{تعاشب شاي}(919) وداعاً جمال.. فالكل باعوك..

https://www.youtube.com/watch?v=w-FoMblFtro&list=PLBsIgVvbrncB0M8dlzAbvjl79Nu8v_BW4

يوم 31 مارس اللي فات ، النيابة العامة التركية طالبت بتحويل ملف محاكمة السعوديين الـ26 المتهمين بقتل جمال خاشقجي الله يرحمه للقضاء السعودي .
ده كان بمثابة انقلاب في مسار ملف القضية ، بالذات و ان الناس فاكرة كويس اللغة الحادة و التصعيد اللي كان بيتكلم بيهم الجانب التركي اللي الجريمة دي حصلت على ارضه .
بعدها بكام يوم ، تحديدا يوم 7 ابريل الجاري ، بالفعل، القضاء التركي قرر نقل ملف القضية للقضاء السعودي !
القرار ده سبب موجة احباط وسط كتير من المتابعين و الغاضبين من قتل خاشقجي ، و البعض اتهم الادارة التركية انها باعت الراجل !
هل فعلا خاشقجي اتباع ؟
و التمن ايه ؟
و ايه سر التحول ده في التعامل التركي مع قضية خاشقجي بعد سنين من التصعيد ؟

{الحراق}(129) ينقذ البشرية و يصلح ساعات Interstellar

https://www.youtube.com/watch?v=jwQs5V0xK5E&list=PLBsIgVvbrncBJbmFFzhjJfzK9aLoMuouz

زمان قبل اختراع المكن والآلات كان المفكرين والفلاسفة بيفسروا كل الحروب والصراعات بين الشعوب، او حتي أي خناقة عادية بين اتنين في سوق.. بإن كل ده راجع (للصراع على الموارد)
وكان تخيلهم إن في المستقبل هيكون فيه سلام عالمي عشان هيبقي فيه ميكنة حديثة وآلات تقدر تكفي احتياجات البشر الأساسية، بالتالي هيتخانقوا علي ايه؟
واضح انهم كانو ناسيين إن أول جريمة قتل... كانت بين أول اتنين اتوجدو على الكوكب... قابيل وهابيل...وأكيد وقتها مكنش الصراع عالموارد.. الصراع كان بسبب احقاد شخصية.
النهاردة هنشوف مشهد شبه ده... شخصين على كوكب لوحدهم بيحاولوا يقتلوا بعض.
يمكن كتير منكم سمع الكلام اللي اتقال عن الدقة العلمية اللي في الفيلم.. بس الحقيقة إنه في الاخر فيلم خيالي يعني، فمش هنركز اوي عالناحية العلمية..
خلينا نستمتع بالقصة من غير ما نقلبها درس فيزيا!
النهاردة هنتكلم عن فيلم.. interstellar .. او زي ما الاستاذ أنيس عبيد ترجمها "بين النجوم"

{تعاشب شاي}(920) عسكر و عمران خان

https://www.youtube.com/watch?v=ft9G-RO4IX0&list=PLBsIgVvbrncB0M8dlzAbvjl79Nu8v_BW4

بسبب الحرب الروسية الأوكرانية فيه كذا خناقة سياسية او عسكرية محتملة زي الصين وتايوان .
و فيه كذا خناقة سياسية كبيرة حصلت بالفعل ، اهمهم خلال الايام اللي فاتت ، معركة دارت في باكستان !
المعركة دي ، زي ما جرت العادة في اغلب الدول الاسلامية و معاه الدول العربية ، كانت هي الخناقة التقليدية بين العسكر من ناحية ، و رغبتهم في السيطرة المطلقة على السلطة ، و بين رئيس الوزرا عمران خان ، اللي كان عاوز يمارس صلاحياته كرئس وزراء مدني بيحكم بلده بشكل طبيعي زي دول العالم الطبيعية ، و يكون من حقه انه يمارس سياسة خاصة ببلده ، هو شايف ان فيها قدر من الاستقلال و عدم التبعية .
و ده الحق البديهي لاي سياسي !
لكن للاسف ،
و كالعادة برضه ، زي ما بيحصل في المعارك دي في دولنا العربية و الاسلامية ، انتصر العسكر ، و تمت الاطاحة بعمران خان !
ايه اسباب الخناقة؟
و ايه علاقتها بحرب روسيا و اكرانيا ؟
و ايه جذورها التاريخية؟

