{الحراق}(126) الثور في الفصل.. Lunana: A Yak in the Classroom

https://www.youtube.com/watch?v=2O7ME-0NEi8&list=PLBsIgVvbrncBJbmFFzhjJfzK9aLoMuouz

مدرِّس شغال في الحكومة، بيتبعت لقرية بعيدة مفيهاش لا كهربا ولا طرق ولا مباني عشان يدرِّس لأطفال في أولى ابتدائي.
الغريب ان القرية مفيهاش مدرسة أساسا.
امال هيشتغل ازاي؟!
هيشتغل في أوضة مبنية بالطين، وفيها كراسي خشب قديمة.. وترابيزتين مكسرين.
وبما ان مفيش سبورة...فهايكتب على الحيطة بالفحم.
بعد كم يوم أهل القرية بيلاقو ان عندهم "طور" كبير في السن مش عاوزين يوقفوه في البرد، ومش لاقييـنله مكان يعيش فيه، فبيقوموا حاطينه في الفصل.
يعني المدرس بيبقي شغال في مكان تقدر تقول انه زريبة.
القرية اللي بتدور فيها الاحداث دي هي قرية حقيقية... اسمه "لونانا"
والفيلم اسمه بالكامل:
"لونانا: الطور في الفصل"!Lunana: A yak in the classroom

الياك ده هو نوع من التيران الجبلية بيسموه "طور التبت"!
الفيلم من انتاج دولة صغيرة جدًا مساحتها واحد على تلاتين تقريبًا من مساحة مصر، وعدد سكانها ٧٥٠ الف نسمة بس، يعني أقل من عُـشر سكان القاهرة.

{تعاشب شاي}(912) لما امك تعملك هيكل في البيت!

https://www.youtube.com/watch?v=DZG5LUpKQlQ&list=PLBsIgVvbrncB0M8dlzAbvjl79Nu8v_BW4

لو انت قاعد تتفرج علي عماد الدين اديب و هو بيتكلم في اي موضوع .. فغالبا مش هتلاقي عنده كاريزما تشدك .. و لا استرسال في الكلام يخليك تتابعه و تركز معاه .. و لا ثقافة تستفيد منها .. و لا معلومات حصرية و لا رؤية عليها القيمة .. بس ده مش معناه ان مفيش اي فايدة خالص هتجيلك من الفرجة عليه .. لانك ممكن مثلا تنام علي صوته و هو بيتكلم .. فايدة دي و لا مش فايدة ؟؟

{الحراق}(127) الكل ملحد.. حتى يسقط الأسانسير..

https://www.youtube.com/watch?v=qdE7MnbCLlo&list=PLBsIgVvbrncBJbmFFzhjJfzK9aLoMuouz

في عمارة الايموبليا المشهورة في وسط البلد ، يركب المخرج صلاح ابو سيف الاسانسير مع مراته الحامل،عشان يطلعوا للدكتور اللي بيتابعوا معاه الحمل ..وفجأة الكهربا تقطع والاسانسير يتعطل ساعة ونص..ساعة ونص من الخنقة والكتمة ، ممزوجة بالقلق على زوجته وحملها ،لحد ما ربنا فرجها وترجع الكهربا وتنتهي المعاناة..لكن مع انتهاء الأزمة تتولد الفكرة ، ويطلع صلاح ابو سيف على صديقه الكاتب الكبير نجيب محفوظ عشان يقول له وجدتها ..احبس لي يا اسطى المجتمع المصري ده بكل أطيافه وشخصياته واخلاقياته جوه اسانسير ، وحطهم في اختبار جوه أزمة بتهدد حياتهم كلهم ، وحطهم كمان في اختبار قدام نفسهم وأخلاقهم وشهواتهم ، وخلينا نشوف الناس اللي متعرفش بعض لكن اكتشفوا إن مصيرهم واحد ، والخطر اللي بيواجه حياتهم واحد ..هيتصرفوا ازاي وهما متعلقين.. بين السما والارض ..

