{تعاشب شاي}(875) فلتبدأ الهنقر قيمز!

https://www.youtube.com/watch?v=mfcMH8MCTYg&list=PLBsIgVvbrncB0M8dlzAbvjl79Nu8v_BW4

المفروض يتحط بند إضافي في عقود العمل في مصر، في الشركات الخاصة، بيقول : في حالة تخلصك من حياتك أثناء ساعات العمل بسبب الفشخ الذي سوف تتعرض له ، مع من نتواصل من اهلك أو أصدقائك ؟!
و ده لان واضح ان الشركات الخاصة في مصر، او جزء مش قليل منها ، تحول لطريق سهل و سريع للآخرة!
الشركة من دول تتعاقد مع الشاب الغلبان من دول بمرتب ضعيف ميكفيش مواصلاته ، لانه محتاج الشغل و البلد حالها واقف . و تشغله ساعات عمل لا نهائية من غير اجازات و يلاقي نفسه شغال فواعلي عند مديره و قرد احيانا لازم يتنطط له عشان يرضى عنه .
و رغم ده كله بتطلع عينه و يلاقي النط من البلكونة في الآخر هو الطريق الوحيد لإنهاء القرف ده كله !
هو ايه اللي بيحصل في سوق العمل في مصر وصل البعض الموظفين لتفضيل انهم يخلصو من حياتهم على الاستمرار ؟
و ليه المناخ ده موجود اصلا ؟
و هل ممكن ينتهي ؟

{تعاشب شاي}(874) هذا أحبه.. و هذا أريده..

https://youtu.be/K6jPu9e3YhY

كلنا عارفين كويس اوي .. ان الحرب الي شغالة بقالها اسبوعين دى .. مش حرب بين روسيا و اوكرانيا و خلاص علي كده .. دى حرب بتقف فيها روسيا ضد امريكا و كل دول اوروبا .. و ده بيخلي معظم دول العالم محتارين و مترددين و مش عاوزين يتسرعوا و ياخدوا موقف واضح مع طرف ضد التاني علشان ما يندموش بعد كده .. طيب نعمل ايه في الورطة دى .. نقف مع الامريكان و نخسر الروس .. و لا نقف مع بوتين و نخسر امريكا .. و لا نقف مع الاتنين .. و لا نسيب الاتنين واقفين و نشوف حتة ناشفة نروح نقف فيها لوحدنا و لا نهبب ايه !

{الحراق}(121) علي بابا حرامي!

https://www.youtube.com/watch?v=RP1nqFHrXvM&list=PLBsIgVvbrncBJbmFFzhjJfzK9aLoMuouz

_ الحاجات اللي ممكن تفضل عايش تفاصيلها بشكل معتاد في حياتك اليومية، والممارسات اللي اتعودت تمارسها..الكلام اللي اتعودت تقوله ، الشارع اللي متعود تمشي منه .. الأفكار والقيم اللي اتربيت ونشأت عليها ، والعادات اللي مطالب طول الوقت بأنك تحافظ عليها.. كل دي بتندرج تحت بند اسمه التابوهات .. يعني المحظورات وغيرها من الحاجات اللي بيقدسوها وبيحرموا التعدي عليها..مع الوقت اتطور المفهوم ده وبقينا نسقطه على حياتنا الاجتماعية، وموروثاتنا التراثية والثقافية..وبقى فيه ثوابت بقى صعب الخروج عليها أو حتى مناقشتها..اللي هو من الآخر هذا ما وجدنا عليه أجدادنا ..اللي يحاول يفكر أو يناقش أو يرفض ويحاول يغير ، أو يقول رأيه في الثوابت والمسلمات دي ، الناس بتستغربه وتهاجم اختلافه ده ، وممكن تعاديه وتحاربه لو كانت وجهة نظره اللي بناها واقتنع بيها ، مخالفة للي فضل سنين راسخ في عقولهم ..

