{عرفوه بالعقل}(54) العبيد و ملك اليمين في الإسلام
https://www.youtube.com/watch?v=3s2_JLEVnwg&list=PLBsIgVvbrncCUHtc-Gd9d0t5wBXwC0_DO

قضية بتثار كشبهة.. و بيستغلوا جهل الناس بالتاريخ و الواقع عشان يشككوهم في دينهم.. لكن يقين الإيمان بيتخطى الشكوك دي عادة.. بس مابيعالجهاش.. مابيسدهاش تماما.. بتفضل زي النار اللي تحت الرماد.. عقل الإنسان دايما مابينساش أبدا الأسئلة اللي ماقدرش يلاقيلها إجابة شافية و مقنعة.. عشان كده السؤال البسيط ده.. ليه الإسلام ما قضاش على العبودية بكن فيكون و اتعامل معاه على انه واقع مقبول؟.. ليه ما تمش تحريمه زي تحريم الخمر مثلا؟.. سؤال هايفضل كامن في العقول.. لو ماتمش الإجابة عليه بشكل مقنع..طب و ليه يعني الواحد مايلاقيش اجابة مقنعة؟.. لأن فيه قضايا أو مسائل معقدة.. محتاجة فهم خلفيات تانية اجتماعية و اقتصادية و سياسية و نفسية.. عشان تفهم الإجابة أصلا و تقتنع بيها.. و للأسف القضية دي.. من النوعية دي.. عشان كده محتاجة حلقات مش حلقة واحدة للتفصيل و الفهم..
فخلونا نتوكل على الله و نبدأ الرحلة دي سوا.. و النهاردة هانبدأ نفتح شوية سكك و تساؤلات بس مش أكتر قبل ما نبدأ نفصل فيها بعد كده..

{تعاشب شاي}(932) زورونا تجدوا ما يشلكم

https://www.youtube.com/watch?v=k3V_z5PC6d0&list=PLBsIgVvbrncB0M8dlzAbvjl79Nu8v_BW4

يوتيوبر امريكي متصيت و مشهور اسمه سوني امه دعت عليه و قرر انه ييجي مصر و يصور فيها فيديوهات علشان يذيعها علي قناته .. و بعد ما قعد عندنا كام يوم و روح .. مش يحمد ربنا بقي انه خرج من مصر سليم و يبوس ايده وش و ضهر انه لسه عايش .. لا .. قعد يهلفط في الكلام و يخبط في الحلل .. و عمل فيديوهات قال فيها ان زيارة مصر كانت اوسخ تجربة في حياته .. و انها اسوا بلد في الكوكب ممكن حد يزورها .. و بدا ينصح الاجانب والسياح انهم ميعتبوش ناحيتها لانهم هيشوفوا معاملة غير ادمية من السلطات المصرية .. عيب عليك و الله يا استاذ سوني .. ميصحش بردو تنصح الاجانب انهم ميزوروش مصر .. هو صحيح دلوقتي المصريين الي عايشين جوه مصر نفسهم مش عاوزين يزوروا مصر .. بس بردو مكانش ينفع تقول كده !

{تعاشب شاي}(130) الهروب من الخانكة

https://www.youtube.com/watch?v=yzHzkRK9QG4&list=PLBsIgVvbrncBJbmFFzhjJfzK9aLoMuouz

لما تصحى الصبح في سنة 2022 على خبر وفاة ايمن هدهود الباحث الاقتصادي، وعضو حزب سياسي مستأنس وشغال تحت عين النظام في النور ، ورئيسه خدام مطيع للسلطة..وحتى هو نفسه كل كتاباته كانت هادية ورصينة وبيطرح فيها حلول اقتصادية، ومش متصادم مع الدولة بأي شكل..ولما تقرا وتسمع عن ملابسات وفاته وفجور النظام اللي خطفه واخفاه قسريا وقتله..وسابوا أهله وأصحابه يدوروا عليه في كل مكان على مدار شهر ونص..وحتى بعد ما أعلنوا موته ما اكتفوش بالفجور لحد كده وبس ..دول شوهوه وطلعوه حرامي ومجنون محتجز في مستشفى العباسية..كل ده حصل السنة دي بس من ايام بسيطة ، لكن كتير ممكن يتفاجئ النهاردة لما نقول له إن من 35 سنة، كان فيه فيلم بيتكلم عن هدهود وكل هدهود في البلد دي.. متقدرش تقول نبوءة ، لانه حتى في وقت عرضه كان بيرصد واقع وبيحكي عنه ، كأنه بيشرح حالنا وحال كل واحد يعتبر عدو للنظام ده ..عدو مش بالسلاح والرصاص.. مجرم بس مش جريمته الإرهاب.. مجرم جريمته عقله ، مريض بداء مُعدي اسمه الفكر والحرية والضمير لازم له عزل أو تصفية

