{تعاشب شاي}(581) البلح المسلح

https://www.youtube.com/watch?v=--qE0wMM-qw&list=PLBsIgVvbrncB0M8dlzAbvjl79Nu8v_BW4

السيسي بقاله كام سنة عمال يشتري بالفلوس الي معاه اسلحة من كل الاشكال و الانواع ،، مقاتلات علي قاذفات علي حاملات طائرات ،، مش مخلي حتة سلاح واحدة موجودة في اي دولة في العالم الا و بيشتريها ،، و فيه ناس كتير اوي مش قادرة تفهم هو بيشتري كل السلاح ده ليه يعني و احنا مبنحاربش اساسا ،، بس احنا مش عاوزين نظلمه ،، جايز لو دورنا كويس نكتشف ان فيه حرب دايرة في البلد و احنا مش واخدين بالنا ،، و جايز بردو يكون السيسي بيشتري السلاح ده لهدف شخصي ،، يكون بيصطاد بيه عصافير مثلا ،، او يكون عليه تار و بيجيب السلاح ده علشان يحمي نفسه ،، فيه احتمالات كتير اوي بصراحة بس احنا الي مش فالحين الا في الهجوم و الافترا علي الراجل

{تعاشب شاي}(582) ما نجيلكمش في انقلاب

https://www.youtube.com/watch?v=QGWMhruoKaI&list=PLBsIgVvbrncB0M8dlzAbvjl79Nu8v_BW4

احنا زعلانين من الشعب الأردني .. احنا كشعوب عربية زعلانين فعلا يعني
مكنش العشم والله .. بقى يبقى عندكم كل الأكشن ده في العيلة الملكية ومتحكولناش ..
فالشعب الأردني يستغرب .. أكشن ايه ونحكيلكم ايه .. سيبونا الله لا يسيئكم في الأحوال الاقتصادية اللي احنا واقعين فيها دي مش فايقين ..
يعني انتو مش عارفين ايه اللي بيحصل عندكم؟
لا والله ولا حد جابلنا سيرة ..
طيب يا جماعة بيقولوا ان كان هيحصل عندكم انقلاب .. وأخو الملك بيتآمر على الملك ..
بس متقلقوش على الاستقرار .. الاستقرار بخير وزي الفل .. ودي مش أول مرة يعني الشعوب العربية تتفاجئ بأحداث سياسية من النوع ده ..
احنا المفروض كبرنا وبقينا عارفين لوحدنا ان الشعوب العربية آخر من تعلم ..

{تعاشب شاي}(583) انسف حمامك القديم!

https://www.youtube.com/watch?v=QMhfn-5ziYs&list=PLBsIgVvbrncB0M8dlzAbvjl79Nu8v_BW4

من كام يوم طلع علينا وزير الخارجية المصري سامح شكري علشان يهاجم الاعلام و ينتقده ،، و يقول ان مصر محتاجة لآلة اعلامية جديدة لانج ،، علشان تظهر الانجازات و المجهود الخرافي الي الدولة بتعمله في كل الملفات ،، و خصوصا ملف حقوق الانسان ،، و الحقيقة ان التصريحات دي لما تطلع من واحد زي سامح شكري يا ما اشتغل في الاعلام و القنوات يبقي لازم نهتم بيها ،، ايه ده هو سامح شكري اشتغل في الاعلام ؟ ،،، كان مذيع في قناة و لا ايه ،، لا هو بصراحة مكانش مذيع في قناة بس قعد فترة طويلة جدا شغلته انه يرمي ميكرفون قناة اول ما يشوفه،.. يعني اكيد بيفهم في الاعلام برضه!

{تعاشب شاي}(584) أيتام على موائد اللئام

https://www.youtube.com/watch?v=A3GQrZisbm0&list=PLBsIgVvbrncB0M8dlzAbvjl79Nu8v_BW4

لما تشوف ولاد زايد قاعدين يعملوا مكاتب إقليمية للشركات العالمية ويستضيفوا معارض وينظمّوا مؤتمرات .. وعاملين فيها محمد منير وبيغنّوا يهمّنا الإنسان ولو ملوش عنوان .. بتبقي عايز تقولهم ما كفاية رأسمالية بقى .. دا انتوا قرّبتوا تبقوا رأسماليين أكتر من الرأسماليين نفسهم .. ولمّا بتشوفهم مضطهدين الشعب اليمني المسكين ومحاصرينه وبينتقموا منه بكل الطرق الوحشية بدون ذنب وكأنهم عايزين يبيدوه ..بتبقى عايز تقولهم كفاية نازية بقى .. سيبوا الشعب اليمني في حاله .. ده أنتو قرّبتوا تبقوا نازيين أكتر من هتلر ..
أمّا بقى لما بتشوفهم بينافسوا جيش الاحتلال على تركيع الفلسطينيين وبيطبّعوا مع الصهاينة وبيعادوا المقاومة والمناضلين في غزة وبيدعموا المستوطنات الصهيونية في الأراضي المُحتلة .. مبتبقاش عايز تقولهم أي حاجة الحقيقة .. لأنك بتبقى شاكك إن ولاد زايد صهاينة فعلاً .. ويمكن صهاينة أكتر من الصهاينة نفسهم كمان ..

