{تعاشب شاي}(881) هاتي فانوسك ياختي يا إلهام

https://youtu.be/SjKfWAF3S9Q

من يوم ما وعينا على الحياة في مصر واحنا بنستنى من السنة للسنة شهر رمضان ، شهر الصوم والعبادات والتقرب من الله وقراءة القرآن ..بمظاهره بقى سواء الدينية بالتراويح واعتكاف العشرة الاواخر منه وصلاة التهجد، أو مظاهره الشعبية التراثية زي الزيارات وعزومات الفطار ، المسحراتي ومدفع الإفطار ، القطايف والكنافة وتعليق الزينة وشرا الفوانيس ، وغيرها كتير من الحاجات اللي التراث المصري مليان بيها.. على ناحية تانية خالص بقى ، حصل استحداث جديد لمظاهر تانية معرفش امتى تحديدا ، ومين اللي خلاها صفة ملازمة للشهر ده .. وهي أنه بقى موسم للتنافس الإعلامي ، وفي القلب منه الدراما ومحتوى الترفيه عموما.. ايام ما كنا غلابة بقى من غير استقطاب ورسايل موجهة.. كان الإنتاج الدرامي كام مسلسل من انتاج قطاع الإنتاج باتحاد الإذاعة والتليفزيون، على كام فزورة على برنامج كاميرا خفية خفيف كده ..طبعا مسلسلات تاريخية ودينية كان موضوع مفروغ منه ، زائد مساحة كبيرة للبرامج الدينية ..بديهيات يعني انت في شهر رمضان حتى لو كان بيحكمك مبارك ومخابرات مبارك..

{تعاشب شاي}(882) حاربوا الغلاء بالاستغباء

https://youtu.be/UN2QdmN1oxY

الحقيقة ان انجازات و مشاريع سيادة الريس السيسي كتير جدا و متتعدش .. و علشان نلحق نتكلم عنها محتاجين كل دقيقة في عمرنا و بردو مش هيكفي .. علشان كده احنا متعودين ان الاخوة الاعلاميين الشرفاء المطبلاتية بتوعنا .. مبيعملوش حاجة في برامجهم الا انهم يتكلموا عن الريس و انجازاته الي مالية حياته .. بس من كام يوم كده .. لقينا الاعلاميين دول بيعملوا حاجة جديدة . .. و بيتكلموا عن موجة زيادة الاسعار الي شغالة اليومين دول و معاناة المواطنين معاها .. بس للاسف لما جم يحكوا عن معاناة المواطنين اتلخبطوا و قاموا حارقين دم المواطنين من غير ما ياخدوا بالهم .. طيب يا اعلاميين متشكرين اوي كتر خيركم علي كده .. يا ريت تسيبوا المواطن في حاله بقي و ترجعوا تتكلموا عن انجازات السيسي زى زمان .. اهي دى كده كده محدش بيشوفها و لا بيشوفكم انتوا كمان فعادي يعني مش فارقة

{عرفوه بالعقل}(53) نسمع أغاني ولا لأ؟

https://youtu.be/wMwLcSh5aRw

طيب.. استعرضنا أدلة التحريم في المسألة من الكتاب و السنة.. و فندناها و أثبتنا خطأ الاستدلال بيها.. يا اما بسبب ضعف الأدلة.. أو عدم دلالتها على التحريم أصلا.. و اكتشفنا ان مافيش إجماع على التحريم أصلا.. و شفنا آراء الأئمة الأربعة و انهم ماحرموش الموسيقى ولا الغناء.. و شفنا الصحابة و التابعين و تابعي التابعين استمعوا للغناء و الموسيقى عادي..
طيب.. نطلع من ده بإيه بقى؟
تعالوا نشوف..