{تعاشب شاي}(913) ليالي الجنيه الحزينة

https://www.youtube.com/watch?v=Lh_hoFu5_xU&list=PLBsIgVvbrncB0M8dlzAbvjl79Nu8v_BW4

بصوا بقي .. لازم تعرفوا ان الجنيه المصري الي متبهدل دلوقتي ده و التمنتاشر منه باقل من دولار امريكي .. كان ممكن جدا يبقي حاله احسن من دلوقتي بكتير لو كان فيه حاجات صغيرة اتغيرت .. لو مثلا روسيا ماضربتش اوكرانيا .. و لو امريكا مارفعتش سعر الفايدة .. و لو مصر فيها اقتصاد قوي .. و لو كان عندنا صناعة و زراعة و تنمية حقيقية لا سمح الله .. و لو كان ماحكمش البلد عبد الناصر و السادات و مبارك و السيسي .. بصراحة كده و من الاخر الجنيه كان حاله هاينصلح و هيبقي وضعه احسن بكتير اوي .. لو كان اتولد و عاش في اي حتة تانية غير مصر اساسا

{تعاشب شاي}(914) الواد يقش

https://www.youtube.com/watch?v=O8afBtScaCY&list=PLBsIgVvbrncB0M8dlzAbvjl79Nu8v_BW4

اول حاجة في لغة السياسة في العالم هي المصالح. يعني اي تصرف بتعمله الدولة من دول او اي تحالف بتدخله او معركة ، لو ما اترجمتش لمصالح واضحة ومكاسب ممسوكة و متشافة ، يبقى قلتها احسن !
و المصالح هنا المقصود بيها " فوايد " سياسية او اقتصادية او عسكرية للبلد كلها ، لان في اوروبا و الدول المتقدمة بيعتبروا ان السياسي او الحاكم لو ماحققش مصلحة للبلد ، او لو حقق مصلحة شخصية ليه ، من ورا اي قرار او توجّه، بيبقى خاين و يستحق المحاسبة !
اليومين دول ، و على خلفية الحرب الروسية الأوكرانية ، الدول كلها بتدور على مصالحها من ورا التناقضات و الخلافات اللي بين امريكا و الغرب من ناحية ، و بين روسيا من ناحية تانية .
و ده طبيعي .
و جنب انه طبيعي ، لازم يخلينا نسأل نفسنا ، هو السياسات الخارجية للسيسي طوال الـ8 سنين اللي فاتوا ، هل كان ليهم نتايج مفيدة ؟
و الفوايد دي كانت في مصلحة السيسي و لا البلد ؟
و ايه المعايير او المقاييس اللي السيسي بيشتغل على اساسها في سياسته الخارجية ؟!

{الحراق}(128) الاختيار.. The Contractor

https://www.youtube.com/watch?v=uM_zML4GAz0&list=PLBsIgVvbrncBJbmFFzhjJfzK9aLoMuouz

السؤال بيقول:
هل احنا ضد إن يتعمل مسلسل زي الاختيار او فيلم زي الممر.. او غيرها من أعمال التطبيل والتزوير وغسيل المخ؟!
هي دي مش حرية فن برضه؟ ولا انتو مع الفن اللي على مزاجكم انتو بس؟!
هقولك معاك حق.
بل و ازيدك من الشعر بيت، إن أفلام تمجيد الجيوش بتتعمل في كل دول العالم بما فيهم أمريكا، وياما هوليود طلعتلنا أفلام بتصور الجندي الأمريكي زي الملاك، بل والاستديوهات بتاخد تسهيلات من البنتاجون عشان يعملوا الهجص ده كمان.
ايه رأيك؟!
هتقولي امال ايه الفرق؟!
هقولك الفرق يا عزيزي... ان عندهم زي ما من حقك تعمل الأفلام دي.. من حقك برضه تعمل في نفس الاستوديوهات... بنفس الميزانيات... افلام مطلعه الجنود الامريكان مجرمين وسفلة وسفاحين وقتلة.. بل ومغتصبين كمان، وتعرض الأفلام دي على اكبر المنصات... وتترشح لأكبر الجوايز(بما فيها الاوسكار) ... ومحدش هايرميك في زنزانة لحد ما تموت من المرض والجوع.
بس كده.. ده كل الفرق.

