- مين أكثر إنسان أثر فيك ؟

في الوقت الحالي , أكثر إنسان متأثر فيه بدون ما أعرفه , الشهيد : سلام المدهون ..
هذه وصيته
https://www.youtube.com/watch?v=O4tOx0L_M8E

- أحيانا بحس انه حضرتك بتحكي مع الناس كأنه انت ملاك وما بتغلط وهم بغلطوا !!! أو يعني بتقلل من قيمتهم بطريقة ردك على أسئلتهم!


احساسك أعطاني حافز لكتابة شيء كنت حابب أكتبه لكن ما تاحت الفرصة المناسبة .. أنا بنظر لكل إنسان بيتركلي ملاحظة نظرة الأفضل , ليش !
..
أنا بشعر أني أكثر إنسان بغلط ومخطئ والناس بتسألني لأني سبقتها بالغلط والخطأ , فبدها تعرف كيف انا بعد ما غلطت وأخطأت .. يعني مثلا لو في صديق الك قدم اختبار في مساق .. أول ما يخلص الإختبار رح تسأله .. شو اجاك في الإختبار ؟ ليش ؟ عشان أنت تجهز نفسك بشكل أفضل وتدخل قاعة الإختبارات وانت واثق من نفسك ..
أنا لو ما غلطت قبل هيك , كان ما عرفت أجاوب أي سؤال وصلني .. شكرًا على إتاحة فرصة للكتابة . ♥️

- مين اعز صديق الك .

كل الناس خير وبركة .. فش صديق معين ♥️

- كم اخ الك وانت اكبر واحد

..
تقريبًا أنا رقم 4 ..
في أحمد ربي يرجعه بالسلامة , وأخي محمد حكيم , وعبدالله شهيد , وأخي عماد رياضي وحكيم سنة أولى , وخليل أخر العنقود .

♥️

- أخي شو أكتر أنشودة بتحبها ؟؟

من فترة وفترة بتتغير .. في الوقت الحالي بحب اسمع هاد الانشودة ♥️

https://www.youtube.com/watch?v=GIcjEcPIjq4

- كيف ننسى حد زعلنا وجرحنا
ونحكي بطلت تفرق متى؟!
شو نسوي لنصير هيك ونبطل نكديين؟!

..
اشغل نفسك , ما تترك مجال للتفكير , رح تنسى ومع مرور الأيام لو تذكرت ما رح تكون مبكية ومتعبة مثل بداية الزعل والجرح ..
( بتبرد مع مرور الوقت ) ..

- بالنسبة الي بيحكي انو انت بتعامل الناس انك ما بتغلط.
انا بشوف انك بتعامل متل ما بتحب يعاملوك وبأدب واخلاق ودين .

..
أقلك شغلة , لو هو في حالة روقان كان ما كتب الملاحظة , بس يبدو انه متضايق شوي . وانا بالنسبة إلي ما تضايقت ولا انزعجت من كلامه بالعكس , شعرت بأنه نصيحة أني أتعامل بشكل أفضل من هيك وما أرد بهاد الاسلوب .. ولو زاد كلامه وكتب كلام جارح ما رح أزعل بالعكس رح أكون سعيد وأخذ كلامه على حسن نية وطيبة .
مش ماخذين من الدنيا شي .. وانا بطلب منه يسامحني ♥️

ردك على سؤال مين أعز صديق الك ..
استغربت انه ما حكيت "مؤمن " ...لأنه دائما كنت تجاوب على هاد السؤال ب " مؤمن ".... ليش هاد المرة ما حكيت مؤمن ؟!

..
وما زال مؤمن , لكن لو كتبت مؤمن هل رح يتغير شيء ؟ لكن لو شملت الجميع وما انتقصت من تواجد الناس اللي بحبوني وبحبهم جنبي رح تكون الإجابة أفضل , مؤمن بعرف مكانته بقلبي وانا كمان بعرف مكانتي في قلبه .. الصداقة الحقيقة مش مجرد إجابة قدام الناس , الصداقة معناها عميق جدًا .. أنا وأنت لسا لليوم بنتعرف على المعنى الحقيقي ..
بجد في أصدقاء كثير رائعين , تواجدهم في حياتي نعمة أشكر الله عليها .. كل الاحترام للجميع ♥️

أكمل ؟

خيو ليش بتسمع أناشيد كئيبة وكلها عن الموت 😕!

من طفولتي بحب الاناشيد الروحانية مش الحزينة , وما بدور على الصوت مثل ما بدور على الكلمات والمعنى , بحب الكلماتي اللي تدعوني للتفكير والتأمل والتدبر وتدفعني للبذل .. .
بالمناسبة أنا بسمع كثير أناشيد وما في انشودة بتنزل إلا بحب اسمعها , يعني في منشد قبل ساعة نشر على حسابه الشخصي .. رح ينشر انشودة جديدة بصوته للأقمار الثلاثة اللي استشهدو برفح .. كل دقيقة بعمل تحديث لصفحته عشان اسمعها .. ♥️

- احكيلي اشي كل ما أمل من الدراسه اتذكره '(
شيء يرفع ارداتي ، يقوني ، الي بدك اياه ..

