{تعاشب شاي}(848) الشوال.. و لاس فيخاص العرب

https://www.youtube.com/watch?v=e2lxOSYhfKM&list=PLBsIgVvbrncB0M8dlzAbvjl79Nu8v_BW4

من كام يوم كده كان فيه حفلة كبيرة اوي ..الحفلة دى شوفنا فيها ناس فرحانين و مزقططين و الفرحة مش سايعاهم .. الي بيتنطط و الي بيتشقلب و الي بيوطي يبوس الارض .. اللهم اجعله خير .. مالهم دول يا جدعان و ايه سر الفرحة المبالغ فيها دى .. هم الناس دول خدوا جايزة نوبل .. و لا كانوا تايهين من اهاليهم و لقوهم فجاة .. و لا عيالهم نجحوا في رابعة ابتدائي و لا ايه … بس الي اكتشفناه ان الناس دول فنانين و اعلاميين مصريين.. و ان سر فرحتهم انهم الحمد لله ربنا كرمهم و ووفقهم و امهم دعتلهم وخدوا جوايز من مهرجان الترفيه الي معمول في الرياض .. و الحقيقة بعد ما شوفت الفرحة دى .. اتمني ان سيادة الشوال تركي ال الشيخ يعمل حسابه السنة الجاية و يجيب عربية اسعاف في الحفلة .. علشان لو فيه ممثل جاتله سكتة او قلبه وقف من كتر فرحته بالجايزة نلحقه فبل ما يروح مننا و تبقي مصيبة ..

{عيانين بالإبداع ADHD}(03) الإيد البطالة نجسة

https://www.youtube.com/watch?v=bGN_fy88eQY&list=PLBsIgVvbrncDhUgCH6RUClfyYvcA7z51K

خلونا نبدأ رحلتنا مع الـADHD و ازاي نقدر نتغلب عليه و نطلع قدراتنا الحقيقية بالرغم من عن عينه..
رحلة طويلة.. هانمشي فيها خطوة.. خطوة.. لأننا محتاجين نتعلم عادات جديدة في كل نواحي حياتنا.. في الدراسة و الشغل و الأسرة و التربية..
و اللي هايكون مفيد لكل الناس مش للي عندهم adhdبس..
و أول خطوة في الرحلة.. أهم حاجة.. لا المذاكرة ولا الشغل ولا الإنتاجية.. أهم حاجة و أول حاجة.. النفسية.. اللي من غير ماتتظبط.. مش هاتقدر تعمل أي حاجة تانية..
عشان كده حتى مع أولادك.. لو عندهم adhd.. طول مانفسيتهم كويسة و مبسوطين و مش حاسين بمشكلة.. ماتقلقش.. تحس بالخطر بس لما تلاقي النفسية اتأثرت..

{حدوتة إسرائيلية}(11) السلاح خير من الكحك

https://www.youtube.com/watch?v=vltweIqy4-c&list=PLBsIgVvbrncBwfV9fP7smSrSv5LU39esP

اتكلمنا عن ازاي الاقتصاد الإسرائيلي قام من تحت الصفر و انطلق... و احنا قاعدين.. و اتكلمنا قبلها عن ازاي ان ثقافة الجيش الإسرائيلي في الغزل برجل حمار و الديمقراطية و انعدام العبودية للرتب..ازاي كل ده أثر على ثقافة العمل في الشركات الإسرائيلية عموما.. الثقافة دي.. لما تضيف عليها بقى الخبرات العلمية و التكنولوجية المتطورة اللي بيتعلموها في وحدات النخبة في الجيش و في صناعة الأسلحة .. بتطلعلك منتج لا يستهان بيه أبدا.. خصوصا موضوع صناعة الأسلحة ده.. اللي ظهوره أصلا كان حاجة عجيبة.. وسط دول ضخمة و غنية حواليهم مصانع السلاح عندهم بتصنع بوتاجازات و حلل و كحك و جمبري.. و في العالم عموما.. ماحدش شاف قبل كده بلد مترين في متر عندها مجمع صناعي عسكري بتاعها هي.. و بتصنع سلاحها بنفسها.. ليه ده حصل في اسرائيل تحديدا؟.. تعالوا نشوف..