{الأسبوع ف كيس}(304) الوحيشة و الوحش

https://www.youtube.com/watch?v=pXA9TNLJFH0&list=PLBsIgVvbrncAeJMvwCpzZg-ow581Oh13M

اللي مش متابع مسلسل الاختيار ممكن نلخصهوله في كلمتين ، بعيدا عن الكوميك والسف على أداء الممثلين اللي بصراحة زاد عن حده، ويعتبر إهانة لمجموعة من المناضلين، منهم اللي ضحى بدقنه أو ضحى بشعر راسه عشان يوضح الحقيقة للناس، ويكشف للشعب جهود الجيش، اللي انقذ مصر من الضياع تحت حكم محمد مرسي بتاع عزيزي بيريز ده .. فأنا مش قادر استوعب ازاي الناس بتتريق على فشاخة الريس ياسر جلال، اللي انقذ مصر من الإنهيار الاقتصادي وسياسة القروض والديون وبيع اصول الدولة، وخلاها الجنة اللي انتوا شايفينها دلوقتي ،ومنع مشروع الإخوان للتطبيع مع الصهاينة.. انتوا متخيلين لولا الملحمة الوطنية اللي بيجسدها المسلسل العظيم ده كان ممكن ايه اللي يحصل في سينا؟.. كنتوا هتبقوا مبسوطين يعني لو الجيش كمان اتأخون، ولقينا الطيران الإسرائيلي بيخش طابا عادي في ذكرى تحريرها ..ويجيب معاه وفود سياحية لنويبع وشرم الشيخ، يقفوا يترقصوا ويسهروا ويسكروا في رمضان على أرض سينا كده على عينك يا تاجر؟

{تعاشب شاي}(933) قمح ياسر جلال

https://www.youtube.com/watch?v=wc0NWDLAmqc&list=PLBsIgVvbrncB0M8dlzAbvjl79Nu8v_BW4

فيه مشهد في فيلم عربي قديم كان عبدالمنعم مدبولي طالع فيه دكتور نفساني ، راح له واحد قصير و متعقد من قصره . اشتكى له من تريقة الناس عليه ، عبدالمنعم مدبولي قال له بص: انت تقف قصاد المراية ، و تاخد نفس وتقول بكل ثقة : انا مش قصير قزعة . انا طويل واهبل !!
الراجل اقتنع و عجبته الفكرة جدا !
اهو السيسي طوّر الاشتغالة اللي عملها عبدالمنعم مدبولي في الفيلم مع الراجل ، و خلاها نظام حكم و طريقة إدارة !
و طبقها اليومين اللي فاتو في ملف القمح !
القمح اللي هو عقدة العقد دلوقت .
ازاي ؟

{تعاشب شاي}(935) إرهابيين و لكن ظرفاء

https://www.youtube.com/watch?v=soi3SDrRJmo&list=PLBsIgVvbrncB0M8dlzAbvjl79Nu8v_BW4

فكرة انك تعيش في دولة نظامها ديكتاتوري قمعي، موضوع مش جديد واتعودنا عليه من اول لحظة قعدت فيه اول بدلة عسكرية على كرسي الرئاسة..لكن كان دايما مفهوم القمع عندهم بيلاقوله مبرر وطني وقومي ، يشرعنوا بيه استبدادهم ضد أي فكر سياسي معارض..فيشوهوه ويشيطونه عشان يضحكوا على عقول البسطاء من ناحية، ومن ناحية تانية تشتغل عصايتهم الأمنية على النشطاء والمعارضين بنفس المبرر، عشان يشيعوا الخوف فيخرسوا اي صوت ، ويخوفوا اللي لسه بيشاور عقله أنه يعترض ويقاوم فسادهم وظلمهم..هو ده النظام العسكري في كل زمان ومكان..لكن الأزمة الحقيقية اللي بتعيشها مصر المرحلة دي ، هي اختلاط النظام العسكري بالبلح ، تحت رعاية واحد تخطى في الظلم والاستبداد كل اللي سبقوه..فاتحول الشعب المصري كله ..حرفيا كله لمجموعة من الفراخ جوه قفص كبير ، وكل اللي بيعمله الفرارجي المجنون ده أنه يفتح القفص عمياني،يمد أيده ويقفش اي فرخة تطولها أيده..