{تعاشب شاي}(883) يا خراب بيتك يا برهوفيطش!

https://www.youtube.com/watch?v=_X07qi9gebo&list=PLBsIgVvbrncB0M8dlzAbvjl79Nu8v_BW4

تخيل تبقي راجل ملياردير اد الدنيا ..و بتلعب بالفلوس لعب .. و عمال تتنطط ليل نهار بين قصورك و يخوتك و طياراتك و شركاتك و الاندية الي بتمتلكها .. و مرة واحدة تلاقي رئيس دولتك جاله مزاج يهجم بجيشه علي دولة تانية و يحتلها .. يقوم العالم كله يمسك فيك انت .. و ينزل فيك شتيمة .. و يصادر ممتلكاتك و يتحفظ علي كل اموالك .. و ميسيبش معاك فلوس تكفي علشان حتي تجيب بيها فنجان قهوة تقعد تشربه و انت بتفكر في مصيبتك .. ده بالظبط الي حصل مع الملياردير الروسي رومان ابراموفيتش بعد حرب اوكرانيا .. فلوسه ضاعت و حياته اتبهدلت و بقي منبوذ في الدنيا كلها .. يعني غالبا ابراموفيتش ده لو كان هو الي بينضرب بالصواريخ و المدافع مش اوكرانيا .. مكانش هينضر و يتخرب بيته للدرجة الي هو فيها دلوقتي دى!

{تعاشب شاي}(884) في ماسبيرونا شوال رز!

https://youtu.be/d7ri5GpCw18

في وقت فيه تعتيم شبه كامل او معلومات مضللة من إعلام المخابرات على المظاهرات والاحتجاجات اللي في مبنى ماسبيرو العريق ، اللي يعتبر إعلام الدولة الحكومي ووسيلة إعلامها الرسمية لسنين طويلة، واللي بيضم جواه بعد عمليات التسريح والمعاش اكتر من 32 ألف.. ما بين موظفين وعمال وفنيين ومهن إعلامية مختلفة .. ومجرد الإشارة لموضوعهم اللي داخل على شهرين، وله خلفيات بقالها أربع سنين، كانت إشارة على أنها شوية احتجاجات محدودة على نظام البصمة، اللي حطته الوطنية للإعلام لتنظيم عملية الحضور والانصراف وعمل تكدس وزحمة.. لكن الحقيقة، واللي مبيجيبش سيرتها إعلام السيسي وعارفها كل متابع على السوشيال ميديا، بيشوف الفيديوهات واللايفات اللي بتطلع من جوه المبنى.. إن الموضوع له أبعاد تانية وحوارات شابكة في بعضيها، أكبر بكتير من مجرد تصوير الموضوع على أنه احتجاجات لموظفين عايزين يزوغوا من البصمة.. خلونا نقرب شوية من الحكاية ، ونحاول نعرف الخيوط اللي واصلة بين ماسبيرو والمخابرات والمتحدة ..وهل للسعودية عن طريق شوالها المتحرك تركي آل شيخ..

{تعاشب شاي}(885) مين السبب في السد؟!

https://youtu.be/_mTfKcjCpKY

لما عرفنا ان فيه وثائق بريطانية ظهرت.. بتكشف عن الخلافات التاريخية الي كانت بين مصر و اثيوبيا .. و تاثير الخلافات دى في ازمة سد النهضة .. مهتميناش اوي و لا حطينا الموضوع في دماغنا .. لاننا فاهمين كويس جدا .. ان السبب الحقيقي في مشكلة سد النهضة .. مش الخلافات القديمة بين مصر و اثيوبيا .. و لا ان السيسي مضي بايده الشريفة علي اتفاقية المبادئ و ادا لاثيوبيا شرعية بنا السد .. لا خالص .. كل ده كلام فارغ و مياكلش معانا و مالوش اساس من الصحة .. السبب الوحيد الي ورا بنا السد .. هو ثورة يناير .. منها لله بقي .. هي الي خلت مصر تكشف ضهرها و تعري كتفها و اثيوبيا تبني سدها .. ايوه سيادة الريس السيسي هو الي مأكدلنا الموضوع ده بذات نفسه !

{تعاشب شاي}(886) ازرع شوارع.. اقلع بنى آدمين

https://www.youtube.com/watch?v=U6Dv_hSCJZU&list=PLBsIgVvbrncB0M8dlzAbvjl79Nu8v_BW4

