه المجيء ويتذكر مرضه ويقول انـا لازم ابين لها اننا مشتيهاش علاسب لاتتعلقش بي

مر الوقت وجـا الوقت المحدد لملاك وبراق التقوا خلف الببت القديم

براق بجفا: خير ياملاك ايش به

ملاك: هكذا ياولد العم لاسلام ولاكيف الحال لهذي الدرجة بتكرهني
براق بحزم: عيب عليش تدعيني لـو يبسرونا الناس ماعيقلوا
ملاك: براق حرام عليـك تعذبني قلي ليش تغيرت
براق: ماتغيرتش ولا انـا هذك انـا

ملاك: الا تغيرت وقوي وبعدين قلي ايش الي فعلته وصدقني مايقع الا الي تشتيه

براق: انـا ماشتي شـي واظن انو انتـي الي دعيتيني ايش تشتي والا شاخطى
ملاك: انـا دعيتك تفهمني ايش فيك ماهو الي غيرك
براق : ماتغيرتش وسخافاتش خليها لش خاطرك يهم بالذهاب وتمسك ملاك بيده وتقول.......
براق : ماتغيرتش وسخافاتش خليها لش خاطرك يهم بالذهاب وتمسك ملاك بيده وتقول بحزن : لهذي الدرجة بتكرهني خلاص انـا اسفة لاني ازعجتك
يؤنب براق نفسه لانه قسى عليها ولكن هذه الطريقة الوحيدة
يذهب براق وقلبه يحترق على ماحدث له ولملاك
.
.
.

عنند ملاك وصلت بيتهم وبكت بحرقة : انـا الهبلا الـي دعيته لكن انـا متاكدة انه مغيره له حاجة

اذن المغرب وسارت اتوضت وفرشت السجادة وصلت وبعد الصلاة دعت ربها انو يكشف لها ماغير براق

وصل ابوها بيداعيها

ملاك: ماهو يابه
سعد: اين العشاء قدنا جاوع
ملاك: الان يجههز

جهزت العشاء تعشت هـي وابوه
سعد مستغرب : انـتي دارية ان صالح اخي خلا البنات يسيرين عند نايف

📚
#ظلمـات_أب_وقسـوة_زمــان 😖
الـبارت (⓼)

يسيرين عند نايف
ملاك: ايوة قد جين ودعني وسارين

سعد: مدري كيـف اقنع ابوه

ملاك: حتى انـا استغربت لكن اللـه يهديه

تمووا العشاء قال ابوها : اسمعي اشتي احاكيش يابنتي بحاجة

ملاك خافت وحست بالذي يشتي يقل
ابوها: تفضل يابه

سعد: انتـي كبرتي يابنتي وصرتي بنت مـن احلا البنات ادب واخلاق وجمال وشحطة ماشاء اللـه عليش وصرتي عروسة

ملاك بخجل : كلهن ايوة يابه الا الاخيرة

سعد : اسمعي ابن جيراننا محمد جا يخطبش وانا ماقد رديت له خبر قلت استشيرش والولد ماينعاب ومن زينة الشباب


ملاك تذكرت براق وقالـت .....

سعد : اسمعي ابن جيراننا محمد جا يخطبش وانا ماقد رديت له خبر قلت استشيرش والولد ماينعاب ومن زينة الشباب

ملاك تذكرت براق وقالـت: شافكر يابه وارد لك خبر

سعد: فكري بـس استعجلي نرد لهم خبر

تذهب ملاك للنوم وتضل تفكر وتفكر بدون الوصول الى قرار
.
.
.
.
.
عند البنات بعد وصولهن الى المدينة