{تعاشب شاي}(936) أنا وطني باحاورك يا وطنطن

https://www.youtube.com/watch?v=PQMyG1-g1jA&list=PLBsIgVvbrncB0M8dlzAbvjl79Nu8v_BW4

فاكر انت لما كنا صغيرين في المدرسة ، كان فيه عيل غلس بيستفز العيال الاكبر منه في الحجم و القوة . و لما ييجو يضربوه و شنطته تقع ، يتمسكن و يعيط و يقول : حرام عليكم الشنطة فيها كتاب دين !
اهو حاجة شبه كده بيعملها السيسي اليومين دول من خلال الدعوة لـ " حوار وطني " !
ازاي ؟

{تعاشب شاي}(937) حرية انما ايه.. ع الناشف!

https://www.youtube.com/watch?v=78HgwmwJvVk&list=PLBsIgVvbrncB0M8dlzAbvjl79Nu8v_BW4

سيادة الريس السيسي طبيب الفلاسفة الموسيقار الفنان التشكيلي راقص الباليه خد من كام يوم قرار تاريخي علشان يثبت انه انسان نبيل و مش مجرم و مستبد و قتال قتلة زى ما ناس كتير فاكرة .. و افرج عن عدد من المعتقلين السياسيين .. الي الرئيس السيسي المجرم المستبد قتال القتلة كان راميهم في المعتقل من سنين من غير اي تهمة .. الله عليك يا ريس يا حبيب الملايين … كنا عاوزين بس نعرف ؟منك .. يا تري السيسي الي افرج عن المعتقلين يحب يقول ايه للسيسي الي كان حابسهم

{تعاشب شاي}(938) الاقتصاد.. و لبن العساكر

https://www.youtube.com/watch?v=8JWIBG2fSp4&list=PLBsIgVvbrncB0M8dlzAbvjl79Nu8v_BW4

في شهر نوفمبر اللي فات ، نجيب ساويرس قال في حوار مع وكالة الانباء الفرنسية ان توسع الجيش في النشاط الاقتصادي بيعمل مناخ منافسة غير متكافيء في السوق مع القطاع الخاص!
و قال ان شركات الجيش مابتدفعش ضرايب للدولة !
بس اللي ساويرس مش واخد بال منه ، او واخد بس مطنش ، هو ان الدولة نفسها فاهمة ده كويس .
و عارفة ان توسع النشاط الاقتصادي للجيش عامل مناخ غير عادل في السوق ، بين شركات القوات المسلحة و شركات القطاع الخاص .
و اللي مش عارفه ساويرس ان الدولة ذات نفسها مستاءة من المناخ الغير عادل ده .
و انها اخدت قرار بتظبيط الوضع ده !
الدولة قررت انها تنسف ام القطاع الخاص ده اصلا !
و انها تزيحه من السوق اساسا !
عشان شركات الجيش تنافس نفسها منافسة عادلة !
و عشان الدولة متظلمش رجال الاعمال قررت انها تعرض عليهم عرض مغري : اما انهم يبيعو شركاتهم للجيش !
او يتحبسو !
اللي قبل العرض ده عدّى !
و اللي رفض اتحبس .
و ابقى وريني بقى هتدير شركاتك ازاي من جوة السجن؟!