{ساس يسوس}(96) الاختيار الأخير

https://www.youtube.com/watch?v=kkgKf6R-rQ4&list=PLBsIgVvbrncC_hFoIcgf8_NyqLkF1nkba

واتكلمنا فى الحلقة اللى فاتت عن خطتك فى التعامل مع الانتخابات من لحظة ما تلاقي نفسك مجبر عليها ولازم تخوضها وتكسبها كمان... وعرفنا إزاي هتبتدي بأول خطوة وتوجّه الرأي العام لصالحك وإن من غيرك البلد هاتنهار والمعارضة هايخربوا البلد، وإزاي هاتلمّع نفسك بعدها فى الإعلام وتلعب فى دماغ الناخبين وتدّي هدايا وتصرف ببذخ عشان تزغلل عين الناس ويختاروك فى الانتخابات سواء برغبتهم أو خوفًا على أكل عيشهم.
وجرينا معاكم بالأحداث وشوفنا إزاي هاتبدأ تجهّز الانتخابات نفسها؛ من أول اللجنة أو المفوضية اللى هاتتولى كل حاجة بدالك، مرورًا بطرق سريعة تفلتر بيها المُرشحين عشان متخليش كل من هب ودب ينزل قصادك، وبعدها تسجيل الناخبين واللعب فى الدواير الانتخابية وشرا الأصوات وتزويرها، لحد ما وصلنا فى النهاية لمرحلة الفرز وعدّ الأصوات وإزاي هاتحسمها لصالحك أو هتعمل إيه بشكل عملي لو بعد كل ده خسرت الانتخابات.
وخلونا النهاردة نكمل معاكم الحكاية ونشوف إيه اللي هيحصل فى نهاية حكمك

{الأسبوع ف كيس}(302) إرحل.. يا ياسر

https://www.youtube.com/watch?v=lt3y7q7Re1Q&list=PLBsIgVvbrncAeJMvwCpzZg-ow581Oh13M

رمضان كريم وكل سنة وانتم بخير.. النظام المصري خلاص قرر ان شهر رمضان يبقى هو الموسم الرسمي اللي يفكرنا فيه ، إن البلد دي مفيش حد عاداها ولا احتلها ولا اتآمر عليها غير الإخوان..مفيش هكسوس ولا انجليز ولا حملة فرنسية ولا صهاينة.. ولا حد خطر على أمنها القومي غير الناس ، اللي يا ماتوا يا اتسجنوا يا طفشوا ، يا قاعدين بالبدلة الحمرا مستنيين الحكم بالاعدام .. وده مبرر أنه يصرف على خياراته التلاتة، وما يستجد من خيارات ملايين من جيوب الشعب، على فقرات الاراجوز وحصص التربية الوطنية واسكتشات التقليد اللي بنشوفها دي .. الجميل في الموضوع بقى إن كان فيه فيلم اتعمل اسمه سري للغاية..الفيلم اتلغى عشان أداء السقا لدور السيسي ماعجبهوش..
فلك عزيزي المشاهد أن تتخيل إن الابداع اللي شفناه ولسه هنشوفه ده عدى على السيسي وعجبه.. ربنا يخليك لينا يا ريس راعي الضحك والكوميكس الاول في الشرق الأوسط.. وعلى جانب آخر انا بضم صوتي لصوت الإعلام الرياضي المصري ،

{تعاشب شاي}(915) طبلي طبل على طبلي

https://www.youtube.com/watch?v=Mtnh3R-Z74E&list=PLBsIgVvbrncB0M8dlzAbvjl79Nu8v_BW4

