هل أحدثك عن عدد المرات التي فكرت فيها بك تحت كل ضغوطات الحياة وكآبتها، هل أخبرك أنك كنت ولازلت الخير الوحيد في كل هذا ؟! ... :)

في سؤال قصف ارض ارض .. يا ساتر .. بشويش يا جماعة والله بحبكم 😍😝

- ليش بتكره العلمي ؟

ما حكيت اني بكره العلمي ..
بس بجد انا من الناس اللي بكره مادة الرياضيات والفيزياء والاحياء والكيمياء .. المواد العلمية .. وبحب مواد الادب والحفظ :) ..
شكرًا على السؤال .

- في نظرك.... من هو الذي يحبك؟ ...

الإنسان اللي بهتم في .. وبذكرني بالخير وبعاتبني على اشياء غلط عملتها من خوفه علي .. اللي بدعيلي بدون ما اعرف .. الانسان اللي بقف معي بظروفي الصعبة .
يعني في حجات كثيرة .. محتاجة وقت للكتابة ♥️

- أنس فيك تحكيلي كيف اقدرت تعيش وتتكيف بعد فقدانك لاخوك. ؟

ما رح اتعبك بالتفكير وتكرار السؤال .. الإنسان سميَ إنسان لأنه كثير النسيان .. والحمدلله على نعمة النسيان .. صحيح في كل زاوية بالبيت موجود ذكرى .. لكن لو بدي أحط ايدي على خدي واضل حزين بالك أخوي اللي فقدته رح يكون مبسوط ؟
لا طبعا .. رح اكمل حياتي واعمل اللي ربنا يقدرني عليه .. ربنا يكتبلنا الأجر في المحنة اللي مرينا فيها بحياتنا ♥️

- ما هى الكتب المميزة التي تنصحنا بمطالعتها ؟
انا ولأول مرة في حياتي أقرأ كتاب .. سأقرأ كتاب .. اهداني اياه أخي محمد وشجعني لقراءته ابي .. كتاب لكريم الشاذلي .. اسمه : ما لم يخبرني به أبي .. لمن يُحب القراءة أو تحمليه هذا هو الرابط :

http://readne.com/book/downloading/130

- لو انتا كنت اخترت بنت للزواج و امك رفضتها. هل راح تخضع لقرار امك ؟

هو لو بدي أقلك .. لازم افرض شخصيتي .. واجيب الزوجة على رأيي وقناعاتي دون استشارة احد .. كل شب فينا قادر .. لكن لا تنسى أهلك الهم فضل عليك وثاني شيء .. انت مستقبليًا بدك يصير بينك وبين اهلك مشاكل عشان بنت عجبتك ؟
تعال فكر معي شوي : ؟
أكثر انسانة عارفة مصلحتي أمي .. لو امي مش موافقة على البنت .. بسألها شو الاسباب ؟
والله اذا اقنعتي بكل الاحترام لقرارها .. لكن اذا ما في سبب مقنع .. بروح استخير وبتوكل على الله ..

بس بدي اقلك نصيحة : الأم ربتك وعاشت معك اقل شيء 20 سنة .. بدك تتركها وتبعد عنها وتزعلها وما تخليها تفرح بزواجك عشان بنت عجبتك ؟
يا أخي ما شاء الله في كثير بنات بالدنيا .. حتى زوجتك ما بترضا يصير معها بالمستقبل ابنها يزعلها يوم زواجه !!

عشان هيك .. ( وجه نفسك ع القبلة وصلي صلاة استخارة واتوكل على الله ) ♥️

- بدايتك كإعلامي ؟
كان عُمري 18 سنة .. يعني كنت لسا طالع من توجيهي ولسا مسجل تخصص علاقات عامة وإعلام جديد .. كنت مراسل صحفي لموقع صدى الملاعب الرياضي في غزة ..
كانت البداية ميسرة لانني كنت مصور ومحرر صحفي بدلًا عن أخي عبدالله ما بعد ذلك .. أي الخطوة التالية في حياتك كانت الأصعب .. بالمناسبة .. كنت أصغر صحفي يمتلك البطاقة الصحفية على مستوى قطاع غزة حينها :) .

- أخي ما رأيكم بهذه العبارة
عجبت لاخوة في الله كيف تنهار بجهالة ساعة
وكيف يمتنع الأخ عن مسامحة أخيه وقد عاش معه أوقات كثيرة مليئة بالمحبة
تطبق في أيامنا أم لا

..
أعجبتني وتطبيق بالفعل .

نصائح توجهها للآخرين في تعاملهم مع الناس
وشكرا

..
كل الإحترام الك استاذي الكريم .. لكنني الأن في فقرة الإجابة على الاسئلة وأنت كقارءة لا تُحب ان يتم تشتيتك ما بين إجابة ونصيحة :) ...

لك ذلك في فقرة أخرى ♥️

- سؤال شخصي...
شو حابب تكون صفات زوجتك المستقبلية ....
بصراحة ...

..
تركت في نهاية سؤالك كلمة ( بصراحة ) ..

سأصارحك .. لم أفكر مسبقًا في مواصفات او مميزات .. الزوجة المستقبلية ..
عندما أقف على أول السلم .. سأبدأ بالتفكير :) ..

