{تعاشب شاي}(970) ليه تركيا واقفة زي العقدة في الزور للسويد و فنلندا على باب الناتو؟

https://youtu.be/4g0b-hP8S-g

في العالم المتوحش الي احنا عايشين فيه .. حيث الدول الكبيرة بتمسك الدول الصغيرة من رقبتها .. و القوي بياكل الضعيف .. و الي معاه فلوس بيحضن و يبوس .. اي حاكم او رئيس دولة تجيله فرصة او تقع تحت ايده ورقة يقدر يضغط بيها علي الدول الي حواليه علشان يحقق مصلحة لبلده .. مبيكدبش خبر .. و بياخد ورقة الضغط الي جاتله من السما دي و يبوسها وش و ضهر .. و بيفضل يستغلها و يعصرها علشان يكسب من وراها لحد ما ينشف ريقها .. و ده بالظبط الي بيعمله الرئيس التركي رجب طيب اردوغان دلوقتي في حوار انضمام فنلندا و السويد لحلف الناتو.. و من ساعة ما الدولتين قدموا طلب دخول الحلف .. و اردوغان واقفلهم زي العقدة في الزور .. و قاعد علي كرسي قصاد باب الحلف و كل ما يشوف فنلندا و السويد بيقربوا يروح راشش عليهم مية و يقولهم كل واحد يروح يلعب عند حلفه

{تعاشب شاي}(971) ايه اللي مخلي تيران و صنافير زي البيت الوقف لغاية دلوقت؟

https://www.youtube.com/watch?v=LxDHyDb4YbA&list=PLBsIgVvbrncB0M8dlzAbvjl79Nu8v_BW4

من جديد رجع تاني الكلام عن " فضيحة " بيع تيران وصنافير للسعودية .
بس محور الكلام المرة دي هي " اسرائيل " ، لا مصر و لا السعودية !
وده اكبر دليل على ان لا مصر ولا السعودية بتقدر تدير شؤونها بشكل مستقل ، رغم كل الشعارات و الاغاني اللي بيعملها النظامين في البلدين حوالين الاستقلالية و القوة و كل المعاني دي .
الكلام رجع بخصوص تيران وصنافير مش لا سمح الله لان نظام السيسي مثلا استجاب لصوت الضمير الوطني و راجع موقفه بخصوص التفريط فيهم !
و لا لان السعودية اكتشفت انها بتتورط في فخ مع اسرائيل !
بالعكس ، ده الفخ ده هو اصل الموضوع و هو الهدف من القصة دي كلها !!

ايه اللي استجد في ملف تيران و صنافير؟
و ليه هو جزء من ترتيبات أسوأ بكتير ، جاية على العالم العربي ؟
و ليه هو تأكيد على ان مفيش قرار عربي مستقل ؟

{تعاشب شاي}(972) ايه اللي جاب الصهاينة جنب الهرم؟

https://www.youtube.com/watch?v=yvloCylg2FE&list=PLBsIgVvbrncB0M8dlzAbvjl79Nu8v_BW4

ناس كتير اوي لما عرفوا .. ان فيه فرقة صهيونية جت مصر ..و فرشت بالالات بتاعتها عند سفح اهرامات الجيزة .. و عملت حفلة كبيرة و هاتك يا عزف و غنا و رقص .. استغربوا اوي .. و قالوا ازاي السلطات المصرية تسمح بحاجة زي كده .. بس الحقيقة بقي ان الي حصل ده مش غريب خالص علي سلطة السيسي الي من يوم ما شوفنا وشها .. و هي بتدفي السلام مع الصهاينة و بتتمني رضاهم .. هو الغريب فعلا ان سيادة الريس طبيب الفلاسفة مراحش حضر الحفلة دي بنفسه .. علشان يقعد مع اخواته الصهاينة و يسمع عزفهم و يغني معاهم و يقطع ايده من التصقيف علي مزيكتهم .. مش فاهم بصراحة ازاي بلحة فوت الفرصة العظيمة دي و محضرش الحفلة …هو ملقاش تذاكر و لا ايه .؟؟

{تعاشب شاي}(973) المطرودون من جنة الحوار الوطني

https://www.youtube.com/watch?v=Ctm1pqirI8E&list=PLBsIgVvbrncB0M8dlzAbvjl79Nu8v_BW4

