{تعاشب شاي}(897) معاييرك حمرة!

https://www.youtube.com/watch?v=j8gMk0P6bH0&list=PLBsIgVvbrncB0M8dlzAbvjl79Nu8v_BW4

الكلام عن ازدواجية المعايير في العالم كلام مش جديد .. مش محتاجين نثبت ان العالم عنده ناس أهم من ناس .. وأديان أروش من أديان .. وشعوب دمها أخف على قلبه من شعوب تانية .. وان معايير المساواة وحقوق الانسان المزعومة بالنسبة له مش واحدة .. وإن قيم العدالة والإنسانية والتحضر شغالة لصالح ناس وناس لأ .. كل دي بديهيات مش محتاجين نعيد ونزيد فيها .. وعشان كده .. مش غريب ان سياسات واحد زي مارك زوكربيرج مكمّلة على نفس الخط ..
يشوف ناس بتدافع عن أرضها يقول "امسك خطاب كراهية " .. "الحق الناس اللي بتحرّض على العنف دي" .. ده مش دفاع عن الأرض .. ده انتهاك لمعايرنا المجتمعية تستاهل عليه حظر ..
يشوف ناس تانية بتدافع برضه عن أرضها بس في منطقة تانية في العالم يقول "شوف الأبطال" بص الشهامة والرجولة؟ أهو هو ده الدفاع عن الأرض اللي أنا بحبه .. خود لايك.
طيب يا عم مارك .. إيه معاييرك في إنك تخذل دُوُل وتنصر دُوُل؟
الإجابة معروفة ..

{تعاشب شاي}(898) تعويم ابن الأسدة

https://www.youtube.com/watch?v=7ygWNWiaZqs&list=PLBsIgVvbrncB0M8dlzAbvjl79Nu8v_BW4

يوم الجمعة ، 18 مارس ، اتفاجيء العالم باستقبال محمد بن زايد لبشار الاسد في الامارات !
أكيد فيه ناس ما اتفاجئتش بالزيارة ، و الناس دي هي اللي مبقتش تستغرب اي حاجة بيعملها حكام الامارات اللي بقالهم سنين متخصصين " شم في راس القرد " !
و مشيها راس القرد .
حكام الامارات بقالهم فترة كبيرة جدا بيدوروا بملقاط على كل حاجة ضد القيم و العروبة و ضد الناس و ضد ضحايا الانظمة ، ويعملوها ببجاحة منقطعة النظير .
مش ده المهم .
المهم هو حاجات مهمة تتعلق بزيارة الاسد للامارات:
ليه الزيارة في الوقت ده ؟
و هل فعلا بن زايد بيناكف امريكا بالزيارة دي ؟
و هل الزيارة دي اعلان اعتراف بان بشار انتصر على الشعب السوري ؟

{تعاشب شاي}(899) بعتني بكام يا عشري؟

https://www.youtube.com/watch?v=SPWFKwRyI4U&list=PLBsIgVvbrncB0M8dlzAbvjl79Nu8v_BW4

من وقت ما كان غزو روسيا لاوكرانيا مجرد احتمال او فكرة ، و كان فيه سؤال رئيسي مع اي كلام عن الموضوع ده هو : موقف الصين هيكون ايه لو روسيا غزت أوكرانيا؟
و موقف الصين هيكون ايه لو الغرب فشخ روسيا ؟
و ايه حدود الدعم اللي ممكن الصين تقدمه لروسيا ؟
حصلت الحرب .
و روسيا غزت أوكرانيا.
و الصين موقفها كان غريب بالنسبة لكتير من الناس لانها اخدت موقف هادي خالص بل بالعكس ممكن تقول ان فيه بوادر لان الصين تبيع روسيا وبوتين !
هل ممكن الصين فعلا تبيع روسيا؟
طيب ليه؟
و هتجني ايه من الموقف ده ؟

{تعاشب شاي}(124) كوبري الجواسيس. Bridge Of Spies

https://www.youtube.com/watch?v=W53ZRkTpPO0&list=PLBsIgVvbrncBJbmFFzhjJfzK9aLoMuouz

