بالمناسبة أنا بالعادة لا أقوم بنشر الملاحظات التي تصلني على هيئة رسالة خاصة او نصها مليء بالكلام الجميل الذي يبعث في نفسي السعادة وربما الكثير من الذي ارسلو لاحظو انني اقتص سؤالهم فقط من الكلام الذي يصلني ♥️
شكرًا لاهتمامكم جميعا .. الله يحبكم

- بتحب تسمع أناشيد ؟ما نوعها ؟


أناشيد ( جهادية ) ♥️

- انت بتوعد وبتخلف ولا المشاغل بتنسيك ؟

المشاغل بتنسيني .. ذكرني لو تكرمت ♥️

- مثلا إنسان طول عمره مجتهد ومتميز وتخرج بمعدل مرتفع بس للأسف مش لاقي وظيفة الواحد بيزعل وبيضايق وبتسود الدنيا في وجهه غير هيك أهله بيضايقوا عليه وبيعطهوش مصاري بحجة لازم يشتغل وهالانسان صار يكره الناس وبيحبش يشوفهم لأنهم كل مايشوفوه بحكوله يا ابو الجامعة والمعدل العالي شوف شو سوت الدنيا فيك كل تعليمك على الفاضي آسف للإطالة بس شو النصيحة .


بصراحة ما رح أفيدك كثير بهاد الشغلة ولأول مرة أعترف اني عاجز عن الرد لأني ما خضت هاد التجربة .. أقلك ليش ؟
لأني تخرجت من الثانوية بمعدل بسيط يعني بدخلني كلية .. تعبت على حالي قبل ما ابدأ دراسة يعني قبل ما اختار التخصص كنت بشتغل :) .
والحمدلله الخبرة في مجال العمل فادتني كثير .. لأنه الميدان العملي أقوى من الكتب ..
لكن لو بدنا نيجي للصحيح .. الكتب الدراسية اللي بندرسها هي العمود الفقري لكل تخصص ومجال في الحياة ..

بدك نصيحتي ..
انزل اشتغل في مجال غير مجالك اذا ما لقيت شغل في مجالك ..
لأنه اذا ما تعبت على نفسك ما رح يساعدك حد ولا رح يجي حد ويقلك قوم اوظفك .. فش فانوس علاء الدين يا حبيبي .. الدنيا تغيرت ..
انا بطلع من ال7 الصبح اشتغل في مجال الاعلام من ناحية اعداد تقارير تصوير أفلام .. توثيق بعد الاحتفال وغيره لمؤسسة إعلامية دون تقاضي أي راتب .. لكن الفرق بيني وبين القاعد في البيت اني في كل مرة بطلع فيها أشتغلت بكتسب خبرة جديدة .. بتعرف على ناس جديدة .. وعلم جديد وتبادل الخبرة مع اهل الخبرة ..
يعني لو يطلب مني دكتوري في الجامعة أقوم اشرح بداله جاهز .. لأنه صار عندي خلفية عن مجالي .


ربنا يوفقك .. بعرف اجابتي مش تمام .. وما رح تعجبك كثير .. لكن ربي يوفقك .. قلبي داعيلك يخو ♥️

-ناس بتتدخل في حياتك كثير شو الحل؟؟


إهمالهم .. رح تقلي كيف ؟
أنا أقلك الإنسان هاد بس بدو يعرف تفاصيلك الصغيرة ..
انت بتجاهلك واهمالك اله .. رح يفرك فرك .. يعني رح يدوخ وهو بدور على تفاصيلك عشان يعرفها ..
كمان لما يجي يسألك .. جاوبه بسؤال .. كيف ؟
لما يقلك وين رايح .. قله انت ليش بتسألني وين رايح ؟
مع مرور الوقت رح يخاف يسألك عشان ما تسألوا ..

...

والاجابة محتاجة كلام كثير .. بس اختصار عشان الوقت ♥️

- رح تفرض ع مرتك النقاب


لا طبعا .. ما في حاجة اسمها فرض .. في مسايسة .. في حُب .. في اساليب .. كثيرة عشان تلبس النقاب وهي حابة تلبسه بجد ..

:) .

