‏-
‏شوي و اموت ، من ظني وتفكيري
‏وما يشهق الحب في صدري وما يزفر

كل ما اذكر ان الخطا اصغر من معاذيري
‏اضحك على قلبي المسكين .. واستغفر !

جازت له الغيبه وللحين غايب
مايدري ان الشوق في خافقي حيّ

من طول الغيبات عنده حبايب
ماعاد فيها لا غنايم ولا شيّ .

‏إكل من الكبر والتطنيش ماتشتهي
‏وأشبع غرورك ولامنك شبعت السعه

‏ماني بقايل علامك ليه ماهيب إهي
‏من يقمعك، بالتغلي بالفراق اقمعه

ما حزنت إلا على هقواتي ، وطيبي ، وظني
يوم كنت أظنه أطيب من على الدنيا لقيته

كنت أشوفه قطعةٍ من قلبي وروحي ومني !
وكنت أشوفه كل حلم وكل شي قد بغيته.

ما هقيت إنه بيحزنّي وعاده : بيغبنّي !
في وفاي اللي وفيت وفي غلاي اللي عطيته .

‏جفاني النوم والهاجوس يلعب بي
لا جاني النوم ولا راااحت الضيقه.

—

في سكون الليل و الظلما يدور بْها القمر
‏من كثر ماهو هدو صارت نجومه خافته

‏اتبع الهاجس على ما فات عمري من عمر
‏ولا لمحت لـ ما مضى فـ العمر ايّت لافته

‏ابغي اليمّه واقدّي قلب من صبري ضمر
‏وطال ليلً ماعرفت احسب مدى مسافته

كان للذكرى ورى عيني لو آغمّض ممر
‏مير هـالليله عيوني غمّضت ما شافته

‏لا سقى الله ليلةً حطّت على كبدي جمر
‏من حرارتها مشاعر خاطري متهافته

‏آفت القلب ! المحبه يوم جاها وانهمر
‏ما درى ان حبّه بيصبح في ضلوعه آفته

‏منزلً شيّدت مبناه وعمرته واندمر
‏ليت نفسي يوم حوّل من علوّه عافته

‏مير هذا الحب ، "ناره جنةً فيها ثمر"
‏وما يرد القلب عن قطف الثمر مخافته

‏ولّعي يا نار في صدري من جروم السمر
‏واحرقي قلبً سعى لـ ايامه اللي طافته
ــ عبدالهادي بن جفال ــ