{كشف حمادة}(69) مولانا النسوانجي.. عدنان أوكطار (هارون يحيى)
https://youtu.be/fB4sbikl_dE

لو مبتعرفش تركي ،، و مسمعتش قبل كده عن واحد اسمه عدنان اوكطار ،، و بختك الاسود خلاك تتفرج بالصدفة علي البرنامج بتاع عدنان ده في التليفزيون ،، هتبص تلاقي واحد متصابي قاعد بيتكلم و حواليه شوية ستات لابسين بدل رقص و مشغلين مزيكا و عمالين يرقصوا حواليه و حاجة في منتهي المليطة .. ساعتها هتقول ده اكيد صاحب ديسكو ،، و لا قواد عامل لايف من الشقة المفروشة الي هو شغال فيها ،، و طبعا لو ساعتها فيه حد حلفلك مية يمين ان عدنان ده بيقول علي نفسه انه داعية اسلامي ،، و ان البرنامج المسخرة ده هو الي بيشرح فيه مباديء الاسلام ،، مش بس هتكدب الي هيقولك كده،، ده انت مش بعيد تشيل التليفزيون و تكسره علي دماغه ،،

لمشاهدة الحلقة على يوتيوب:
https://www.youtube.com/watch?v=a_lDzEGwcTo&list=PLBsIgVvbrncC_hFoIcgf8_NyqLkF1nkba

شفنا الحلقة اللي فاتت شكل المؤسسات السياسية و الاقتصادية أيام عبدالناصر. و شوفنا انه رغم ان من اهداف ثورة يوليو زي ما كان بيقولوا إقامة حكم ديمقراطي سليم، فعبد الناصر قالهم سليم ده يبقى ابن خالتك!
و عمل كل ما يتناقض مع حكم ديموقراطي سليم من الغاء الاحزاب و دسترة لنظام الحزب الواحد وإلغاء حرية الاعلام بالكامل و القضاء على استقلالية القضاء وسيادة القانون بالمحاكم الاستثنائية و فصل القضاة اللي عارضوه.
و اقتصاديا اسس عبدالناصر مؤسسات اقتصادية استحواذية سرقت حقوق الناس باسم التأميم و رأس المال الوطني.. و وقع في نفس غلطة محمد علي بالاعتماد على فكرة النهضة من خلال القطاع العام.. اللي في الاخر انهار زي ما كلنا شايفين و فشلت مصر في تحقيق الثورة الصناعية و تحقيق النمو الاقتصادي المستدام.
وانتهى عصره بالنكسة.. اللي زي ما شوفنا انه عبدالناصر بذات نفسه اقتنع انها كانت بسبب غياب الديموقراطية.
ومن بعد ناصر جه السادات بفكر مختلف.. فتعالوا نشوف ايه كان شكل المؤسسات أيام السادات ومن بعده مبارك.

{تعاشب شاي}(533) فيها حاجة حلوة
https://www.youtube.com/watch?v=YyKl4R03rEE&list=PLBsIgVvbrncB0M8dlzAbvjl79Nu8v_BW4

كل رمضان تقريبا بنتوقّع موجة جديدة من الاعلانات لجمع تبرعات لجمعيات ومؤسسات أهلية وخيرية .. بتختلف أنشطتهم إلا إن محدش يقدر يختلف على أهمية الدور اللي بتلعبه الجمعيات الأهلية والخيرية في المجتمع المصري .. الجمعيات دي بتبني مدارس وبتقوم بأدوار موازية لوزارة التربية والتعليم عشان تقاوم الأمية والجهل .. وجمعيات تانية بتبني مستشفيات وعيادات وبتتكفّل بعلاج حالات مرضية حرجة ومستعصية متقدرش تتكفّل بيها وزارة الصحة .. وجمعيات تالتة قايمة على مبادرات كفالة الأيتام ودور الرعاية للمسنين وغير القادرين وذوي الاعاقة .. وده المفروض انه دور وزارة التضامن الاجتماعي .. غير جمعيات المشروعات الصغيرة والجمعيات الزراعية وجمعيات الأقليات والفئات المهمشة اللي محدش مهتم بيهم ولا بيعبر عنهم .. والجمعيات دي بتقوم بدور وزارة التنمية في انها بتوفر كل أنواع الدعم لأن ..
لأ ثانية واحدة كده .. هي لو الجمعيات الأهلية والخيرية بتعمل كل ده .. الدولة بتعمل ايه؟

{علمني الغزالي}(11) تلاقي امك اللي جايباهالك!
https://www.youtube.com/watch?v=TJfO1M8d2wg&list=PLBsIgVvbrncAHNkFLd8veDFxr1q-HieVu