في يوم من أيام شهر ابريل سنة 1961 الرئيس الأمريكي "جون كيندي" جاتله مكالمة من ظابط مخابرات كبير بيقوله إن العملية العسكرية الأمريكية في "كوبا" فشلت فشل ذريع.
أعضاء الجيش الثوري الكوبي برئاسة جيفارا و كاسترو.. قبضو علي ١١٠٠ جندي شغالين لحساب أمريكا.. في المنطقة اللي اسمها ... "خليج الخنازير"
العملية دي كانت جزء من خطة كبيرة بدأها الرئيس اللي قبل كيندي (اللي هو ايزنهاور) .. لقلب نظام الحكم في كوبا.
ظابط المخابرات قال لكيندي هنعمل ايه دلوقتي يا سيادة الريس؟! الجنود دول لو جرالهم حاجة هتبقي نقطة سودا في تاريخنا... وفضيحة ديبلوماسية على اعلي مستوى.. والمصيبة الأكبر... اننا منقدرش نقول انهم تبعنا لأن العملية اصلاً سرية!
ولو حاولنا نتدخل مباشرة بالجيش بتاعنا.. هانبدأ حرب في المنطقة كلها!
كيندي قاله.. مفيش غير شخص واحد بس.. اللي بلجأله في المواقف اللي زي دي... الشخص ده هو .. جيمس دونفان.. أحسن خبير تفاوض في العالم...

{تعاشب شاي}(900) وديتوا القمح فين؟

https://www.youtube.com/watch?v=jsCtmd1ZhKY&list=PLBsIgVvbrncB0M8dlzAbvjl79Nu8v_BW4

اي حد اتعلم في مصر .. و دخل مدارسها الجميلة النضيفة المتطورة .. هيلاقي جملة معينة موجودة في كل كتب وزارة التربية و التعليم بتخبط في وشه من اول ابتدائي لحد ثانوي .. الجملة دي هي ان مصر كانت طول عمرها سلة القمح في العالم … و ان علي مدار التاريخ إنتاجنا من القمح كان كبير جدا و بالكوم و فايض عن حاجتنا و مش عارفين نوديه فين .. لدرجة ان الدنيا كلها كانت بتاخد قمح من عندنا .. طيب ايه الي اتغير و حول مصر من أكبر منتج للقمح في العالم لاكبر مستورد ليه .. و ازاي السلة الي كانت مليانة قمح دى مبقاش موجود فيها دلوقتي الا بلح!

{عيانين بالإبداع ADHD}(06) اللي قادر ع التحدي

https://www.youtube.com/watch?v=QHtIPrvLDYY&list=PLBsIgVvbrncDhUgCH6RUClfyYvcA7z51K

معظم الهداهد.. أو اللي عندهم ADHD مبدعين بطبيعتهم.. و أصليين.. مابيعرفوش يقلدوا حد ولا يمشوا ويا القطيع ولا يعملوا زي ما الناس بتعمل و خلاص.. دايما بيفكروا زي ماقلنا برة الصندوق.. لأنهم مش شايفين الصندوق أصلا.. و دايما حاسين ان فيه دافع جواهم انهم عاوزين يعملوا حاجة جديدة.. أو يصمموا حاجة جديدة.. أو يخترعوا حاجة جديدة.. أو حتى يطبخوا أكلة جديدة.. دافع بيبقى عامل زي الأكلان بتاع الهرش كده..
زي ما مش هاترتاح الا لو هرشت.. برضه الهدهد مش هايرتاح الا لو عمل الحاجة دي و شاف إنجاز جديد عمله بايديه قدام عينيه.. ولو ماحصلش ده.. هايحس بالإحباط و الاكتئاب.. و هنا بقى تركاية مهمة جدا.. احنا معشر الهداهد.. لو اشتغلنا على حاجة أقل من قدراتنا الإبداعية.. مافيهاش تحدي بالنسبة لنا يعني.. بنقفل من الليلة كلها.. بنفقد الحماس و الدافع اننا نعملها.. ليه؟.