سعاد: الـله والحلا فـي المدينة ياريت وامة الرزاق معانا تفرح

انتصار: قدي فـي الجنة ماعد تشتي مـن المدينة اللـه يرحمها هـي وامي

يسرى وانتصار وسعاد: اميـن

سعاد:يعلم الـله كيـف حال براق قلبـي قلق

انتصار: ولاعيقع عليه شـي هـو قال ان الفحوصات طلعت وقالوا مابش شـي غر برد

سعاد: الـله يستر بـس


فـي تلك الليلة يزداد مرض براق الـذي كان ينادي ولامجيب لان خواته ماعد بحدهن


براق : ااااه اااه
تسحب الى الباب لكي يفتحه واذا به ينفتح وتدخل خالته

جميلة: لهذه الحال واخس ياعيال سيدة الثاني لاحق بش ياسيدة لاحق بَش


براق: قواا ياخالة ادي لي قلص قهوة

جميلة بضحكة طويله وسخرية: واخيرا تلجيتوا لـي ياجهال سيدة موووت والله ماتشربها ابدا


تذهب وتغلق الباب بدون رحمة وشفقة وبراق ينادي ويتأوه



«مرض القلب ابشع مـن اي مرض اخر .... ليس مرض القلب بالسقم لكن مرضه بالقسوة ...»


.
.
.
يجلس طوال الليل براق يتمنى كوب مـن القهوة ولكن دون رحمة مـن خالته التي منذ ان خرجت مـن عنده لم تعد ابدا


يشتدد مرضه عند اذان الفجر ويذهب وياخذ قلم وورقة ويكتب فيها ....

يجلس طوال الليل براق يتمنى كوب مـن القهوة ولكن دون رحمة مـن خالته التي منذ ان خرجت مـن عنده لم تعد ابدا

يشتدد مرضه عند اذان الفجر ويذهب وياخذ قلم وورقة ويكتب فيها وصية الى ملاك وهـي ....
.
.
.
.
تقوم الخالة ذلك اليوم نشيطة وتسترجع ماذا قالت لها صديقتها بالامس

هدى: عندي لش حل لهذا خالد ماعد باقي الا ﮪو وكملتيهم

جميلة بضحكة: ايووه ماعد باقي الا هو

هدى: توي لش واحدة مكشوف عنها الحجاب
جميلة: ماعتفيدني هذه

هدى: افهمي ياخبلا تفعله عمل وتهجعي

جميلة: ايووه وبعدين هـو بيقرا قران عيقلوا غر جنن مـن كثر التشدد صـح

هدى: ايوووه بالضبط طول عمرش فهيمة المهم ادي معش زلط وقصي شوية من لداته وجي لاعندي الصبح نسير واعملي حسابي فـي الزلط
جميلة: ولاايهمش ابشري لاقد غر خطتش عتسبر
ترجع للواقع عندما ناداها خالد: كنت اشتي اقلش حاجة ياخالة

جميلة بكهن: ماهو يابني
خالد باستغراب: انـا سايري اعاون ابي وهذا حقي الثوب مـن عيصبنة

جميلة بفرح: اناا شاصبنة اطرحه

يستغرب خالد اكثـر ويقول فـي نفسه(والله ان قد الخالة جميلة مسكينة اللـه يهـديها )

يذهب خالد وتحضر جميلة مقص وتقص مـن داخل ثوبة صغيرة وتذهب الـى جارتها هـدى
ومن ثم تذهب هـي وهدى الى المرأة المشعوذة والعياذ بالله ويتفقين على السعر وتعمل لهن العمل وتقول لها المشعوذة ان تخبأة فـي مكان لاا يستطيع احد اين يصل اليه
استيقظت ملاك  وهي تفكر فـي الموضوع وتقول: ازيد افكر اليوم والكل وازيد اصلي العشي استخارة وبعدين شارد لابي خبر

وسارت تصلح الصبوح

... ليسـت النهايات جميعها سعيدة هناك نهايات لاتكتمل سعادتها الا عند ربها حتى وان كانت نهايتها فـي الدنيا حزينة ...