من ايام مبارك ، و من قبله السادات ، و الدولة بتعتبر اي كوبري او طريق فرعي تعمله ، في اي قرية ولا مركز في مصر ، بتعتبره انجاز قومي ويروح الرئيس بنفسه يفتتحه و يتعمل له اغاني ، و التليفزيون ينقل الافتتاح ع الهوا و حاجة اخر هيصة !
بعد شوية الطرق كبرت و بقت محاور .
و المحاور طلع لها كباري .
لدرجة انك تحس ان فيه حد ماسك علبة مليانة كباري و عمال يكب في البلد من غير حساب ولا خطة !
و بعد مبارك ، السيسي كمل في حوار معايرة الناس باي كوبري يتعمل ولا اي طريق يفتتحه ، بل ان السيسي أفور جدا في موضوع الطرق و الكباري ده و من كترها متعرفش هي كلها مفيدة كلها ؟ ولا افادت ناس و اضرت ناس ؟
و هل كلها كان ليها لزوم ؟ ولا فيه طرق وكباري اتعملت لزوم الفشخرة بس ؟
و هل الاماكن اللي اتعملت فيها الطرق و الكباري دي فعلا استفادت منها و عادت عليها بالخير زي ما السيسي واعلامه بيغنوا علينا ؟ ولا فيه طرق وكباري اضرت المناطق اللي اتعملت فيها !

{تعاشب شاي}(887) شنب الغلابة!

https://youtu.be/iCkCeqFc4no

الكاتب الكندي آلان دونو في كتابه نظام التفاهة ، بيوضح ازاي ان النظام العالمي عشان يتحكم في الشعوب ، ويقتل في المهد كده أي قيمة للتفكير والإرادة الحرة ، والبحث عن حلول حقيقية للمشاكل..مابيعملش حاجة غير أنه يقلل ويسخف في عين الناس كل حاجة ، ويوجه إحساسهم وادراكهم للتفاهات والمواضيع السطحية ..يصدر في كل نواحي الحياة التفاهات والتافهين للمشهد..كل حاجة تبقى سطحية وقشور ..علم ثقافة سياسة ، اقتصاد وفن..يفتت كل فكرة أصيلة سياسية أو اجتماعية لحتت صغيرة ..فتتوه الفكرة نفسها ، فيخلي الشعوب واحدة واحدة تستحسن الرداءة والجهل..ويسيبهم يتفاعلوا معاه كمان ، عشان يحسوا أنهم لهم رأي وقناعات ، وردود فعلهم مهمة وليها اعتبار وتأثير ..وفي مصر بقى وعلى صغير كده ،ومن بعد الانقلاب على الملك فاروق.. كان الظباط الاحرار بقيادة الزعيم عبد الناصر اول اللي لقطوا خيط التفاهة ، وقرروا أنه يبقى اسلوب حياة ..وعمموا فكرة سيطرة التافهين وصعود قواعد الرداءة والانحطاط ، وتهميش واستبعاد أي قيمة محترمة من المشهد ..وكانت لهم صولات وجولات في مرحلة فرز نجوم الفن ..

{تعاشب شاي}(122) مكروباظ آدم The ADAM Project

https://www.youtube.com/watch?v=5Pd0jVrtX-k&list=PLBsIgVvbrncBJbmFFzhjJfzK9aLoMuouz

فيه دراسه اتعملت في جامعه هارفارد، استمرت لمدة ٧٥ سنة.. ابتدت سنة ١٩٣٨... وفضلت لحد 2013.
الدراسة دي كانت بتحاول تجاوب علي سؤال واحد.. وهو.. "ايه اللي بيخلي حياة الناس اسعد وأفضل؟"
وده لأننا لو سألنا الناس في نهاية حياتهم عن ذكرياتهم.. غالبًا بيدونا إجابات مش معبرة عن الواقع اللي عاشوه فعلاً... لازم ندرسهم بنفسنا عشان نعرف حصل ايه في حياتهم فعلاً!
الدراسة ابتدت على عدد ٧٢٤ مراهق من أماكن مختلفة وظروف مختلفة.. الخ.. وفضلت تتابعهم لحد ما..إما ماتو.. او بعضهم عاش لحد ما عدا التسعين سنه.
وأخيرًا .. سنة ٢٠١٦ الرئيس الرابع للبحث ده.. واللي اسمه الدكتور Robert Waldinger
عمل محاضرة في سلسلة محاضرات تيد TED المشهورة.... وقالنا علي نتيجة البحث.
البحث اللي درس سنين طويلة من حياة البشر، دراسة علمية دقيقه، عشان يقولنا سر السعادة في الحياة!
قبل ما اقولهالك خليني اسئلك سؤال بسيط:
لو تخيلنا ان بقى عندك القدرة على انك تسافر للماضي.. وتغير أي حاجة.. هاتغير ايه؟!