في بلاد ما وراء التفريعة ، وفي وقت بتستعد فيه البلد في أجواء احتفالية لدعوة النبي عجوت للحوار الوطني بينه وبين مجموعة من رموز المعارضة المازوخية، اللي طلعهم من الفريزر يفكوا، عشان يبدأ معاهم النقاش الأبوي في قضايا الوطن ، واللي هيسمحلهم فيه يسلخوه بشراسة ويتهموه علنا أنه حلو بس اللي حواليه هما اللي وحشين، ويعزمهم على الغدا وهو رابط على بطنه حجر ، ويأكلهم بايده كوكتيل متنوع من ورق الشجر، عشان يثبت للعالم كدب الاشاعات المغرضة اللي بتقول عليه ديكتاتور ومستبد وبيحبس الناس بسبب آراءهم.. كان على الناحية التانية القضاء الشامخ المستقل بيقوم بدوره في تنفيذ القانون ، وبيحارب على الجبهة بتاعته أعداء الوطن ، من المخربين والعملاء اللي بينشروا اخبار غلط ، وبيسعوا للخلخة نخلة الوطن باستخدام أسلحة غير مشروعة ومحرمة بلحيا...ورقة وقلم وضمير.. فكان الحكم على واحد اعتاد من زمان على إهانة الرموز المصرية، من اول الحاج عمر افندي شخصيا وصولا للسيسي افندي ..والجريمة إبداء الرأي..

{اسجد واقترب}(07) ما معنى حركات الصلاة؟

https://www.youtube.com/watch?v=-02VccvIlXU&list=PLBsIgVvbrncCg06bAoXNXPvRcani7U9ES

{تعاشب شاي}(974) حوار البلحان

https://www.youtube.com/watch?v=rri3X-t87-s&list=PLBsIgVvbrncB0M8dlzAbvjl79Nu8v_BW4

كل حاجة في مصر مبنية على التمثيل !
وياريته تمثيل ناجح ، قادر انه يأدي مهمته كـ " تمثيل " و يحبك الدور على الناس و يصدقوه !
لا ده تمثيل هابط ، و كذاب ، و اكتر حاجة مخلياه كذاب هو انه تمثيل بيحصل في مسرح مكشوف للناس كلها ، و اصغر عيل في البلد عارف ان كل اللي بيحصل كذب في كذب !
من اول كلام النظام عن انجازاته الاقتصادية !
مرورا بمشروعاته القومية !
وصولا لأحدث مسرحيات السلطة في مصر ، اللي هي " الحوار الوطني "!
بس بصراحة الماستر سين بتاع الكذب اللي في مصر ده كله ، هو حوار حمدين صباحي مع ضياء رشوان !

{تعاشب شاي}(975) دموع بليلة

https://www.youtube.com/watch?v=J_VXxlqnW4s&list=PLBsIgVvbrncB0M8dlzAbvjl79Nu8v_BW4

تحس كده ان الانظمة الشمولية المستبدة الحنجورية اللي بتحكم عالمنا التالت ، ناقصلها شوية و تطلع بنظرية نقاء عرقي ليها ولرجالتها ، و ان دمهم مختلف عن دم عموم الناس زي اللي كان بيحصل في الممالك القديمة !
لان واضح ان فعلا الانظمة دي و اعلامها بتتصرف على هذا الاساس !
و الشعور ده بيظهر مع كل ازمة او موقف بيتعرض ليها حد من ولاد الانظمة دي او رجالتها .
زي بالظبط اللي بيحصل مع ننوس عين امه ، ابن وزيرة الهجرة المصرية المتهم بالقتل في امريكا و داخل على محاكمة هناك كمان كام يوم !

{تعاشب شاي}(976) قشفنا و نشفنا ياريس!

https://www.youtube.com/watch?v=O0stW6kZX_Q&list=PLBsIgVvbrncB0M8dlzAbvjl79Nu8v_BW4

سيادة الريس الزعيم السيسي طلع من كام يوم و كان مضايق من المسريين علي الاخر .. لان طلباتهم كترت اوي .. و وصلت بيهم البجاحة انهم بقوا عاوزين ياكلوا و يشربوا عادي زي بقية خلق الله .. و مبقوش مستحملين الفقر .. و لا راضيين بالمجاعة الي معالي الزعيم عملهالهم بايده .. رغم ان زمان اوي لما المسلمين اتحاصروا مع سيدنا محمد في شعاب مكة .. كانوا مستحملين الجوع عادي و بياكلوا ورق الشجر و مفيش حد فيهم اشتكي .. طيب اشمعني بقي المصريين مش راضيين يستحملوا الجوع دلوقتي .. رغم ان السيسي نبي بردو زي سيدنا محمد بالظبط .. و ليل نهار بيشتكوا من الفقر و يعيطوا من الجوع و يصدعوا الريس و يقرفوه بطلباتهم.. و ماسكينه من رجليه الشريفة و عمالين يهزوا فيه علشان يوقع عليهم بلح !