{تعاشب شاي}(876) الجهاد في سبيل بوتين

https://www.youtube.com/watch?v=ckcUbbX0y0c&list=PLBsIgVvbrncB0M8dlzAbvjl79Nu8v_BW4

اللي حضروا فترة التسعينيات و اوائل الالفينات ، غالبا هيفتكروا حرب الشيشان !
او عشان الدقة : حرب الشيشان الاولى و التانية !
و الاتنين كان الطرف الرئيسي فيهم هو : قوات الجيش الشيشاني و معاهم مجموعات من المقاتلين المسلمين و العرب اللي توافدو للقتال هناك .
القتال ضد مين ؟
ضد روسيا !
و مين اللي كان بيقود روسيا ؟
فلاديمير بوتين !
مرة و هو مسؤول بارز في الدولة الروسية ، و مرة وهو رئيس !
و الحربين حصل فيهم مذابح كبيرة ضد اهل الشيشان !
امال ازاي الآية اتقلبت ، وبقى مقاتلين شيشانيين بيحاربو تحت راية بوتين و في سبيله ، ضد مسلمين زيهم و مستضعفين في سوريا ؟!
و ازاي وصل الامر لتحريك قوات شيشانية عشان تشارك في غزو اكرانيا تحت راية بوتين برضه ؟

{تعاشب شاي}(877) العلف عندهم.. و البهايم عندنا!

https://www.youtube.com/watch?v=U0AEEa0GGeE&list=PLBsIgVvbrncB0M8dlzAbvjl79Nu8v_BW4

اول ما بتيجي سيرة الحرب بين اوكرانيا و روسيا و تأثيرها الاقتصادي علي مصر .. الكل علي طول بيجيب سيرة القمح و لقمة العيش .. علي اساس ان مصر فضلة خيركم هي أكبر مستورد للقمح في العالم .. و اغلب القمح الي بنستورده ده بييجي من روسيا و اوكرانيا .. بس المفاجاة بقي .. أن القمح طلع مش هو المشكلة الوحيدة .. ده فيه مشكلة تانية كبيرة راقدالنا في الدرة .. ما هو احنا طلعنا بنستورد الدرة من اوكرانيا بردو الحمد لله .. عموما يعني احنا كل ما نيجي نسأل عن اي محصول او منتج نكتشف اننا بنجيبه من بره .. تقريبا كده الحاجة الوحيدة الي بننتجها عندنا هي البلح .. علشان كده بنهتم بيه جدا لدرجة اننا بنخليه يحكم البلد عادي!

{تعاشب شاي}(878) بوتين يشرب.. و احنا نتسطل

https://youtu.be/J21gNGcLDJI

احنا متعودين ان اي ازمة بتحصل في اي حتة في العالم بتاثر علي الشرق الاوسط و بتغير فيه .. سواء كانت الازمة دي سياسية او اقتصادية او حتي عسكرية .. علي طول هتلاقي الشرق الاوسط مكدبش خبر و لقطها و اتاثر بسببها .. تحس كده ان الشرق الاوسط ده بيتلكك علشان يتاثر .. يعني ممكن اوي تقوم حرب بين دولتين في اي حتة علي الخريطة … و تبص تلاقي الدولتين الي بيحاربوا بعض دول نفسهم متاثروش بالحرب الي دايرة فيهم ..و الشرق الاوسط هو الي اتاثرعادي!

{الأسبوع ف كيس}(299) نبيض نبيض و تحيا مصر!

https://www.youtube.com/watch?v=O5lni8chSjA&list=PLBsIgVvbrncAeJMvwCpzZg-ow581Oh13M