من يوم ما السيسي وصل للحكم ، و الصحافة في مصر تحولت لقعدة على غرزة او مصطبة ، كل اهتماماتها هي الهيافة و الاخبار السطحية ، وبقت المانشيتات عن موضوعات ولا ليها 30 لازمة .
بس كل اللي بيحصل في الصحافة و الاعلام المصري الكام سنة اللي فاتو ، حمادة ، و اللي بيحصل في الاعلام ده سواء مكتوب او متشاف – مُشاهَد يعني – من ساعة ما نظام السيسي نزل بأحدث منتجاته الفنية " الاختيار 3 " ، حمادة تاني خالص !
ازاي ؟

{تعاشب شاي}(916) من النهاردة مافيش كاميرا .. اني الكاميرا..

https://www.youtube.com/watch?v=PygHQSSWYbQ&list=PLBsIgVvbrncB0M8dlzAbvjl79Nu8v_BW4

تسمعو عن هيرو أونودا... hiroo onoda..
لأ ده مجرد سؤال بلاغي مش اكتر.. لو متسمعوش عنه عادي يعني.
هيرو اونودا يا سادة يا كرام هو جندي ياباني كان بيحارب في الحرب العالمية التانية ولما الحرب خلصت رفض انه يصدق اللي حصل..
فضل مستخبي في غابه في الفلبين لسنين بعدها.. وكل ما يشوف حد معدي يقتله ومتصور ان لسه الحرب شغاله.
كل ما حد يحاول يتكلم معاه ويقوله ان الحرب خلصت
أونودا يقوله اسكت يا عميل الامريكان.
يقولوله يا حبيبي خلاص.. فكرة أمريكا واليابان بقو حلفاء دلوقتي!
يقولهم انا مستحيل اتخلي عن موقعي واخون اللامبراطور؟
يهديك يرضيك.. مفيش..
وطبعا من ساعتها بأه يستخدم كرمز للناس اللي التاريخ وقف في دماغهم.. ورافضين يعترفوا ان الظروف بتتغير ولازم تصرفاتهم تتغير برضه.
لو بحثت عن قصته اون لاين... هتلاقي انه في النهاية استسلم لما بعتوله قائده السابق في الجيش.. اللي اقنعه فعلا ان اليابان استسلمت والحرب انتهت.

{تعاشب شاي}(917) إفلاس لبنان.. بس؟

https://www.youtube.com/watch?v=HkJfI5y-C6c&list=PLBsIgVvbrncB0M8dlzAbvjl79Nu8v_BW4

و كأنها كانت ناقصاه !
باتكلم عن نائب رئيس الوزراء اللبناني اللي طلع و قال ان لبنان مفلس و بنكه المركزي مفلس و الدنيا آخر خراب و العياذ بالله !
تصريحات نائب رئيس الوزراء اللبناني جت في وقت مخلي الجميع مُهَيَّئين للاقتناع بإفلاس لبنان ، و مستعدين نفسيا لتصديق اي كارثة تحصل في لبنان اللي ظروفه تسد نفس العدو قبل الحبيب !
و برضه مستعدين لتصديق اي كارثة في العالم العربي عموما !
او في العالم كله ، اللي مفحوت بفعل ازمات كتيرة منها حرب اكرانيا و ازمة الغذاء الحالية و زمة الغذاء المتوقعة ، و ازمة الطاقة ، و احتمالية توسع الحرب .
ظروف كلها آخر بؤس الصراحة !
بس هل لبنان فعلا فلس تماما ؟
و هل التجربة دي ممكن تحصل في دول عربية تانية منها مصر ، زي ما البعض خايف بسبب كتر الديون ؟
و يعني ايه اصلا بلد تفلس ؟!