{تعاشب شاي}(901) ساموراي البلح

https://www.youtube.com/watch?v=4v3uM1RmOfo&list=PLBsIgVvbrncB0M8dlzAbvjl79Nu8v_BW4

بعد تخفيض قيمة الجنيه اللي حصل من كام يوم ، و رفع سعر الفايدة في مصر ، و اللي كان استمرار للعك الاقتصادي اللي بيعمله نظام السيسي من ساعة ما مسك الحكم ، هل الامور هتتوزن شوية و تتعدل ؟
و هل فيه امل ان القرارات دي ، زي ما النظام واعلامه بيقولو ، تسند اقتصاد البلد باي مقدار؟
و ايه الحلول اللي هيلجأ ليها النظام عشان يكمل علاج ازمات الاقتصاد المصري ؟
و هل اصلا ممكن علاج ازمات الاقتصاد المصري بنفس الدماغ اللي شغالة في مصر دي ؟
و ايه اللي مستني الناس في مصر من الناحية الاقتصادية ؟

{تعاشب شاي}(902) و ركب الدولار

https://youtu.be/8qJjB5B4aVw

فيه ناس كتير فاكرين ان الجنيه المصري بيتاثر بأي حاجة بتحصل في العالم .. و ما بيصدق يلمح حرب او ازمة عالمية او خناقة في اي حتة في الكوكب و بيروح يهبط علي طول و قيمته بتقل .. و الحقيقة ان الكلام ده مش صحيح .. لان من اهم الانجازات الاقتصادية الي عملها سمو الرئيس عبد الفتاح السيسي .. انه خلي الجنيه يعتمد علي نفسه .. و ميبقاش محتاج ان اي ازمة تحصل في العالم علشان قيمته تقل .. لا هو بينهار لوحده كده من غير اي حاجة .. يعني حتي لو السلام عم العالم و كل الصراعات انتهت و الدول الي بيحاربوا دول اتصالحوا و خدوا بعض بالحضن .. الجنيه المصري و لا هيهتم و قيمته هتقل بردو عادي .

{تعاشب شاي}(13) توتة توتة.. و تتمر الحدوتة

https://www.youtube.com/watch?v=MZxnDn0LZV4&list=PLBsIgVvbrncBwfV9fP7smSrSv5LU39esP

كل اللي حكيناه ده في حدوتتنا لغاية دلوقت.. مش معناه ان الحكاية خلصت كده .. و الدنيا استقرت خلاص.. المشهد الاقتصادي في اسرائيل اللي شكله مستقر النهاردة.. نقدر نقول انه بدأ مع بداية اقتصاد الإنترنت.. اللي هو ايه؟.. من عشرين سنة مثلا؟.. و مش طفرة اقتصاد الإنترنت بس اللي ساهمت في الحكاية دي.. لأ ده كمان طفرة شركات التكنولوجيا في أمريكا.. اللي استعانت بالخبرات الإسرائيلية و استثمرت فيها.. و كمان دعم الحكومة الإسرائيلية للاستثمار من خلال برنامج يوزما اللي حكينا عنه.. ده غير موجة الهجرة الضخمة لليهود الروس بعد انهيار الاتحاد السوفييتي.. اللي كتير منهم كانوا كفاءات علمية ثقيلة يعني.. و كمان اتفاقية أوسلو للسلام سنة ٩٣.. هممم.. يكونش الموضوع صدفة؟.. يعني ضربة حظ خلت كل الظروف دي اتجمعت مع بعضها فخدمتهم؟.. طب افرض الظروف دي اتغيرت.. القصة دي كلها هاتنزل على فاشوش و تنهار؟؟ تعالوا نشوف..

{تعاشب شاي}(904) ما لقيصر لأبلح.. و ما لله لأبلح برضه!

https://youtu.be/Obpll0qjIGg

يقال والعهدة على الراوي ، إن مارادونا اللاعب الأرجنتيني المعروف، قال إني روحت مرة الفاتيكان وبصيت على السقف ، لقيته متزين بالدهب وسمعت البابا وهو بيتكلم عن الفقر والفقرا.. تبا للجحيم ، طب ما تبيعوا السقف !!.. وبصرف النظر عن حقيقة التصريح من عدمه..السيسي قرر يستقطع من ارض العاصمة الإدارية مساحة 15 فدان يعني حوالي 63 الف متر مربع..عشان يبني اكبر كاتدرائية في الشرق الأوسط بتكلفة خيالية وتصميم عالمي ، ويروح يفتتحها بنفسه في عيد الميلاد ،عشان يهني صديقه الانتيخ البابا تواضروس بالصرح العظيم ده..اللي هيبقى زيه زي كل كنيسة في مصر، تسري عليه شريعة المسيحيين والوصايا الخاصة بالتبرع المختلفة زي البكور والنذور والعشور ..ومؤخرا بقى بعد ما نظام السيسي قرر رفع صناديق التبرعات من الجوامع ، وتقنين أوجه صرف الصدقات والزكاة.. لدرجة إن بعض الشيوخ وعلى رأسهم المفتي، أجازوا التبرع بالزكاة للصناديق السيادية..هنا يظهر كام سؤال ، بعد ما بقى مصير الفقرا والمستحقين للصدقات المسلمين في أيد النظام ..طب بالنسبة للفقرا والمحتاجين من المسيحيين !!..