اللي يتأمل آيات القرآن. يلاحظ انها دايما بتأكد على عنصر ”الوحدة“.. وحدة الأمة تحت مظلة الإيمان و العدالة.. المقاصد اللي كان التركيز عليها واضح جدا من النبي ”ص“.. و من الخلفاء الراشدين من بعده.. و مافي مرة بعدت الأمة عن استهداف تحقيق المقاصد دي.. الا و ظهرت الفتن و المظالم بين الناس و الأمة نفسها اتمزعت بسبب الصراعات.. و اتقسم الناس لطبقات محبوسين جواها..
و سبحان الله تلاقي القرآن بيتكلم عن الطبقات دي من أول يوم..بيحكي حججهم و أكاذيبهم و صويتهم و هم خايفين المنظومة الطبقية بتاعتهم تنهار..
ليه يعني؟.. هو الإسلام ضد ان الواحد يكون غني؟ .. أبدا.. امال فين المشكلة؟
المشكلة في السرف.. و الترف..
السرف في المعيشة.. هو تجاوز الحد في النفقة و إجابة كل مطالب النفس..
و الترف.. هو التعود و الإلف اللي بيحصل على الوضع ده.. لدرجة ان الرفاهية تتحول لضروريات.. لدرجة ان الشخص يألف النعمة لدرجة احتقارها و عدمالشعور بقيمتها و عدم شكر الله عليها..

{تعاشب شاي}(534) ثورة دي ولا كابوس!
https://www.youtube.com/watch?v=KAS4lfty-ww&list=PLBsIgVvbrncB0M8dlzAbvjl79Nu8v_BW4

بتمسك تليفونك وفاتح الفيسبوك وبتقلب فيه .. فلقيت صفحة الذكريات اللي بتفكرك بكل حاجة عملتها من سنين .. فضولك بيحركك وتفتح الذكريات دي لنفس اليوم من كل سنة وتقول لنفسك .. ألاه .. ده 25 يناير .. هو أنا نسيت ولا كُنت بحاول أنسى .. أنا بصراحة مكنتش عايز أفتكر .. منا كنت ساهي في شغل ولا في بيت ولا في عيال .. مش حابب افتكر اليوم اللي اتحول من مصدر الأمل في حياتي وحياة ولادي لمصدر الاحباط ويأس وفشل .. مش حابب افتكر اللي ماتوا ماتوا ليه.. عشان ييجي النهاردة بالشكل ده بعد ما ماتوا .. ولّا أفتكر؟ أصل اليوم ده تحديدا متقدرش تنسى فيه أحساسك ومشاعرك وانت فخور بنفسك وفخور بكل اللي حواليك .. وانت بتقول لنفسك ان من النهاردة البلد دي هتتغير .. والناس بدأت التغيير ده بنفسها ومن نفسها .. ياااه .. عدى 10 سنين على اليوم ده؟ بالسرعة دي؟
عموما ..أيوة فات 10 سنين على 25 يناير 2011 .. وأيوة مفيش حاجة من أهداف الثورة اتحققت .. وده لأن الثورة نفسها اتسجنت واتحكم عليها بالنسيان ..

{الحراق}(47) خطوات الشيطان Breaking Bad

https://www.youtube.com/watch?v=foQZ_vDyhbc&list=PLBsIgVvbrncBJbmFFzhjJfzK9aLoMuouz

مبدئيا المسلسل مسموش "اختلال ضال"!!!.. هو يعني ايه "اختلال ضال" أساسا؟
ياخي تبًا لترجمات ويكيبيديا اللي خليتنا نعرف قيمة أنيس عبيد اللي كنا بنتريق عليه..
يمكن اكتر ترجمة قريبة لكلمة "بريكينج باد" من لهجتنا المصرية هي.. "عياره فلت" او "طاح في الناس"..
اللي هي اكتر وصف مناسب للشخصية اللي هنتكلم عليها النهاردة.. واللي انت عارفها كويس سواء شفت المسلسل او حتى عارفها من الميمز... يمكن مفيش شخصية خياليه اشهر منها غير يمكن ... سوبر مان؟
ده حتي سوبرمان فيه ناس شايفاه لعب عيال ومراهقة... مع انه راجل طيب وبيحارب الأشرار..
انما السيد والتر وايت هو الأشرار نفسهم.. ومع ذلك مفيش حد اتفرج عليه غير وساب فيه أثر صعب ينمحي.. سواء بشكل مباشر في العقل الواعي... او على مستوى اللاوعي
لأن اغلب الناس للأسف معندهاش وقت فاضي تقعد تحلل في أسباب اعجابها بمسلسل..
انما احنا بأه فاضيين، وهنقولك بالتفصيل ايه اللي يميز السيد هيزنبرج.. عن أي شخصية تانية في تاريخ التلفزيون..