فيلم الليلة لحلقة "الحراق".. Hacksaw Ridge

Hacksaw.Ridge.2016_720

Hacksaw.Ridge.2016_480

Hacksaw.Ridge.2016_360

{الحراق}(65) سلميتنا أرصرص من الرصاص! Hacksaw Ridge

https://www.youtube.com/watch?v=qVKoAAF36j8&list=PLBsIgVvbrncBJbmFFzhjJfzK9aLoMuouz

في معضلة فلسفية مشهورة بتقولك لو انت شايف قطر ماشي بسرعة وهيدوس على خمس اشخاص مش واخدين بالهم .. وأكيد هيموتهم.
بس قدامك فرصة انك تدوس على زرار... تغير اتجاه القطر وبدل ما يموت الخمسة دول.. هيموت ٣ واقفين الناحية التانية.. هاه... هتدوس عالزرار؟
هتقولي والله ليه لأ... تلاته احسن من خمسه.
بس خلي بالك.. انت هتبقي مسؤول عن موت التلاته دول... لو متدخلتش كانو هيعيشو...انت فعلك تسبب في قتلهم بشكل مباشر... بس في نفس الوقت.. لو فضلت واقف مكانك.. في خمسة هيموتو!
هاه... هتقتل بإيدك تلات أبرياء؟.. ولا تبعد عن الموضوع كله وكل واحد ياخد نصيبه وانا مليش دعوة يا عم؟
سنة ٢٠١٦ صدر فيلم Hacksaw Ridge... واترشح ل٦ جوايز اوسكار وزوربيح جوايز تانية.
الفيلم بيحكيلنا قصة مجند امريكي اثناء الحرب العالمية التانية... بيرفض الحرب .. وبيرفض انه يشيل سلاح ولا يضرب طلقة رصاص واحدة... ومع ذلك بيحصل على (ميدالية المجد) اللي هي أعلى تكريم عسكري في أمريكا.

{تعاشب شاي}(585) سنحاربهم بالكولوبامية!

https://www.youtube.com/watch?v=2u0YP1lUt4k&list=PLBsIgVvbrncB0M8dlzAbvjl79Nu8v_BW4

ورجعنا تاني للملف الأخطر اللي بقى بيهدد المصريين بشكل صريح ..
سد النهضة .. واللي ممكن يعمله في حصة مصر المستقبلية من النيل في حالة بدأ المرحلة التانية لملء السد
و المفاوضات أهي فشلت للمرة المليون .. وأثيوبيا من الآخر كده قالت لمصر والسودان بقولكوا ايه .. اخبطوا دماغكم في الحيط .. ولا أقولكم تعالوا اخبطوها في السد
لا يا أثيوبيا .. مش دماغنا اللي هنخبطها في السد .. انتي نسيتك نفسك ولا ايه؟
دا احنا بيعنا هدومنا وقربنا نشحت من الجوع ومديونين لطوب الأرض عشان نشتري سلاح ..
احنا بدل ما هنخبط دماغنا في السد .. هنخبط سلاحنا في السد ..
فجأة لقينا السيسي بيقولنا .. الحرب مُكلّفة !!
فبقى منظرنا وحش أوي الصراحة .. ها يا أثيوبيا تحبي نخبط دماغنا في أنهي حتة بالظبط في السد؟

{تعاشب شاي}(586) عزيز ماسر

https://www.youtube.com/watch?v=nLLHMwXPUgI&list=PLBsIgVvbrncB0M8dlzAbvjl79Nu8v_BW4