الأسبوع ده وفي ظاهرة فلكية تطبيلية جديدة لانج.. تم اكتشاف عضو جديد في سلسلة الكائنات زلالية الخلية، المعروفة إعلاميا بآل أديب.. يعني انتوا متخيلين إن طاسة بيض الوطن ، اللي اتحملت بمعجزة عمرو وعماد مضاف إليهم لميس الحديدي ، كفرد أضاف للعيلة المزيد من صفار البيض، طلعت لسه قادرة على إنتاج المزيد من الشكشوكة الأديبية، وطلع لهم بسطرمة اسمها عادل أديب كمان.. لأ وجاي بتطبيلته المتفردة بقى اللي جاية تكسح اللي سبقوه،عشان يقدم أوراق اعتماده للسيسي كعجة تطبيلية سريعة التحضير ..
قالك انا بطالب الدولة تفرض ضريبة متعة على مشاهدة التليفزيون، تنضاف على فاتورة الكهربا..وبصرف النظر هو بيعمل ايه وهو قاعد مع التليفزيون لوحده وشيطان المتعة ثالثهما.

{تعاشب شاي}(879) الخليفة.. و المحتل..

https://www.youtube.com/watch?v=lUygg-NBF1g&list=PLBsIgVvbrncB0M8dlzAbvjl79Nu8v_BW4

السياسة عالم معقد و متشابك و غريب و مليان تقلبات . عشان كده مينفعش نبص لاي حدث سياسي من زاوية واحدة . او بعين الحب و الكره !
او الابيض و الاسود .
خصوصا و احنا عايشين في زمن.. ماعادش حد فيه بيدور على الحقيقة.. أغلب الناس عاوز يسمع اللي على هواه أو اللي يريحه أو اللي يقول له انه صح.. و بس..
و بتبان الأزمة دي جدا و بتتعقد أكتر لما يكون محور الحديث شخص.. له دراويش.. و الدراويش دول لهم أعداء.. أو الشخص ده له أعداء و الأعداء دول لهم دراويش..
و تلاقي الدراويش من هنا مسكوت في خناق الدراويش من هنا..
و النكتة.. ان وسط العركة دي كلها.. الشخص ده لو سياسي أو زعيم و احنا دايبين في دباديبه ، ولا يفرق معاه حبنا او كرهنا ليه ! ولا بيأثر معاه لحظة ما بييجي ياخد قرار معين.. اللي بيأثر معاه و بيحركه بس.. المصالح..
لان السياسة مصالح .
و المصالح بس.. هي اللي بتحرك بوصلتها .

{تعاشب شاي}(880) بنزين الحلو.. يا بنزينه!

https://www.youtube.com/watch?v=qWCj2tjGI8s&list=PLBsIgVvbrncB0M8dlzAbvjl79Nu8v_BW4

كلنا عارفين كويس ان مفيش انسان معصوم من الخطأ .. بس ده الانسان مالناش دعوة بيه .. انما فيه حاجات تانية معصومة من الخطأ عادي .. زى البلح مثلا .. علشان كده سيادة الريس مبيغلطش ابدا و العيبة مبتطلعش من بؤه .. و زى الحكومة .. اهي دى كمان مبتغلطش نهائي.. و اي حد يقول انها بتغلط او عندها مشكلة او خلل في شغلها .. يبقي العيب فيه هو .. و لازم يراجع نفسه و يستغفر ربنا .. حكومة ايه يا بني الي تغلط . انت هتكفر و لا ايه !

{تعاشب شاي}(881) هاتي فانوسك ياختي يا إلهام

https://youtu.be/SjKfWAF3S9Q

من يوم ما وعينا على الحياة في مصر واحنا بنستنى من السنة للسنة شهر رمضان ، شهر الصوم والعبادات والتقرب من الله وقراءة القرآن ..بمظاهره بقى سواء الدينية بالتراويح واعتكاف العشرة الاواخر منه وصلاة التهجد، أو مظاهره الشعبية التراثية زي الزيارات وعزومات الفطار ، المسحراتي ومدفع الإفطار ، القطايف والكنافة وتعليق الزينة وشرا الفوانيس ، وغيرها كتير من الحاجات اللي التراث المصري مليان بيها.. على ناحية تانية خالص بقى ، حصل استحداث جديد لمظاهر تانية معرفش امتى تحديدا ، ومين اللي خلاها صفة ملازمة للشهر ده .. وهي أنه بقى موسم للتنافس الإعلامي ، وفي القلب منه الدراما ومحتوى الترفيه عموما.. ايام ما كنا غلابة بقى من غير استقطاب ورسايل موجهة.. كان الإنتاج الدرامي كام مسلسل من انتاج قطاع الإنتاج باتحاد الإذاعة والتليفزيون، على كام فزورة على برنامج كاميرا خفية خفيف كده ..طبعا مسلسلات تاريخية ودينية كان موضوع مفروغ منه ، زائد مساحة كبيرة للبرامج الدينية ..بديهيات يعني انت في شهر رمضان حتى لو كان بيحكمك مبارك ومخابرات مبارك..