{الحراق}(125) خاشقجي في أوكرانيا Mr. Jones

https://www.youtube.com/watch?v=XQATcNhzCcU&list=PLBsIgVvbrncBJbmFFzhjJfzK9aLoMuouz

فلاح أوكراني قاعد في البيت مع مراته سنة ١٩٣٢... ولنفترض ان اساميهم هي.. نيكولاس والكساندرا.
البلد فيها مجاعه بقالها شهور!
نيكولاس والكساندرا مدخلش بطنهم أكل من أسبوعين.. نظرهم ضعف.. وحركتهم بقت صعبة وبتعمل ألم في المفاصل.. لأن جسمهم بيتغذي على نفسه.
هم عارفين كويس ان خلال الأربعة وعشرين ساعة الجايين روحهم هتطلع لو مكلوش أي حاجة.. وعارفين برضه إنهم مش هايلاقو حاجة تتاكل.. ومش هيبقو اول ناس تموت من الجوع!
ولا رقم ألف..
ولا رقم مليون..
هم مجرد رقم مجهول ضمن أكتر من ٣ مليون أوكراني ماتو في المجاعة اللي ستالين رئيس الاتحاد السوفيتي عملها بشكل (متعمد) في أوكرانيا في اول التلاتينات.

{الأسبوع ف كيس}(301) ماتبس بقى!

https://www.youtube.com/watch?v=p-5isCOZCzQ&list=PLBsIgVvbrncAeJMvwCpzZg-ow581Oh13M

السيسي الاسبوع ده الظاهر ميزانية البيت عنده كانت متأثرة بعملية هتك عرض الجنيه الأخيرة ، فمقدرش يجدد باقة النت، ومقعدش كعادته يلعب على الفيس بوك وتويتر، يتابع رأي الناس فيه هو شخصيا ، وفي العيش والعيشة واللي عايشنها..وفي الشركات اللي صفاها والأسعار اللي غلاها.. فسأل واحد من معاونيه: هي الناس بتقول ايه عشان مش متابع يا محروس؟ ..والظاهر إن محروس قالك ده مجنون لو رصيت له ربع الشتايم والدعا عليه ممكن يرميني في السجن .. فقال له وحياة شرفك يا زعيم الناس بتشكرك..السيسي قال له ايه ده؟.. احنا هنهرج لا شكر على واجب دي أقل حاجة عندي ..انا هطلع ابستفهم على الكلام ده..
اللي عايز يشكرني يخلي باله من مصر .. وانا من هذا المنبر بقولك والله ياريس مش بأيدينا..مفيش ما يمنع أننا نخلي بالنا من مصر وفي نفس الوقت نشكرلك..الشعب كله بيشكرلك..بنشوف نتايج الإصلاح الاقتصادي بنشكرلك..بنشوف وشك بس لا إراديا بنلاقي نفسنا بنشكرلك..ده احنا بنشكرلك وبنجيب ناس تشكرلك

{تعاشب شاي}(905) إسرائيل تجمعنا

https://www.youtube.com/watch?v=DsIFhzDJM3w&list=PLBsIgVvbrncB0M8dlzAbvjl79Nu8v_BW4