{الحراق}(115) نجوم ع الأرض

https://www.youtube.com/watch?v=6lXx4AyBRD0&list=PLBsIgVvbrncBJbmFFzhjJfzK9aLoMuouz

ورجعنا للهند للمرة التالتة بعد ما اتكلمنا قبل كده على أفلام.."النمر الأبيض" و "مليونير العشوائيات"
بس فيلم النهاردة هندي ١٠٠٪ مفيهوش لا انتاج امريكي ولا تمثيل بريطاني... هو تصنيع وتجميع وتقفيل هندي...
like stars on earth .. او "زي النجوم عالأرض"
أحد كلاسيكيات بوليود اللي العالم كله شافها..

{تعاشب شاي}(849) المعدية.. و السواق الأعمى

https://www.youtube.com/watch?v=kivhF8CZoZ4&list=PLBsIgVvbrncB0M8dlzAbvjl79Nu8v_BW4

في الوقت اللي كان النظام المصري فيه لامم ألاضيشه ، وكمالة عليهم جايب فوق ال 3000 شاب من دول العالم، وجامعهم كلهم في شرم الشيخ وصارف عليهم المليارات.. لتلميع سياساته والكلام عن إنجازاته والطفرة الاقتصادية وجهود الإصلاح ، ومشاريعه اللي دايسة في مصر بطولها وعرضها ، وأثناء ما سيادته معمول له سيرك حرفيا وبيفرجوه فقرة الساحر ،والباشا قاعد منشكح وبؤه مفتوح من الضحك لحد ودانه.. كان على البر التاني من مصر المنسية ،او بمعنى اصح مصر الحقيقية بعيد عن بدل وبرفانات وشباب حزب مستقبل وطن ..الحياة اللي مش متشافة من الفقر والتهميش تحت كباري الزعيم ومنشآته اللي دايسة عليها ودافناها تحتها .. كان فيه حوالي 28 طفل من عمال التراحيل، من عزبة التفتيش بأشمون ،يومية العيل فيهم متزيدش عن 50 جنيه..كانوا متكربسين فوق بعض جوه عربية نص نقل ،في وقت البلد فيه كانت بتمر بأصعب موجة برد عدت عليها من سنين ..وعلى معدية متهالكة في منشية القناطر اللي بتربط بين محافظة المنوفية والجيزة،

{تعاشب شاي}(850) تسقط تسقط الأشجار الغير مبلحة!

https://www.youtube.com/watch?v=n5NZm3J46q8&list=PLBsIgVvbrncB0M8dlzAbvjl79Nu8v_BW4

مبقاش صعب على أي حد متابع للشأن المصري، أنه يلاحظ هوس وعشق السيسي للإنشاءات الضخمة والطرق والكباري.. ريحة الاسمنت بتكيفه اكتر من ريحة الفل والياسمين..منظر الخابور وهو بيتضرب في الأرض ، بيمتعه اكتر من منظر شجرة واقفة في حالها على الرصيف كافية غيرها شرها..فكرة استهدافه لأي مساحة خضرا، أو مشتل بينتج ويبيع نباتات زينة ، أو شجرة حظ أمها المنيل إن وقفتها جت في سكة كوبري ولا محور ، مبقتش مستخبية على حد ..هو بيكره بشكل واضح اللون الاخضر ، ممكن والله اعلم يكون اللون ده بيفكره بأيامه الاولى ،بعد ما كبر بسم الله ما شاء الله وبقى رطب أد الدنيا؟ ..متفهمش ..طبعا يستثنى من الحكاية دي النخل بأنواعه لأسباب قد تكون عائلية.. لكن السيسي مؤخرا بقى مكتفاش بأنه يكون الرئيس صاحب الرقم القياسي في قطع آلاف الأشجار ، وفشخه للتوازن البيئي في سكته لمشروع كوبري لكل مواطن.. واستبدال شجر الزينة اللي كان في سكة الكوبري ، بالكافيهات

{علمني الغزالي}(27) السلام النفسي

https://www.youtube.com/watch?v=ny3CJSBdzII&list=PLBsIgVvbrncAHNkFLd8veDFxr1q-HieVu

و خلونا نستكمل رحلتنا مع الشيخ الغزالي.. و مازلنا مع كتاب الجانب العاطفي من الإسلام..
اتكلمنا عن الإسلام و الإيمان و الإحسان.. و خلونا النهاردة نتكلم عن سلامة النفس.. و صحة النفس و القلب.. نتكلم عن التربية..