هل تعتبر سبب نجاحك هو الاعلامي راجي الهمص ؟

في البداية .. أنا لا زلت على عتبات البداية ولم اصل إلى النجاح الحقيقي الذي رسمته لنفسي في بداية حياتي ..
..
التوفيق من عند الله وسر نجاح أي إنسان في هذه الحياة .. هو محبة الله له ♥️
الله يوفق الجميع ..

- أخوي راجي كان دوره كبير .. كبير كثير .. 6 شهور من مرافقته وبشكل يومي .
من الصبح للمسا .. يعني لو إنسان غبي قعد ما إنسان مثل راجي كنز معلومات في مجال الإعلام و11 سنة من الخبرة رح يستفيد وكثير كمان .
لكن الحمدلله .. كل كلمة سمتها كنت احاول اطبقها واذا ما قدرت اسعى ..
والصح اعمله والغلط اتجنبه وبصراحة لحتى الأن أنا بستشيره وبأخذ بشوره في مجالي ..
يعني أخر مرة .. ( كان في مخيم اعلامي ومطلوب مني اكون مشرف في المخيم ضمن 3 مشرفين )
سألته .. هل ابدأ من الأن مشوار اعطاء المحاضرات والاشراف وتحمل مسئولية الطلاب ..
- قلي شو بتنتظر ؟
- قلتله .. لسا محتاج اتعلم أكثر عشان لما اقف قدام الطالب يكون بجد حاسس اني استاذه مش مجرد شب .
قال : انا واثق بدايتك رح تكون موفقة بإذن الله .

وبالفعل .. توفقت في المخيم ♥️
بالمناسبة : كنت لما احكي ما اعرف اسكت .... برام🙈

- ذاكرتك ضيعفة ولا قوية ؟؟

#ضعيفة .. والسبب كثرة الطلعة والنزلة يعني الانشغالات . ♥️

- هل تعتقد بان لك اعداء في ساحة الانترنت ؟


لو ما كان في اعداء .. رح اتأكد اني لسا ما نجحت :) .

- كيف بتعرف انو الي بيحكي معك بنت او شب؟؟


وضح سؤالك ..
لأني بصراحة مش فاهم ..
أول ما قرأت السؤال فهمت قصدك بخصوص اسئلة السايت .. لكن وضحلي عشان اجاوبك :)

-برايك ما الذي يجعلك مميز وركز على كلمة برايك ؟


- سؤالك .. واهتمامك بأنس أكبر دليل اني بنظرك مميز :) .
لكني محتاج لسا كثير عشان اصير بنظر نفسي انسان مميز .. في امور كثيرة محتاج اثبتها لنفسي بالأول ♥️

- مين الطفل الي حاط صورته ♥️؟


#عبدالله إبن أخوي محمد .. حبيبي :)

-اذا مريت بتجربه التوجيهي
من فضلك عندك نصائح 💜؟

التوجيهي سهل .. بس شو بفرق عن السنوات الثانية ..

توجيهي تقرير مصير 12 سنة في حياتك .. يعني رسوبك او نجاحك بقرر مصير 12 سنة تعب في حياتك .

بعدين الناس ما شاء الله ما بتسيبك من شرها وطولة لسانها بحجة خوفهم عليك .
عن نفسي .. كنت اروح اصلي .. جاي عشان ربنا ينجحك ؟
وعالطلعة والنزلة .. وين كيف توجيهي .. كرهت السنة .
بس بدي أقلك نصيحة .. ادرس أول بأول .. ما تراكم المواد عليك وما تسمع من حد اي كلمة ..
وكأنها سنة عادية في حياتك .
ليش ؟

في قصة قصيرة بنظري قاعدة في حياتي :

( قائد الضفادع وقف قدام جميع الضفادع وقال الضفدع اللي بيصل قمة الجبل أول رح أعطيه جائزة قيمة .. بس بعد ما قال هيك بدأ يخوفهم ويقول في حيوانات شرسة بالطريق ويحكيلهم ما تسرعوا كثير لانه سرعتكم رح تلفت نظر الحيوانات الشرسة ..
كلهم كانوا خايفين .. إلا ضفدع اطرش ما بيسمع ..
عرف انه في سباق غير هيك ما سمع شي .. وصل القمة .
العبرة .. ما تسمع من حد .. وتوكل على الله وربنا يوفقك .


نصيحة : لما تحب توخذ نصيحة .. خذها من إنسان نجح في الثانوية بمعدل عالي مش مثلي :) ..

