- هو سؤال غبي شوي بس فضولي
لو بنت حكتلگ او بعتتلگ بحبگ
شو ردگ عليها بصراحة .

طالما انت عارف انه سؤال غبي .. ليش بتسأله ؟
لكن طالما هو فضولي .. .
انا بتعامل مع جميع متابعيني من البنات سواء كانوا بعرفوني او لا كأخوات .. و لكن لو صار و اجت بنت منهم حكتلي بحبك .. انا ما راح احاول ارد عليها بطريقة ما احرجها فيها و بنفس الوقت افهمها غلطها .. يعني الله يحبك و بقلل تعاملي معها لو كان في مجال عمل أو ما برد ع مسجاتها بعد هيك لو كان على حسابي الشخصي او صفحتي .. فقط لا غير ..

- مين عبدالله أبونجا ..

عبدالله من الناس الغير مفهومة .. يعني ممكن تتعامل معاه ويتعامل معك لكن انت وهو مش فاهمين بعض .. بس بنحب بسرعة سبحان الله .. حبيته من يوم ما اعرفته .. زي ما بقولوا من أول نظرة 😉

شو هوا الشيء الي مش ممكن تسامح الشخص الي عمل هالعملة شو هيا الشغلة يعني ؟


انا مسامح الكُل .. ما بظن رح اعطيك مجال للتفكير .. اكثر من هيك .

( انا مسامح الكل ♥️ ) .

- شو وجهت نظرك
عن الناس الي بتظاهرو بشي أمامك و من خلفك عكس الي انت شايفه منهم تمامًا ؟؟

كوجهة نظر .. هم جبناء .. أو بالأصح بخافوا .. وكمان لو بدي أحسن الظن أكثر وأكثر .. يمكن هيك طبيعتهم .. من ربنا .

لكن كتعامل .. رح اتعامل معهم باحسان ♥️

سؤالي
انت ليش متغير
لا للاسواء ولا للافضل متغير بشكل عام
يعني تحولت من شخص فكاهي
الى شخص جدي
من واحد بحب الناس والكلام معهم
الى واحدبعني هيك شوية بحب الانعزال
من نيتك الصافية
الى ظن السوء
من شبابك العادي
الي شخص متدين
يعني اشياء حلوة واشياء لا
وبتمنى تاخد الخصل الحلوة من التنين وتجمعهم في شخصيتك
والله يوفقك ويسهل امورك 😍😍 .



- لما عنجد أشعر باسألتك رح أجاوبك .. كيف أقلك تغيرت وانا ما شعرت بالمناسبة حتى لو تغيرت بعد اتخاذ قرار .. رح اكون عارف ليش أنا تغيرت وشو الاسباب اللي غيرتني ..
لكن اسئلتك تدل على انك انسان موجود في حياتي وعارفني منيح .. وبنفس الوقت حابب تقرب ومش حابب تبعد ..
يا أخي وحبيبي .. يمكن انت غلطت معي وصار تعاملي معك رسمي بعد انهيار ثقتي فيك .. الموضوع مش سهل اكتب فيه .. وعميق جدا ومحتاج .. اجابة عميقة عشان اقدر اقنعك وتقرأ أنت راضي .. ♥️

- في حياتنا مواقف أو أشخاص ممكن تؤثر فينا
أخي هل هناك موقف غير مجرى حياتك
هل هناك شخص ممكن أن تقول له
لولا الله ثم انت لما كنت للأفضل .

أه فيه بدل الموقف مواقف , لكن لو سردتها الك ما بتوقع في يوم من الأيام رح تصير معك .. يعني اجابتي ما رح تفيدك .. وبنفس الوقت .. انا منحاز لعدم الكلام في المواقف المؤثرة في حياتي .. ( يمكن خايف افتح باب على نفسي من ابواب الذكريات ) لكن بدي أحكيلك شغلة .. ( فش انسان بصل للمكان اللي بده اياه بسهولة .. لازم ينشل امله عشان يصل ) ..
وخاصة الناس اللي عايشة بغزة .. بتتعب وبتعمل المتسحيل بس عشان تصل .. للدرجة الاولى في السلم :) ..

شكرًا لاهتمامك واتمنى تسامحني

- بتحب الهدايا أخي ولو اهديتك بتقبلها ؟

بكل صدق .. أعشق الهدايا .. صحيح نادر جدًا تصلني هدية .. لكن هدية بسيطة بتغير مجرى يومك من سيء لسعيد جدا . او يمكن تغير حياتك ♥️

- ما هو أكثر شيء فعلته و تفتخر به في حياتك ؟

خليه بيني وبين ربنا .. ♥️

- انس بتحب اللون الأحمر لأنو أغلب لبسك احمر 😊


#عادي .. بلوزة أخي ولبستها .. وبالصدفة تصورت فيها .. فنشرتها ♥️

- شو نوع تلفونك ... ؟

#كشاف .. ابو شريحتين
لو كنت ماسك في ايدي جوال بصورة من الصور يمكن .. عشان اتصور فيه سيلفي .. ( جوال صديق من اصدقائي ) .

مبسوط ع الكشاف .. ♥️

- محتاج لمساعدتك ؟

تفضل /ي ..
إذا كنت قادر اساعدك رح اساعدك واذا ما كنت قادر .. رح اسعى لمساعدتك :)

- نفسك تشوف أمك وأبوك بالقدس ؟

..
قال نفسي قال .. #أخ .

الله يوعدنا جميعًا .. بالصلاة في القدس .. ونتصور سيلفي جماعي .. ♥️

- شو يعني جبد ؟

قبل ما احكي معناها .. رح احكيلك قصتها ..