براق
يشتد مرضه عند اذان الفجر ويذهب وياخذ قلم وورقة ويكتب فيها وصية الى ملاك وهـي
.
.
«الـى ملاكـي :الى حبي الاول والاخير حب الطفولة والشباب كنت احلم باليوم الذي ستكونين فيه لـي ولكـن مـع تقدم الايام كـان هـذا الحلم يتلاشى

اقول لك واكتب لك وانا اعلم انها اخر سطور وكلمات اكتبها فـي حياتي ولاكنها لن توفيك حقك ولااريد ان القاكِ فـي الاخرة وانتي مجروحة مني واعلمي انني قسوت عليك فـي ذلك اليوم لكي لاتتعلقي فيني ونهايتي قريبة

انـا مريض بالسرطان وهو فـي مراحلة المتقدمة وسامحيني لانني لم احقق احلامك واحلامي بان نجتمع فـي بيت واحـد كما كنت اقول لك فـي طفولتنا اريدك ان تكوني قوية لفراقي وان تدعي لي بالرحمة والمغفرة وان تكملي حياتك بعدي

#براق »
بعد ان اتم براق كتابة وصيتة تقبل وتشهد ونطق اخر حروف له فـي الدنيا ...ملاك
#اللهم_اشفيي_كل_مريض
#وارحم_امواتنا
.
.
.
ياالله
قالتها ملاك عندما اسقطت الكاس مـن يدها وتكسر وحست بقلبها ينقبض
ملاك: ياالله استر مدري مال قلبـي
براق يوو مدري ماله اللـه يستر الـله يسمعنا خير

📚
#ظلمـات_أب_وقسـوة_زمــن 😖
الـبارت (⓽)

قربت الصبوح واصتبحت هـي وابوها وقلبها جالس خايف
ملاك: يابه انـا شاسير بـيت عمي بين احس ان براق فيه حاجة
سعد: صلي على النبي مابش الا كـل خير

ملاك: شاسير اطمن
سعد: تمام سيري وسلمي عليهم
.
.
.
ذهبت ملاك ولقت مرت عمها بتنبش فـي غرفة خالد

ملاك: سلام عليكم

جميلة بخوف: ماهو مالش نكزتيني تدخلي لا احم ولا دستور استحي

ملاك باحراج: مش هكذا ياعمة غر جيت اتطمن عليكم وينهو براق كيف هو

جميلة بلا مبالاه: هوذاك فـي غرفته سيري قومية يصتبح

تذهب ملاك وقلبها بينقبض كـل ماتقرب مـن الغرفة فتحتها وحطت يدها فـي فمها وصاحت: براااااق
بسرت فـي يدة ورقة وفمة بيخرج منه دم

ملاك والدموع ملان وجهها بتهزة بعنف: براااق لاتموتش براااق لاتفلتنيييش
وبصراخ:براااااااااق
.
.
.
سمع صرختها كـل البيت
خالد كان بيقرا قران وفجعه صوت ملاك وهي بتصيح : ياالله استرر يـارب
وحمل بسر غرفة براق مفتوحة ودخل وملاك هاناك وانفجع مـن شكل براق حمل شله وطار به للمستفـى

بعد ماخالد شل براق للمستشفى يتاكد مـن حالته بسرت ملاك الورقة وشلتها وقدي عتفتحها
دخلت جميلة
جميلة: مالكم بتصيحوا نكزتوني مـن النوم
ملاك ببكا: براق مدري ماله قد شله خالد للمستشفى
جميلة : لارجعهم الاثنين
ملاك: حراام عليش انتـي مابتحسيش مـن ايش مخلوقة انـتي اللـه يعاقبش

جميلة: ماتدخليش اخرجي مـن بيتي يله
تهم ملاك بالذهاب وتقول: نهايتش قريبة وعتبسري
.
.
تخرج ملاك مـن الباب وتلقى خالد فـي طريقها وهو فـي حالة يرثى لها وشكله مش طبيعي
ملاك: خالد اين جا براق

خالد بضياع: براق اين جا براق براق مااات مات ياملاك

ملاك ماقدرتش تستحمل دوخت على طول
.
انتشر خبر وفاة براق والاب بدأ ضميره يأنبه وهو يكلم نفسه ويقول: طيحت جهالي بيدي طيحتهم وكله بسببها لكن شاوريها بعد مانكمل نقبر