{اسجد واقترب}(01) سبحتك فين يا معلم؟

https://youtu.be/LlWqB382hYc

خلونا نبدأ رحلة جديدة سريعة.. مع الصلاة..
الحاجة اللي حاضرة و غايبة في نفس الوقت.. في حياتنا.. و مجتمعاتنا..
حاضرة.. لأن الكل مستشعر أهميتها.. اللي بيصلي و اللي مابيصليش..
و المجتمع بيبص للي مواظب على صلاته نظرة تقدير و احترام.. و بيحسنوا الظن فيه..
و غايبة.. لأن للأسف.. مش باينلها أثر حقيقي في حياتنا..
كنت عملت السلسلة دي من سنين طويلة بعد ما قريت سلسلة كتيبات أثرت فيا جدا للدكتور أحمد خيري العمري بعنوان ”كيمياء الصلاة“.. و دي كانت بداية معرفتي بيه.. فورا دورت عليه و تواصلت معاه استأذنه اني أعمل منها حلقات بسبب أهميتها.. و هو جزاه الله خيرا كعادته ما بيتأخرش أبدا في المشاركة في أي مشروع فيه فايدة للناس..
و بسبب أهمية الموضوع.. قررت اعمل الحلقات تاني لأنها محتاجة تتشاف أكتر..

{تعاشب شاي}(939) الافطيار٣ وحياة زحلف

https://youtu.be/NzeJFgbfP68

البلد بتمر بأزمة اقتصادية محصلتش قبل كده .. و التضخم بيزيد .. و الدولار راكب الجنيه و مدلدل رجليه .. و الاسعار مولعة .. و الناس مش لاقية تاكل .. و الديون علي مصر عدت الخمسة تريليون دولار .. طيب نعمل ايه يا سيادة الريس طبيب الفلاسفة في المشاكل دي كلها .. قالك بسيطة .. نعمل افطار جماعي للأسرة المصرية … لان ثبت علميا اننا مينفعش نحل مشاكل و ازمات البلد علي بطن فاضية .. لازم ناكل لقمة الاول

{تعاشب شاي}(941) طائفة البهرة وسر علاقتها القوية بالسيسي

https://www.youtube.com/watch?v=znDmskBxwxk&list=PLBsIgVvbrncB0M8dlzAbvjl79Nu8v_BW4

لسبب غير مفهوم ، هتلاقي السيسي في الملف الديني دايما تصرفاته غريبة و مستفزة .
يعني في الوقت اللي تلاقيه بيروح الكنيسة في عيد الميلاد و بيقعد يتمحلس و يتسهوك و يقول كلام كله عواطف ، تلاقي خطاباته للمسلمين في المناسبات الاسلامية كلها بستفة و نقرزة و تبكيت و ناقص يطلع من جيب البدلة خرزانة و يجري ورا المسلمين في الشوارع و يلسوعهم بيها !
و في الوقت اللي مضيق على المسلمين في صلاة التراويح و التهجد و الاعتكاف في شهر رمضان من خلال الصبي بتاعه في الاوقاف مختار جمعة ، تلاقيه متصور وهو بيستقبل سلطان طايفة البُهرة ، و بيظهر معاه في مسجد الحسين ، اللي كان مغلق بحجة الترميم ، و كعادته مع كل رجل دين غير مسلم ، هتلاقيه مبسوط و بيضحك و حاجة آخر سخسخة !
مين هم البهرة اللي السيسي اتصور مع سلطانهم ؟
و ايه حكاية السيسي معاهم ؟
و ايه حكاية البهرة مع مصر ؟
و عاوزين ايه منها ؟

{تعاشب شاي}(942) كارثة الدَّين المصري في الحساب الختامي لموازنة الحكومة

https://youtu.be/hTXdN8xtrHk

من كام يوم كده .. كان فيه جلسة مهمة اوي عملها مجلس النواب الموقر بتاعنا .. لمناقشة تقرير الحكومة عن الحساب الختامي لموازنة السنة المالية الي خلصت .. و في عز ما الجلسة شغالة .. لقينا الكام نفر بتوع المعارضة الي دخلوا المجلس بالغلط دول .. عمالين يتكلموا بالمستندات والأرقام عن وقائع فساد وإهدار مال عام و سرقة واختلاس و بلاوي متلتلة حصلت في الموازنة متورط فيها محافظين و مسئولين كبار في الحكومة .. و ناس كتير بعد ما سمعت الكلام ده قالت اكيد الشرطة هاتقتحم المجلس دلوقتي و هاتحط الكلابشات في ايدين الحكومة و هاتاخدها علي الكراكون عدل .. بس الكلام ده محصلش و كل الي اتقال في المجلس راح اونطة و ذهب مع الريح .. و في اخر الجلسة أغلبية البرلمان وافقت علي تقرير الحكومة و شكرتها و خدتها بالحضن و باستها من بؤها .. و الحكومة خدت بعضها و مشيت معززة مكرمة علشان تلحق تروح قبل ادان المغرب و تفطر مع عيالها .. و الموضوع خلص علي كده الحمد لله و كل موازنة و انتوا طيبين ..