في الشتا كنا سهرانين مجموعة شباب وبالصدفة شب .. كان بيحضر فيديو ( للعم كيمو ) مقدم برامج فلسطيني .. المهم بنص الفيديو بيقول ( واجبد واجبد واجبد )
المهم .. لفتت انتباه الجميع الكلمة .. فالكل حوط الشب وطلبنا منه يرجع يشغل الفيديو .. وحضرناه من يومها والشباب ماسكين بالكلمة ..

معناها كما فهمت :

اجبدني كف .. اخبطني كف ...
اجبدني تعليق عالفيس بوك .. اتركلي تعليق عالفيس بوك ..
يعني الكلمة معناها حسب الكلمة اللي بعديها .

.

الله أعلى واعلم ♥️

- شو بلدك الاصلية ؟ كلنا اخوة ، وبنحمل دم واحد لكن فضول 😊



أخوكم في الله .. من سكان بلدة يبنا ♥️

-أفضل واصعب مرحله مر بحياتك ؟


في تناقض في سؤالك .. كيف أفضل وأصعب مرحلة ..
بالمناسبة .. أفضل مرحلة لن تكون الأصعب لأنها تأتي بعد المرحلة الأصعب في حياتي ..
فتفادي الأصعب يؤهلني لكي اعيش الأفضل ..

لكن لو بدي أفهم انك سألت كل سؤال على حده .
رح أقلك أفضل مرحلة : هذه المرحلة التي أعيشها الأن ..

أصعب مرحلة : أيضًا التي أعيشها الأن ..

كيف ذلك .. انظر الى سؤالك .. ستعرف سبب إجابتي المتناقضة .. ستفهم ..

ومن حُبي لك . .
سأوضح لك .. ولغيرك ..
كل لحظة في حياتك مهما كانت مرة .. ستمر .. فلها مدة زمنية وان طالت .
هذه اللحظات عندما تمر .. ستتذكرها وتقول في نفسك انها ايام جميلة حتى وان كان قلبك مقتول وجسدك ميت حينها ..
فمجرد تجاوزك يعني انك رائع بنظر نفسك ..

بدأت ابتعد عن الأجابة لكن .
أخي الكريم .. كل لحظة تعيشها تكون جميلة او سيئة تجد ان لحظة الفرح لها ضريبة ولحظة الحزن لها مفتاح فرج بالنهاية .

يعني الحياة ماشية والله يسعدك .. ♥️

- اخي .. عندك اخوات بنات ؟ وكيف بتتعامل معهم ؟


أكيد .. عندي أختي إيمان ( أم علي ) الله يحفظها يارب ..

رح اسألك .. كيف بتتعامل مع امك ؟
رح تكون إجابتك .. اجابتي .. في كيفية تعاملي مع اختي ..
بتعامل مع أختي مثل ما بتعامل مع أمي لانها صاحبة فضل كبير ربي يحفظها .. مثل الوالدة .. هي #البكر ( يعني أكبر اخواتي ) .. يعني كانت تنصحني من طفلتي وتحكيلي عن الصح صح والغلط غلط .. درستني واكلتني .. ولعبتني .. ييييه #الفضل ما بنكتب .. والذكريات كثيرة ♥️ :)
♥️

- كيف اخوك محمد بعد العملية ان شالله طلع منيح ؟

الحمدلله .. نشكر الله على كُل حال .. دعواتك ♥️

- شو نوع تلفونك يلي بعتوو ؟

note 4 :) ..

- مرحبا أنس لو عزمتك على حفلة تخرجي بتيجي بكون مبسوطة اذا بشوفك ؟


- إذا كنتِ في الجامعة الإسلامية فلكِ الحق بثلاثة أو 4 دعوات ..
اهلك هم الأحق في رؤيتك ناجحة .. اما اذا كنتِ طالبة في أي جامعة أخرى .. فليس لي الحق برؤيتك في جميع الأحوال .. كل الاحترام لكِ أتمنى لكِ النجاح والتوفيق في حياتك .. التعليمية والمهنية بإذن الله ..

- خير الكلام ما قل ودل ...سؤال من هو انس ...ولا اقصد بهذا شكله او اسمه او تحديد صفاته .....اخبرني من هو انس ؟!

( لا شكل ولا اسم ولا صفات ) .


بصراحة مش حابب أحكي عن نفسي قد ما انا حابب تتعامل معي وتكتشف أنس بنفسك .. رح تكون أدق مني في التعرف على تفاصيلي :)

- شو رأيك بالاشخاص المزاجيين اللي كل ساعة بمزاج ؟؟
وكيف ممكن تتعامل معهم ؟

المزاجيين بالذات .. بحب اكون صديق مقرب منهم .. يمكن عشان انا بحب اكون بنظر صديقي الكُل في الكل .. إذا انا ما تحملته في تقلب مزاجه مين رح يتحمله ؟
حتى لو عاملني بإسلوب سيء .. رح اكون اكثر انسان متحمله .. بعيدًا عن الناس اللي بتشوف تحوله .. هو محتاج إنسان يحتويه في جميع مزاجاته انسان يفهم ..
عالهامش : طالما انت عرفت انه مزاجي فأنت تجاوزت الخطوة الأولى في القرب .. تجاوز الخطوة الثانية وتحمله . رح تتعب في البداية وعن تجربة ..
بعدين وبنفس زعاقه عليه او بهدلته الك .. بتلاقيه بصحى وبشكل تدريبي ببدأ يحكيلك اخ انا اسف غلطت امانة سامحني وخليك جنبي وما تتركني ..

لحظتها بتحصد ثمار تعبك ♥️

أسمع مني كل اللي بتحتاجه تحمل وصبر وحكمة ♥️