{عرفوه بالعقل}(52) الموسيقى و الغناء في حياة السلف

https://www.youtube.com/watch?v=dc1LmwwpRtc&list=PLBsIgVvbrncCUHtc-Gd9d0t5wBXwC0_DO

و مازلنا في رحلتنا مع قضية الموسيقى و الغناء من خلال كتاب دكتور عبد الله الجديع ”الموسيقى و الغناء في ميزان الإسلام“..
ناقشنا لغاية دلوقت الأدلة من القرآن.. و السنة.. و قضية الإجماع و آراء المذاهب المختلفة..
خلونا النهاردة نتكلم عن الموسيقى و الغناء في حياة سلف الأمة.. الصحابة و التابعين..
قبل مانختم في الحلقة الجاية بتفصيل الحكم الشرعي في الموسيقى و الغناء بناءا على كل الأدلة دي..

{حدوتة إسرائيلية}(12) سبع صنايع.. و البخت والع!

https://www.youtube.com/watch?v=sn3mPwqrAqc&list=PLBsIgVvbrncBwfV9fP7smSrSv5LU39esP

خلونا النهاردة نستكمل رحلتنا و نحاول نجاوب على سؤال مهم جدا.. ليه دول غنية زي الإمارات مثلا.. ماقدرتش تحقق اللي إسرائيل حققته في المجالات الاقتصادية و العلمية؟.. ناقصهم ايه؟
تعالوا نشوف..

{الحراق}(117) الماتريكس باقية و تتمدد..

https://www.youtube.com/watch?v=mQ13bZQo7bs&list=PLBsIgVvbrncBJbmFFzhjJfzK9aLoMuouz

الفيلم الأول من السلسلة اللي هنتكلم عليها النهاردة نزل سنة ٩٩ وناس كتير اعتبرته.. ولسه بتعتبره لحد النهاردة... أهم فيلم خيال علمي في تاريخ السينما.
"ماتريكس"
فكرة معقدة ومركبة ولو حكينا الاربع أجزاء بالتفصيل وحللنا المعاني والمشاهد والرمزيات... هناخد وقت اطول من وقت السلسلة نفسها.. اللي هي مقربة من عشر ساعات.
فاحنا ممكن نلخص العشر ساعات دول في ٣ كلمات!
"ثورة .. العبيد.. عالأسياد"
الأسياد في السلسلة عباره عن آلات... مَكـَـن... بس مش دي أهم تفصيله في الموضوع... لأن كل ثورات العبيد علي أي أسياد... هتلاقي فيها نفس العناصر.
هتلاقي القائد اللي شايل رسالة الحرية على كتفه!
وهتلاقي جموع العبيد اللي كتير منهم مش فارق معاهم.. وبعضهم مش مدرك انهم عبيد اصلاً!
هتلاقي العبد الخاين اللي مرتاح في العبودية ومبسوط بيها... عشان الحرية دي وجع دماغ واحنا مش ناقصين.
وعلى الجانب الآخر هتلاقي الأسياد اللي شايفين انهم عاملين في العبيد جميلة انهم سامحينلهم يعيشو أساسا...

{تعاشب شاي}(856) الرقصمالية البلحية

https://www.youtube.com/watch?v=nnzz1VvMzi0&list=PLBsIgVvbrncB0M8dlzAbvjl79Nu8v_BW4