{تعاشب شاي}(921) حنطني يا!
https://www.youtube.com/watch?v=Vn09pPFSYAU&list=PLBsIgVvbrncB0M8dlzAbvjl79Nu8v_BW4

اوعي تفتكر ان الفن و الدراما وظيفتهم الوحيدة هي التسلية .. لا خالص .. الدراما دي مهمة جدا و ممكن اوي مسلسل واحد يغير حياة ناس كتير .. و هنروح بعيد ليه ؟؟ عندك مسلسل الاختيار 3 مثلا .. اهو ده مش بس غير حياة ناس .. ده جاب عاليها واطيها …فيه ناس مثلا لما شافوه ورموا .. و فيه ناس ماتوا من الضحك .. و فيه ناس كسروا التلفزيونات .. فيه بقي مجموعة تانية لما شافوا المسلسل فكروا بايجابية .. و بداوا يلموا من بعض علشان يجمعوا مبلغ كبير و يدوه للاستاذ بيتر ميمي مقابل انه يعتزل و يقعد في البيت و يبطل اختيارات بقي لان جسمنا باظ منها و الله

{تعاشب شاي}(922) مسلم و مسيحي.. و المختل واحد

https://www.youtube.com/watch?v=uKZ1m55kEWM&list=PLBsIgVvbrncB0M8dlzAbvjl79Nu8v_BW4

اكيد حضرتك لو انت بتتابع الاخبار ، او لو مش بتتابعها بس بتقلب على الفيس كل شوية زي ملايين الناس في العالم ، اكيد عدت عليك اخبار عن جريمة بشعة حصلت في مصر من كام يوم ، لما شخص اعتدى على قس اسمه ارسانيوس وديد ، كاهن كنيسة العذراء في محرم بيه في اسكندرية، بسكينة ، و ترتب على الاعتداء ده وفاة القس !
اهو القصة دي او الجريمة دي ، اللي عدت عليك و انت بتقلب على الفيس بوك ، مليانة ثغرات و خروم ، بتقول لك ان كل حاجة في مصر دلوقت عبثية و غوغائية و مش معقولة و ممكن تقود لكارثة اكبر.
و ان النظام مبيكلفش نفسه انه حتى يحبك الكذب اللي بيكذبه على الناس !
ازاي الكلام ده ؟
و ليه لازم كل المصريين يقلقو من جريمة زي دي ؟

{ساس يسوس}(97) كله بالجغرافيا بيفك

https://www.youtube.com/watch?v=BBrXiYanOdQ&list=PLBsIgVvbrncC_hFoIcgf8_NyqLkF1nkba

واتكلمنا في الحلقة اللي فاتت عن... لحظة كده، مش كفاية كلام في التاريخ بقى؟ عمالين ننقل من تاريخ مصر شوية لتاريخ كوريا لتشيلي للعراق لأندونيسيا والكونغو بالمرة، واخدين العالم من شرقه لغربه عشان نحكيلكم تاريخ المستبدين والطغاة، وإزاي الحاكم المستبد بيتم صُنعه وبيوصل للحكم ويقعد ويترستق على الكرسي... كل الحكايات دي مش مجرد حواديت قبل النوم وخلاص، كان قصدنا نتعلم إزاي يتعرف الحاكم اللي ناوي يبقى فاسد من أول بصة في سحنته لما يهل علينا، امممم ويمكن برضه نساعدكم لو فيه حد فيكم عنده ميول ديكتاتورية ولا حاجة بس مش عارف السكة منين، أهو نبقى أخدنا ثوابه ووريناه أول الطريق وكله عند الله... بس عمومًا، سواء ده أو ده، كفاية كلام عن التاريخ شوية، وخلونا ننقل على موضوع جديد... موضوع ايه؟ بقولك كفاية تاريخ، يبقى أكيد هنتكلم عن الجغرافيا، أنت مأخدتش دراسات فى إعدادي ولا ايه؟ وبعدين السلسلة دي اسمها ساسا يا سوسو، عارف سوسو دي تبقى مين؟ لأ مش هي، مع إن دماغك شمال وعجباني، سوسو دلع (دراسات) عادي.