{تعاشب شاي}(882) حاربوا الغلاء بالاستغباء

https://youtu.be/UN2QdmN1oxY

الحقيقة ان انجازات و مشاريع سيادة الريس السيسي كتير جدا و متتعدش .. و علشان نلحق نتكلم عنها محتاجين كل دقيقة في عمرنا و بردو مش هيكفي .. علشان كده احنا متعودين ان الاخوة الاعلاميين الشرفاء المطبلاتية بتوعنا .. مبيعملوش حاجة في برامجهم الا انهم يتكلموا عن الريس و انجازاته الي مالية حياته .. بس من كام يوم كده .. لقينا الاعلاميين دول بيعملوا حاجة جديدة . .. و بيتكلموا عن موجة زيادة الاسعار الي شغالة اليومين دول و معاناة المواطنين معاها .. بس للاسف لما جم يحكوا عن معاناة المواطنين اتلخبطوا و قاموا حارقين دم المواطنين من غير ما ياخدوا بالهم .. طيب يا اعلاميين متشكرين اوي كتر خيركم علي كده .. يا ريت تسيبوا المواطن في حاله بقي و ترجعوا تتكلموا عن انجازات السيسي زى زمان .. اهي دى كده كده محدش بيشوفها و لا بيشوفكم انتوا كمان فعادي يعني مش فارقة

{عرفوه بالعقل}(53) نسمع أغاني ولا لأ؟

https://youtu.be/wMwLcSh5aRw

طيب.. استعرضنا أدلة التحريم في المسألة من الكتاب و السنة.. و فندناها و أثبتنا خطأ الاستدلال بيها.. يا اما بسبب ضعف الأدلة.. أو عدم دلالتها على التحريم أصلا.. و اكتشفنا ان مافيش إجماع على التحريم أصلا.. و شفنا آراء الأئمة الأربعة و انهم ماحرموش الموسيقى ولا الغناء.. و شفنا الصحابة و التابعين و تابعي التابعين استمعوا للغناء و الموسيقى عادي..
طيب.. نطلع من ده بإيه بقى؟
تعالوا نشوف..

{تعاشب شاي}(883) يا خراب بيتك يا برهوفيطش!

https://www.youtube.com/watch?v=_X07qi9gebo&list=PLBsIgVvbrncB0M8dlzAbvjl79Nu8v_BW4

تخيل تبقي راجل ملياردير اد الدنيا ..و بتلعب بالفلوس لعب .. و عمال تتنطط ليل نهار بين قصورك و يخوتك و طياراتك و شركاتك و الاندية الي بتمتلكها .. و مرة واحدة تلاقي رئيس دولتك جاله مزاج يهجم بجيشه علي دولة تانية و يحتلها .. يقوم العالم كله يمسك فيك انت .. و ينزل فيك شتيمة .. و يصادر ممتلكاتك و يتحفظ علي كل اموالك .. و ميسيبش معاك فلوس تكفي علشان حتي تجيب بيها فنجان قهوة تقعد تشربه و انت بتفكر في مصيبتك .. ده بالظبط الي حصل مع الملياردير الروسي رومان ابراموفيتش بعد حرب اوكرانيا .. فلوسه ضاعت و حياته اتبهدلت و بقي منبوذ في الدنيا كلها .. يعني غالبا ابراموفيتش ده لو كان هو الي بينضرب بالصواريخ و المدافع مش اوكرانيا .. مكانش هينضر و يتخرب بيته للدرجة الي هو فيها دلوقتي دى!