{الأسبوع ف كيس}(253) الشرطة و الشعب راسين في لباس

https://www.youtube.com/watch?v=EdemjD5l_d0&list=PLBsIgVvbrncAeJMvwCpzZg-ow581Oh13M

وكعادة الصين اللي سباقة دايما في البحث العلمي والاكتشافات الطبية ..زي ما هي سباقة وليها الريادة في اكلاتها اللذيذة لكل حاجة يقابلوها في سكتهم ..لأي كائن حي يتكعبلوا فيه ..واللي برضه سباقة في الفرفرة اللي بتفرفر بيها الكوكب من الأمراض والأوبئة بسبب البلاوي اللي بيطفحوها..الاسبوع ده كانت سباقة في اكتشاف وسيلة جديدة في مسحات الكشف عن الوبا.. وبشكل فعال ودقيق اكتر من الاول ..اكتشفوا المسحة الشرجية يا معلم ..ودي بقى للي كان بيسأل عن معاد الصبة الجديدة في مصلحة المواطن واستناها من الحكومة ..فجاتله من الصين المرة دي..الجميل بقى أن أول موقع نشر البشرى السارة دي كان موقع صدى البلد..وانا كده اتأكدت من مصداقية الخبر ..
وعرفت مين أول مصري عمل المسحة دي بكل حماس واتأكد من فاعليتها.. وعلى جانب آخر..كل سنة وانتم طيبين..الاسبوع ده بنحتفل بذكرى 25 يناير ..عيد الشرطة طبعا اللي لسبب لا يعلمه إلا الله..فيه عبقري اقترح أن الخميس 28 يناير يبقى هو معاد الاجازة الرسمية له ..

فيلم الليلة من حلقة الحراق The White Tiger مترجم و بأحجام مختلفة مناسبة للباقات

{تعاشب شاي}(535) عودة الأندال

https://www.youtube.com/watch?v=lhb1U1cqmJA&list=PLBsIgVvbrncB0M8dlzAbvjl79Nu8v_BW4

لما تيجي تبص حواليك كده بعد عشر سنين من ثورة يناير ،، هتلاقي حاجة غريبة جدا ،، الناس الي عملت الثورة كلهم مرميين في السجون ،، و الناس الي قامت عليهم الثورة كلهم عايشين حياتهم و متنغنغين و واخدين مناصب كبيرة ،، و ماسكين مراكز مهمة في مؤسسات البلد ،، ايه يا رجالة مبارك ،، ايه قلة الذوق بتاعتكم دي ،، انتوا متعرفوش ان فيه ثورة جت شالتكم و لا نسيتوا ان الثوار طردوكم من حكم البلد و لا ايه الموضوع ،، ده لو انتوا الي قومتوا بالثورة مش قامت عليكم مكنتوش هتوصلوا للمناصب الي انتوا فيها دلوقتي دي و الله

{الحراق}(48) الجوكر الهندي The White Tiger

https://www.youtube.com/watch?v=bAeqGq-ciDg&list=PLBsIgVvbrncBJbmFFzhjJfzK9aLoMuouz

اتكلمنا قبل كده عن أفلام (الجوكر و باراسايت و جانجو المش متسلسل) النهاردة جايبينلكو التلات أفلام دول مضروبين في خلاط هندي.. ومحطوط عليهم صوص حراق من الفساد والفقر وطموحات الصعود الاجتماعي... وفيه نمر ابيض في الموضوع، وشنطة فلوس... وجريمة قتل... وانسان حلم حياته يبقي خدام.
المهم هتنبسطو يعني..

{تعاشب شاي}(536) 69 سنة شرطة

https://www.youtube.com/watch?v=zbITAQQfwoU&list=PLBsIgVvbrncB0M8dlzAbvjl79Nu8v_BW4

طبيعي أن أي دولة في العالم يكون عندها يوم وطني أو مناسبة قومية ..تفتخر بيها ويحتفل بيها الكل نظام وشعب..لأن النظام والشعب في النهاية مفروض حاجة واحدة ..وفي مصر زيها زي الدول دي ..مع الاعتراف بأننا دولة اوڤر شوية وعندها اسهال من المناسبات القومية والاجازات..اللي وصلت ان لو زعيم محبوب بيحب التين هنعمل يوم وطني للتين البرشومي ..عندنا بقى وفي 25 يناير من كل سنة بيحتفل النظام ..وبيخلي الشعب يحتفل معاه غتاتة كده بعيد اسمه عيد الشرطة وبيخليه اجازة رسمية كمان ..وهنا بقى يظهر كام سؤال ..ليه 25 يناير عيد للشرطة؟ وايه طبيعة جهاز الشرطة ده اصلا ؟ وهل الشرطة اللي بنحتفل بيها من 69 سنة هي نفسها شرطة دلوقتي؟ هل شرطة 1952 سبب الاحتفال ده هي شرطة زكي بدر وحبيب العادلي؟ هل شرطة زمن الاحتلال الإنجليزي..هي شرطة العسكر من عبد الناصر للسيسي؟ …