{تعاشب شاي}(923) خالد عيد ماماتش.. مرتين..

https://www.youtube.com/watch?v=xN0Ori8eJ5I&list=PLBsIgVvbrncB0M8dlzAbvjl79Nu8v_BW4

اعذروني المرة دي لان عادة لما باتكلم عن اي موضوع ، باحاول اعالجه بشكل فيه دعابة او سخرية .
بس المرة دي ، الموضوع مستحيل بتعالج بالشكل ده .
لان موضوع الحلقة دي كارثة و مصيبة فوق اي وصف واي محاولة للمعالجة او التحليل !
احنا اتكلمنا كتير عن " الاخفاء القسري " اللي نظام السيسي محترف فيه ، من ساعة ما وصل للسلطة .
المرة دي ، هنتكلم عن واقعة اختفاء قري انتهت بالموت ، و بعد الموت اختفاء تاني !
لغاية ما بالصدفة ، السلطات افتكرت انها تبلغ اهل الضحية !
و الضحية مش شاب ممكن يتقال عليه ان عنده افكار متطرفة او بتاع عمل عنيف او اخوان او اي حاجة من الحاجات اللي اتعود نظام السسي و اعلامه انه يلزقها في اي ضحية من ضحاياه !
المرة دي الضحية باحث اقتصادي مرموق، و سياسي في حزب شرعي ، خريج الجامعة الامريكية ، كتاباته و حتى انتقاداته لسياسات النظام هادية وعاقلة و مفيهاش اي تطرف !
هنتكلم النهاردة عن : أيمن هدهود .
ايه الحكاية ؟
و ليه قصة ايمن هدهود الله يرحمه بتقول ان البلد دي مفيهاش اي امل ؟

{الأسبوع ف كيس}(303) رمدان كريم يا مسريين

https://www.youtube.com/watch?v=aC4LphBuhb4&list=PLBsIgVvbrncAeJMvwCpzZg-ow581Oh13M

معروف ان المسلسلات معمولة عشان تتشاف أو تتسمع..في رمضان السنة دي فيه ظاهرة جديدة على الدراما، وهي إنك ممكن تشم المسلسل كمان ..وده اللي حصل مع مسلسل فاتن امل حربي ..نظرة واحدة عليه هتشم ريحة ابراهيم عيسى في كل مشهد، ومش محتاج تسأل المسلسل ده تأليف مين ..عشان قريب اوي ممكن كمان حلقتين ولا حاجة هتلاقي نيللي كريم طلع لها شنب ولبست حمالات وهي رايحة مشوار لشيخ، عشان تقول له أنا خابطة المشوار أسألك،
 ومش مقتنعة بكلامك من قبل ما تجاوب عشان الإجابة دي مش مكتوبة بالنص في القرآن مليش فيه ..طب يا أبلة انتي مش مقتنعة بكلام شيوخ ولا علما ولا مفسرين، وعندك القرآن في البيت جاية تسألينا ليه ؟ لأ مفيش أنا ابراهيم عيسى بعتني ابيض عليكو بس ، واطلع كل الشيوخ انتهازيين وجهلا وخلقهم ضيق ومعندهمش حجة ..وانا جامدة زوحليقة وهعمل اللي انا عايزاه طالما مش مكتوب في القرآن..وعلى الله حد يقول لي ما هي القايمة وحق الكد والسعاية، والشقة من حق الزوجة

