من الذكريات :
كان عبدالله على سرير الموت بالمستشفى وابوي وامي واقفين جنبه على امل الدكتور يطمنهم ويحكيلهم عبدالله بخير بس انا وابوي عارفين انه عبدالله شهيد .. لاني لما حملت الله ما كان فيه نبض الدكتور كان واقف عند راسه بحاول يعمل عملية انعاش .. يومها بتذكر وما بظن رح انسى .. اجت فضائية الاقصى وطلبت من امي تحكي كلمة انها واقفة بين اثنين من ابنائها والاثنين حالتها خطيرة جدا ...
امي وبكل ارادة وصبر وجهت رسالة لنتنياهو باللغة العبرية .. غزة ستنتصر باذن الله وان المقاومة ستستمر حتى تحرير فلسطين ..

من الذكريات :
تم تحويل عبدالله ومحمد الى مستشفيات خارج رفح لعدم توفر العلاج في رفح
ما ضل بالمستشفى الا انا وعماد اخوي من العيلة الكل طلع بالاسعافات .. جربت اطلع من باب المستشفى
صار علينا اطلاق نار ،، ضلينا قاعدين بالمستشفى قرابة ساعة ما في امكانية نتحرك ويومها قصفو ارض بصاروخ اف 16 بعيد عنا قرابة 100 متر الله سترنا كان صارت فاجعة كبيرة ... قدرنا نطلع من المستشفى من الباب الخلفي وكان شارع رملي وكنت انا وعماد حافيين والارض يومها كانت زي النار يعني حرارة الارض شديدة .. قدرت اصل البيت مع خوف شديد على نفسي وعلى عماد .. مش متحمل اشوف امي وابوي بيفقدونا كمان .. بيتنا كان مفتوح مش مسكر حاولت اغير اوعي من الدم اللي كان مغطي بلوزتي ...كان الاتصال صعب في 1-8 ويلا يلا يلقط معك الخط ولحظة ما لقط تواصلت مع زوجة اخوي عشان نقدر ننزح على منطقة تل السلطان بيت العائلة ... كان صعب اني امشي من بيتنا قرابة 6 كيلوا لعدم توفر المواصلات وحرارة الجو الشديدة لكن ما بعرف كيف تيسرت الامور وقدرت اصل واشوف زوجة اخوي ... يومها كذبت عليها وقلتلها عبدالله ومحمد بخير حولوهم على مستشفى خانيونس عشان يتحسنو وهي يومها صدقت ... حملت تصر وطلعنا نمشي لما وقفلنا باص وطلعنا فيه ... وصلنا السلطان لهو جوال عبدالله ببرن ،،، اذكر يومها جوالي كان واقع مني مع القصف ... كانت نغمة جوال عبدالله ان تدخلني ربي الجنة وكان اسم ابوي ع جوال عبدالله ( ربي ارزقه الجنة )
-الو اه يابا
- انت بخير ؟
- اه الحمد لله
- طيب دير بالك ع اخوتك
-حاضر
- كيف عبدالله ومحمد
- عبدالله - تعيش انت
- محمد حالته خطيرة ..
سكرت في وجه ما بعرف كيف ولقيت حالي ع الارض
.. وصلت لبيت العيلة ما بعرف كيف لكن ربنا يسرها

دخلت بيت العيلة والكل بيبكي وزعلان وانا فاتح عيوني وبطلع .. مصوم
كل ثانية بيرجع قدامي المشهد اللي صار لحظة الاستشهاد ولحظة الاسعاف ولحظة الازعاق حاولت انام لكن كل ثانية بشوف قدام عيني الاحداث اللي صارات .. بترجع اللحظات من اول وجديد

كيف عبدالله ؟
كان معي ...
لسا كنا بنحكي
...
ما نمت لاكثر من يومين

من الذكريات :
مر اليوم الاول بدون دموع ،، صمت
رجع ابوي من المستشفى واول ما دخل بيت العائلة وشاف الكل بيبكي. سجد وقام وقال الحمد لله .. وزرع فينا الامل بدرس لكل الموجودين. .. كنت بجد مش عارف شو احكي ابوي وامي صابرين قدامي لدرجة كبيرة وانا الشب مش قادر اتحمل ... يوما عرفت انه الانسان اللي بيصبر على المصيبة من الوهلة الاولى هو اللي ربنا بخبه من الانسان اللي ما بيرضاربقضاء الله وقدره ...
اجا الليل ووجعه .. عارف انك تسمع قهقهة بكاء ؟
ومن راجل كبير ؟
عارف انك تسمع هاد القهقهة من كل الموجودين ،،، ؟
الليل اجا ومعه زر تشغيل فيديو الحدث من جديد ،،، كان الاشي صعب جدا
في اليوم الثاني كان صعب نقدر نجيب جثة عبدالله وندفنها عشان الطيران بيقصف ع العميان ...
ثالث يوم من الفراق رجعت ع بيتنا عشان اشوف هل تغير شي ؟
حلق باب غرفتي لقيته مكسور باب بيتنا مكسور مع القصف شباك الصالون مكسور ،،، وطبعا منيح ضل في كم شباك ما انكسر ،، تحممت ولبست اواعي عبدالله ..
ورجعت ع بيت العيلة لانه بيتنا في منطقة شرقية واحتمالية القصف واردة ..