{عرفوه بالعقل}(55) لماذا لم يحرم الإسلام العبودية؟.. أي عبودية؟

https://www.youtube.com/watch?v=qIOtg4YIOcI&list=PLBsIgVvbrncCUHtc-Gd9d0t5wBXwC0_DO

خلونا نستكمل رحلتنا.. اللي لسة مطولة شوية لأن الموضوع مش بسيط أبدا و محتاج فهم عميق..
و خلونا نبدأ النهاردة بأول خطوة.. عشان نحاول على سؤال هو ليه الإسلام أو الأديان عموما ماحرمتش العبودية بشكل مباشر كده بكن فيكون و نقطع عرق و نسيح دمه و نخلص..
السؤال اللي إجابته هاتكون سؤال تاني محتاجين نجاوبه الأول.. انت عاوز الدين يحرم العبودية؟.. مافيش مشاكل.. شاورلي عليها بس.. ايه هي العبودية أصلا؟.. متأكد انك عارف ايه هي العبودية؟..
آه.. بدأنا التحوير بقى.. لا والله ماتحوير ولا حاجة.. ماتيجو نشوف..

{الأسبوع ف كيس}(308) العثور على سيدة مصر الثانية

https://www.youtube.com/watch?v=GVnGiCT2vAo

الإعلاميين المصريين الاسبوع ده قطعوا الشك في البيسين ، واثبتوا بشكل واضح كدب الإتهامات اللي بتتوجه ليهم أنهم معدومين المروءة ، أو معندهمش اخلاق ولا إنسانية، وقاموا بدورهم في نشر قيم التسامح والتضامن والتعاطف مع أي إنسان في أزمة أو في موقف إنساني صعب.. وده ظهر في التناول الإعلامي لقضية ابن وزيرة الهجرة المتهم بقتل اتنين زمايله في الشغل، وبيتحاكم دلوقتي قدام القضاء الأمريكي.. وبعيدا عن إن طبعا لا شماتة في الوزيرة ، لأنها في الآخر أم ومحدش يتمنى لحد أنه يعيش الموقف الصعب ده ..بس انا عاجبني حالة الإعلام الملائكية اللي كلها حنية وطبطبة على قلب ام مكلومة حزينة ، بصرف النظر إن فيه أمين تانيين عيالهم اتدبحوا وضاعت حياتهم ومستقبلهم فعلا .. بس ما علينا اهم حاجة المبادئ ..المبادئ تعلو على الحاجات.. ومحدش ييجي جنبهم دلوقتي، ويقولهم طب بالنسبة لأمهات المعتقلين اللي مرميين في السجن وهما مدبحوش فرخة حتى..انت كده هتبوظ حالة التعاطف وهتضرب مفك في المبادئ ، وهيقفشوا فيك انت ويتهموك انك شمتان ..

{الأسبوع ف كيس}(308) العثور على سيدة مصر الثانية

https://www.youtube.com/watch?v=GVnGiCT2vAo

الإعلاميين المصريين الاسبوع ده قطعوا الشك في البيسين ، واثبتوا بشكل واضح كدب الإتهامات اللي بتتوجه ليهم أنهم معدومين المروءة ، أو معندهمش اخلاق ولا إنسانية، وقاموا بدورهم في نشر قيم التسامح والتضامن والتعاطف مع أي إنسان في أزمة أو في موقف إنساني صعب.. وده ظهر في التناول الإعلامي لقضية ابن وزيرة الهجرة المتهم بقتل اتنين زمايله في الشغل، وبيتحاكم دلوقتي قدام القضاء الأمريكي.. وبعيدا عن إن طبعا لا شماتة في الوزيرة ، لأنها في الآخر أم ومحدش يتمنى لحد أنه يعيش الموقف الصعب ده ..بس انا عاجبني حالة الإعلام الملائكية اللي كلها حنية وطبطبة على قلب ام مكلومة حزينة ، بصرف النظر إن فيه أمين تانيين عيالهم اتدبحوا وضاعت حياتهم ومستقبلهم فعلا .. بس ما علينا اهم حاجة المبادئ ..المبادئ تعلو على الحاجات.. ومحدش ييجي جنبهم دلوقتي، ويقولهم طب بالنسبة لأمهات المعتقلين اللي مرميين في السجن وهما مدبحوش فرخة حتى..انت كده هتبوظ حالة التعاطف وهتضرب مفك في المبادئ ، وهيقفشوا فيك انت ويتهموك انك شمتان ..