{تعاشب شاي}(924) خدوا الجنسية و سيبولي مصر

https://www.youtube.com/watch?v=Fo6TZwjBNmw&list=PLBsIgVvbrncB0M8dlzAbvjl79Nu8v_BW4

من واحنا صغيرين بنسمع اغاني و اناشيد ، ونتعلم في المدرسة ، و بنشوف دراما ، كلها بتتكلم حوالين معنى الانتماء للوطن و ضرورة الفخر بالانتماء ليه .
و ده الوضع الطبيعي جدا .
انك تحب انتماءك لبلدك و تفتخر بجنسيتك و تحتمي بيها .
بس من بين الاوضاع الشاذة و البشعة و الغريبة اللي اتسبب فيها نظام السيسي ، ان الجنسية المصرية اصبحت عقاب اكتر منها مدعاة للفخر !
و اصبحت سجن اكتر منها حاجة تخليك سعيد بيها !
لدرجة ان بقى التنازل عن الجنسية المصرية في احيان كتير سبيل وحيد للحصول على الحرية و الكرامة ، و طوق نجاه من القمع و الاعتقال و القتل !
عكس ما بتقول كل الاغاني و البرامج و المسلسلات و الافلام و المناهج المدرسية !!
ازاي ده حصل ؟
و ازاي السيسي حول الجنسية المصرية لعقاب ؟!

{عرفوه بالعلم}(29) النباتات في ليلة الدخلة

https://www.youtube.com/watch?v=Wh-7Kg-jVLg&list=PLBsIgVvbrncChqmejIOyA-Xp_dcywQQln

مازلنا في رحلتنا مع عالم النبات العجيب.. بس خلونا نوقف شوية كده و نفكر.. و نبص حوالينا و نتأمل.. و نسأل نفسنا.. وديتوا النباتات فين؟!!! اللي يبص على شوارعنا.. يحس اننا خلاص اتفطمنا من النباتات.. و مابقيناش محتاجينها عشان نعيش.. ماعادلناش علاقة بيها.. مقاطعينها.. ماهو اللي احنا بنعمله مالهوش تفسير تاني الحقيقة..
و لكن عموما.. الحمد لله اننا لسة متقبلين فكرة ان النباتات تشاركنا الحياة على الكوكب لسة.. كتر خيرنا يعني.. بس ده مش كفاية.. لأننا هانلبس كده في الآخر.. لأن حضرتك النباتات مش بتشاركنا الحياة.. النباتات هي الحياة.. من غيرها.. مافيش حياة ممكن تستمر على الكوكب أصلا..
أكلك كله معتمد على النباتات.. من غيرها هاتموت من الجوع.. ليه يا عم؟.. هو احنا استغفر الله العظيم فيجيتيريان ولا فيجان الملحدين دول؟.. لا احنا مؤمنين و موحدين بالله الحمد لله و مابناكلش سلطة خالص.. ولا لحمة الحقيقة.. هو السيسي مش سايبلنا حاجة ناكلها الحمد لله..

{تعاشب شاي}(925) البلاح باع الفلاح

https://www.youtube.com/watch?v=_vG4kL7Tyvw&list=PLBsIgVvbrncB0M8dlzAbvjl79Nu8v_BW4