رجعت على بيت العيلة لهو ابوي بحكيلي الاسعاف كمان شوي جاي وجايب عبدالله ،، ان شاء الله رح نصلي الظهر عليه في مسجد سعد ..

ما بكيت من لحظة استشهاد عبدالله وكنت لسا من كل عقلي مش مقتنع عبدالله راح عني .. لسا عبدالله عايش لسا موجد ...
اجت اللحظة اللي قلبي ما وقف والدمعة الاولى تنزل ..
حملت عبدالله على كتفي انا وصديقه محمد وحطيناه قدام امي .. ما بذكر يومها قدرت او في حد قدر يرفع راسي عن صدره ،،، حطيت راسي ع صدره وكان الوداع الاخير .. مر يومين من الفقد وانا مش مصدق انه راح ما رح اشوفه مرة ثانية ،،،
صليتا عليه وكانت الجنازة بالنسبة لوقت حرب عددها كبير
..
نزلت في القبر انا وابوي .. كانت اول مرة في حياتي انزل قبرة وادفن حد .. الحد هو اخوي .. تناولت عبدالله من الشباب ووجهت وجهه عالقبلة .. وفكيت حبال الكفن .. طلع والدي وضليت انا وعبدالله بالقبر ... غطيت راسه بالبلاطة الاوالى والثاني .. دخلت راسي عنده وهمست في ذانه اخر كلام .... واعذروني ما بدي اكتبه ... وقبلته قبلة الوداع وطلعت من القبر وبعدها تم دفن قلبي ،،،

من يومها لليوم وانا بزور المقبرة ..
..
بتعرفوا بجد اذا بدكم تتعظوا .. زوروا المقابر ،، البعض منكم رح يقول لا انا بخاف والبعض الثاني بيقول ما بحب ارجع الذكريات .. لكن اذا انت بجد حابب تتغير ومن حين لاخر بتلاحظ انك لسا ما تحسنت روح زور المقبرة ... شوف هدوء المقابر وضجيج افكارك شوف انت لوين وصلت في علاقتك مع ربنا ،؟
جاهز تدخل القبر ؟

جاهز للموت ،،، لا انا ولا انت ولاااا حد جاهز ... كلنا مقصرين وقد ما نعمل مقصرين .

يا اخوان خلوا بينكم وبين الله عبادة سر تدخلكم الجنة .. خلونا كلنا نعاهد انفسنا ونتنافس مين يكون عنده عبادات سر بينه وبين ربنا ... خلونا نتقابل بالجنة باذن الله ...



حط النية تكون من الناس اللي يقال عنهم السابقون السابقون ،،، خلي طموحك واملك بالفردوس الاعلى

...

الله يكرمني ويكرمكم ..
سامحوني ...
جميع ما كتبته ليس الا #حكايا_قلب لاحداث مرت بي .

غدا سأكتب مجموعة من الذكريات ...

اقرف شي بجوال اللمس لما تكتب من قلبك وتنزل دموعك ع الجوال بتبطل تعرف تكتب ..

التطش ع الفاضي 😥

*

رِفْقَاً يَا قَلْبُ ؛ وَ صَبْراً . . 💜 ") !

⁧ #الشهادة ⁩
سعادة لا تنتهي !!
وهنيئا لمن كان له نصيب من الإصطفاء !!
وكان من أهل قوله تعالى"وَيَتَّخِذَ مِنْكُمْ شُهَدَاء"

من الذكريات :