{تعاشب شاي}(888) هو ده بايضن.. هي دي الرنة!

https://www.youtube.com/watch?v=bXRFF7hs5J0&list=PLBsIgVvbrncB0M8dlzAbvjl79Nu8v_BW4

في ظروف الولعة اللي فيها العالم دلوقت بسبب حرب اكرانيا و روسيا ، فيه سوق كبير منصوب للمزايدة و البطولة كله بيحاول يدخل يعرض بضاعته فيه عشان ياخد اللقطة .
ابرز لقطة صاحبها حاول ياخدها بس ردت في وشه هي لما تم تسريب اخبار بتقول ان محمد بن سلمان رفض استقبال مكالمة من الرئيس الامريكي بايدن ، و الخبر انتشر و كان بن سلمان على وشك انه ياخد اللقطة بس الامريكان ماخلهوش يتهنى بيها !
اللي خلى بعض الناس تصدق ان ممكن يكون بن سلمان فعلا رفض انه يتكلم مع بايدن ، هو ان فيه كلام عن خلافات بين السعودية و الامارات من ناحية، و امركيا من ناحية تانية حوالين زيادة انتاج البترول ، لتعويض الغرب عن النفط و الغاز اللي بييجو من روسيا !
بس هل فعلا بن سلمان رفض انه يكلم بايدن ؟
و هل بن سلمان اصلا يقدر يعمل كده ؟
و ايه خلفيات الكلام ده ؟
و هل ممكن فعلا السعودية ممكن تختلف مع امريكا خلاف بجد ؟

{تعاشب شاي}(889) أبو شقة انهزم يا مِنز

https://www.youtube.com/watch?v=Vq8loBovsPE&list=PLBsIgVvbrncB0M8dlzAbvjl79Nu8v_BW4

يوم الجمعة 11 مارس .. مصر كانت علي ميعاد مع ظاهرة كونية نادرة مبتحصلش ابدا .. و هي ان فيه انتخابات اتعملت و خلصت و محصلش فيها تزوير .. و مش عرس انتخابي واحد الي متزورش . لا دول لامؤاخذة عرسين .. انتخابات حزب الوفد الي سقط فيها ابو شقة حبيب السيسي .. و انتخابات نقابة المهندسين الي وقع فيها هاني ضاحي الوزير السابق وصديق الدولة الانتيم .. و بعد ما نتايج الانتخابات ظهرت فيه علماء كتير اوي حاولوا يفسروا الظاهرة دى و يفهموا أسبابها .. هل مثلا سلطات الدولة في اليوم ده صحيت متاخرة و ملحقتش تروح تزور الانتخابات .. و لا علشان الانتخابات اتعملت يوم الجمعة فالتزوير كان قافل .. و لا ايه الي الحكاية بالظبط

{تعاشب شاي}(890) العيش.. مصلحتك أولاً!

https://www.youtube.com/watch?v=WBr2H0bmJHU&list=PLBsIgVvbrncB0M8dlzAbvjl79Nu8v_BW4

في مصر دلوقت فيه دراما سودا بتحصل في اهم واخطر ملف يتعلق بحياة المصريين بعد ملف المية و سد النهضة .
الدراما او الكارثة دي تتعلق بملف " العيش " .
الخبز يعني . .
و الخبز يعني القمح.
مهزلة بتستهدف تدمير القمح ، في وقت العالم كله بيتسابق على التفكير في حلول لاخطر ازمتين بيواجهوه بسبب الحرب الاكارنية الروسية : ازمة الغذاء و ازمة الطاقة .
العالم كله بيبحث عن حلول .
و في مصر النظام بيزود المشاكل !