{عرفوه بالعلم}(27) عودة أخضر رجل في العالم

https://www.youtube.com/watch?v=U4JDR_ttORg&list=PLBsIgVvbrncChqmejIOyA-Xp_dcywQQln

خلونا نرجع و نستكمل رحلتنا هنا من تاني..
اتكلمنا في الحلقات اللي فاتت عن تاريخ العلم عموما..
و خلونا نبدأ رحلة جديدة النهاردة نتفرج فيها على خلقة ربنا.. و نسأل نفسنا ليه؟.. و ازاي؟..
فمانلاقيش إجابة غير.. سبحان الله..
عالم كبير.. محتاجين نشوفه.. عشان نحس بالدهشة شوية.. فنقول سبحان الله.. لأننا وسط المعتقلات الخرسانية اللي عايشين فيها.. بقينا تقريبا مابنشوفش خلقة ربنا.. ولا إعجازه فخلقه.. فبقينا عاملين زي نكتة أو كاريكاتير شفته.. اتنين أجنة في بطن امهم.. واحد فيهم بيقول للتاني.. انت مؤمن بوجود حياة بعد الولادة؟.. تفتكر فيه حاجة اسمها "ماما" أصلا؟.. فالتاني قال له فكك يا اسطى.. ماما دي وهم من صنع خيال البشر..

{ساسَ يسُوسُ}(94) ابن الدايرة

https://www.youtube.com/watch?v=kcz8rdW_Nxs&list=PLBsIgVvbrncC_hFoIcgf8_NyqLkF1nkba

واتكلمنا فى الحلقة اللى فاتت عن إزاي هتبني اقتصاد قوي فى بلدك، وإيه أهمية الفلوس فى دولة لسه بتقوم على رجلها زي دولتك، وإن حاكم زيك محتاج كل قرش مش عشان يعمل مشاريع وتنمية ده قد ما إنه يظبّط محاسيبه ويصرف على الجيش ويدّلع عيلته عشان محدش يطمع فى الكرسي بتاعه، وطبعًا قبل أي كل ده يبني ثروة محترمة يحوّلها أول بأول على بنوك بره عشان لما يخرج بره الحكم.
وجرينا معاكم بالأحداث وعرفنا إزاي هتجيب فلوس من كل وسيلة فى البلد، من أول القطاع العام اللى هتكوّش عليه وتفرض تعاقدات من الحكومة على سلع وخدمات ومشاريع بتقدمها الشركات اللى تبعك وتبع رجالتك بس، لحد القطاع الخاص اللى هتقلّبه بكل وسيلة ممكنة بالرسوم والتراخيص والإتاوات والتأميم، وتخلّص كل ده وتدخل على الشغل الشمال من تهريب ومخدرات وسلاح وتقلّيب الناس في فلوس الخدمات العامة وحتى فلوس الإعانات الدولية وقت الكوارث.

{عيانين بالإبداع ADHD}(٠٤) عقلي الصغير سيحتمل

https://www.youtube.com/watch?v=6oJADn6s3f4&list=PLBsIgVvbrncDhUgCH6RUClfyYvcA7z51K

و مازلنا في رحلتنا مع الadhd.. و لسة بنتكلم عن عقل الهدهد .. اتكلمنا في الحلقة اللي فاتت عن الشبكات العصبية.. و ازاي ان عندنا شبكة بتنشط لما نكون بنعمل حاجة بوعي و تركيز.. شبكة العوامة.. و شبكة تانية بتنشط لما نكون شغالين على الطيار الآلي.. أو عايمين في مية البطيخ.. و ازاي ان كل شبكة لما بنستخدمها أكتر بتقوى أكتر.. زي العضلات بالظبط.. مازلنا بنتكلم عن المخ برضه.. و خلونا النهاردة نتكلم عن جزء تاني في المخ.. المخ الصغير..
و نتكلم بالمرة عن وصفة سريعة مجملة للتعامل مع أولادنا لو عندهم adhd..