"لا لكلمة مستحيل! هذا المشهد بأعلام عربية بجانب علم إسرائيل وأمريكا في واجهة فندق " كِدما " في " سديه بوكير" الذي يستضيف قمة النقب على بعد خطوات محدودة فحسب عن المكان الذي يرقد فيه مؤسس الدولة العبرية دافيد بن غوريون وعقيلته باولا "!
ده نص تويتة لوزارة الخارجية الاسرائيلية ، بمناسبة المولد اللي داير هناك على هامش الاجتماع بتاع وزراء خارجية مصر و الامارات و البحرين و المغرب مع وزير الخارجية الصهيوني في الارض المحتلة في حضور وزير الخارجية الامريكي !الصور و التغريدات الصادرة عن الاجتماع ده حاجة اخر مسخرة ممكن تتصورها !
المسخرة دي بقى ، هدفها ايه ؟
و هل خلاص بقت اسرائيل هي محور المنطقة ؟
و ايه اللي البهوات بتوع التطبيع الفج ده منتظرين انهم يستفيدوه من كده ؟
و هل فعلا هيستفيدوا ؟

{تعاشب شاي}(906) ماتيجي تبيعني احسن!

https://www.youtube.com/watch?v=Sflp4KR8iMI&list=PLBsIgVvbrncB0M8dlzAbvjl79Nu8v_BW4

لما تتابع الاخبار اليومين دول تحس ان الامارات شغالة بكل طاقتها ، لسبب ما ، في شرا كل اللي تقدر تشتريه في مصر . شركات من كل نوع : اسمدة و نقل و زراعة و صحة ، و بنوك و شركات اوراق مالية !
تحس انها عاوزة تلحق الشركات دي قبل ما تخلص !
الامارات عاملة بالظبط زي محمد صبحي في المشهد الشهير من مسرحية الهمجي : اشتريه يمكن يغلى !
الفرق الوحيد بين الواقع و بين المشهد هو ان كل حاجة بتشتريها الامارات في مصر هي فعلا غالية و شغالة و بتكسب كويس جدا !
يعني الامارات عارفة كويس هي بتعمل ايه و بتختار كويس اللي بتشتريه !
الاقبال الاماراتي على شراء اي حاجة و كل حاجة في مصر ليه كذا شق او جانب ، سياسي و اقتصادي ، لكن من اهم الملامح الاقتصادية ليه هو انه بيستحوذ على حصص كبيرة في شركات وبنوك رئيسية بالنسبة للبورصة المصرية .
هل لده هدف سياسي ؟
و ليه الامارات مهتمة قوي كده بشرا الشركات المؤثرة في البورصة بالذات ؟

{تعاشب شاي}(907) الاستبداد خسرنا بلاد

https://www.youtube.com/watch?v=7ur5y4bCNQ0&list=PLBsIgVvbrncB0M8dlzAbvjl79Nu8v_BW4

فيه ناس كتير متخيلين ان الاستبداد السياسي مبياثرش عليهم و علي حياتهم في اي حاجة .. و يقولك هي الاحزاب والبرلمانات و احترام الدستور و الديمقراطية و الكلام الكبير ده هايفيدني بايه و لا هاياثر علي حياتي اليومية و شغلي و لقمة عيشي من انهي اتجاه .. هو لو فيه تداول سلطة في البلد هايعينوني رئيس جمهورية مثلا .. بس الي الناس دول مش عارفينه .. ان غياب الديمقراطية ده لوحده .. كفيل انه يبوظ حياتك من اولها لاخرها .. و يفضل يطلع يجرى وراك طول عمرك لحد ما ياخد الي معاك كله و يسيبك ملط .. ايوه التاريخ هو الي مأكدلنا كده بنفسه !

{ساس يسوس}(95) الفيل في الصندوق

https://www.youtube.com/watch?v=kkgKf6R-rQ4&list=PLBsIgVvbrncC_hFoIcgf8_NyqLkF1nkba