{تعاشب شاي}(884) في ماسبيرونا شوال رز!

https://youtu.be/d7ri5GpCw18

في وقت فيه تعتيم شبه كامل او معلومات مضللة من إعلام المخابرات على المظاهرات والاحتجاجات اللي في مبنى ماسبيرو العريق ، اللي يعتبر إعلام الدولة الحكومي ووسيلة إعلامها الرسمية لسنين طويلة، واللي بيضم جواه بعد عمليات التسريح والمعاش اكتر من 32 ألف.. ما بين موظفين وعمال وفنيين ومهن إعلامية مختلفة .. ومجرد الإشارة لموضوعهم اللي داخل على شهرين، وله خلفيات بقالها أربع سنين، كانت إشارة على أنها شوية احتجاجات محدودة على نظام البصمة، اللي حطته الوطنية للإعلام لتنظيم عملية الحضور والانصراف وعمل تكدس وزحمة.. لكن الحقيقة، واللي مبيجيبش سيرتها إعلام السيسي وعارفها كل متابع على السوشيال ميديا، بيشوف الفيديوهات واللايفات اللي بتطلع من جوه المبنى.. إن الموضوع له أبعاد تانية وحوارات شابكة في بعضيها، أكبر بكتير من مجرد تصوير الموضوع على أنه احتجاجات لموظفين عايزين يزوغوا من البصمة.. خلونا نقرب شوية من الحكاية ، ونحاول نعرف الخيوط اللي واصلة بين ماسبيرو والمخابرات والمتحدة ..وهل للسعودية عن طريق شوالها المتحرك تركي آل شيخ..

{تعاشب شاي}(885) مين السبب في السد؟!

https://youtu.be/_mTfKcjCpKY

لما عرفنا ان فيه وثائق بريطانية ظهرت.. بتكشف عن الخلافات التاريخية الي كانت بين مصر و اثيوبيا .. و تاثير الخلافات دى في ازمة سد النهضة .. مهتميناش اوي و لا حطينا الموضوع في دماغنا .. لاننا فاهمين كويس جدا .. ان السبب الحقيقي في مشكلة سد النهضة .. مش الخلافات القديمة بين مصر و اثيوبيا .. و لا ان السيسي مضي بايده الشريفة علي اتفاقية المبادئ و ادا لاثيوبيا شرعية بنا السد .. لا خالص .. كل ده كلام فارغ و مياكلش معانا و مالوش اساس من الصحة .. السبب الوحيد الي ورا بنا السد .. هو ثورة يناير .. منها لله بقي .. هي الي خلت مصر تكشف ضهرها و تعري كتفها و اثيوبيا تبني سدها .. ايوه سيادة الريس السيسي هو الي مأكدلنا الموضوع ده بذات نفسه !

{تعاشب شاي}(886) ازرع شوارع.. اقلع بنى آدمين

https://www.youtube.com/watch?v=U6Dv_hSCJZU&list=PLBsIgVvbrncB0M8dlzAbvjl79Nu8v_BW4

من ايام مبارك ، و من قبله السادات ، و الدولة بتعتبر اي كوبري او طريق فرعي تعمله ، في اي قرية ولا مركز في مصر ، بتعتبره انجاز قومي ويروح الرئيس بنفسه يفتتحه و يتعمل له اغاني ، و التليفزيون ينقل الافتتاح ع الهوا و حاجة اخر هيصة !
بعد شوية الطرق كبرت و بقت محاور .
و المحاور طلع لها كباري .
لدرجة انك تحس ان فيه حد ماسك علبة مليانة كباري و عمال يكب في البلد من غير حساب ولا خطة !
و بعد مبارك ، السيسي كمل في حوار معايرة الناس باي كوبري يتعمل ولا اي طريق يفتتحه ، بل ان السيسي أفور جدا في موضوع الطرق و الكباري ده و من كترها متعرفش هي كلها مفيدة كلها ؟ ولا افادت ناس و اضرت ناس ؟
و هل كلها كان ليها لزوم ؟ ولا فيه طرق وكباري اتعملت لزوم الفشخرة بس ؟
و هل الاماكن اللي اتعملت فيها الطرق و الكباري دي فعلا استفادت منها و عادت عليها بالخير زي ما السيسي واعلامه بيغنوا علينا ؟ ولا فيه طرق وكباري اضرت المناطق اللي اتعملت فيها !