بالتزامن مع الازمة الاقتصادية الفاشخة اللي في مصر ، و اللي هتزيد و هتزيد المواطن فشخا بعد موجة القروض الجديدة اللي السيسي هياخدها قريب ، و بالتزامن مع الازمات السياسية العالمية اللي بتنعكس على مصر فبتعمل زيادة في الازمة الاقتصادية !
بالتزامن مع كل ده ،
فيه مخلوق بسيط ياعيني قاعد على جنب كده ،
عمال ياخد ضربات من جوة ومن برة ،
و مش ملاحق على البونيات و الشلاليت !
المخلوق ده اسمه الفلاح المصري !
الفلاح المصري اللي لسة مفاقش من ضربة القمح و الاسعار الواقعة اللي الحكومة بتجبره يبيع بيها ،
لقى نفسه يا ولداه بياخد في جنابه ضربة تانية مصدرها الحكومة برضه ، هي بيع شركات الاسمدة الكبيرة ، و ده معناه ان السماد هو كمان هيخون الفلاح و هيخلى بيه !
ايه موضوع الاسمدة اللي بتتباع ؟
و ايه تأثير ده على الفلاح ؟
و ليه بيع شركات السماد معناه ان السيسي بيخلص على اللي فاضل من مصر ؟

{تعاشب شاي}(926) بلحاتيي.. انفخ البلالين

https://www.youtube.com/watch?v=hAdPfF0jeY8&list=PLBsIgVvbrncB0M8dlzAbvjl79Nu8v_BW4

فيه ناس كتير كانوا فاكرين ان مسلسل الاختيار 3 .. هو مجرد عمل ملحمي تاريخي بطولي عظيم .. مبيعملش اي حاجة غير انه بيقدم للمشاهدين ضحك و كدب و تدليس .. و بيزيف الاحداث و بيغير التاريخ و بيزور الحقايق .. و بيطلع السيسي المجرم الخاين في توب البطل العظيم المخلص الشريف اوي و الامين اوي .. و خلاص علي كده .. بس الحقيقة ان مسلسل الاختيار كان مخبيلنا مفاجاة .. و طلع بيقدم كمان فوق ده كله .. فقرة الكاميرا الخفية .. الي كنا اتحرمنا منها في رمضان من ايام زكية زكريا .. بس الحمد لله السيسي رجعهلنا في اخر كل حلقة من المسلسل .. و بامانة يعني و بكل موضوعية الكاميرا الخفية بتاعة السيسي طلعت بتضحك اكتر بكتير من بتاعة ابراهيم نصر!

{تعاشب شاي}(927) القدس كمان و كمان

https://www.youtube.com/watch?v=fcaLFm36I6U&list=PLBsIgVvbrncB0M8dlzAbvjl79Nu8v_BW4

" كنت شاهدا على معظم اقتحامات المسجد الأقصى، لكن اقتحام اليوم هو الأصعب والأضخم والأكثر تخريبا لمحتويات المسجد.. والوصف الدقيق لما يجري هو استباحة كاملة لأولى القبلتين"!
دي شهادة لمواطن مقدسي مرابط في المسجد الاقصى المبارك دلوقت، لموقع قناة الجزيرة ، بيوصف فيها الاحداث الحالية و الاقتحام البربري الهمجي اللي بيقوم بيه الاحتلال الاسرائيلي للمسجد و الاعتقالات اللي بيعملها وسط اهل القدس .
الشهادة دي هي مجرد جزء او زاوية صغيرة من المشهد الدموي الحاصل هناك .
ايه اسباب الاقتحام الصهيوني الحالي للمسجد الاقصى ؟
و ايه اللي بيحصل بالظبط ؟
و المشهد رايح على فين ؟

{عيانين بالإبداع}(07) عود درة وحداني.. في غيط كمون

https://www.youtube.com/watch?v=VZ0ruh4XBsY&list=PLBsIgVvbrncDhUgCH6RUClfyYvcA7z51K