{تعاشب شاي}(537) البوتوكس الرئاسي

https://www.youtube.com/watch?v=KzXcko8IOJQ&list=PLBsIgVvbrncB0M8dlzAbvjl79Nu8v_BW4

لو قلتلك ان السيسي دفع ١٣ مليون دولار في ست سنين لشركة امريكية .. هتقول اكيد الشركة وردتله بالفلوس دي بضاعة مثلا ،، و لا بنتله بيهم كوبري و لا استراحة من الي بيحبهم ،، بس الحقيقة غير كده ،، السيسي دفع كل الفلوس دي للشركة بس علشان تحسن صورته و تجملها و تخبي عيوبها قدام الامريكان ،، معقول ؟ ،، ١٣ مليون دولار علشان صورة السيسي تتحسن ،، شوية بصراحة ،، دول لو صرفوا مال قارون علشان يداروا علي البلاوي الي فيه مش هيكفوا و الله

{تعاشب شاي}(538) علي بابا و الاربعين بلحة!
https://www.youtube.com/watch?v=YnAJyzheQps&list=PLBsIgVvbrncB0M8dlzAbvjl79Nu8v_BW4

لو ربنا كرمك وبقيت ملياردير أد الدنيا وبتلعب بالفلوس لعب .. يبقى لازم تسأل نفسك سؤال..
انت ملياردير في دولة نظامها ديموقراطي؟ ولا دولة نظامها استبدادي ديكتاتوري؟
أصلك لو ملياردير في دولة نظامها ديموقراطي .. غالبا مش هتحتاج تتعامل مع نظام الدولة غير بالقانون اللي ماشي عليك وعلى غير ومش هيعورك غير في شوية الضرايب اللي بتدفعهم كل سنة واللي ممكن يوصلوا لـ 60% من مكسبك مثلا ..
بس بص متقلقش ..
لان الاحتمال الأكبر انك تبقى ملياردير في نظام ديكتاتوري .. سواء نظام عسكري أو نظام الحزب الواحد .. وساعتها لازم تسأل نفسك سؤال برضو..
هل أنا مع النظام ومع سياساته وتابع ليه وبنفذ أوامره بالحرف ولا أنا ضد النظام ومعارض ليه أو حتى مبطبلّوش ومليش دعوة بالسياسة ؟
لأن لو حضرتك ملياردير ضد النظام الديكتاتوري أو حتى مش بتطبله .. فغالبا مش هتلحق تتمتع بالكام مليار ومصيرك اسود ومنيل ..

فيلم حلقة الليلة من سلسلة “الحراق”.. فيلم “كشف المستور”

{الحراق}(49) فقش المفقوس

https://www.youtube.com/watch?v=HioXhk6afPk&list=PLBsIgVvbrncBJbmFFzhjJfzK9aLoMuouz

السينما المصرية زي ما فيها على مدار تاريخها افلام مهمة وحلوة ..طرحت موضوعات محترمة وناقشت قضايا وقدمت افكار..منها اللي مانجحش على المستوى الجماهيري أو التجاري وقت عرضه ..لكن التاريخ وزيادة وعي المشاهد نصفه بعدها يمكن بسنين ..كمان قدمت وخصوصا في التسعينات واواخر التمانينات افلام في منتهى رداءة الفكر والمضمون..في وقت الانتاج السينمائي فيه كان بيعاني فعلا سواء من ضعف الإنتاج أو ضعف المستوى الفني..سواء ورق أو اخراج أو موهبة ممثلين..فكان بيتم تعويض الفقر الفني قصاد المراهقين أو اللي بيحبوا السينما.. بالاڤورة وبيع الكلام ..بداية من الألقاب اللي بيطلعها صحفيين تحت السلم على ممثلين تعبانين اساسا ..فنلاقي نجمة الجماهير ونجمة مصر الأولى وفراشة الحديقة وهدهد الجناين وكل الهبل ده..ومعاه بقى في الدعاية لأي فيلم عبيط..ان الفيلم العالمي الذي حطم مش عارف ايه وتجاوز الخطوط البنفسجي وتخطى حدود السلوم ..

{تعاشب شاي}(539) ميانمار.. و سلسال البلح

https://www.youtube.com/watch?v=qemR-2ij3uQ&list=PLBsIgVvbrncB0M8dlzAbvjl79Nu8v_BW4