المصريين من ساعة ما وعيوا عالدنيا وهما أساتذة في كل حاجة وبيفهموا في كل حاجة .. في السياسة تلاقيهم كلهم خبراء استراتيجيين .. في الكورة تلاقيهم كلهم الكابتن محمود الجوهري .. في السواقة تلاقيهم كلهم الكابتن شوماخر.. وغيره وغيره .. المصريين ما بيغلبوش يعني .. فهلوية وبيفهموها وهي طايرة ودايما عندهم نظريات وآراء في كل حاجة .. باستثناء حاجة واحدة بس .. الاقتصاد .. ده باعتبار اننا في مصر مجازا كده عندنا اقتصاد ..
احنا تيجي سيرة الاقتصاد من هنا وتلاقي الناس حطت ايدها على قلبها .. أصل طالما الموضوع فيه اقتصاد يبقى الجنيه هايقع قدام الدولار .. أو الدعم اللي فاضل هيتاكل منه حتة .. أو الضرايب هتزيد .. أو الجنيه زهق من العوم مثلا وقرر يغرق.. المصريين لا شاغلهم الاقتصاد كاقتصاد ولا مهتمين بحوارات الحكومة ولا بتصريحاتها .. مش عايزين نفهم الدولة بتهبب ايه في الاقتصاد بس أهم حاجة إن محدش يقرّب لرغيف العيش .. أصل هو في إيه في الاقتصاد يتفهم؟ دا محدش عارف ملة الاقتصاد بتاعنا ده ايه..

{عرفوه بالعلم}(28) سبحان التطور!

https://www.youtube.com/watch?v=vCwvLyoD4qM&list=PLBsIgVvbrncChqmejIOyA-Xp_dcywQQln

بدأنا رحلتنا في عالم النبات.. من أخضر مكان ف يالعالم.. الغابات المطيرة.. و شفنا ازاي الحرب دايرة بين كل الكائنات الحية في الغابة على مصدر الطاقة الأساسي.. اللي هو نور الشمس..
لغاية ما وصلنا لورق الشجر.. مصنع الطاقة في النبات.. اللي قلنا انه هايتسبب في صراعات تانية على الطاقة.. و مش أي صراعات.. ده احنا عندنا النهاردة حكاية عجيبة.. عن حرب كيماوية بعيدة المدى..
فتعالوا نشوف..

{كشف حمادة}(74) طبال لكل العصور

https://www.youtube.com/watch?v=YiWUSCxn7gU&list=PLBsIgVvbrncAh0AZmC-LIXEQWlSbz7MZq

مع اي حدث أو موقف بيظهر فيه مصطفى بكري عشان يدلي بجردله في موضوع.. واللي كان آخره هيجانه الأخلاقي على فيلم أصحاب ولا أعز ، اللي بيبهوأ المجتمع ويلخلخ قيم الأسرة المصرية، مع أنه قبلها بكام يوم كان بيدافع عن سمعة واخلاق محمد الامين ،اللي متهم بالتحرش وهتك عرض بنات أيتام.. دايما بيستحضر كده العقل الجمعي شخصية محجوب عبد الدايم.
اللي قدمها الفنان حمدي احمد في فيلم القاهرة 30 ..لكن الحقيقة إن نجيب محفوظ نفسه اللي كتب القصة ،وصنع بايده شخصية محجوب عبد الدايم، لو كان عايش في زماننا وتابع مشوار حياة مصطفى بكري الصحفي والسياسي .. كان راح بنفسه لمصطفى بكري وخده بالحضن ، وقال له حقك عليا انا يا ابني ..محجوب عبد الدايم ايه اللي يشبهوك بيه ده ؟.. ده راجل غلبان كان كل طموحه عيشة مرتاحة، وتمامه يطبل لمديره أو يباصي المدام لوزيره مرتين في الأسبوع

{تعاشب شاي}(857) في الزنازين؟.. لسة!

https://www.youtube.com/watch?v=x2MzaX4cOjM&list=PLBsIgVvbrncB0M8dlzAbvjl79Nu8v_BW4

في اوروبا و الدول المتقدمة .. الشخص الي بيدخل السجن لازم يكون ارتكب جريمة و بيخش السجن علشان يتعاقب عليها .. انما في مصر الموضوع مختلف شوية و فيه مرونة كبيرة اوي …عندنا كل الناس بيدخلوا السجن عادي حتي لو معملوش اي حاجة .. و لو مرتكبتش جريمة مش هنغلب فيك بردو و هندخلك السجن بمليون طريقة … هنلفقلك قضية او هنحبسك احتياطي او هنمسكك تحري او هنعتقلك او هنخطفك .. و ده مش لان النظام ظالم لا سمح الله .. لا خالص .. هو بس عاوز السجن يكون متاح لكل فئات الشعب .. مهو مش علشان المواطن مرتكبش جريمة .. نقوم نحرمه من تجربة ممتعة زى دخول السجن في مصر .. مينفعش طبعا !