هههه الله يسعدك يبدو انك زهقان وبدك أي حاجة تبسطك , حاسس فيك 😂
المهم .. تذكر حلمك وهدفك , اتذكر ابتسامة امك لما تشوفك ناجح , وفرحة ابوك ..
قوم اقف قدام المراية وأضحك , هاي أكثر حاجة بترفع المعنوية .. شد حيلك وربي يوفقك ♥️

ما بتفكر تدرس العلم الشرعي .. ك تخصص ؟؟ عقلية مثلك يحتاجها الدين والدعوة 😊

كتخصص جامعي , بصارحة ما بفكر ..
لكن كقراءة , الفترة الماضية وانا غايب عن مواقع التواصل قرأت تفسير سورة الأنفال ..
الحمدلله ربنا أكرمني في والد يعشق قراءة كتب التفسير وكتب العلم الشرعي .. عنا في البيت مكتبة كبيرة جدًا .. من جديد بدأت أقرأ الكتب الموجودة .. :) .

- شو رأيك بالأناشيد اللي ع نغمات الأغاني

..
عن نفسي بسمعها .. طالما كلماتها جميلة :) .

- هلأ إنت رديت ع سؤال أحدهم كيف ينسي شخص بيحبو انو يشغل حالو
طيب انا بشغل حالي وبنص الشغل بكون أفكر شو اعمل !؟

..
غير بوصلة تفكيرك , حاول تشغل تفكيرك بموضوع ثاني ... تحاول مع الناس اللي حوليك .. تناقش :)

- انت وين ساكن ؟

قلعة الجنوب .. #رفح .. الصندوق الأسود ♥️

- ليش انت اخترت تعمل قناة الك عالتيليجرام ؟

..
#الأثر الطيب فكرة مشروع تقريبًا صار الها سنة .. وبدأت الفكرة والكتابة تحت عنوان الأثر الطيب قبل سنة تقريبًا .. فاختيار إنشاء القناة كان مكمل للمشروع .. يعني في مجموعة على الواتس لكن مش تحت إشرافي .. بإسم #الأثر الطيب .. أنا مشترك وقارء فقط ما بنشر فيها . وفي صفحة على الفيس بوك بإسم الأثر الطيب والتيليجرام مكمل .. والحمدلله عدد 1.400 مشترك مش بسيط .. :)

شكرًا لتواجدكم جميعًا .♥️

يعني اختيار إنشاء القناة من باب إكمال الفكرة ونشرها بشكل أكبر .. ♥️

- لم أعرفه يوما و لم أسمع به ولم أره على الاطلاق الى حين استشهاده ورحيله من هذه الدنيا لا أدري قد تستغرب من حديثي أو لربما تقول هذه فقدت عقلها لكن في قلبي كثير من الكلام الذي تجاوز قدرتي على الكتمان و عدم البوح و الفض تجاوز كل دموعي التي ذرفت بصمت تلك التي تكون مصحوبة بغصة في الحلق كيف لي ان لا أمل من النظر الى صوره وجثمانه الذي لم يعد ليوارى الثرى و مشاهدة وصيته مرارا و تكرارا كلماته الاخيرة.. لحظات وداعه..لما هو فقط لما ترك في قلبي كل هذا الأثر...وليس كأي أثر !!...أبكي عندما أذكره...أكتب عنه و كأنني أعرفه منذ زمن تتدفق الكلمات إلى الورقة و يمتزج الحبر بدموعي..و عندما يرون كتاباتي يفتكرون أنني أقصد أحدٌ من أهلي أو أقاربي ....أرجوك قل لي هل يجوز لي حقاً أن أحب شهيدا؟!! غريبةٌ أنا و لربما تبصم بجنوني لكن كل ما أردته هو أن أتكلم فلا أحد ممن حولي سيفهمني أو بالأحرى لن يفهموا أياً من مشاعري و قد تكون مثلهم ولكن الفرق أنني قلت كل ما بخاطري دون أن يقاطعني أحدهم بردٍ متوقع _بكفيكي هبل_ ....
إذا كنت رأيت هذا أو لم ترَه أشكرك حقاً لأنني أشعر و كأنني فرغت الشحنات التي بداخلي إن صح التعبير كنت أريد البوح فقط و إذا أردت أن تقول شيئاً لا تبخل علي به....
أسعدك الله أينما تكون و أينما تذهب و ثبتك ربي على الحق و جمعك الله بأخيك و بمن تحب بجنان النعيم...

..

أختي الكريمة .. لا يوجد مشكلة من وجهة نظري .. لأنك لم تأخذي شيء منه .. في النهاية أقصى ما قد تفعليه الدعاء له .
لكن أتعرفين أين المشكلة ؟
المشكلة في الخلوة بين الشاب والفتاة , والخيانة , وتبادل الحديث الغرامي .
انت مرادك غير دنيوي أختي الكريمة .. الله يكرمك .
( الحلال بين والحرام بين ) .

ملاحظة : تحية لمن طلب حافزًا للدراسة وأحب أن أقول له .. تذكر انك أمل الامة واجتهد بالدراسة من أجل الاقصى💙

شكرًا على هذه المشاركة ♥️

- شكلك بتحب الاناشيد كتير ؟

صحيح ولو في عندك أنشودة حلوة , خليني اشاركك الإستماع .. :) ♥️

- انت لحالك في القناة ؟

صحيح , لو في أدمن الفترة الماضية كان ما لاحظ حد غيابي وانشغالي . ♥️