♥️

-هل هناك صفة تحبها في نفسك او الناس يحبونها فيك، و الى أي درجة أنت راضي عن نفسك ؟؟



انت من تحدد الصفة وليس انا .. وأنت من يجب أن يخبرني بالصفحة التي تعجبك والتي لا تعجبك .. كي اكثر من الصفات التي تعجبك واتجنب الصفات التي لا تعجبك ..

اما من ناحية درجة الرضا .. فأنا راضي تمامًا عن نفسي ..
بالمناسبة اليوم بعد العشاء دار حوار بيني وبين اصدقائي بخصوص موضوع الرضا عن النفس ..

الحمدلله ♥️

-السلام عليكم أنس ليش ما بتغير الصورة الشخصية لصفحتك في الك صورة قاعد بين الشجر وبتضحك جحلوة كتير الصورة ممكن تحطها لو سمحت هادة طلبي 😊


لو لاحظت /ي ما بنشر صور على صفحتي مثل زمان ..
بس بنشر على الانستقرام .. لكن ان شاء الله رح اغيرها بإذن الله .

بس بجد ما بحب انشر صوري على الفيس بوك مثل زمان .

رح اغيرها لانه طولت عنجد

شكرا للاهتمام

الحياة شو ببتعنيلك ؟

قال رسول الله صلى الله عليه وسلم "الدُّنْيَا سِجْنُ المُؤْمِنِ وجنَّةُ الكَافِرِ"

هيك الاجابة كافية .. اظن ؟ ♥️

-ليش الغالبية العظمى من متابعينك بنات؟ بتعتبر هاد شي طبيعي لشاب ملتزم وبعمرك؟


طبيعي جدا يكون بنات مش شباب ..
ليش ؟
أولًا : لأنه انا بكتب قصص طولية والشباب ما بحبو قراءة القصص الطويلة ..

ثانيًا : البنت لما تعلق على أي صفحة أو على أي شب بتركلها رسالة او ببعتلها طلب صداقة او بضايقها وهي بس اعجبت بكتاباته او تصويره او موهبته .. وهاد الشي انا ما بعمله ..لأني واثق بأنه مش كل متابع بحبني .. الاعجاب مختلف تماماً عن الحُب .. والأهبل بس هو اللي بفكر انه اذا حطت لايك يعني بتحبه .

ثالثًا :
انا منشوراتي واضحة جدا ولو الي هدف بجد ببين في التعليقات عن طريق ردودي على البنات .. والكل بشوف وبتابع تعليقاتي ..
يا بذكرهم بالاذكار يا بشكرهم على تواجدهم .

رابعًا :
هدف الصفحة .. أثر طيب .. لو فيه هدف غير هيك كان على الأقل تم تفعيل رسائل الصفحة .. لكن انا ما عندي حساب شخصي ورسائل الصفحة معطلة .. يعني أنا كل شغلي آلة نشر .. آلة كاتبة .. بكتب وبنشر وبرد .. وربنا يتقبل ♥️


في اسباب ثانية وكثيرة كمان .. لكن سأكتفي بهذه الاجابات :) ♥️

- قدوتك ؟! و لماذا

الرسول صلى الله عليه وسلم ..

لماذا : محمد صل الله عليه وسلم هو نبي الله ترك لنا الأثر الطيب الذي يسعى الجميع في تقليده ولو بالقليل ..

( الاجابة على لماذا .. محتاجة قعدة ) ♥️

-سؤال فضولى :/ متى ناوي تنام


- لما انعس :) .

- لما يقتلك التفكير ع الآخر شو بتعمل؟؟؟؟

#بنام , او بحتاج مساعدة أي انسان وبشاركه الافكار يمكن يقدر يساعدني ♥️

-محمد منصور ؟
هل هو صديقك المفضل ؟
واحكيلنا شوية عنه



محمد بعرف مكانته بقلبي .. لو حابب تعرف محمد .. عيش معاه
لكن وبإختصار محمد :
إنسان طموح وذكي .. وشاطر في مجاله كثير
وبالنسبة اللي في مجالي .. محمد مكملني ..
..
انا ما حكيت عن محمد كثير ..
لأني ما بحب أحكي عن اصدقائي .. بخاف ينحسدو 😝🙈