{تعاشب شاي}(851) صحة يا ريس

https://www.youtube.com/watch?v=Yvwwv59nI_U&list=PLBsIgVvbrncB0M8dlzAbvjl79Nu8v_BW4

فيه ناس كتير فاكرين ان الريس السيسي مبيعملش حاجة في حياته غير انه بيبني كبارى و بيعمل مشاريع فاشلة و بيلغي الدعم و بيلم من الناس الغلابة ضرايب و رسوم .. و الحقيقة ان الكلام ده مش صحيح و فيه ظلم كبير اوي لعنقود البلح الي بيحكم البلد .. لان سيادة الريس مثلا بحكم تخصصه الطبي باعتباره طبيب فلاسفة اد الدنيا بيهتم جدا بصحة المواطن .. بس فيه مشكلة صغيرة بصراحة و هي ان السيسي مش مهتم بصحة المواطن علشان يحسنها .. لا هو مهتم بالقضاء عليها خالص.. بس مش مشكلة عادي .. المهم انه مهتم و خلاص الراجل عداه العيب بصراحة !

{الأسبوع ف كيس}(296) الرئيس اللفتة الإنسانية

https://www.youtube.com/watch?v=sWdoVXq-AO4&list=PLBsIgVvbrncAeJMvwCpzZg-ow581Oh13M

في إطار من الروح الرياضية والهدوء والسلام ، وفي تطبيق نموذجي للديمقراطية والعملية الانتخابية الراقية..انتهت على خير انتخابات رئاسة نادي الزمالك، ووصل من يستحق اصوات جمهور النادي والأندية المجاورة لمنصب رئيس النادي العريق ..مستر اكس الرياضة ،بات مان القانون ، سبايدر مان المجالس النيابية وملك السيديهات الخلوق مرتضى منصور عاد من جديد، ورجع للساحة بوجه مشرق ،ووعود بفتح صفحة جديدة مع الكل ، وأمهات الكل ..هو صحيح بقاله كام يوم ماسابش حد كان ضده الا وهزأه وهدده..وصحيح طلع فصل اتنين مذيعين من قناة الزمالك على الهوا ..بس ده لا يمنع أنه مكمل في وعوده بفتح صفحة جديدة مع الكل.. هو صحيح طلع شتم نادي فيوتشر على الهوا برضه ، وهدده باللجوء للفيفا لأنه تابع لحزب سياسي اللي هو مستقبل وطن، وقال إن ميصحش يكون نائب رئيس النادي متحرش بدون ذكر اسماء احمد شوبير يعني..بس كل ده مايمنعش خالص أنه ناوي يفتح صفحة جديدة مع الكل.. طبعا حزب مستقبل وطن اللي تابع للمخابرات اساسا ناس محترمة

{تعاشب شاي}(852) الديمقراطية مش ليك يا مرزوق

https://www.youtube.com/watch?v=-cntVI5s6nQ&list=PLBsIgVvbrncB0M8dlzAbvjl79Nu8v_BW4

فيه خناقة و عركة كبيرة دايرة بين المصريين بقالها كام سنة علي الديمقراطية .. ايوه احنا معندناش ديمقراطية فعلا .. بس بنتخانق عليها بردو عادي و لا يهمنا .. هتلاقي فيه ناس بتقول ان وجود الديمقراطية في مصر ضروري وشرط اساسي علشان نبقى دولة حقيقية متقدمة و متحضرة ومحترمة زى بقية خلق الله في العالم كله .. فيه ناس تانية بقي عباقرة و جهابذة وخبراء استراتيجيين من الي فاهمين كل حاجة دول .. يقولولك لا .. الديمقراطية دى مينفعش تطبق عندنا و متمشيش مع الشعب المصرى و لا تليق عليه .. و تقريبا كده سعادة الريس السيسي لما عرف بالجدل ده خد علي خاطره .. و زعل اوي ان المصريين سايبين دورهم الأساسي في الحياة وهو انهم يجوعوا و يفتقروا و يتحبسوا في عهده و قاعدين يتكلموا عن الديمقراطية و الكلام الفارغ ده .. فراح واخدها من قصيرها و قام مخلص على اي امل فاضل في الديموقراطية و دفن جثته تحت النخلة الي هو واقع منها و خفاه من الوجود.. علشان نفوق كده ونبطل خناق و نلتفت لحياتنا و نتفرغ للمصايب الي الريس بيعملها فينا !