تمت مراسيم دفن براق وخالد على حالة وملاك تبكي فـي غرفتها وتذكرت حاجة

ملاك: الورقة اين خليتها دورتها لمـا لقيتها

ملاك: ايوة هيذه افتحها اقراها بدا قلبها ينبض بقوة ودموعها تسابقها وفتحتها وقريتها كلها ماقدرتش تتحمل الصدمة قامت بضياع وسارت لافوق قبرة

ملاك: براق جعلني مت قبلك ليش فلتني لمن يابراق لمن وتزداد شهقاتها وتقول
ملاك: ليش ماتقلي انك مريض ليش تتعذب وحدك ياارب موتني ياارب وضلت تبكي وتبكي حتى غفت فوق قبره وهي تنادي باسمه

<لـو البكاء يرجع الاحباب ان قد رجعناهم قبلش يـا ملاك >
دخل البيت بيتلفت بضياع والبيت هادئ وتذكر حس سيدة فيه وضحكة امة الرزاق وشم طبخ سعاد وخواتها وصوت براق بيداعيه وخالد بيقرا قران تذكر احلام جهاله الي حطمها وهو بيذم نفسه وتذكر منهو السبب فـي هـذا كله

صالح: والله ماسارت لش
دخل على جميلة وهي بتمشط شعرها وفارحة مسكها مـن شعرها وصيح : دمرتييني دمرتي جهالي اللـه ينتقم منش

جميلة : ااي فلتني مادمرتش احد انـت الي دمرتهم جهالك انـت انـا مادخلني
ضربها ضرب لوما شبع قلبه وهي قدي متكوره على نفسها وتتاوه مـن الالم

صالح: انتـي طاالق طاالق طالق
وخرج وقفل الباب
وتقفل معه باب روايتي الـي شبه حقيقية..

انتهينا من روايـة

#ظلمـات_أب_وقسـوة_زمــن 😖
#الخـــاتمة
#ملاك ...
بعد ايام ملاك تأقلمت على الوضع وجلست تدعي لبراق ومارضيتش تختطب لاحد ومصممة تجلس توبه لابوها الـي مرض بعد موت براق

#خالد
اللـه يشفيه بعدما فعلت له سحر خالته وذلحين قدة مجنون وحالتة حاله وابوه بيتحسر عليه مادريش مايفعله

#صالح
مرض بعد ماطلق جميلة وندم بـس بعد ايش بعدما كمل جهاله

#جميلة الشريرة
الي وقعت فـي شر اعمالها لانها بعد ماتطلقت مـن صالح وتزوجت خارج القرية بواحد بيضربها ويهينها وعايشة خدامة لمرت ابنة تستاهل وعذابها فـي الآخرة
💐 #النـــهايــــــه 💐
ﺩﻣﺘﻢ ﺑـﻮﺩ متابعين قناتنا ..
ما رأيكم بها ان شاء الله تكون عجبتكم واستمتعتوا بقراءتها...

شاركونا رأيكم ونقدكم وتعليقكم هنا.....
على تعليقات القناة

دمتم بود
....والقادم اجمل بإذن الله...😍❤️


نرحــب بجميــع الاعضاء
#رابــــط_القنــــاة👇👇👇
https://t.me/Abbotrr

الـبدايهـ👆❤

وين التفاعل 🥲❤‍🔥

...

اعطيكم نبذه عن الرويه علئ شان تتفاعلوا وتصوتوا 🥲❤‍🔥

بطلت ما عتنشر هذه المره روايتي بنشر روايه للكاتبه اميره اليمن روايه ضخمه اعجبتني بقووه وحبيت انشرها لكم 🙂✍

ورغم أن التفاعل هنا ماعجبني وماهو بذاك الزود..

بس شابدأ انزل الرواية من بكره لعيون كل من تفاعل واتحمس وانتظر 🥲❤‍🔥

بارتـات يومنـا قراءه ممتعه 👆🏻😍
#يسعدلي_اوقاتكم 😍❤

اليمن رسميا بطلا لكأس غرب آسيا للمرة الثانية فزنا😻👏🏻👏🏻

بارتـات يومنـا قراءه ممتعه 👆🏻😍

لا غيب الله أفراحك يابلادي🥺♥️♥️ 🇾🇪.