{تعاشب شاي}(977) بختك يابو بخيتي

https://www.youtube.com/watch?v=O0stW6kZX_Q&list=PLBsIgVvbrncB0M8dlzAbvjl79Nu8v_BW4

كلام كتير جدا اتقال وبيتقال وهيفضل يتقال عن التغيرات اللي بيقودها بن سلمان في السعودية .
بس واضح ان كل الكلام ده لسة موصلش لجوهر او حقيقة اللي بيعمله ولي العهد تحت مسميات التطوير و التحديث !
و لأن الشيطان بيكمن في التفاصيل زي ما المثل بيقول، فعشان تقرا المشهد بشكل اعمق و اوضح لازم تبص على بعض الاحداث او التفاصيل اللي بتعدي ، عشان الصورة تكتمل عندك.
و من الاحداث دي موضوع زيارة المتحدث السابق باسم الحوثيين ، علي البخيتي للسعودية ، و اللي عمله و هو موجود هناك ، و بعدها تركه يسافر منها بسلام ، في الوقت اللي السعويين نفسهم ، لو حد منهم عمل ربع اللي عمله البخيتي كان زمانه في السجن بل ممكن يوصل الامر لاعدامه !!
ايه الموضوع ؟

{تعاشب شاي}(978) بلد بتاعت مبادرات صحيح!

https://www.youtube.com/watch?v=DzJrZo38b1I&list=PLBsIgVvbrncB0M8dlzAbvjl79Nu8v_BW4

في سنة 2018 الشرطة المصرية الباسلة اعتقلت السياسي المصري عبد المنعم ابو الفتوح و حطته في السجن .. بس الكلام ده كان زمان بقي .. ايام القمع و الدولة البوليسية و الاعتقالات و الاخفاء القسري الله لا يرجعها .. انما دلوقتي بعد ما سمو الرئيس السيسي فتح دراعاته لكل اطياف الشعب و عمل حوار وطني حر و مبادرة للافراج عن المعتقلين .. الوضع اختلف خالص .. و الدولة قررت ان عبد المنعم ابو الفتوح الي مرمي في السجن بقاله 5 سنين لازم يستفيد من مبادرة سيادة الريس و يقطف مع المسريين ثمار الحوار الوطني .. و قامت مدياله حكم بالسجن المشدد لمدة 15 سنة علشان يقضي بقية حياته في السجن .. الحمد لله ان ابو الفتوح عايش في عصر السيسي الي بيوزع علي الناس حرية و مالي البلد مبادرات و الا كان زمان عمره ضاع في السجن !

{تعاشب شاي}(979) حتى العقيد مستريح!

https://www.youtube.com/watch?v=-W4wgEipfso&list=PLBsIgVvbrncB0M8dlzAbvjl79Nu8v_BW4

سمعت عن المستريحين ؟
تصدق سؤال غريب .
انا اسف ..
مين اللي مسمعش عن المستريحين ؟
الناس اللي قررت تكسب ملايين و هي مستريحة ، عن طريق النصب على ناس عاوزة هي كمان تكسب و هي مستريحة !
من غير ما الاتنين يتعبو و يعملو اي نشاط عليه القيمة يجيب فلوس حلال .
خليني اعدل سؤالي :
سمعت عن ان فيه خيار وفقوس حتى بين المستريحين؟
يعني حتى وسط النصابين ؟
و هل سمعت عن ان المستريح اللي طالع من ضهر الحكومة بتبقى ليه مميزات غير النصابين التانيين ؟
مستغرب كلامي ؟
طيب .. خليني اكلمك عن سيادة العقيد المستريح !!
نهار اسود !
عقيد ؟!
اه و الله .
عقيد جيش كمان !
ايه قصته ده ؟

{تعاشب شاي}(980) دولاري رايح.. دولاري جاي..