{تعاشب شاي}(918) شخلل عشان تعدي

https://www.youtube.com/watch?v=d3-0l45cP0Q&list=PLBsIgVvbrncB0M8dlzAbvjl79Nu8v_BW4

اي دولة في العالم بتقرر انها تعمل طريق عندها ..غالبا بيبقي في دماغها اهداف معينة .. زى مثلا انها تكون عاوزة تربط بين مناطقها بالطريق ده .. او تسهل حركة النقل .. او تخدم المواطنين .. او تعمل تنمية .. اما في مصر بقي فالموضوع مختلف شوية .. الدولة عندنا طول النهار والليل بتعمل طرق طويلة عريضة مخصوص ..علشان تحط عليها كارتة و تلم فلوس الناس

{تعاشب شاي}(919) وداعاً جمال.. فالكل باعوك..

https://www.youtube.com/watch?v=w-FoMblFtro&list=PLBsIgVvbrncB0M8dlzAbvjl79Nu8v_BW4

يوم 31 مارس اللي فات ، النيابة العامة التركية طالبت بتحويل ملف محاكمة السعوديين الـ26 المتهمين بقتل جمال خاشقجي الله يرحمه للقضاء السعودي .
ده كان بمثابة انقلاب في مسار ملف القضية ، بالذات و ان الناس فاكرة كويس اللغة الحادة و التصعيد اللي كان بيتكلم بيهم الجانب التركي اللي الجريمة دي حصلت على ارضه .
بعدها بكام يوم ، تحديدا يوم 7 ابريل الجاري ، بالفعل، القضاء التركي قرر نقل ملف القضية للقضاء السعودي !
القرار ده سبب موجة احباط وسط كتير من المتابعين و الغاضبين من قتل خاشقجي ، و البعض اتهم الادارة التركية انها باعت الراجل !
هل فعلا خاشقجي اتباع ؟
و التمن ايه ؟
و ايه سر التحول ده في التعامل التركي مع قضية خاشقجي بعد سنين من التصعيد ؟

{الحراق}(129) ينقذ البشرية و يصلح ساعات Interstellar

https://www.youtube.com/watch?v=jwQs5V0xK5E&list=PLBsIgVvbrncBJbmFFzhjJfzK9aLoMuouz

زمان قبل اختراع المكن والآلات كان المفكرين والفلاسفة بيفسروا كل الحروب والصراعات بين الشعوب، او حتي أي خناقة عادية بين اتنين في سوق.. بإن كل ده راجع (للصراع على الموارد)
وكان تخيلهم إن في المستقبل هيكون فيه سلام عالمي عشان هيبقي فيه ميكنة حديثة وآلات تقدر تكفي احتياجات البشر الأساسية، بالتالي هيتخانقوا علي ايه؟
واضح انهم كانو ناسيين إن أول جريمة قتل... كانت بين أول اتنين اتوجدو على الكوكب... قابيل وهابيل...وأكيد وقتها مكنش الصراع عالموارد.. الصراع كان بسبب احقاد شخصية.
النهاردة هنشوف مشهد شبه ده... شخصين على كوكب لوحدهم بيحاولوا يقتلوا بعض.
يمكن كتير منكم سمع الكلام اللي اتقال عن الدقة العلمية اللي في الفيلم.. بس الحقيقة إنه في الاخر فيلم خيالي يعني، فمش هنركز اوي عالناحية العلمية..
خلينا نستمتع بالقصة من غير ما نقلبها درس فيزيا!
النهاردة هنتكلم عن فيلم.. interstellar .. او زي ما الاستاذ أنيس عبيد ترجمها "بين النجوم"

{تعاشب شاي}(920) عسكر و عمران خان

https://www.youtube.com/watch?v=ft9G-RO4IX0&list=PLBsIgVvbrncB0M8dlzAbvjl79Nu8v_BW4

بسبب الحرب الروسية الأوكرانية فيه كذا خناقة سياسية او عسكرية محتملة زي الصين وتايوان .
و فيه كذا خناقة سياسية كبيرة حصلت بالفعل ، اهمهم خلال الايام اللي فاتت ، معركة دارت في باكستان !
المعركة دي ، زي ما جرت العادة في اغلب الدول الاسلامية و معاه الدول العربية ، كانت هي الخناقة التقليدية بين العسكر من ناحية ، و رغبتهم في السيطرة المطلقة على السلطة ، و بين رئيس الوزرا عمران خان ، اللي كان عاوز يمارس صلاحياته كرئس وزراء مدني بيحكم بلده بشكل طبيعي زي دول العالم الطبيعية ، و يكون من حقه انه يمارس سياسة خاصة ببلده ، هو شايف ان فيها قدر من الاستقلال و عدم التبعية .
و ده الحق البديهي لاي سياسي !
لكن للاسف ،
و كالعادة برضه ، زي ما بيحصل في المعارك دي في دولنا العربية و الاسلامية ، انتصر العسكر ، و تمت الاطاحة بعمران خان !
ايه اسباب الخناقة؟
و ايه علاقتها بحرب روسيا و اكرانيا ؟
و ايه جذورها التاريخية؟