{تعاشب شاي}(858) ماتقوم تطمن على فلوسك

https://www.youtube.com/watch?v=CyTx232-0aA&list=PLBsIgVvbrncB0M8dlzAbvjl79Nu8v_BW4

فلوس حرام تايهة يا ولاد الحلال .. غسيل أموال على نهب فلوس الشعوب الفقيرة على إتجار بالبشر على تجارة مخدرات وكوكايين على تهرب ضريبي على إدارة حسابات لعصابات الجريمة المنظمة.. ما شاء الله حاجة تقرف .. ده اللي اتكشف في آخر التسريبات الخاصة بواحدة من أشهر المؤسسات المالية في سويسرا .. بنك كريدي سويس السويسري .. واحد من أكبر البنوك المقرضة في العالم والوجهة المفضلة لكل السياسيين ورجال الأعمال اللي بيكوّنوا ثروات من خلال علاقاتهم السياسية .. واللي اتأكدنا بعد نشر التسريبات دي .. ان البنك متورط في قضايا غسيل أموال وفساد وتوفير ملاذ آمن للسياسيين الفاسدين من كل أنحاء العالم ..

{الحراق}(118) مدعوق أبو الوطن!.. Belfast

https://www.youtube.com/watch?v=ryuq-yLTF48&list=PLBsIgVvbrncBJbmFFzhjJfzK9aLoMuouz

حرب طائفية، ومظاهرات مسلحة...
قنابل مولوتوف، وعربات بتنفجر، ومحلات بتتكسر!
وفوق كل ده.. اسرة عليها ديون وضرايب، وبعض افرادها عندهم امراض قاتلة!
قصة مأساوية صح؟!
بالعكس بأه... الفيلم من نوعية الأفلام اللي تخلصها تلاقي نفسك بتبتسم... وخلال الفيلم هتضحك اكتر من مره!
لأننا بنشوف القصة كلها من خلال عيون طفل عنده ٩ سنين.. ميعرفش ان فيه حاجة اسمها حرب.. ولا عنده فكرة ايه هي الطوائف الدينية اللي بيقولو عليها دي!
كل طموحه في الدنيا انه يسرق حته شيكولاته من غير ما أمه تعرف.. واكبر صراع بيواجهه في الحياة هو صراعه عالمركز التاني في امتحان الحساب... عشان يقعد في الديسك اللي قدام جنب البنت اللي بيحبها في تانية ابتدائي!
دي عبقرية فيلم (Belfast)
اللي خلته يترشح لسبع جوايز اوسكار من ضمنهم اتنين للكاتب والمخرج.. اللي بيحكي قصة طفولته الشخصية في الفيلم ده..
بس من غير ما يركز على المأساة... بل ومن غير حتي ما يركز على نفسه.
لأن الفيلم زي ما هو باين من اسمه له بطل مش تقليدي..
بطل الفيلم..
هو الوطن!

{الأسبوع ف كيس}(297) لفتة في الحربية

https://www.youtube.com/watch?v=LTimB-bkh_M&list=PLBsIgVvbrncAeJMvwCpzZg-ow581Oh13M

الاسبوع ده ، وبعد ما إثيوبيا اكتشفت إن الخط الأحمر اللي رسمه السيسي طلع كابل كهربا اساسا ، وانه كان بيثبتنا احنا.. وبيوجب معاهم هما.. بس محدش فهمه ساعتها..قررت اثيوبيا البدء في عملية تشغيل اول توربينات السد، وده برضه كان تنفيذ لتوجيهات فشاخة الرئيس ،اللي كانت بالنسبة للشعب رسالة أنه دكر ومسيطر، وبالنسبة لإثيوبيا كانت رسالة مشفرة فهموها متأخر برضه، لما قال لهم اللي عايز يجرب يجرب.. فقالك طب ما يللا نجرب وبالفعل نجحت التجربة.. بس لا تيأس عزيزي المواطن ولا تقلق..احنا زي ما عندنا وحوش على أرض ميدان المعركة، عندنا أسود في الخارجية..والشهادة لله ماسكتوش.. وبدأوا في إجراءات تصعيدية سببت بعض القلق على الفيس بوك، وتوتر وحالة من الترقب على تويتر.. الخارجية طلعت بيان.. وارفع رأسك يا أخي.. لقد أصبح لهذه الأمة تويتة وبوست..واوعى اسمع حد يقلل أو يشكك في نتايج البيان ده.. أو حد يقول ده لو جواب من واحدة مفركشة مع حسن، وبتقول له: ”كده برضه يا سونا يا خاين!“ كان هيبقى اقوى من كده.. وأطول من كده ..