{تعاشب شاي}(943) ماذا عن الاعتداء الجنسي وكشوف العذرية داخل السجون؟

https://youtu.be/_YrfgQd8l3w

فاكر فرج بتاع المخابرات اللي في فيلم " الكرنك " اللي كمال الشناوي طلقه على سعاد حسني عشان يغتصبها بهدف انهم يكسروها و يذلوها ؟
اهو فرج ده واضح انه الشخصية الدرامية المفضلة عند السيسي و الاجهزة الامنية !
لان بالبحث و النخورة ، هتكتشف ان بعيدا عن حكايات الاعتقال بدون تهمة و الاخفاء القسري ، و القتل خارج اطار القانون ، بعيدا عن ده كله ، نظام السيسي عايش دور فرج مع المعتقلات و المعتقلين !
و ان التحرش و الاعتداءات الجنسية قولا وفعلا ، بيحصلو باستمرار و انتظام من ساعة ما ربنا ابتلانا بالسيسي !

يعني ايه الكلام ده ؟
و ليه النظام حريص على كسر الناس في السجون خصوصا المعتقلات ، بالاساليب دي ؟
و ايه كواليس الملف ده ؟

{اسجد واقترب}(02) كيف خلقك لعبادته؟

https://www.youtube.com/watch?v=LlWqB382hYc&list=PLBsIgVvbrncCg06bAoXNXPvRcani7U9ES

اللي يتأمل تاريخ الإسلام المعاصر.. يلاقي اننا مرينا بهزائم و انكسارات كتير.. سابت آثار عميقة محفورة جوانا.. خلتنا بقينا نرضى بأقل القليل.. بل خلت أقصى طموحنا.. هو أقل القليل..
خلتنا بقينا بنفهم كل شئ من أضيق زواياه.. مابقيناش نتوقع من نفسنا إلا “أضعف الإيمان”..
فقدنا احترامنا لنفسنا.. و مابقيناش نتوقع من نفسنا أي شئ إيجابي..
أدمنا الهزيمة..
في كل شئ.. حتى في الصلاة..
ياه.. للدرجة دي؟
ايوة.. لدرجة ان صلاتنا.. تبقى حجة ناس تانية.. لعدم الصلاة..
بدل ماتغيرنا الصلاة للأحسن.. احنا غيرناها للأسوأ..
حولنا صلاتنا إلى جناحين مكسورين.. يقتلوا الهمة جوة أي حد بيشوفهم..
بدل ماتبقى الصلاة جناحين بياخدوا الإنسان إلى القمة..
بدل ما تبقى بجد (عماد الدين)

{الأسبوع ف كيس}(305) العيد بلحة.. ياسالااام!

https://www.youtube.com/watch?v=Tm6oBq0a8j4&list=PLBsIgVvbrncAeJMvwCpzZg-ow581Oh13M

كل سنة وانتم طيبين وعيد سعيد عليكم.. ودعنا شهر رمضان ربنا يعيده عليكم بالخير والبركة، واستقبلنا العيد بكل أمل، وتفاؤل، وفرحة..المصريين..بعد اذن السيسي ووزير الأوقاف ..نزلوا لأداء صلاة العيد ..، والحمد لله عدت على خير ، وربنا سترها ومحصلش براكين وزلازل، ومطلعش من تحت الارض ديناصورات وتنانين مجنحة والأمن مستتب..
هوبا لقينالكم فشاخة الريس في وشنا على غيار الريق من صباحية ربنا!
نزل يصلي العيد هو كمان.. مافيش مشاكل معذور.. الراجل بقاله ٣٠ يوم محبوس و ماصدق يتفك..
هو بس انا لاحظت ان سيادة الريس كان بيفرح قوي كل مايسمع المصلين بيقولوا ”و هزم الأحزاب وحده“.. مصيبة لتكون فاكرهم يقصدوك انت.. مش الأحزاب دي ياريس..!
خلص صلاة و قلنا خلاص هايروح.. لا يروح فين؟.. لسة بدري..
ايه يا عم خير؟.. انت مازهقتش مننا؟.. ماسكنا هبد و عزق و كدب ٣٠ يوم.. و جايلنا أول يوم العيد تعملنا امتحان مفاجئ في مسلسل الاختيار؟ يا عم ده عيد!
لا ماليش فيه!.. لا عيد ولا بطيخ.. كله يقفلي انتباه هنا دلوقت حالا..