المصريين أو حتى غير المصريين .. بييجي في بالهم من وقت للتاني .. انهم يقارنوا بين مبارك والسيسي .. بحكم ان في ناس عاصرت حكم ده وحكم ده ..
مبارك اللي كان بالنسبالهم صاحب كاريزما وحضور حتى لو كانوا عارفين من جواهم انه على رأس منظومة ملهاش حدود من الفساد .. وسايب البلد لشلة حرامية .. كان عليه واحدة " الأخوة المواطنون " تخليك تسيب اللي في ايديك على طول .. كلامه كان قليل وظهوره كمان قليل.. ورغم انه كان عسكري .. الا انه حافظ على مسافة ثابتة بينه وبين الجيش طول فترة حكمه .. وفي آخر أيامه حيّده تماما وحط كل ثقته في منظومة أمنية من الداخلية وأمن الدولة .. وبعد 30 سنة من الفساد والظلم والنهب والتعذيب .. قدر المصريين انهم يكسروا حاجز الخوف جواهم ويواجهوه .. ويوجهوا نظامه وداخليته وكل دولته العميقة ..
السيسي بقى .. رغم انه بيتشارك مع مبارك في كونه عسكري .. إلا انه ميتقارنش بيه ..
هتقولي ليه يعني؟
هقولك يا سيدي انت مستعجل ليه .. ما أنا جاي مخصوص أقولك ليه!

{الأسبوع ف كيس}(262) حكمتك يا رع!

https://www.youtube.com/watch?v=78NP8g-1EXw&list=PLBsIgVvbrncAeJMvwCpzZg-ow581Oh13M

أيا كان خلافك مع النظام ده ومؤيديه واعلامه..لكن لازم تعترف أنه بيتميز عن المعارضة بالعزيمة والإصرار والاتحاد على هدف واحد..الكفتة ..مهما اختلفوا وفرقتهم الاماكن والظروف ..الكفتة بتجمعهم على شواية واحدة..الريس يرسم خط احمر في ليبيا ويدق صاجات الحرب ويخمس بكام طيارة على الممر ويدعم حفتر.. الله عليك يا اسد..الريس يمسح الخط الاحمر ويحلق لحفتر ويدعم الحكومة الشرعية.. الله على اخلاصك في لم الشمل ياريس..الريس يقاطع قطر اللي بتدعم الإرهاب الله عليك يا دكر..الريس يصالح قطر الشقيقة..يا سلام عليك يا ابو قلب أبيض يا مجمع الأشقاء..الريس يقول احنا فقرا اوي عندك حق يا ريس..الريس يصرف مليارات على الفناكيش الله ينور مصر تقدر ياريس..الريس يرفع صباعه ويهدد ويرسم خط احمر على سد النهضة.. أيوه كده يا كبير اتق شر الحليم إذا غضب افرم يا سيسي..

{تعاشب شاي}(587) صراع اللباوي

https://www.youtube.com/watch?v=tL5TfYYR8-w&list=PLBsIgVvbrncB0M8dlzAbvjl79Nu8v_BW4

في العالم العربي .. بتلاقي نموذج سياسي متكرر في معظم الدول العربية تقريبا .. بتختلف الجمهوريات عن الملكيات في الاسم والشكليات بس .. لكن العيلة اللي بتحكم من ورا الكواليس مبتختلفش .. آل سعود في السعودية وآل زايد في الامارات وآل خليفة في البحرين .. عيلة مبارك ومن بعده عيلة السيسي في مصر وعيلة الحريري في لبنان وعيلة بوتفليقة في الجزاير .. كلها عائلات سيطرت أو لسه بتسيطر على الحكم لسنين طويلة جدا .. العائلات دي مع الوقت بتبدأ تعتقد انها مش بس بتحكم الناس .. دي بتملك الناس .. ومُلكهم ده مش من حق أي حد انه ينازعهم عليه أو يشاركهم فيه .. البلد كلها بتتحول لتركة وحق مكتسب ليهم ولعيالهم ..
بس عيلة الأسد .. غير أي عيلة من العائلات دي .. اختلافهم جاي من اختلاف سوريا نفسها كبلد عن أي بلد تانية .. وتحسهم فعلا اسم على مسمى .. وكأنهم عايشين في غابة فيها الأسد ومراته وأشباله وزُمرة كاملة من وراه بتتخانق على مين اللي يحكم الغابة ..