{تعاشب شاي}(859) مين اللي أكرن أوكرانيا

https://youtu.be/p6ipSDl1W34

الحرب قامت يا رجالة .. و روسيا هجمت علي اوكرانيا .. و الاخ المجرم فلاديمير بوتين شرب كل مخزون الفودكا الي موجود في روسيا و ماشي يطوح و قافش انه يعمل حرب عالمية تالتة ..و داير يخبط في الكل و لا فارق معاه تهديدات بايدن و حلف الناتو و لا عقوبات الاتحاد الاوروبي .. طيب تطلع مين اوكرانيا بالصلاة ع النبي الي العالم اتقلب بسببها دى .. ايه تاريخها و اصلها و فصلها .. و ايه الي عملته في حياتها علشان يحصلها كل ده ؟!

{تعاشب شاي}(860) الولعة العالمية الثالثة

https://www.youtube.com/watch?v=cisI4xDkUaQ&list=PLBsIgVvbrncB0M8dlzAbvjl79Nu8v_BW4

الساعات اللي فاتت ، بوتين بدأ هجوم موسع على اكرانيا، بعد سنين من الشرشحة الكلامية بين الاتنين و التهديد الروسي لاكرانيا و الاستغاثة الاكرانية بالغرب وامريكا عشان يحموهم من بوتين الرهيب اللي الكل عارف انه هبيهزرش و مندفع و عامل زي بلطجي الحتة اللي شايف ان دراعك هو صاحبك الوحيد !
و بعد شهور من التحركات الروسية و الشتيمة الغربية لبوتين، و التحليلات اللي رايحة جاية على الفضائيات لدرجة ان من كترها الناس مبقتش فاهمة على وجه الدقة ايه اللي بيحصل!!
مع الهجوم الروسي على اكرانيا انفجرت في كل سنتيمتر من السوشيال ميديا و القنوات الفضائية و المواقع و الجرايد ، ماسورة تحليلات و توقعات جديدة، زي اعلان روتانا مش هتخليك تقدر تغمض عينك، فيها كل حاجة حرفيا بشكل يبدو متضارب و بشكل دخل الناس في حيرة . حيرة مصدرها مش السؤال عن حجم الهجوم الروسي هيكمل لغاية فين ، لا ، بل مصدرها سؤال : هو ايه اللي ممكن يترتب على الوضع الحالي ؟
و هل ممكن فعلا تحصل حرب عالمية تالتة؟

{تعاشب شاي}(861) و لكنكم تحرقون أوراق القمحون!

https://www.youtube.com/watch?v=Af5YPCsMqT8&list=PLBsIgVvbrncB0M8dlzAbvjl79Nu8v_BW4

اول ما بدات الحرب بين روسيا و اوكرانيا .. فيه مصريين كتير مسكوا بطنهم و بداوا يقلقوا ويفكروا في رغيف العيش .. علي اساس ان معظم القمح الي بتستورده مصر بييجي من الدولتين الي مسكوا في خناق بعض دول .. و اكيد الخناقة دى هتعمل قلق و هتاثر علي تصدير القمح لينا .. ما هم ايديهم مش فاضية بقي .. و اكيد مش هيسيبوا السلاح الي ماسكينه و هيبعتولنا قمح .. و هنا بقي فيه ناس سألت سؤال مهم جدا .. يا تري الدولة عندنا عاملة حسابها و محضرة خطة بديلة للطوارئ علشان توفر القمح و لا لا ؟ .. بصوا هو احنا عموما ملناش في حوار التخطيط ده .. و مبنعملش خطط في الظروف العادية اصلا .. فاكيد مش هنعمل خطط مخصوص للطوارئ يعني .. بس في نفس الوقت احنا مطمنين و حاطين في بطننا سنبلة صيفي .. لان عندنا في مصر حاجة اهم من الخطط بكتير ..

