ASTU Network ®️

" ከ10 በላይ ተማሪዎች በጸጥታ አካላት ከዶርማቸው ተወስደዋል። ከትምህርት የተባረሩም አሉ " - የደባርቅ ዩኒቨርሲቲ ተማሪዎች

➡️ " የዲስፕሊን ቅጣት አንቀበልም ያሉ 5 አካባቢ ተማሪዎች በፖሊስ እንዲወጡ ተደርጓል " - ዩኒቨርሲቲው

" 5 ተማሪዎች ከትምህርት ገበታቸው ሲሰናበቱ፣ 3 ተማሪዎች ለአንድ ዓመት ከትምህርት ገበታቸው የተወገዱ ሲሆን፣ 19 ተማሪዎች ከፍተኛ የጽሑፍ ማስጠንቀቂያ እንዲደርሳቸው ተደርጓል! "

ከሳምንት በፊት "ርቦናል፣ ምግብ ይስተካከልንን" በሚል በቲክቫህ ኢትዮጵያ በኩል ጥያቄ ያቀረቡ የደባርቅ ዩኒቨርሲቲ ተማሪዎች ሰላማዊ ሰልፍ መውጣታቸው የሚታወስ ሲሆን፣ በወቅቱ " አመጽ ቀስቅሰዋል " የተባሉ ተማሪዎች ሰሞኑን " በጸጥታ አካላት በኃይል ከዶርማቸው መወሰዳቸውን " እና "የተባረሩ" ም እንዳሉ ተማሪዎቹ እየገለጹ ናቸው።

ትናንት (ህዳር 27/2018 ዓ/ም) " 12 ተማሪዎች ከዶርማቸው በጸጥታ ኃይሎች " እንደተወሰዱና ያሉበት እንደማይታወቅ ተማሪዎቹ ሲገልጹ የተስተዋሉ ሲሆን፣ አንዳንዶቹ ደግሞ የተወሰዱ ተማሪዎችን ቁጥር "ወደ 17" አድርሰውታል። ሌሎቹ ደግሞ የ17 ተማሪዎች ስም ዝርዝር ሲጠየቅና ሲፃፍ እንዳስተዋሉ ገልጸዋል።

" ምግብ እንዲስተካከልልን በመጠየቃችን ጥይት ተተኮሰብን " ሲሉ በሰላማዊ ሰልፉ ወቅት የደረሰባቸውን በማስታወስ ያማረሩት ተማሪዎቹ፣ አሁን ደግሞ ተማሪዎች በጸጥታ ኃይሎች እንዲወሰዱ እየተደረገ በመሆኑ ለጉዳዩ አስቸኳይ መፍትሄ እንድሰጥ ጠይቀዋል።

ደባርቅ ዩኒቨርሲቲ ለቲክቫህ ኢትዮጵያ ምን ምላሽ ሰጠ ?

ቲክቫህ ኢትዮጵያ፣ ከዚህ ቀደም ጥያቄ ያነሱ የዩኒቨርሲቲው ተማሪዎች " በጸጥታ ኃይሎች ከዶርማቸው ተወስደዋል" ስለመባሉ ምን ምላሽ እንዳለው የደባርቅ ዩኒቨርሲቲን የጠየቀ ሲሆን፣ የዩኒቨርሲቲው ፕሬዝዳንት ስልክም ሆነ የጽሑፍ ምላሽ ባይሰጡም የዩኒቨርሲቲው የህዝብና አለምአቀፍ ግንኙነት ዳይሬክተር አቶ አምሳሉ ተበጀ ግን የጽሑፍ ምላሽ ሰጥተዋል።

በዚህም፣ " በዩኒቨርሲቲያችን ህገወጥ ሰልፍ በመሩና ባስተባበሩ፣ የአካል ጉዳትና የንብረት ውድመት ባደረሱ ተማሪዎች ላይ ተገቢው ማጣራት ተደርጎ የአካዳሚክ የዲስፕሊን ቅጣት ተላልፏል። ከዚህ ውጭ በማህበራዊ ሚዲያ የሚሰራጨው መረጃ ፍጹም የተሳሳተ ነው። ዩኒቨርሲቲያችን ሰላማዊ የመማር ማስተማር ስራውን እንደቀጠለ ነው " ብለዋል።