ايه اللي بيحصل في ملف القمح في مصر؟
و ازاي الامور متجهة لكارثة اكبر حتى من كل اللي بتسمع عنه في الاخبار ؟

{تعاشب شاي}(891) علمني العوم و النبي يا احمد!

https://www.youtube.com/watch?v=A2zrcTUrh1o&list=PLBsIgVvbrncB0M8dlzAbvjl79Nu8v_BW4

بعد 8 سنين من حكم السيسي ، اتسخرت ليه خلاله كل ادوات و اجهزة و موارد و خزاين الدولة، الناس مش بس اكتشفت ان الوضع الاقتصادي في مصر محلك سر ومفيش اي تقدم من اي نوع في اي حاجة ، لا ، ده الوضع بقى عامل زي السيارة اللي بترجع للخلف من فوق جبل . و كالعادة اللي بيدفع التمن هو المواطن البسيط المفحوت من سياسات السيسي على مدار السنين اللي فاتت . و الحلول اللي بتظهر دايما هي حلول هتزود الطين بلة وتزود المواطن فشخ !
و من ضمن الحلول او الافكار اللي بيطرحها الاقتصاد الراسمالي دايما ، تعويم العملة . او تعويم الجنيه في حالة مصر .
و بينقسم الناس لمجموعتين ، مجموعة عادة بتكون موالية للسلطة، شايفة ان تعويم العملة هو الحل ، و مجموعة تانية شايفة ان تعويم العملة هو اصل المصايب !
هو ايه حوار تعويم العملة ده ؟
و هل هيفيد في حالة مصر؟
و هل فيه اي حل اقتصادي ممكن ينفع في مصر طول ما السيسي موجود و بيدير الامور بنفس السياسة المالية العجيبة ؟

{الحراق}(123) التار ولا العار.. The BATMAN

https://www.youtube.com/watch?v=pND7acbpwuw&list=PLBsIgVvbrncBJbmFFzhjJfzK9aLoMuouz

أثناء ثورة ٢٥ يناير، داخلية مبارك فتحت السجون وانسحبت من الشوارع، عشان تنشر الفوضى والفزع بين الناس، وحصل ان كذا منشأه مدنية تم اقتحامها زي "اركيديا" مول في وسط البلد" وهايبر ماركت كارفور، وبعض محلات الصرافه, وغيرهم الخ!!
ده بيحصل في كل الثورات، وكل أوقات غياب القانون، يمكن اللي حصل في مصر كان اقل كتير من اللي حصل في بلاد تانية، لأن الناس اللي كانوا في الشوارع في ثورة يناير، كان عندهم هدف فعلا! النهب حصل من ناس استغلت لحظة الفوضى، انما محدش من الثوار قالك طالما هنثور، يبقي بالمرة نعملنا مصلحة على جنب!!
في أمريكا اثناء المظاهرات المضادة للعنصريه في ٢٠٢٠ كان فيه حوادث نهب كتير جدًا... في المولات ومحلات التوكيلات سواء اجهزة الكترونية او حتي محلات هدوم ، حتي فيه فيديو مشهور لبنت وهي سارقه تورتة فراولة من مطعم حلويات..
ثورة بأه... محتاجين كالوريز عشان نكمل طريق الحرية للآخر!

{تعاشب شاي}(892) يغلبكم بالمال.. اغلبوه بالعيال!

https://www.youtube.com/watch?v=EKb4tiu3HP8&list=PLBsIgVvbrncB0M8dlzAbvjl79Nu8v_BW4

بالرغم من وجود قانون في مصر معمول بيه من فترة طويلة، بينص على إلزام المقبلين على الزواج بعمل كشوفات طبية معينة ، بتتم عن طريق اخد عينة دم وتحليلها لفحص الهيموجلوبين، وفحص نسبة فقر الدم والتهاب الكبد الوبائي ب أو ج ، ومرض نقص المناعة المكتسبة اللي هو الايدز..بشرط إن التحاليل دي تتعمل في فترة متقلش عن 3 شهور من المعاد اللي اتحدد للجواز ..لحد هنا والموضوع عادي ومتبع مع اختلاف التفاصيل في كل دول العالم، والغرض نفسه كإنساني واجتماعي نبيل ، ودينيا كمان فتاوي كتير من علماء وشيوخ اجازوه، لكن بشرط أنه يدخل ضمن نطاق المباح ميبقاش فرض وإلزام لإتمام الجواز من عدمه.. في أوائل شهر مارس بقى طلع علينا الإعلام بالاعلان عن مشروع قانون مقدمه النائب كريم طلعت السادات عضو لجنة الإسكان في البرلمان.. قانون سموه الفحص الطبي قبل الزواج وكأنه مش موجود اصلا..