واتكلمنا فى الحلقة اللى فاتت عن الانتخابات، وإزاي ممكن تكون فرصة مهمة عشان توصل للكرسي لكن فرصة أهم عشان تفضل مكمّل عليه، يعني مهما دلّعت محاسيبك ورجالتك هتفضل محتاجها ومحتاج تظبط الناس لغاية ما توصل لميعادها، لكن لو معملتش ده ونسيت الناس لحد ما السكينة سرقتك فساعتها هتحتاج خطة بديلة تخليك تلغي خطوة الانتخابات دي خالص من دماغ الشعب.
وجرينا معاكم بالأحداث وشوفنا إيه أهم خطوات الخطة البديلة دي: ما بين اختيار كومبارس تحكم من خلاله، أو تعديل الدستور على مزاجك ومدّ فترة الحكم عشان متحتاجش انتخابات أصلًا، أو تعمل استفتا نتيجته تخليك مكمل للأبد، أو بدل ما الشعب ينتخب تخلي البرلمان والحزب بتوعك هما اللى ينتخبوك كل مرة، أو تعلن الطوارىء وتستغل البيروقراطية والروتين اللى فى بلدك عشان تطلّع عينهم لحد ما تعمل انتخابات.
وخلونا النهاردة نكمل معاكم بقية الحكاية ونشوف إيه اللى يحصل بقى لو اضطريت خلاص للانتخابات ومابقاش منها مفر، هتعمل ايه وهاتوجّه الرأي العام إزاي

{تعاشب شاي}(908) رئيس من فيلم كارتون

https://www.youtube.com/watch?v=fAj0PntwKXs&list=PLBsIgVvbrncB0M8dlzAbvjl79Nu8v_BW4

الدول العربية ، في اختيار حكامها ، ياعيني عاملة بالظبط زي نموذج بنشوفه كتير في الدراما المصرية ، اللي بتحكي عن الاحياء الشعبية و البلطجة اللي بتحصل فيها ، ، لما يجيبلك بنت غلبانة ، حلوة شوية ، بس كل الي بيتقدمولها عشان يتجوزوها عيال شمال و شمامين كولة ومدمنين مخدرات ، و ظروفها بتخليها محتاجة تتدارى في ضل راجل !
بتضطر البنت دي انها تختار احسن الشمامين او اقل المنحرفين !
اللي في الاخر بيبهدلها و يطلع عينها و يكفرها في عيشتها !
الاستثناءات في حالة الخيارات المطروحة على الشعوب العربية عشان تختار حكامها قليلة جدا للاسف ، و النتيجة بتكون كارثية !
و من اكبر و اوضح النماذج على اللي احنا بنقوله ده ، الاستاذ الدكتور البروفيسير بتاع القانون الدستوري ، برنس الليالي ، قيس سعيد بتاع تونس !
نموذج كده غريب و فانتازي او ممكن تقول " سريالي " !
حاجة كده محتاجة ورشة من كتاب الدراما عشان تحلله و تطلع لنا نموذج من القطعية بتاعته !

{تعاشب شاي}(909) و ضاع الغاز يا ولدي!

https://www.youtube.com/watch?v=UCu55aPjmWc&list=PLBsIgVvbrncB0M8dlzAbvjl79Nu8v_BW4

الدول بتحارب بعض ، و تحتل بعض، و تدمر بعض، و تتآمر على بعض، عشان تستولي على ثروات بعض !
يبقى البديهي و المنطقي ان الدولة اللي ربنا مديها ثروات طبيعية تعمل اقصى ما في وسعها عشان تحمي ثرواتها و تستثمرها افضل و اكمل و اعلى استثمار عشان تحقق اعلى مكاسب !
ده الطبيعي و المنطقي !
لكن بما اننا في مصر ماشيين عكس المنطق !
و بما ان السيسي مش بيحب دراسات الجدوى !
و يعمل ايه التعليم في وطن ضايع ، ولو مش ضايع احنا هانضيعه !
بما ان كل ده موجود، فمصر هي الدولة الوحيدة في العالم اللي بتفرط بمنتهى الثقة و الجدارة في ثرواتها من الغاز الطبيعي !
و هي الدولة الوحيدة في العالم اللي بترجع تستورد غاز من عدوتها اللي هي اسرائيل !
و هي الوحيدة في العالم اللي بتعمل اتفاقيات مع عدوها التاريخي عشان تديله الحق في انه يمنعها من استغلال مواردها من الغاز !
ازاي كل ده بيحصل ؟

{تعاشب شاي}(910) شيلوا الميتين اللي هنا!

https://www.youtube.com/watch?v=GmJas4qA9lQ&list=PLBsIgVvbrncB0M8dlzAbvjl79Nu8v_BW4