{تعاشب شاي}(921) حنطني يا!
https://www.youtube.com/watch?v=Vn09pPFSYAU&list=PLBsIgVvbrncB0M8dlzAbvjl79Nu8v_BW4

اوعي تفتكر ان الفن و الدراما وظيفتهم الوحيدة هي التسلية .. لا خالص .. الدراما دي مهمة جدا و ممكن اوي مسلسل واحد يغير حياة ناس كتير .. و هنروح بعيد ليه ؟؟ عندك مسلسل الاختيار 3 مثلا .. اهو ده مش بس غير حياة ناس .. ده جاب عاليها واطيها …فيه ناس مثلا لما شافوه ورموا .. و فيه ناس ماتوا من الضحك .. و فيه ناس كسروا التلفزيونات .. فيه بقي مجموعة تانية لما شافوا المسلسل فكروا بايجابية .. و بداوا يلموا من بعض علشان يجمعوا مبلغ كبير و يدوه للاستاذ بيتر ميمي مقابل انه يعتزل و يقعد في البيت و يبطل اختيارات بقي لان جسمنا باظ منها و الله

{تعاشب شاي}(922) مسلم و مسيحي.. و المختل واحد

https://www.youtube.com/watch?v=uKZ1m55kEWM&list=PLBsIgVvbrncB0M8dlzAbvjl79Nu8v_BW4

اكيد حضرتك لو انت بتتابع الاخبار ، او لو مش بتتابعها بس بتقلب على الفيس كل شوية زي ملايين الناس في العالم ، اكيد عدت عليك اخبار عن جريمة بشعة حصلت في مصر من كام يوم ، لما شخص اعتدى على قس اسمه ارسانيوس وديد ، كاهن كنيسة العذراء في محرم بيه في اسكندرية، بسكينة ، و ترتب على الاعتداء ده وفاة القس !
اهو القصة دي او الجريمة دي ، اللي عدت عليك و انت بتقلب على الفيس بوك ، مليانة ثغرات و خروم ، بتقول لك ان كل حاجة في مصر دلوقت عبثية و غوغائية و مش معقولة و ممكن تقود لكارثة اكبر.
و ان النظام مبيكلفش نفسه انه حتى يحبك الكذب اللي بيكذبه على الناس !
ازاي الكلام ده ؟
و ليه لازم كل المصريين يقلقو من جريمة زي دي ؟

{ساس يسوس}(97) كله بالجغرافيا بيفك

https://www.youtube.com/watch?v=BBrXiYanOdQ&list=PLBsIgVvbrncC_hFoIcgf8_NyqLkF1nkba

واتكلمنا في الحلقة اللي فاتت عن... لحظة كده، مش كفاية كلام في التاريخ بقى؟ عمالين ننقل من تاريخ مصر شوية لتاريخ كوريا لتشيلي للعراق لأندونيسيا والكونغو بالمرة، واخدين العالم من شرقه لغربه عشان نحكيلكم تاريخ المستبدين والطغاة، وإزاي الحاكم المستبد بيتم صُنعه وبيوصل للحكم ويقعد ويترستق على الكرسي... كل الحكايات دي مش مجرد حواديت قبل النوم وخلاص، كان قصدنا نتعلم إزاي يتعرف الحاكم اللي ناوي يبقى فاسد من أول بصة في سحنته لما يهل علينا، امممم ويمكن برضه نساعدكم لو فيه حد فيكم عنده ميول ديكتاتورية ولا حاجة بس مش عارف السكة منين، أهو نبقى أخدنا ثوابه ووريناه أول الطريق وكله عند الله... بس عمومًا، سواء ده أو ده، كفاية كلام عن التاريخ شوية، وخلونا ننقل على موضوع جديد... موضوع ايه؟ بقولك كفاية تاريخ، يبقى أكيد هنتكلم عن الجغرافيا، أنت مأخدتش دراسات فى إعدادي ولا ايه؟ وبعدين السلسلة دي اسمها ساسا يا سوسو، عارف سوسو دي تبقى مين؟ لأ مش هي، مع إن دماغك شمال وعجباني، سوسو دلع (دراسات) عادي.