{تعاشب شاي}(862) عصافير النهضة

https://www.youtube.com/watch?v=JQA4ZH16Ig4&list=PLBsIgVvbrncB0M8dlzAbvjl79Nu8v_BW4

فاكر لما السيسي وقف يخطب في الصحفيين اللي حضروا حفل تعويم السفينة " ايفر جرين " اللي كانت مشبوحة في قناة السويس، و كان لابس نضارة شمس غالية و بدلة آخر شياكة و نافش ريشه و متقمص روح جمال عبدالناصر و قال ان كل الخيارات بما في ذلك الخيارات اللي مش تمام متاحة قدام المصريين في موضوع سد النهضة لو اثيوبيا ركبت دماغها و كملت في المشي الشمال و حرمت مصر من اي جزء من حصتها في مية النيل؟
طيب فاكر لما جهاز السامسونج حب يمتص غضب الناس شوية و ادى تعليمات للاراجوزات بتوعه انهم يهاجموا اثيوبيا و السد شوية، بعد ما كان اعلام السيسي بيهوّن من خطر السد ؟
و طلع ساعتها احمد موسى نفسه هاجم اثيوبيا ؟
طيب فاكر الهري الكتير عن مناورات الجيش في السودان و اللي بعض الحالمين قالوا ان هدفها التحضير لضرب السد؟

اهو كل ده مش بس طلع بلح .
لا ،
ده كمان حوار السد كله على بعضه مبقاش موجود تقريبا لا في حوارات المصريين و لا في اعلام السيسي و المولد انفض يا معلم !!
ازاي و ليه ده حصل؟
و ايه معنى ده ؟

{كشف حمادة}(75) فيلسوف الغلابة

https://www.youtube.com/watch?v=G8Gq1gd8HmU&list=PLBsIgVvbrncAh0AZmC-LIXEQWlSbz7MZq

توت توت.. الحرية ولا القوت.. هتموت وأنت ذليل ومصدي ، ولا تموت راجل بتحدي ، أصل العمر أكيد هيعدي ..وفي كل الأحوال هتموت..
لو كان مفهومك عن الشخص الأعمى أنه إنسان مابيشوفش وراح النور من عينيه ، قعدة واحدة مع عم صلاح عبد الله هتعرفك ان العمى عمى القلوب والبصيرة .. لو فكرتك عن العمى أنه ضعف واستكانة وتواكل، أسمع عم صلاح عبد الله وهو بيشاغب، وتسلخ قصايده كل فاسد وظالم ..هتعرف إن صاحب الحق قوي حتى لو كان بنضارة وعكاز و سلاحه مجرد الكلمة..لو شايف إن الإعاقة يأس وعجز واكتئاب، تبقى محتاج جلسة أنس وفرفشة مع عم صلاح عبد الله..البهجة والضحكة اللي من القلب مضمونة مع المشاكس الجرئ ابو دم خفيف.. ولأن لكل شئ نهاية ولكل قطر معاد وصول لآخر محطة ، تنتهي رحلة حياة شاعر العامية الكبير يوم الاتنين 21 فبراير ..ويمشي بهدوء.. ويسيب دكتور الفلسفة وراه مئات القصايد والحكاوي.. وسط تجاهل تام للخبر من إعلام فتح له كل استوديوهاته

{تعاشب شاي}(863) وديتي النووي فين يا أوكرانيا

https://www.youtube.com/watch?v=pytX5aR8oc8&list=PLBsIgVvbrncB0M8dlzAbvjl79Nu8v_BW4