{الحراق}(116) الكينج رشاد Kinr Richard

https://www.youtube.com/watch?v=kzeGGI3of0I&list=PLBsIgVvbrncBJbmFFzhjJfzK9aLoMuouz

مش كل ريتشارد يبقي قلب أسد.. بس ريتشارد بتاع النهاردة كان قلب أسد برضه... وكان هيقتل الواد اللي اتحرش ببنته .. بس مش دي أهم حاجة في الموضوع.. عشان الموضوع كبير ويستاهل الست ترشيحات اوسكار اللي خدهم من كم يوم!فيلم الملك ريتشارد King Richard..
بيحكي قصة أب فقير ومش متعلم وصحته على قده وساكن في حي كله جريمة وعصابات ومتحرشين ومدمنين... قرر انه يدرب بناته الاتنين عشان يبقو ابطال عالميين في التنس!
قصته على فكرة عامله زي قصة "لازلو بولجار"
- لازلو مين يا فندم؟!
لازلو بولجار حضرتك.. ايه معقوله متعرفوش؟ طيب اتفضل في الانتريه وانا أقولك كل حاجة !

{تعاشب شاي}(853) مليون ريان.. و البئر واحد

https://www.youtube.com/watch?v=RWQQvSLBqMM&list=PLBsIgVvbrncB0M8dlzAbvjl79Nu8v_BW4

على طريقة اغلب الأنظمة العربية واستخدام نفس الكتالوج، في ردود فعلها وتصرفها في الحوادث المأساوية اللي تستوجب المحاسبة ، زي مثلا تعامل النظام المصري في مأساة إنسانية زي حادثة مستشفى الحسينية..اللي مات فيها مرضى بسبب نقص أنابيب الأكسجين، رغم تفاعل الملايين معاها ، وتعاطف الناس مع ضحايا كارثة الإهمال والتقصير..فكان رد فعل النظام هو إصدار قرار بمنع التصوير في المستشفيات، من غير تقديم أي مسئول للمحاكمة بالعكس ..حققوا مع الممرضات اللي انهاروا وكانوا هيحبسوا اللي صور الواقعة .. الموضوع مختلفش كتير في المغرب ، بعد حادثة الطفل ريان اللي شغلت العالم كله ايام ،لا في طريقة الغلوشة وبعترة المسئولية يمين وشمال، وتضليل وتتويه الرأي العام عن المسئول الحقيقي ،والمقصر الحقيقي المباشر عن وفاة طفل.. وتوجيه الإعلام أنه ميجيبش سيرة رئيس حكومة أو وزير أو محافظ ،استعدادا لتقديم كبش فدا يلبس الليلة وتترمي في حجره المسئولية لوحده .. وخلونا نتكلم عن الحدث اللي استحوذ على اهتمام وتعاطف الكوكب كله

{تعاشب شاي}(854) سبعون عاماً من البلح

https://www.youtube.com/watch?v=Rnw2oooTg0g&list=PLBsIgVvbrncB0M8dlzAbvjl79Nu8v_BW4

في يوليو الجاي ان شاء الله و عليكم خير .. هيكون مر علي مصر سبعين سنة تحت الحكم العسكرى الي بدا سنة 52 .. و بالمناسبة السعيدة دى نحب نشكر الاخوة العسكريين الي حكموا البلد طول السنين الي فاتت .. لانهم استحملونا رغم تقل دمنا .. و اجتهدوا كتير علشان خاطرنا مع اننا ما نستاهلش.. و ملولنا البلد قمع و ظلم و استبداد و ديكتاتورية و تضخم و بطالة و انهيار اقتصادي و حاجات تانية كتير .. بس المشكلة مش ان بقالنا سبعين سنة تحت الحكم العسكرى .. المشكلة الاكبر ان الحكم ده شكله مكمل معانا سبعين سنة تانيين .. و مبقاش حكم عسكرى بس ده بقي عسكرى و بلحي كمان !