{تعاشب شاي}(887) شنب الغلابة!

https://youtu.be/iCkCeqFc4no

الكاتب الكندي آلان دونو في كتابه نظام التفاهة ، بيوضح ازاي ان النظام العالمي عشان يتحكم في الشعوب ، ويقتل في المهد كده أي قيمة للتفكير والإرادة الحرة ، والبحث عن حلول حقيقية للمشاكل..مابيعملش حاجة غير أنه يقلل ويسخف في عين الناس كل حاجة ، ويوجه إحساسهم وادراكهم للتفاهات والمواضيع السطحية ..يصدر في كل نواحي الحياة التفاهات والتافهين للمشهد..كل حاجة تبقى سطحية وقشور ..علم ثقافة سياسة ، اقتصاد وفن..يفتت كل فكرة أصيلة سياسية أو اجتماعية لحتت صغيرة ..فتتوه الفكرة نفسها ، فيخلي الشعوب واحدة واحدة تستحسن الرداءة والجهل..ويسيبهم يتفاعلوا معاه كمان ، عشان يحسوا أنهم لهم رأي وقناعات ، وردود فعلهم مهمة وليها اعتبار وتأثير ..وفي مصر بقى وعلى صغير كده ،ومن بعد الانقلاب على الملك فاروق.. كان الظباط الاحرار بقيادة الزعيم عبد الناصر اول اللي لقطوا خيط التفاهة ، وقرروا أنه يبقى اسلوب حياة ..وعمموا فكرة سيطرة التافهين وصعود قواعد الرداءة والانحطاط ، وتهميش واستبعاد أي قيمة محترمة من المشهد ..وكانت لهم صولات وجولات في مرحلة فرز نجوم الفن ..

{تعاشب شاي}(122) مكروباظ آدم The ADAM Project

https://www.youtube.com/watch?v=5Pd0jVrtX-k&list=PLBsIgVvbrncBJbmFFzhjJfzK9aLoMuouz

فيه دراسه اتعملت في جامعه هارفارد، استمرت لمدة ٧٥ سنة.. ابتدت سنة ١٩٣٨... وفضلت لحد 2013.
الدراسة دي كانت بتحاول تجاوب علي سؤال واحد.. وهو.. "ايه اللي بيخلي حياة الناس اسعد وأفضل؟"
وده لأننا لو سألنا الناس في نهاية حياتهم عن ذكرياتهم.. غالبًا بيدونا إجابات مش معبرة عن الواقع اللي عاشوه فعلاً... لازم ندرسهم بنفسنا عشان نعرف حصل ايه في حياتهم فعلاً!
الدراسة ابتدت على عدد ٧٢٤ مراهق من أماكن مختلفة وظروف مختلفة.. الخ.. وفضلت تتابعهم لحد ما..إما ماتو.. او بعضهم عاش لحد ما عدا التسعين سنه.
وأخيرًا .. سنة ٢٠١٦ الرئيس الرابع للبحث ده.. واللي اسمه الدكتور Robert Waldinger
عمل محاضرة في سلسلة محاضرات تيد TED المشهورة.... وقالنا علي نتيجة البحث.
البحث اللي درس سنين طويلة من حياة البشر، دراسة علمية دقيقه، عشان يقولنا سر السعادة في الحياة!
قبل ما اقولهالك خليني اسئلك سؤال بسيط:
لو تخيلنا ان بقى عندك القدرة على انك تسافر للماضي.. وتغير أي حاجة.. هاتغير ايه؟!

