هي حاجة خارج طبيعة القناة بتاعتنا بس افتكرتها وحبيت اشاركها معاكم...

في مرة أبويا الله يرحمه قال لي : لما تكون بتوزع فلوس زكاة أو صدقة إدي لفلان ( حد معروف وصاحب مهنة محترمة وعنده محل ويبان مستور و نزيه وبيلبس شيك ) .. قلت له : معقول يابابا دا هياخد زكاة ، دا معاه أكتر مننا .. قال لي : إسمع الكلام وإعمل اللي بقولك عليه .. روحت للراجل ولسه بديله الظرف قال لي : إيه دا يابني ؟ قلت له : دي محبة ، نفحة من ربنا .. قال لي : لا يابني ، مستورة والحمد لله وخير ربنا كتير ، شوف حد يستاهل إديهاله .. رجعت لأبويا ، قال لي : كان لازم تضغط وتحايله ، عموماً إرجع له تاني وقول له : أبويا اللي باعتني وبيقولك ماتكسفنيش علشان خاطره لو له معزة عندك .. روحت للراجل وطلعت له الظرف تاني وقلت له اللي أبويا قالهولي .. إتفاجئت بإن الراجل أخده من غير أي مقاومة ، و إبتسم وبعدين عنيه دمعت ودعا لي ولأبويا و عمل لي شاي وقعد حكالي جزء من المآسي الضخمة اللي هو عايشها والإلتزامات اللي عليه وظروفه المرضية هو وزوجته وبنته
الناس دي الأولى بزكاتنا وصدقاتنا ( تحسبهم أغنياء من التعفف ) .. الناس دي ندور عليهم ونروح لهم ونحايلهم ونبوس رأسهم علشان يقبلوا منا مال الله الذي أرسله لهم معنا .. الناس دي أولى من الأنطاع المستنطعين اللي قاعدين أدام باب الجامع ومش بيدخلوا يصلوا واللي قاعدين ع الرصيف ناقص يقوموا يقطعوا جيبك وياخدوا اللي فيه
زمبؤولكم كدا

لا تنسوا أبي وجميع موتانا من صالح دعائكم..
فالميت لا يطلب من الدنيا شيئًا، إلا دعوة صادقة تصل إليه فتؤنس وحدته وترفع درجته عند الله.
اللهم ارحم من غابوا عن أعيننا ولم يغيبوا عن قلوبنا 🤍

مهتم ب آخر اخبار التكنولوجيا..متنساش تتابع القناة بتاعتنا ❤️🥸