من ساعة ما روسيا هجمت علي اوكرانيا و العركة قامت .. و احنا قاعدين نسمع حوارات و اخبار و تحليلات ليل نهار عن الحرب و اسبابها و نتايجها و تاثيرها علي موازين القوي في العالم و كلام كبير من النوع ده .. و من ضمن الحاجات الي سمعناها كتير اوي اليومين الي فاتوا .. جمل من نوعية .. منهم لله الي ضحكوا علي اوكرانيا و خدوا منها اعز ما تملك .. الي هو السلاح النووي يعني .. و لو مكانتش اوكرانيا فرطت في النووي الي عندها مكانش ده بقي حالها .. طيب ايه قصة السلاح النووي الي كان عند اوكرانيا ده .. و مين دول الي ضحكوا عليها و غرروا بيها و خدوه منها .. و انتي يا اوكرانيا .. ازاي يبقي عندك سلاح نووي و تفرطي فيه عادي كده .. ده الي عنده مسدس صوت في الزمن الاغبر ده بيحافظ عليه و بيشيله في عينيه و بيخبيه في بوكسره !

{تعاشب شاي}(864) اشتريه!.. ده رخيص!

https://www.youtube.com/watch?v=lZqZ5azL0VA&list=PLBsIgVvbrncB0M8dlzAbvjl79Nu8v_BW4

من اول لحظة للسيسي في الحكم و الكل عارف انه بايع نفسه للامارات بدون اي اعتبار لا للامن القومي المصري، و لا الاقتصاد المصري و لا المواطن الصري اللي تقدر تعتبر انه اصبح من رعايا الدولة الاماراتية !
لكن الغريب ،
هو ان رغم الشواهد و الاخبار اللي بتقول ان فيه بعض الخلافات بين القاهرة و ابوظبي، و رغم الدعم الامارتي الواضح و المباشر لاثيوبيا في سد النهضة ، اللي هو اكبر خطر عرفته مصر في تاريخها كله، و رغم ان الاخبار بتاعت الخلافات دي وصلت لكلام عن طرد السفير الاماراتي من مصر او على الاقل خروجه من البلد، رغم كل ده ، لسة الامارات نازلة شرا في كل حاجة في مصر من مستشفيات لشركات مقاولات لشركات اوراق مالية لبنوك لكل حاجة حرفيا !
وبعد ما كنا بنتكلم عن شركات و حاجات بتشتريها الامارات ، بقى الوضع هو ان الامارات بتغرف غرف من السوق المصري !
ايه الخريطة و الحجم الجديد للتوسع الاماراتي في السوق المصري ؟
و ايه سر التوسع ده ؟
و ممكن يوصل بينا لفين ؟

{تعاشب شاي}(865) ماعملتش و مش هاعمل!

https://www.youtube.com/watch?v=5U8AVtySLH0&list=PLBsIgVvbrncB0M8dlzAbvjl79Nu8v_BW4

عمرك شفت رئيس امريكا او فرنسا او اي بلد طبيعية ، مش لازم تكون بلد سوبر ، لا بلد زي تركيا مثلا مهياش من دول الصف الاول في القوة و التقدم ، عمرك شفت حد من قيادات الدول دي طالع يفتتح حاجة اسمها " المشروع القومي لتنمية الاسرة " ؟!
طب عمرك شفت حاجة كده في الدول اللي بتعاني من قلة عدد سكانها مثلا؟.. طب لما تكون الدولة بتشتكي أصلا من زيادة عدد السكان.. يبقى مشروع تنمية الأسرة ده هدفه ايه بالظبط؟.. قطع الخلف؟
مستحيل طبعا ، لان الاسرة في فكر الناس الطبيعية هي زيها زي اي حاجة في المجتمع و الحياة ، بتتطور و بتنمو بشكل طبيعي في اطار مناخ عام طبيعي برضه ، فيه افراد الاسرة دي بيلاقو خدمات و تعليم و امكانيات و موارد دخل ، بشكل طبيعي برضه ، مش بقرار من سيادة الرئيس الملهم ولا الزعيم الخزعبلي !
الاسرة بما انها اساس المجتمع و و حدة بناؤه فهي مش محتاجة قرار حكومي .
ولا مشروع قومي .
لكن زي ما كلنا عارفين، كل حاجة عند السيسي غير !
فتلاقيه راح يفتتح حاجة اسمها " المشروع القومي لتنمية الاسرة المصرية " !