https://www.youtube.com/watch?v=yYnqc3r4g6c&list=PLBsIgVvbrncB0M8dlzAbvjl79Nu8v_BW4

الدولة عندنا للاسف طول عمرها مبتفهمش في الاقتصاد و لا ليها فيه .. لانها مخادتهوش في الكلاس و لا درسته في الجامعة .. و بعد سنين من الفشل و التخبط و عدم التخطيط و سوء الادارة الي وصلونا للانهيار الاقتصادي الي احنا غرقانين فيه دلوقتي .. احنا خلاص فقدنا الامل في ان الدولة ممكن في يوم من الايام تفهم في الاقتصاد او تحل ازمته .. احنا املنا الوحيد دلوقتي ان الاقتصاد هو الي يفهمنا و يقدر موقفنا .. و يعرف ان المسؤولين عندنا جهلة و كواحيل و يخلي عنده دم و ينصلح من نفسه كده ينوبه ثواب

{عيانين بالإبداع}(09) باصص فين يابني؟!

https://www.youtube.com/watch?v=M8mbVN-Cfnk&list=PLBsIgVvbrncDhUgCH6RUClfyYvcA7z51K

و رجعنا من تاني..
عارف اني طولت شوية و اتأخر في السلسلة دي.. بس انا انشغلت مؤخرا عشان بدأت كورس في التدريب و العلاج للADHD مطول معايا شوية للسنة الجاية..
بس ان شاء الله اقدر اكمل تاني بمعدل أسرع..
احنا لغاية دلوقت خدنا لفة سريعة كده و أخدنا فكرة عامة عن الADHD..
تعالوا نرجع الشريط من الأول و نتكلم بالتفصيل أكتر .. عشان نفهم أكتر..
يمكن كتير من اللي بيتابعوا الحلقات دي عندهم ADHD.. هداهد..    .
أو فيه حد في حياتهم .. قريب.. صديق.. ابن. أخ.. زوج.. زوجة.. عندهم ADHD.. و حابين يفهموهم أكتر و يساعدوهم.. السلسلة دي مهمة لكل الناس.. لأن لو انت عندك ADHD فانت محتاج جدا تفهم نفسك و من خلال الفهم ده هاتفهم الدنيا من حواليك و تفهم ليه انت دونا عن اللي حواليك بيحصل معاك حاجات معينة أو بتقابل صعوبات معينة.. ولو ماعندكش ADHD فانت برضه هاتفهم نفسك أكتر.. و هاتفهم ليه ناس حواليك بتحبهم ممكن يكونوا محتاجين مساعدتك..=

{تعاشب شاي}(981) اللي بنى مصر كان في الأصل بلحاوي

https://www.youtube.com/watch?v=he8J_wTOllk&list=PLBsIgVvbrncB0M8dlzAbvjl79Nu8v_BW4

ماعرفش ليه احنا مصرّين دايما نغني على بعض ونقول : اللي بنى مصر كان حلواني !
مع ان اللي يدوس في تفاصيل ازاي مصر اترتبت و اتخططت ، هيعرف ان اللي بناها تقريبا كان عيل صغير بيلعب في الرمل و عمال يرسم اشكال غريبة و خطوط ملهاش معنى !
يعني ايه الكلام ده ؟
باختصار، كل حاجة اتخططت في مصر ، اتعملت بدماغ مركزية مش شايفة المستقبل ، و ده عمل تفاوت و ظلم في كل جوانب الحياة في البلد .
و الغريب ان الانظمة المتعاقبة ، كل ما تحب تغير و تصلح ، بتبعد عن اصل المشكلة ، اللي هو التخطيط المركزي لمصر . و عشان كده مشاكل و سلبيات الحياة في مصر مستمرة و مش هتخلص مهما اتعملت مشروعات .
او خليني اقول : حتى لو اتعملت مشروعات حقيقية .
الطريقة المركزية اللي اتخططت بيها الحياة في مصر مش بس مسؤولة عن مشاكل الحياة زي العشوائية و الفقر و غياب الخدمات عن مناطق كتير ، لا دي كمان مسؤولة عن غياب اساسيات الحكم السليم زي الديمقراطية و الحرية !
نهار اسود!