من لحظة ما العالم بدأ ينتبه و ياخد باله من موضوع الهداهد و الـADHD ده.. بدأ الناس يتساءلوا عن مدى تأثير البيئة المحيطة بالشخص.. إيجابيا و سلبيا.. على حالته.. لأن الموضوع ماهواش أدوية و بس.. الدكتور اللي بدأ أسلوب العلاج بالمنشطات ذات نفسه.. خصوصا مع الأطفال.. سنة ١٩٣٧ .. كان بيحط خطة العلاج بناءا على إدارة البيئة و الظروف المحيطة بالطفل.. أو الشخص.. مش بناءا على الدوا و بس.. زي ماقلنا كتير... الدوا مش حل سحري بيعالج كل حاجة لوحده.. ده مجرد عنصر واحد في المعادلة.. مابيشتغلش لوحده.. و هانتكلم في حلقة بالتفصيل عن الأدوية.. عشان حتى احكيلكم رحلتي معاها و ووصلت لفين.. المه.. الدكتور ده جنب الدوا.. بدأ يجرب يغير شكل و لون الإضاءة في العيادة بتاعته.. وي غير شكل و زلوان لبس الموظفين عنده.. اللي الأطفال بيتاعاملوا معاهم.. معلهش انا باقول أطفال لأنه كان متخصص في الأطفال بس الكلام يسري على المكل أطفال و كبار.. لأن في البداية كان الاعتقاد السائد ان الاضطراب ده بيكون موجود في الأطفال بس.

{تعاشب شاي}(928) لقمة القاضي

https://www.youtube.com/watch?v=g9-IFvM02So&list=PLBsIgVvbrncB0M8dlzAbvjl79Nu8v_BW4

فيه ناس كتير اوي من اعداء الوطن و اهل الشر بيقولوا انك في مصر علشان تتعين في النيابة او تشتغل في السلك القضائي لازم يكون ابوك قاضي .. علي اساس يروجوا لفكرة قال ايه ان كرسي القضاء عندنا بيتورث و كده .. و الحقيقة ان الكلام ده كله غلط و اشاعات .. و مش شرط ابدا ان ابوك يكون قاضي علشان تتعين في القضاء .. ممكن جدا يكون اخوك الكبير هو الي قاضي او خالك او عمك مثلا.. و ساعتها هتتعين في القضاء بردو عادي .. يعني الموضوع مفيهوش اي توريث او واسطة خالص اهو .. مش عارف بصراحة بيجيبوا الكلام ده منين !

{تعاشب شاي}(929) بيبي بلحة في القدس..

https://www.youtube.com/watch?v=PCp2cqp4DFA&list=PLBsIgVvbrncB0M8dlzAbvjl79Nu8v_BW4

ابتداء من فجر الجمعة 15 ابريل ، انفجر الوضع في القدس مرة جديدة بسبب اقتحامات جديدة همجية للاحتلال ، اللي دخّل مستوطنين لساحات المسجد الاقصى المبارك على امل ان حد منهم يقدر يذبح قربان جوة المسجد بمناسبة عيد الفصح اليهودي!
الفلسطينيين طبعا كالعادة وقفوا بشراسة وقالولهم ده بعيد عن شنباتكم ، فشرطة الاحتلال نزلت فيهم ضرب و سحل و اعتقال .
مع الاعتداء الصهيوني الجديد على الاقصى ، ظهر تاني ، كلام عن " مخطط التقسيم الزماني و المكاني للمسجد المبارك "!
و فيه ناس كتير شايفين ان اللي بيحصل ده هو تأكيد على نية الصهاينة تنفيذ التقسيم ده .
عشان كده محتاجين نفهم : ايه هو التقسيم الزماني و المكاني للاقصى ؟
و محتاجين نفهم كمان : هل ممكن يكون فيه علاقة بين التصعيد اللي بيحصل في القدس ، و بين الزيارة اللي قام بيها محمود السيسي لدولة الاحتلال يوم الاحد اللي فات ؟
و هل ده دور جديد بيلعبه تمهيدا لادوار اكبر ؟!