{عيانين بالإبداع ADHD}(05) انت مش لوحدك يا فواز

https://www.youtube.com/watch?v=xIxHy4yaM5c&list=PLBsIgVvbrncDhUgCH6RUClfyYvcA7z51K

معلهش انشغلت عنكم شوية الفترة اللي فاتت.. بس ادينا رجعنا نكمل رحلتنا..
و خلونا النهاردة نتكلم عن وباء استفحل بين البشر في العالم كله..
و الهداهد من أكتر الناس اللي بيعانوا منه.. وباء.. الوحدة..

{الحراق}(119) المش خرساء CODA

https://www.youtube.com/watch?v=gAugIBqVptQ&list=PLBsIgVvbrncBJbmFFzhjJfzK9aLoMuouz

سي – أوه – دي – إيه
أو – CODA
اربع حروف انجليزي.. هي الحروف الأولى من جملة Child Of Deaf Adult
يعني "طفل لشخص بالغ أصم"
كودا مترشح السنة دي لجايزة أوسكار احسن فيلم.
القصة بسيطة... طفلة طبيعية اتولدت في أسرة من الصم والبكم.. وبتلاقي نفسها مجبرة تلعب دور حلقة الوصل ما بين أسرتها والعالم الخارجي.
مسؤولية كبيرة من أول ما فتحت عينها علي الدنيا... ودور معكوس بيخلي أصغر عضو في الاسره هو أهم عضو فيها!
بس مش دي المشكلة... المشكلة ان هاييجي يوم من الأيام.. والطفلة دي هاتكبر.. هاتحب تسافر او تروح كلية.. أو يبقالها حياتها الخاصة بعيد عن الدور اللي اترسملها غصب عنها!
بس أسرتها عاشت حياتها كلها معتمدة عليها بشكل كامل
هنا بتلاقي نفسها في اختيار صعب..
تتخلي عن اسرتها..
ولا تتخلي عن كل احلامها؟
فيلم (كودا) مش أول ولا أخر عمل فني يتكلم عن ذوي الاحتياجات الخاصة... وتحديدًا الصم والبكم...
بس فيه نقطة عبقرية... بتفرقه عن أي عمل تاني.. فرق السما من الأرض

{تعاشب شاي}(866) لاجئين.. خيار و فقوس!

https://www.youtube.com/watch?v=Nal2s15iF1U&list=PLBsIgVvbrncB0M8dlzAbvjl79Nu8v_BW4

زي ما في حياة الانسان الشخصية او الفردية ، الازمات بتقوم بدور مهم في كشف حقيقة الانسان ده لما بيمر بيها، و زي ما من ضمن الحاجات اللي الازمات بتكشفها هي درجة تمسك الانسان بالمباديء اللي بيغني بيها و يتكلم عنها .. بيحصل بالظبط نفس الموضوع على أوسع او صورة أكبر .. لما البشرية كلها او العالم تمر بأزمة جماعية .
و بما ان الغرب بحكم سيطرته على السياسة و الاعلام هو اللي بيشكل مجموعة المباديء و الشعارات اللي بتتصدر للناس و بتحكم حياتهم ، فالغرب دلوقت بيمر باختبار حقيقي لقيمه المتعلقة بالمساواة و العدالة ورفض العنصرية و التمييز بين الناس على أساس الدين او الجنسية او اللون ..
الاختبار ده هو التعامل الغربي مع اللاجئين الاكرانيين او النازحين الاكرانيين اللي بيدقوا على باب دول اوروبا ، بعد القصف الروسي، في مقابل التعامل الغربي مع اللاجئين العرب و المسلمين و الملونين و الافارقة و كل من هو غير غربي او اوروبي .
هل الغرب نجح في الاختبار ده ؟