{تعاشب شاي}(923) خالد عيد ماماتش.. مرتين..

https://www.youtube.com/watch?v=xN0Ori8eJ5I&list=PLBsIgVvbrncB0M8dlzAbvjl79Nu8v_BW4

اعذروني المرة دي لان عادة لما باتكلم عن اي موضوع ، باحاول اعالجه بشكل فيه دعابة او سخرية .
بس المرة دي ، الموضوع مستحيل بتعالج بالشكل ده .
لان موضوع الحلقة دي كارثة و مصيبة فوق اي وصف واي محاولة للمعالجة او التحليل !
احنا اتكلمنا كتير عن " الاخفاء القسري " اللي نظام السيسي محترف فيه ، من ساعة ما وصل للسلطة .
المرة دي ، هنتكلم عن واقعة اختفاء قري انتهت بالموت ، و بعد الموت اختفاء تاني !
لغاية ما بالصدفة ، السلطات افتكرت انها تبلغ اهل الضحية !
و الضحية مش شاب ممكن يتقال عليه ان عنده افكار متطرفة او بتاع عمل عنيف او اخوان او اي حاجة من الحاجات اللي اتعود نظام السسي و اعلامه انه يلزقها في اي ضحية من ضحاياه !
المرة دي الضحية باحث اقتصادي مرموق، و سياسي في حزب شرعي ، خريج الجامعة الامريكية ، كتاباته و حتى انتقاداته لسياسات النظام هادية وعاقلة و مفيهاش اي تطرف !
هنتكلم النهاردة عن : أيمن هدهود .
ايه الحكاية ؟
و ليه قصة ايمن هدهود الله يرحمه بتقول ان البلد دي مفيهاش اي امل ؟

{الأسبوع ف كيس}(303) رمدان كريم يا مسريين

https://www.youtube.com/watch?v=aC4LphBuhb4&list=PLBsIgVvbrncAeJMvwCpzZg-ow581Oh13M

معروف ان المسلسلات معمولة عشان تتشاف أو تتسمع..في رمضان السنة دي فيه ظاهرة جديدة على الدراما، وهي إنك ممكن تشم المسلسل كمان ..وده اللي حصل مع مسلسل فاتن امل حربي ..نظرة واحدة عليه هتشم ريحة ابراهيم عيسى في كل مشهد، ومش محتاج تسأل المسلسل ده تأليف مين ..عشان قريب اوي ممكن كمان حلقتين ولا حاجة هتلاقي نيللي كريم طلع لها شنب ولبست حمالات وهي رايحة مشوار لشيخ، عشان تقول له أنا خابطة المشوار أسألك،
 ومش مقتنعة بكلامك من قبل ما تجاوب عشان الإجابة دي مش مكتوبة بالنص في القرآن مليش فيه ..طب يا أبلة انتي مش مقتنعة بكلام شيوخ ولا علما ولا مفسرين، وعندك القرآن في البيت جاية تسألينا ليه ؟ لأ مفيش أنا ابراهيم عيسى بعتني ابيض عليكو بس ، واطلع كل الشيوخ انتهازيين وجهلا وخلقهم ضيق ومعندهمش حجة ..وانا جامدة زوحليقة وهعمل اللي انا عايزاه طالما مش مكتوب في القرآن..وعلى الله حد يقول لي ما هي القايمة وحق الكد والسعاية، والشقة من حق الزوجة