كان عبدالله يشتغل في مدارس الاونروا .. والمدارس مليانة ناس نازحة من بيوتهم .. كان في غرفة مخصص للعاملين .. كل يوم عبدالله يطلب مني اجي معه اساعده واسليه .. نوخذ اللاب توب ونلعب #بيس كورة يعني بس نحاول نغير شوية من اجواء الحرب وسبحان الله طول الليل ما كملنا لعبة وحدة .. كل شوي واحد يدخل الغرفة يطلب مساعدة من عبدالله ..
كان لما عبدالله يطلع .. اضل ابعتله رسايل .. شو ي عبود مطول ؟
يبعتلي رسالة - سلي حالك بالبزر والعصير على بين ما اجي ..
يوم 31-7 ما طلعت مع عبدالله ع شغله .. دخل يوم 1-8 وعبدالله لسا في الدوام .. كان دوامه من المغرب للساعة 7 الصبح ..
يومها كان في كلام على هدنة .. اتصلت امي على عبدالله تقريبا بعد صلاة الفجر تطمن عليه .. قالتله : ما تروح عالبيت .. غير لما يعلنوا الهدنة ..
حكالها ما تقلقي واللي ربنا كاتبه بيصير ..
رجع عبدالله ونام في غرفتنا .. كنا انا وعبدالله بغرفة وحدة ..
يومها صحي على صوت صاروخ نزل على بيت جيرانا .. واصوات الناس النازحين اللي كانوا يمشو من شارعنا رايحين ع مناطق غرب رفح ..
يومها .. انا عند عبدالله بحكيلوا بعد ما سألني وين القصف .. حكيتله
ضربوا بيت ابو طه والناس بتنزح عشان صار عملية خطف جندي
جد يا انس في خطف .. اه يا راجل .
قام من مكانه ومسكني من ايدي واخذني على درجه وحكالي اسمع انا علي ديون وهي الورق مكتوب فيه كل شي من كمبيالات سداد دين وهي مصاري خليهم معك وحط كل غراضه في شنتة .. واعطى جواله الحديث لاخوي احمد .. وقلي روح حط كل الغراض في بيت عمي .. عشان الامور رح تتصعب
.. تمام طلعت من الغرفة انا وعبدالله .. لقيت امي قاعدة هي وابوي وكل البيت بغرفة الضيوف عشان الغرفة اكثر امان من باقي غرف البيت ..
عبدالله قعد على الشباب وهو بيضحك ضحكة حلوة ما بنساها .. يماا يمااا
اني لاشم رائحة الجنة .. يومها حكاها باللغة الفصحى ما اخذنا فيها كثير انه عبدالله بودع .. ابوي قال صار لازم نطلع من البيت .. كل اللي في المنطقة الشرقية نزحو ومن الخطر نضل في البيت .

طلعت انا وعبدالله على بيت عمي ومعنا امي وزوجات اخوتي ..
قعدنا شوي وبصراحة ما قدرنا نتحمل نضل بالبيت لانه الكل في الحرب بيتخنق من قعدة البيت .. طلعت انا قبل عبدالله ولبست يومها #شبشبه الله يعزكم وطلعت ولما وصلا بيتنا نادى علي وقلي وقف بدي اجي معك على الشارع عند احمد ومحمد وعماد .. بس خليني اجيب الكاميرا اصور النازحين والقصف .. انتظرته ع باب بيتنا ولما اجا كان حامل كاميرا لسا جديدة اول مرة يشتغل عليها حكالي يومها الحين ي انس رح اصور اول فيديو بالكاميرا الجديدة ..
مشينا مشينا ولما قربنا نصل لمكان ما اخواتي واقفين عن باب الدكان .. قلي عبدالله .. اعطيني #شبشبي الله يعزكم وخذ #صندلك يا أنس ..
الكل بيعرف انه #الصندل عشان تقدر تمشي فيه لازم تعمل اللزق وتظبطه قبل ما تمشي
قعدت على الارض اعمل لزق الصندل وعبدالل لبس الشبسب رضل ماشي ... ما لقيت بعدها غير دخان الصاروخ .. عبدالله وجنبه محمد
قمت من مكاني وبسرعة مسكت عبدالله حاولت احكي .. عبدالله عبدالله ما رد .. حطيت ايدي على راسه لكن .. ممممممممم جزء من النص مفقود ...
بعدها رحت اشوف محمد لقيته لسا بتشهد وبحكيلي عدة وصايا ..
قمت من مكاني وصرت اصرخ واطلع يمين وشمال ما حد راضي يقرب الكل خايف يقصفونا كمان مرة .. ربنا ستر عماد واحمد اخواتي كان في باب حديد ساتر الهم من الصاروخ .. طلع عماد راسه من الباب يشوف مين اللي بيصرخ ومين اللي انقصف لقاني واقف بين عبدالله ومخمد بنادي الناس تيجي تساعدني .. اجاني هو واحمد والصدمة على وجوههم .. عماد وجهه وحبة الليمون واحد اصفر اصفر .. طلبت من عماد يروح يحكي لابوي عن اللي صار ما فش دقيقة لقيت ابوي وعماد جايين .. حمل ابوي وعماد محمد .. وحملنا انا واحمد وشباب كثر الله خيرهم عبدالله .. في سيارة #فلوكس .. ما كان فيه اسعافات ..

يومها جريت من مكان القصف لبيت عمي احكي لامي .. يومها بتذكر ما قدرت احكي كلمتين على بعض ..
عبدالله ومحمد اتصاوبوا
امي بتسأل : طيب كيف اصاباتهم ؟
محمد بحكي .. بس عبدالله ( جزء من النص مفقود )

طلعت امي ومرت عمي .. بتكون بنفس الوقت خالتي .. على المستشفى وطلعت معهم يومها على #تكتك .. ما لقيتا سيارة ولا اي وسيلة مواصلات غيرها ..
وصلت المستشفى .. كان الدكتور بيحاول يعمل عملية انعاش نبض .. فرحت عند محمد ولقيته بيتشهد ..

قعدت بين سرير عبدالله ومحمد ..
عبدالله استشهد ... محمد بخير والحمدلله .


تقريبا اللي صار بعد هيك كتبته امبارح 😔

"الجنة يا الله للأصدقاء الذين لا يتغيرون ولا ينفرون من أحزاننا .. بل يواجهونها معنا." ❤️