{تعاشب شاي}(893) سمعنا سمعت الرعد!

https://www.youtube.com/watch?v=BgUaxXS7sSE&list=PLBsIgVvbrncB0M8dlzAbvjl79Nu8v_BW4

الغنا في مصر اتغير خالص عن ايام زمان .. و خصوصا الغنا الشعبي .. فين ايام ما كان المطرب من دول ياخدك من ايدك و يقعدك علي حجره كأنه ابوك بالظبط . و يفضل بقي ينصحك و يحكيلك حكم و مواعظ و يملي ودانك بأمثال شعبية و اقوال ماثورة علشان يعلمك الصح من الغلط و يرشدك للطريق المستقيم و يشربك الأخلاق بالمعلقة .. و لا بعد كده لما المطرب كان بينزلك من علي حجره و يقعدك جنبه و يفضل يحكيلك عن احزانه والامه و يشتكيلك من غدر الزمن و تمسكوا المناديل انتوا الاتنين و تقعدوا تعيطوا سوا .. دلوقتي بقي المطرب الشعبي في اغانيه لا بينصحك و لا بيشكيلك .. ده بقي بيفتح عليك المطواة و يثبتك اول ما يشوفك !

{تعاشب شاي}(894) شغلتك ع المدفع بوروروم؟

https://www.youtube.com/watch?v=dWGBEF-Oe1s&list=PLBsIgVvbrncB0M8dlzAbvjl79Nu8v_BW4

لما تبص على المظاهر و الاحتفاليات بتاعت الجيوش العربية، و شعاراتها واناشيدها ، و لما تبص على ميزانيات الدفاع وشرا الاسلحة اللي الدول العربية كلها تقريبا بتاكلها من قوت المواطن ولحمه الحي ، لما تبص على ده كله ، هتلاقي ان كل الحاجات دي المفروض انها تعمل جيوش كفء و قوية و خبراتها العسكرية كبيرة .
لكن لما تبص على واقع الجيوش دي، و كفاءة الفرد فيها مقارنة بغيره في الجيوش الغربية ، و لما تبص على اداءها في المعارك اللي بتضطر تخوضها – مع استثناءات قليلة – هتلاقي واقع الجيوش دي مختلف تماما عن المظاهر المحيطة بيها !
و لما تقرا تقارير مهنية محترفة بتقيم اداء و كفاءة الجيوش دي في الدوريات او المجلات العالمية المتخصصة ، هتلاقي ان صفة " انعدام الكفاءة " هي الاقرب دايما لوصف الجيوش العربية !
ايه اسباب التناقض ده بين مظهر الجيوش العربية و حقيقتها ؟
و ايه اسباب انخفاض كفاءة الجيوش العربية عموما ؟
و هل فيه علاقة بين الدور السياسي اللي بتلعبه الجيوش العربية ، وبين انخفاض او انعدام كفاءتها ؟

{الأسبوع ف كيس}(300) هل يضعه الدولار كله؟

https://www.youtube.com/watch?v=KE44AQZx-lU&list=PLBsIgVvbrncAeJMvwCpzZg-ow581Oh13M

الأسبوع ده وبعد اذن قيم الغرب وانسانيته اللي على الدواق، وبعد اذن كل شخصية عامة سواء حكام أو فنانين أو رياضيين عرب، فاكرين إن لهم قيمة ومركز وتأثير، وهما معندهمش جرأة أنهم يقولوا كلمة حق ، ولا استعداد لدفع تمنها..وبعد ما اكتشف الغرب إن الرياضة عادي طلع ليها علاقة بالسياسة..وأنه عادي إن كل رياضي يقول رأيه ويتعاطف ويتضامن مع ضحايا الحروب..فكان معادنا ومعادهم مع شاب مصري بطل من ابطال العالم في الاسكواش..
مسكوه الحديدة عشان يستغلوه في دعم المستضعفين في اوكرانيا ، ضحايا بوتين اللي مزاجهم يطلعوه مجرم مدام المصلحة تحكم أنه يتسمى مجرم.. والجدع مكدبش خبر ودعمهم فعلا ..بس استغلهم زي ما حاولوا يستغلوه ،وسمع العالم كله أنه فيه قضية ومعاناة لدولة تانية بشعب تاني اسمه الشعب الفلسطيني.. يختلفوا بس في لون البشرة والشعر والتسعيرة في سوق انسانيتهم المعذبة..