{تعاشب شاي}(888) هو ده بايضن.. هي دي الرنة!

https://www.youtube.com/watch?v=bXRFF7hs5J0&list=PLBsIgVvbrncB0M8dlzAbvjl79Nu8v_BW4

في ظروف الولعة اللي فيها العالم دلوقت بسبب حرب اكرانيا و روسيا ، فيه سوق كبير منصوب للمزايدة و البطولة كله بيحاول يدخل يعرض بضاعته فيه عشان ياخد اللقطة .
ابرز لقطة صاحبها حاول ياخدها بس ردت في وشه هي لما تم تسريب اخبار بتقول ان محمد بن سلمان رفض استقبال مكالمة من الرئيس الامريكي بايدن ، و الخبر انتشر و كان بن سلمان على وشك انه ياخد اللقطة بس الامريكان ماخلهوش يتهنى بيها !
اللي خلى بعض الناس تصدق ان ممكن يكون بن سلمان فعلا رفض انه يتكلم مع بايدن ، هو ان فيه كلام عن خلافات بين السعودية و الامارات من ناحية، و امركيا من ناحية تانية حوالين زيادة انتاج البترول ، لتعويض الغرب عن النفط و الغاز اللي بييجو من روسيا !
بس هل فعلا بن سلمان رفض انه يكلم بايدن ؟
و هل بن سلمان اصلا يقدر يعمل كده ؟
و ايه خلفيات الكلام ده ؟
و هل ممكن فعلا السعودية ممكن تختلف مع امريكا خلاف بجد ؟

{تعاشب شاي}(889) أبو شقة انهزم يا مِنز

https://www.youtube.com/watch?v=Vq8loBovsPE&list=PLBsIgVvbrncB0M8dlzAbvjl79Nu8v_BW4

يوم الجمعة 11 مارس .. مصر كانت علي ميعاد مع ظاهرة كونية نادرة مبتحصلش ابدا .. و هي ان فيه انتخابات اتعملت و خلصت و محصلش فيها تزوير .. و مش عرس انتخابي واحد الي متزورش . لا دول لامؤاخذة عرسين .. انتخابات حزب الوفد الي سقط فيها ابو شقة حبيب السيسي .. و انتخابات نقابة المهندسين الي وقع فيها هاني ضاحي الوزير السابق وصديق الدولة الانتيم .. و بعد ما نتايج الانتخابات ظهرت فيه علماء كتير اوي حاولوا يفسروا الظاهرة دى و يفهموا أسبابها .. هل مثلا سلطات الدولة في اليوم ده صحيت متاخرة و ملحقتش تروح تزور الانتخابات .. و لا علشان الانتخابات اتعملت يوم الجمعة فالتزوير كان قافل .. و لا ايه الي الحكاية بالظبط

{تعاشب شاي}(890) العيش.. مصلحتك أولاً!

https://www.youtube.com/watch?v=WBr2H0bmJHU&list=PLBsIgVvbrncB0M8dlzAbvjl79Nu8v_BW4

في مصر دلوقت فيه دراما سودا بتحصل في اهم واخطر ملف يتعلق بحياة المصريين بعد ملف المية و سد النهضة .
الدراما او الكارثة دي تتعلق بملف " العيش " .
الخبز يعني . .
و الخبز يعني القمح.
مهزلة بتستهدف تدمير القمح ، في وقت العالم كله بيتسابق على التفكير في حلول لاخطر ازمتين بيواجهوه بسبب الحرب الاكارنية الروسية : ازمة الغذاء و ازمة الطاقة .
العالم كله بيبحث عن حلول .
و في مصر النظام بيزود المشاكل !

ايه اللي بيحصل في ملف القمح في مصر؟
و ازاي الامور متجهة لكارثة اكبر حتى من كل اللي بتسمع عنه في الاخبار ؟