{تعاشب شاي}(944) الصحفيين في مصر.. أموات مع إيقاف التنفيذ

https://www.youtube.com/watch?v=W7JxiPlFmvc&list=PLBsIgVvbrncB0M8dlzAbvjl79Nu8v_BW4

احنا كمصريين عندنا تعبير دارج ، بنقوله وقت الغضب و برضه وقت الهزار !
بنقول " هاموت نفسي " !
بس التعبير اللي كان بيتقال على سبيل اما الهزار او التعبير عن القرف ، تحول فعلا لـ " لايف ستايل " في مصر !
حالات تخلص من الحياة بأعداد مفزعة !
تنوع في الشرايح الاجتماعية و الفئات العمرية اللي بتحصل فيها الحالات دي !
الوضع بقى فعلا مخيف .
لكن مع كل ده ،
ايه اللي يخلي صحفي كبير ، في موقع مهم ، في مؤسسة مهمة هي الاهرام ، و وضعه المادي كويس ، و عنده اولاد في الجامعة ، ايه اللي يخليه هو كمان ينضم لقوافل اللي قرروا التخلص من حياتهم في مصر ؟
باكلمك عن الصحفي عماد الفقي ، اللي أنهى حياته في شباك مكتبه في جريدة الاهرام في مصر .
ياترى ليه ممكن يكون عمل كده ؟
و هل ده ليه علاقة بالاوضاع اللي بيعيشها الصحفيين ، و مهنة الصحافة عموما في مصر في عهد السيسي ؟

{تعاشب شاي}(946) ماذا يحدث بعد ركوب ميكروباص الشرطة؟

https://www.youtube.com/watch?v=Xwe0NMSS9aM&list=PLBsIgVvbrncB0M8dlzAbvjl79Nu8v_BW4

الدنيا مشغولة بقالها كام يوم بكلام السيسي في افطار الاسرة المصرية بخصوص " الحوار الوطني " اللي اتكلم عنه .
السيسي دعا لحوار وطني بعد 8 سنين في السلطة ، حصلت خلالهم في مصر كمية انتهاكات مروعة من حيث العدد و النوعية !
من اعتقال بدون تهمة لاخفاء قسري لقتل باشكال متنوعة سواء قتل خلال التعذيب او قتل بالاهمال الطبي في السجون او قتل مباشر عبارة عن تصفية جسدية لناس مقبوض عليهم !
فالسيسي بقا فاكر انه لما ييجي يقول يلا بينا حوار وطني كل حاجة هتخلص ؟
ما اظنش حد عاقل يتوقع ده .
النهاردة هاكلمك عن تجربة او خلينا نقول رحلة زي الكابوس ، مر بيها مئات الاف المصريين ، بدأت بجملة واحدة : اركب الميكروباص !!
الرحلة دي هي اكتر و اهم ظاهرة سياسية طوال حكم السيسي !
و هي اللي اما انها ترسي بيك على الاعتقال او الاخفاء ، و ياما وصلت بناس للموت !!
رحلة ايه السودة دي ؟!

{تعاشب شاي}(947) هاتاكلوا مصر يعني؟

https://www.youtube.com/watch?v=e4BFahRRsBw&list=PLBsIgVvbrncB0M8dlzAbvjl79Nu8v_BW4

فيه منهج عند السيسي من ساعة ما وصل للحكم ، هو انه دايما بيحمل المواطن المسؤولية عن كل اشكال الفشل و الاخفاق في مصر من يوم ما ربنا خلقها !
المصريين في رأي السيسي شعب عالة على البشرية ، مبيعرفش يفكر ، ولا بيعرف يركب مواصلات ، و شعب غبي لدرجة ان سهل جدا ينضحك عليه من جهات خارجية و يتجند منه عملاء كتير !
ده مضمون كلام كتير قاله السيسي في مناسبات كتير .
بس ماشي ،
ممكن تقول ان الراجل كان شايف انه مش قادر يحقق اي انجاز وبيلوش في الكلام عشان يلبس الشعب كل حاجة .
لكن لما توصل ان السيسي يبص للمصريين في اللقمة !
و يعد عليهم اكلهم اللي هو اصلا قليل و اسعاره غالية و مش صحي و ملوث وبيجيب امراض !
ده بقا اختراع جديد من اختراعات نظام السيسي .