ቲክቫህ ኢትዮጵያም፣ ግን እኮ "ወደ 17 ተማሪዎች በጸጥታ ኃይሎች ከዶርማቸው ተወስደዋል" ተብሏል፤ ወዴት ነው የተሰዱት? በማለት ሲጠይቃቸውም፣ "ወደ '17 ተማሪዎች በጸጥታ ኃይሎች ከዶርማቸው ተወስደዋል' የሚለው ፍጹም የተሳሳተ መረጃ ነው። የዲስፕሊን ቅጣት አንቀበልም ያሉ 5 አካባቢ ተማሪዎች በፖሊስ እንዲወጡ ተደርጓል" ሲሉ መልሰዋል።

" ሕገወጥ ሰልፍ " ማለት ምን ማለት ነው? ተማሪዎቹ እንደገለጹልን፣ " ምግብ ይስተካከልልን " ብለው ነው ሰላማዊ ሰልፍ ያደረጉት፤ ታዲያ ይህ እንዴት ህገወጥ ሊባል ይችላል ? ሲልም ቲክቫህ ኢትዮጵያ ለአቶ አምሳሉ ተጨማሪ ጥያቄ አቅርቧል።

እሳቸውም፣ " ጥያቄውን በሰላማዊ መንገድ ከመጠየቅ አልፈው በሀይልና በጉልበት ኮብል ስቶን ድንጋይ በመወርወር ግጭት እንዲጀመር ያነሳሱ፣ በሰላማዊ ተማሪዎች፣ የምግብ ቤት ሠራቸኞችና ካምፓስ ፖሊሶች ላይ ጥቃት ለመፈጸም ማምራታቸው ሰልፉን ህገወጥ ያደርገዋል " ብለዋል።

ለመሆኑ " የአካል ጉዳት የደረሰባቸው " እነማንና ስንት ናቸው? ምን አይነት ንብረትስ ነው የወደመው? በምን መልኩ ወደመ ? ለሚለው ጥያቄ ደግሞ፣ " የአካል ጉዳት የደረሰባቸው ሁለት ተማሪዎችና በርካታ የፀጥታ አካላት ናቸው። የወደመው ንብረት የዶርሚተሪ እና የመመገቢያ አዳራሽ መስታውት መሰበርና፣ ጄኔሬተር የማቃጠል ሙከራ ናቸው " የሚል ምላሽ ሰጥተዋል።

" የዲስፕሊን ቅጣት በተመለከተ በአጠቃላይ ይህን ጥፋት የመሩና ያስተባበሩ የሚመለከተው የዩኒቨርስቲው የስራ ክፍል የተረጋገጠ ሲሆን 5 ተማሪዎች ከትምህርት ገበታቸው ሲሰናበቱ ፣ 3 ተማሪዎች ለአንድ ዓመት ከትምህርት ገበታቸው የተወገዱ ሲሆን፣ 19 ተማሪዎች ደግሞ ከፍተኛ የጽሑፍ ማስጠንቀቂያ እንዲደርሳቸው ተደርጓል " ነው ያሉት።

" የዲሲፕሊን ቅጣቱ በማህበራዊ ሚዲያ ከእውነት የራቁ የዩኒቨርስቲውን ገጽታ እና የአካባቢውን ማህበረሰብ የማይወክሉ መረጃዎችን የሚያሰራጩት ተማሪዎችን ያካተተ ነው " ሲሉም አክለዋል።

ተማሪዎቹ ከሳምንት በፊት ምግብ ይስተካከልልን ብለው ሰላማዊ ሰልፍ አድርገው ነበር፤ ለመሆኑ ቅሬታቸው ምላሽ ተሰጠው? በተጨባጭ ምን አይነት ማስተካከያ ተደረገ? ስንል ላቀረብነው ጥያቄም፣ " ዩኒቨርሲቲው በሚቻለው መጠን በምግብ በኩል የተነሱ ጥያቄዎች ከተማሪዎቹ ጋር በመወያየት ምላሽ እየሰጠ ይገኛል " ሲሉ ለቲክቫህ ኢትዮጵያ ተናግረዋል።

ቲክቫህ ኢትዮጵያ
አዲስ አበባ
#TikvahEthiopiaFamilyAA

@tikvahethiopia

😭12❤7👍1😁1

2.2K views18:21