{تعاشب شاي}(930) ماكرون؟.. ولا هونجا بونجا؟

https://www.youtube.com/watch?v=fXOgHDOW8yo&list=PLBsIgVvbrncB0M8dlzAbvjl79Nu8v_BW4

اليومين دول فيه انتخابات رئاسية في فرنسا !
حدث مهم جدا ، لكن غايب عن متابعة كتير من الناس بسبب الانشغال باحداث اكبر و اخطر وواخدة شو اعلامي اوسع ، زي طبعا ، الحدث الابرز في العالم كله دلوقت ، الحرب في اكرانيا .
انتخابات فرنسا رغم ان التغطيات الاعلامية ليها ضعيفة حبتين ، لكنها مهمة من كذا زاوية .
هنحاول نتكلم عن بعض الزوايا دي في الفيديو ده ، و نربطها بالزاوية اللي تخصنا بشكل أساسي كعرب و مسلمين ، و اللي هي : ايه موقف المسلمين و العرب المقيمين في فرنسا من الانتخابات ؟
و هل بعد كل المعاناة و القرف اللي شافوه بسبب سياسات ماكرون المتشددة ، المنغلقة ، اللي ضد المسلمين و العرب، هل بعد كل ده ، قدر المسلمين في فرنسا يكونو عنصر مؤثر في الانتخابات الفرنسية ، بشكل يحقق مصالحهم ويحميهم ؟

{تعاشب شاي}(931) دولة الخانكة

https://www.youtube.com/watch?v=Mw4E_p_ixtg&list=PLBsIgVvbrncB0M8dlzAbvjl79Nu8v_BW4

فيه فيلم اسمه الخانكة ، بطولة عزت العلايلي و ماجدة الخطيب ، في الفيلم ده ماجدة الخطيب كان فيه خلافات بينها وبين اخوها ، قام الافندي استعان بصديقه الدكتور النفساني اللي شغال في مستشفى الخانكة للامراض النفسية ، و دخلوها المستشفى عشان يجننوها و يستولي على حقوقها !
و من بين الحكاوي اللي بتتحكي في اوساط المثقفين عن العهد الناصري ان الامن وقتها كان لما يحب ينتقم من حد ، انتقام اقوى من الاعتقال ، كان بيرميه في العباسية !
من كام يوم رجع الكلام تاني عن استخدام الامن للعباسية في انه " يتاوي " كتير من المعتقلين !
و ده على خلفية وفاة الباحث الاقتصادي ، و الناشط السياسي ايمن هدهود ، بالشكل الغامض اللي مات بيه ، بعد اعتقاله – و اكيد تعذيبه – و بعدين رميه في مستشفى العباسية لغاية ما اتوفى ، الله يرحمه و يجعل معاناته دي في ميزان حسناته .
ليه الكلام عن علاقة اجهزة الامن بمستشفى العباسية رجع تاني ؟
و ايه اللي حصل مع ايمن هدهود خلال فترة احتجازه هناك؟
و ازاي الامن رجع تاني يتاوي معتقلين كتير في العباسية ؟

{عرفوه بالعقل}(54) العبيد و ملك اليمين في الإسلام
https://www.youtube.com/watch?v=3s2_JLEVnwg&list=PLBsIgVvbrncCUHtc-Gd9d0t5wBXwC0_DO