ليه نظام السيسي باصص للمصريين في اللقمة ؟
و ازاي معايرة السيسي واعلامه للمصريين بأكلهم " الكتير " بتتحول من حاجة بتخدّم على النظام ، لحاجة بتفضح النظام ؟
و ليه النظام واعلامه بيشتغلو الناس بالارقام اللي بينشروها عن استهلاك المصريين من الاكل ؟

{ساس يسوس}(98) أستراليا.. و الحياة تحت باط الكوكب

https://www.youtube.com/watch?v=JKsxmpjxnZU&list=PLBsIgVvbrncC_hFoIcgf8_NyqLkF1nkba

واتكلمنا في الحلقة اللي فاتت عن أهمية الجغرافيا، وإن تاريخ أي دولة مش بيصنعه شعبها بس، قد ما بتصنعه جغرافية الدولة دي نفسها سواء بموارد تخليها مطمع، أو موقع مميز يحطها تحت رحمة غزو، أو تحط دولتين مثلًا في وش بعض فيبقوا بنهم صراع وعداوة تخلي العالم خايف أقل مشكلة تحصل للدنيا تولع بينهم، بالظبط زي ما حاصل دلوقت بين إيران والسعودية أو بين تركيا واليونان، وغيرهم أمثلة كتيرة.
وجرينا معاكم بالأحداث وشوفنا إزاي العالم اتحول من نظام متعدد الأقطاب زي ما كان طول عمره، لنظام ثنائي القطب من بعد الحرب العالمية التانية وفضل مقسوم بين روسيا وأمريكا لحد ما صفصفت على أمريكا فى النهاية اللي بقت حاكمة العالم الأوحد، قبل ما تختم الدورة دي برجوع العالم من جديد للنظام متعدد القوى، وكل ده حصل بعد شوية مواقف زي تدخّل روسيا في حرب كوسوفو، وتدخّل إيران في الشأن العراقي واستغلالهم للشيعة، وغيرها من الأحداث اللي ولّدت قوى جديدة مع أمريكا بيتخانقوا بينهم وبين بعض عشان يحققوا مصالحهم.

{تعاشب شاي}(948) ما فعله الدولار بالجنيه

https://www.youtube.com/watch?v=cyiSjVNRRQA&list=PLBsIgVvbrncB0M8dlzAbvjl79Nu8v_BW4

من سنين كتيرة ، الكلام عن الاقتصاد و اسعار البترول و العملات ، مبقاش حكر على الاقتصاديين و المتخصصين ، وده نتيجة ان كل حدث اقتصادي في العالم بقى يأثر سلبا او ايجابا على دول او مناطق تانية .
لكن بداية من ازمة الكوفيد 19 ، و العالم فعليا بقى كله بيتأثر باي حاجة تحصل في اي بلد !
الكوفيد اتسبب في مشاكل اقتصادية كتير في العالم كله طالت امريكا اللي اصلا اقتصادها فيه شوية قلق نتيجة اسباب داخلية عندها ، و نتيجة حربها التجارية مع الصين .
و نتيجة ان امريكا مازالت هي القوى العظمى في العالم ، و نتيجة ان الدولار هو زعيم العملات في العالم ، فأي تغير في الاقتصاد الامريكي بقت تأثيراته مضاعفة على العالم كله ، اللي لسة لابس مشاكل كتير بسبب الكوفيد ، و دخلت عليها مشاكل حرب روسيا و اوكرانيا !
عشان كده لما أمريكا قررت ترفع سعر الفايدة في بنوكها ، العالم كله قام و لسة مقعدش !
و في عز ما هو قايم ومقعدش ، امريكا راحت رافعة سعر الفايدة تاني !
ايه تأثيرات رفع امريكا سعر الفايدة ، على العالم ؟