{تعاشب شاي}(895) علقنا الكهارب و انتو لأه!

https://www.youtube.com/watch?v=p2jqrcqPROc&list=PLBsIgVvbrncB0M8dlzAbvjl79Nu8v_BW4

في عز ما العالم كله مشغول بالحرب الي دايرة بين روسيا و أوكرانيا و الدنيا مقلوبة في كل حتة .. إثيوبيا راحت سهت الكل و اتسحبت من ورا ضهر المجتمع الدولي وأعلنت من كام اسبوع ان الحمد لله ربنا وفقها و بدات بشكل رسمي تولد كهربا من سد النهضة ..علي فكرة بقي يا اثيوبيا الي عملتيه ده مش رجولة .. مهو مينفعش تستغلي ان معالي الريس السيسي مشغول باخبار الحرب و مبينامش الليل من التفكير في رفع سعر رغيف العيش و تروحي تعملي عملتك دى لانك ضامنة انه لا فاضيلك و لا فايقلك علشان يمنعك …. انما عارفة بقي لو كان فايقلك ….مكانش هيعرف يمنعك و لا يعمل اي حاجة بردو عادي!

{تعاشب شاي}(896) أخويا هايص.. و انا لايص..

https://www.youtube.com/watch?v=hfm7s35tya8&list=PLBsIgVvbrncB0M8dlzAbvjl79Nu8v_BW4

بعد سنين امتدت من لحظة اندلاع الربيع العربي، و بعد فترة كبيرة من شكل محدد لتحالفات الشرق الاوسط ، اللي كانت واضحة و محددة و محفوظة ، و المحاور كانت مترتبة : قطر وتركيا و معاهم حركات الاسلام السياسي ، في مواجهة نظام السيسي و معاه السعودية والامارات !
بعد كل السنين دي ، و بعد ما المباراة فضلت دايرة بالشكل ده فترة كبيرة، ما فجأة ، و قبل حرب روسيا واكرانيا بحاجة بسيطة، الاماكن بدأت تتبدل ، و الكراسي اتغيرت، و التحالفات اتشقلبت !
تركيا صالحت الامارات ، و قطر صالحت السعودية والامارات و مصر ، و الوضع بقى زبادي خلاط على الآخر و بشكل مش مفهوم !
هو منين يودي على فين ؟!
و مين مع مين ؟
و الاطراف دي عاوزة ايه ؟
و مين من الدول دي اللي ممكن يطلع كسبان بعد حرب روسيا واكرانيا ، ده لو خلصت قريب !!

{تعاشب شاي}(897) معاييرك حمرة!

https://www.youtube.com/watch?v=j8gMk0P6bH0&list=PLBsIgVvbrncB0M8dlzAbvjl79Nu8v_BW4

الكلام عن ازدواجية المعايير في العالم كلام مش جديد .. مش محتاجين نثبت ان العالم عنده ناس أهم من ناس .. وأديان أروش من أديان .. وشعوب دمها أخف على قلبه من شعوب تانية .. وان معايير المساواة وحقوق الانسان المزعومة بالنسبة له مش واحدة .. وإن قيم العدالة والإنسانية والتحضر شغالة لصالح ناس وناس لأ .. كل دي بديهيات مش محتاجين نعيد ونزيد فيها .. وعشان كده .. مش غريب ان سياسات واحد زي مارك زوكربيرج مكمّلة على نفس الخط ..
يشوف ناس بتدافع عن أرضها يقول "امسك خطاب كراهية " .. "الحق الناس اللي بتحرّض على العنف دي" .. ده مش دفاع عن الأرض .. ده انتهاك لمعايرنا المجتمعية تستاهل عليه حظر ..
يشوف ناس تانية بتدافع برضه عن أرضها بس في منطقة تانية في العالم يقول "شوف الأبطال" بص الشهامة والرجولة؟ أهو هو ده الدفاع عن الأرض اللي أنا بحبه .. خود لايك.
طيب يا عم مارك .. إيه معاييرك في إنك تخذل دُوُل وتنصر دُوُل؟
الإجابة معروفة ..