لو فيه حاجة مرتبطة بالسيسي من لحظة ظهوره في المشهد المصري، فهي استهتاره بالموت و عدم احترامه ليه ولا لحياة الناس و ارواحهم !
معروف طبعا ان السيسي وصل للحكم على الاف الجثث يمين وشمال ، معارضين على مؤيدين على عسكريين على شرطة . كل انواع الموت و كل اشكاله كانت و مازالت حاضرة في مشوار السيسي وحكايته معانا !
بس الغريب واللافت هو ان حتى جثث الاموات مبتسلمش من استهتار نظام السيسي و اجرامه حتى و هي بلا روح ، و بعد ما بقت في عالم الغيب ، و كل االلي فاضل هو انه يتصلى عليها عشان تتدفن و تنتهي آخر علاقة ليها بالعالم !
و اذا كان نظام السيسي قتل ناس كتير ، فهو كمان منع العزاء والصلاة على ناس كتير !
و آخرهم كان نقيب المحامين رجائي عطية اللي توفي من كام يوم !
ليه نظام السيسي مستهتر بموت الناس حتى وهم جثث في التوابيت ؟
و ليه بيمنع الصلاة على كتير منهم ؟
و ايه علاقة ده بالسياسة و الامن ؟
و ليه بيتساوى في ده المؤيد و المعارض ؟!

{تعاشب شاي}(911) في الأول جرترتك

https://youtu.be/MtENbIksrDM

في يونيو 67 حصلت الحرب المشؤومة بين مصر و الكيان الصهيوني ، اللي نظام عبدالناصر وقتها حب يخفف وقعها على الناس و سماها نكسة . النكسة دي بلعت كل سينا ، و كل الجولان في سوريا ، و بقية فلسطين اللي مكنش الصهاينة لسة احتلوها !
الست سنين اللي بعد 67 مصر اعادت بناء جيشها و حاربت في 73 و حررت سيناء بعد مفاوضات طويلة وشاقة مع اسرائيل .
و من السبعينيات اتغيرت تماما اللغة اللي القيادة المصرية كانت بتتكلم بيها عن اسرائيل ، من " العدو " و " هنرميهم في البحر
" الى " السلام " و " السلام العادل " و بعد كده " السلام الدافيء" !
و وصلنا لمرحلة ان وزير خارجية مصر سامح شكري يزور بيت نتنياهو في القدس و سهر معاه و حضر معاه ماتش كورة !
و من كام يوم ، سامح شكري نفسه راح اجتماع في منطقة " النقب " بالقرب من قبر بن جوريون مؤسس اسرائيل ، مع 3 وزراء خارجية عرب تانيين ، ومعاهم وزير خارجية اسرائيل و وزير خارجية امريكا !

{الحراق}(126) الثور في الفصل.. Lunana: A Yak in the Classroom

https://www.youtube.com/watch?v=2O7ME-0NEi8&list=PLBsIgVvbrncBJbmFFzhjJfzK9aLoMuouz

مدرِّس شغال في الحكومة، بيتبعت لقرية بعيدة مفيهاش لا كهربا ولا طرق ولا مباني عشان يدرِّس لأطفال في أولى ابتدائي.
الغريب ان القرية مفيهاش مدرسة أساسا.
امال هيشتغل ازاي؟!
هيشتغل في أوضة مبنية بالطين، وفيها كراسي خشب قديمة.. وترابيزتين مكسرين.
وبما ان مفيش سبورة...فهايكتب على الحيطة بالفحم.
بعد كم يوم أهل القرية بيلاقو ان عندهم "طور" كبير في السن مش عاوزين يوقفوه في البرد، ومش لاقييـنله مكان يعيش فيه، فبيقوموا حاطينه في الفصل.
يعني المدرس بيبقي شغال في مكان تقدر تقول انه زريبة.
القرية اللي بتدور فيها الاحداث دي هي قرية حقيقية... اسمه "لونانا"
والفيلم اسمه بالكامل:
"لونانا: الطور في الفصل"!Lunana: A yak in the classroom

الياك ده هو نوع من التيران الجبلية بيسموه "طور التبت"!
الفيلم من انتاج دولة صغيرة جدًا مساحتها واحد على تلاتين تقريبًا من مساحة مصر، وعدد سكانها ٧٥٠ الف نسمة بس، يعني أقل من عُـشر سكان القاهرة.