شكرًا على السؤال .

- سؤالي ما هو سبب اختيارك لكنية أبو بلال .

أخي عبدالله رحمه الله كان الجميع يناديه بأبو بلال .. وانا كان الكثير من شباب المسجد ينادوني بأبو محمد ..
لكن بعد استشهاد عبدالله .. أحببت أن اكنى بكنيته .. كي يبقى الإسم خالد في الذاكرة مع سبب التسمية ♥️

- ماذا لو كان هناك سرا بينك و بين نفسك و لا تريد لأحد معرفته و أتى ذلك اليوم و كشف ذلك السر ؟

..
عبادة السر هي الشيء الوحيد الذي أخاف أن يعرفه أحد .. لأن معرفة الناس لهذه العبادة .. سيحولها إلى عبادة مثل باقي العبادات ..

ما دون ذلك .. فالله خير الحافظين :) .

- قبل فترة قصيرة كنت على مواقع التواصل حالتك النفسية في بوستات وكلام وصور تعبر عن حدا خيب الثقة تبعتك . او انتا كنت واثق فيي زيادة وخيب املك وبعدها بفترة قصيرة كمان نزلت كلام بصوتك على الساوند بيعبر انو انتا ما بدك حدا يدخل في مشاعرك وهادي اشياء خاصة وما بتحب حد يدخل فيها . هل الكلام الصوتي يلي نزلتو الو علاقة بالناس يلي كانت تتسال مالك وشو فيي !!؟ ..


لا .. يمكن انت فاهم خطأ :) ..

شكرًا على اهتمامك

- كيف تتعامل مع الناس كما يقال بياعين وجوه ؟

بأخلاقي .. إذا هُم عاملوني بوجه سيء أو بالأصح تعاملوا معي بالحسنى ومن وراي تعاملوا بسوء .. بتعامل معهم بأسلوب يعلمهم وهو مقابلة الإساءة بالإحسان .. اذا انا اليوم عاملته بنفس اسلوبه رح يضل يمارس اسلوبه مع الكل .. لكن لو انا غيرت مفهومه وعاملته باسلوب طيب رح يتعجب وانا واثق رح يقول .. انس مش احسن مني يتعامل باسلوب طيب .. والله لاكون احسن منه ..

وهي رح يتغير :) ..

( مش ماخذين من الدنيا اشي ) ♥️

- شو أكتر حاجة بتكرها في نفسك وبدك تتخلص منها ☺️



معرفتك لهاد الشغلة رح تكون نقطة ضعف بالنسبة الي وانا ما بعرفك وما بعرف أغلب الموجودين ممكن انسان يستغلها ضدي .. عشان هيك .. رح اتحفظ على الإجابة .. شكرًا لاهتمامك :)

- هل في حياتك أشياء تفرح عند رؤيتها
مثلا هدية من شخص تحبه ؟

أكيد .. اشياء كثيرة وبالمناسبة السعادة ما بتقتصر على هدية او رسالة .. السعادة أحيانا تعليق والله .. لما تلاقي انسان تركلك تعليق فيه كلامات بتفرح .. قلبك بنشرح مش بنبسط .. وكمان السعادة احيانا على هيئة اشخاص مثلكم افاضل ... اعشق التواجد بينكم .. ♥️
الله يحفظكم .. يمكن بعدت عن الإجابة .. لكن سامحني .. هيك رد بسيط وخفيف ♥️

- أنس في حد بساعدك في الرد علي تعليقات وتنزيل المواضيع لاني شايف مجهود كبير منك ؟


لا طبعا .. الصفحة بإسم أنس نصر .. وكل منشور أو تعليق يمثلني :) .
شكرًا لاهتمامك

- شو بيعنيلك رفيقك المصور معمر ؟

لو لاحظت في سؤالك انتقصت من قدر محمد بقلبي .. وكتبت رفيق .. لكن هو بالنسبة لي أكثر بكثير من معنى هذه الكلمة .. هو يعلم ذلك ..


وبخاف ننحسد 😂

- هو سؤال غبي شوي بس فضولي
لو بنت حكتلگ او بعتتلگ بحبگ
شو ردگ عليها بصراحة .

طالما انت عارف انه سؤال غبي .. ليش بتسأله ؟
لكن طالما هو فضولي .. .
انا بتعامل مع جميع متابعيني من البنات سواء كانوا بعرفوني او لا كأخوات .. و لكن لو صار و اجت بنت منهم حكتلي بحبك .. انا ما راح احاول ارد عليها بطريقة ما احرجها فيها و بنفس الوقت افهمها غلطها .. يعني الله يحبك و بقلل تعاملي معها لو كان في مجال عمل أو ما برد ع مسجاتها بعد هيك لو كان على حسابي الشخصي او صفحتي .. فقط لا غير ..

- مين عبدالله أبونجا ..

عبدالله من الناس الغير مفهومة .. يعني ممكن تتعامل معاه ويتعامل معك لكن انت وهو مش فاهمين بعض .. بس بنحب بسرعة سبحان الله .. حبيته من يوم ما اعرفته .. زي ما بقولوا من أول نظرة 😉