قضية بتثار كشبهة.. و بيستغلوا جهل الناس بالتاريخ و الواقع عشان يشككوهم في دينهم.. لكن يقين الإيمان بيتخطى الشكوك دي عادة.. بس مابيعالجهاش.. مابيسدهاش تماما.. بتفضل زي النار اللي تحت الرماد.. عقل الإنسان دايما مابينساش أبدا الأسئلة اللي ماقدرش يلاقيلها إجابة شافية و مقنعة.. عشان كده السؤال البسيط ده.. ليه الإسلام ما قضاش على العبودية بكن فيكون و اتعامل معاه على انه واقع مقبول؟.. ليه ما تمش تحريمه زي تحريم الخمر مثلا؟.. سؤال هايفضل كامن في العقول.. لو ماتمش الإجابة عليه بشكل مقنع..طب و ليه يعني الواحد مايلاقيش اجابة مقنعة؟.. لأن فيه قضايا أو مسائل معقدة.. محتاجة فهم خلفيات تانية اجتماعية و اقتصادية و سياسية و نفسية.. عشان تفهم الإجابة أصلا و تقتنع بيها.. و للأسف القضية دي.. من النوعية دي.. عشان كده محتاجة حلقات مش حلقة واحدة للتفصيل و الفهم..
فخلونا نتوكل على الله و نبدأ الرحلة دي سوا.. و النهاردة هانبدأ نفتح شوية سكك و تساؤلات بس مش أكتر قبل ما نبدأ نفصل فيها بعد كده..

{تعاشب شاي}(932) زورونا تجدوا ما يشلكم

https://www.youtube.com/watch?v=k3V_z5PC6d0&list=PLBsIgVvbrncB0M8dlzAbvjl79Nu8v_BW4

يوتيوبر امريكي متصيت و مشهور اسمه سوني امه دعت عليه و قرر انه ييجي مصر و يصور فيها فيديوهات علشان يذيعها علي قناته .. و بعد ما قعد عندنا كام يوم و روح .. مش يحمد ربنا بقي انه خرج من مصر سليم و يبوس ايده وش و ضهر انه لسه عايش .. لا .. قعد يهلفط في الكلام و يخبط في الحلل .. و عمل فيديوهات قال فيها ان زيارة مصر كانت اوسخ تجربة في حياته .. و انها اسوا بلد في الكوكب ممكن حد يزورها .. و بدا ينصح الاجانب والسياح انهم ميعتبوش ناحيتها لانهم هيشوفوا معاملة غير ادمية من السلطات المصرية .. عيب عليك و الله يا استاذ سوني .. ميصحش بردو تنصح الاجانب انهم ميزوروش مصر .. هو صحيح دلوقتي المصريين الي عايشين جوه مصر نفسهم مش عاوزين يزوروا مصر .. بس بردو مكانش ينفع تقول كده !

{تعاشب شاي}(130) الهروب من الخانكة

https://www.youtube.com/watch?v=yzHzkRK9QG4&list=PLBsIgVvbrncBJbmFFzhjJfzK9aLoMuouz

لما تصحى الصبح في سنة 2022 على خبر وفاة ايمن هدهود الباحث الاقتصادي، وعضو حزب سياسي مستأنس وشغال تحت عين النظام في النور ، ورئيسه خدام مطيع للسلطة..وحتى هو نفسه كل كتاباته كانت هادية ورصينة وبيطرح فيها حلول اقتصادية، ومش متصادم مع الدولة بأي شكل..ولما تقرا وتسمع عن ملابسات وفاته وفجور النظام اللي خطفه واخفاه قسريا وقتله..وسابوا أهله وأصحابه يدوروا عليه في كل مكان على مدار شهر ونص..وحتى بعد ما أعلنوا موته ما اكتفوش بالفجور لحد كده وبس ..دول شوهوه وطلعوه حرامي ومجنون محتجز في مستشفى العباسية..كل ده حصل السنة دي بس من ايام بسيطة ، لكن كتير ممكن يتفاجئ النهاردة لما نقول له إن من 35 سنة، كان فيه فيلم بيتكلم عن هدهود وكل هدهود في البلد دي.. متقدرش تقول نبوءة ، لانه حتى في وقت عرضه كان بيرصد واقع وبيحكي عنه ، كأنه بيشرح حالنا وحال كل واحد يعتبر عدو للنظام ده ..عدو مش بالسلاح والرصاص.. مجرم بس مش جريمته الإرهاب.. مجرم جريمته عقله ، مريض بداء مُعدي اسمه الفكر والحرية والضمير لازم له عزل أو تصفية