{علمني الغزالي}(28) كُل و اشكر

https://www.youtube.com/watch?v=JtcXcaBDuh4&list=PLBsIgVvbrncAHNkFLd8veDFxr1q-HieVu

الإنسان عجيب.. غرقان في نعم ربنا.. بس دايما مش شايف غير اللي ناقصه و بس.. مش شايف النعم..
فلا عاش سعيد.. ولا حتى أدى شكر النعم اللي عنده..
اللي الإنسان هو اللي محتاج انه يؤدي شكرها.. ربنا مش محتاج منه حاجة..
{قُلْ أَغَيْرَ اللَّهِ أَتَّخِذُ وَلِيًّا فَاطِرِ السَّمَاوَاتِ وَالْأَرْضِ وَهُوَ يُطْعِمُ وَلَا يُطْعَمُ قُلْ إِنِّي أُمِرْتُ أَنْ أَكُونَ أَوَّلَ مَنْ أَسْلَمَ وَلَا تَكُونَنَّ مِنَ الْمُشْرِكِينَ (14)}(الأنعام)
القرآن هاتلاقيه بيعرض نعم كتير الناس غافلين عنها.. عشان يصحي ضماير الناس أحسن يقعوا في مصيدة الجحود.. اللي بيحول حياتهم لجحيم..
هانلاقي مثلا سورة كاملة.. سورة الرحمن.. بتستعرض نعم في الدنيا و الآخرة.. و كل شوية تفكرك..
{فَبِأَيِّ آلَاءِ رَبِّكُمَا تُكَذِّبَانِ} (الرحمن)
طب ليه الشكر و الحمد.. مادام ربنا مش محتاج مننا حاجة؟..

{تعاشب شاي}(855) حلِّي بُقي و افرحك!

https://www.youtube.com/watch?v=lhz2UoKflow&list=PLBsIgVvbrncB0M8dlzAbvjl79Nu8v_BW4

الحقيقة ان الحاج طارق شوقي وزير التعليم راجل مجتهد جدا .. و لما اخترع منظومته العجيبة معملهاش كده و سابها و سكت . .. ده كل يوم بيضيف ليها حاجة جديدة تبوظ التعليم اكتر .. و تخرب بيت الطلبة و اولياء الامور و المدرسين اسرع .. لان سيادة الوزير مستعجل علي الموضوع ده اوي .. و نفسه يحقق هدفه النهاردة قبل بكرة .. و طبعا سيادة الوزير مش هدفه انه يعلم الطلاب لا سمح الله .. هو هدفه انه يعقد الطلاب .. و ماشي في الموضوع ده كويس جدا بصراحة و بخطي ثابتة !

{عرفوه بالعقل}(52) الموسيقى و الغناء في حياة السلف

https://www.youtube.com/watch?v=dc1LmwwpRtc&list=PLBsIgVvbrncCUHtc-Gd9d0t5wBXwC0_DO

و مازلنا في رحلتنا مع قضية الموسيقى و الغناء من خلال كتاب دكتور عبد الله الجديع ”الموسيقى و الغناء في ميزان الإسلام“..
ناقشنا لغاية دلوقت الأدلة من القرآن.. و السنة.. و قضية الإجماع و آراء المذاهب المختلفة..
خلونا النهاردة نتكلم عن الموسيقى و الغناء في حياة سلف الأمة.. الصحابة و التابعين..
قبل مانختم في الحلقة الجاية بتفصيل الحكم الشرعي في الموسيقى و الغناء بناءا على كل الأدلة دي..

{حدوتة إسرائيلية}(12) سبع صنايع.. و البخت والع!

https://www.youtube.com/watch?v=sn3mPwqrAqc&list=PLBsIgVvbrncBwfV9fP7smSrSv5LU39esP

خلونا النهاردة نستكمل رحلتنا و نحاول نجاوب على سؤال مهم جدا.. ليه دول غنية زي الإمارات مثلا.. ماقدرتش تحقق اللي إسرائيل حققته في المجالات الاقتصادية و العلمية؟.. ناقصهم ايه؟
تعالوا نشوف..