{تعاشب شاي}(982) ماحدش هايشتغل هنا!

https://youtu.be/HNKSve8a31M

الدولة المصرية قررت انها تحط خطة طموحة علشان تواجه الازمة الاقتصادية الي البلد غرقانة فيها اليومين دول .. فلغت الدعم .. و زودت اسعار كل المنتجات الاساسية .. و فرضت رسوم و ضرايب جديدة .. و رفعت اسعار الكهربا و المية و كل الخدمات .. و بعد ما خلصت كل ده بدات تقفل الشركات و المصانع علشان ترمي العمال و الموظفين في الشارع و تقعدهم من غير شغل .. تقريبا كده و الله اعلم الدولة لما جت تعمل خطة للقضاء علي الازمة الاقتصادية.. اتلخبطت و عملت خطة للقضاء علي المواطن المصري

{تعاشب شاي}(983) انت مش مصري.. انت بلحاوي

https://www.youtube.com/watch?v=XEXoak8_Cr8&list=PLBsIgVvbrncB0M8dlzAbvjl79Nu8v_BW4


بعد اذنك انا عاوزك تجيب كباية شاي و تقعد في البلكونة وتغمض عينيك و ترجع بذاكرتك شوية لورا ، و تفتكر العالم الكبير الدكتور احمد زويل الله يرحمه !
ليه ؟
عاوزك لو سمحت تتخيل احمد زويل لو كان فضل في مصر و سمع كلام الناس اللي استغربو انه هيسافر امريكا و قتها !
يا ترى كان هيبقى عامل ازاي؟
و حياته كان هيبقى شكلها ايه ؟
ليه باقولك تعمل كده ؟
عشان ده ليه علاقة بالازمة الحاصلة دلوقت بسبب لاعب الاسكواش المصري محمد الشوربجي .
ازاي ؟

{كشف حمادة}(76) وداعاً شاعر القصيدة المهربة

https://www.youtube.com/watch?v=gKxZODMSuWw&list=PLBsIgVvbrncAh0AZmC-LIXEQWlSbz7MZq

سنة 1934 ، وجوه قصر بيطل على نهر دجلة في العراق ، بتسكنه أسرة من سلالة عيلة النواب..العيلة الغنية اللي كانت بتحكم ولاية من ولايات الهند قبل الاحتلال الإنجليزي ، يتولد طفل يسموه مظفر..اللحظة اللي مكانش حد يتخيل ساعتها صورة عن مستقبل الطفل ده، غير أنه هيطلع تلقائيا طفل ثري متدلع ، شايل معاه اسم العيلة الأرستقراطية صاحبة الثراء والنفوذ..لكن اللي حصل إن اللحظة دي كانت لحظة ميلاد مناضل حقوقي، مشاغب خارج عن النص ، معبر بأشعاره عن نبض وهموم الغلابة والمستضعفين، مش بس في بلده العراق، لكن في كل البلاد العربية سواء المنكوبة بالاحتلال، أو المنكوبة بحكامها..عشان يعيش عمره كله ما بين معتقل أو مطارد أو مهاجر ، زي ما كان مرافقه القلق والخطر ، كان مصاحبه الورقة والقلم..يدوس على زناد الشعر أو الهجاء من اي مكان، توصل الرصاصة وتنتشر في الوطن العربي كله ، فاستحق عن جدارة لقب شاعر القصيدة المهربة، الشاعر الكبير مظفر النواب

{تعاشب شاي}(984) لما امك تعملك فضائية في البيت

https://www.youtube.com/watch?v=1uduZrUPJIY&list=PLBsIgVvbrncB0M8dlzAbvjl79Nu8v_BW4

بقالنا سنين بنسمع مصطلح الجمهورية الجديدة .. و سيادة الريس السيسي بقي كل ما يشوف وشنا و يقفش في الحديدة يقعد يكلمنا عنها .. بس لحد دلوقتي مفيش حد فاهم تطلع ايه الجمهورية الجديدة دي و بتعمل ايه بالظبط يعني لمؤاخذة .. و لما رحنا سالنا الجماعة في سلطة البلح ..الجمهورية الجديدة دي عبارة عن ايه يا اخوانا و موجودة فين .. قالولنا سهلة اوي .. افتحوا التليفزيون و هاتوا اي قناة من قنوات الاعلام المصري المطبلاتي .. و بصوا علي الشاشة كويس .. هتلاقوا الجمهورية الجديدة مرمية في هاشتاج فوق علي الشمال كده ..بس يا عم هي دي .. ايه ده خلاص كده ؟ اه طبعا اومال انتوا فاكرين ايه