{تعاشب شاي}(588) الشاطر أحمس و الهكاكسة

https://www.youtube.com/watch?v=0ZtuUkZSVgw&list=PLBsIgVvbrncB0M8dlzAbvjl79Nu8v_BW4

سنة ١٩٤٠ امريكا كان فيها انتخابات مولعة ،، و الامريكان مكانوش لا علي حامي و لا علي بارد ،، و قاعدين مستنيين يعرفوا مين الي هيكسب ،، روزفلت الي كان واثق من الفوز ،، و لا ليندبرج المرشح الي نازل قدامه،، و الي كان ميال ناحية الالمان الي ماسحين بكل دول اوروبا ارضية الكوكب ،، و دايب في دباديب هتلر و بيموت في شنبه ،، للاسف نتيجة الانتخابات بتظهر ،، و ليندبرج بيكسب روزفلت و بيمسك حكم امريكا ،، و بيتحالف مع الالمان ضد دول اوروبا ،، و بيخلص علي كل يهود امريكا ،، و دي كانت بداية تحول امريكا لدولة نازية ،، اتخضيتوا ؟ ،، لا متقلقوش ده مش التاريخ الي حصل ،، دي احداث رواية المؤامرة ضد امريكا ،، الي كتبها الاديب الامريكي فيليب روث ،، يا نهار ابيض ،، و ازاي يكتب حاجة زي كده روث وش النملة ده ،، ده مش بس شوه التاريخ ده دلق علي وشه مية نار ،، اكيد الناس في امريكا لما قروا الرواية صادروها و بعدين ربطوا الكاتب ده في شجرة و نزلوا فيه بالكرابيج زي ما الباشوات كانوا بيعملوا مع الفلاحين زمان ،،

{تعاشب شاي}(589) بلحنة الـMATRIX

https://www.youtube.com/watch?v=KIOReJbEoDs&list=PLBsIgVvbrncB0M8dlzAbvjl79Nu8v_BW4

بصوا هو السيسي عموما كلامه العادي مش مفهوم اساسا .. بس هو قرر يعلي في مستوي عدم الفهم زيادة .. و بقالنا فترة كل ما نشوف وشه نلاقيه ماسك لنا في كلام غريب كده .. شمول مالي علي حوكمة علي رقمنة علي بلحنة .. و عاوز يلم معلومات البلد كلها و يحطها في حفرة تحت الارض في العاصمة الادارية .. متعرفش بقي المعلومات دي بعد الاف السنين هتتحول لبترول مثلا هيبيعه .. و لا هتبقي اثار و هيتاجر فيها و لا ايه بالظبط .. ما هو اكيد الموضوع ده فيه وراه مصلحة لسيادته هو و نظامه .. ده السيسي يعني اكيد مش هيعمل حاجة لمصلحة البلد او الشعب لا سمح الله

{حدوتة عربية}(08) الخليفة خلف الله خلف خلاف المخالف!

https://www.youtube.com/watch?v=xE1q4OeiQAw&list=PLBsIgVvbrncBI-GBODIFomvD6RVkJ618b

في أواخر سنة 938.. أبو الحسن العروضي.. معلم الخليفة الراضي راح يزوره.. فعدى على منطقة في العراق بيحكمها والي تركي.. اسمه بجكم.. و كان يوم عيد عندهم من أعياد الفرس القديمة.. فلقى مهرجان و هيصة و الناس بتحتفل و تنبسط و بتاع.. بشكل ماشافهوش قبل كده في حياته..
.. فلما وصل للخليفة الراضي بالله.. لقاه قاعد مهموم.. و لقاه ماسك دينار دهب من اللي صكهم بجكم.. الوالي التركي.. الدينار كان عليه صورة بجكم بسلاحه.. و مكتوب عليه:
إنما العز فأعلم..
للأمِير المعظم ..
لسيد الناس بجكم ..
.. فقال الراضي لأبي الحسن:." أما ترى صنع هذا الإِنسان، وما   تسمو إليه همته، وما تحدثه به نفسه؟ "

طب هو الخليفة كان مهموم ليه؟ حس بقلق.. المفروض الوالي ده شغال عنده!.. يقوم يصك عملة يحط عليها صورته و يمجد في نفسه؟ ده كده يتخاف منه لأنه أكيد طامع في الخلافة نفسها.. .

{تعاشب شاي}(590) الدولة الكاتعة

https://www.youtube.com/watch?v=62JnA-2npVw&list=PLBsIgVvbrncB0M8dlzAbvjl79Nu8v_BW4

في الافلام و المسلسلات و الروايات ، اللي فيها اي دور لشخصية الدجال او العراف او المشعوذ، دايما بتلاقي الدجال ده لما بيحاول يثبت قوته ، بيحاول يثبتها من خلال تهديد الزبون بتاعه او تخويفه . تلاقيه مثلا يقوله هاسخطك كرسي حمام او رجل كنبة او ملة سرير او شطافة ! !
و عمرك ما تلاقي عراف او دجال يقول للزبون بتاعه وهو بيحاول يثبت له قوته ، هاخليك سعيد او هاعمل لك حاجة تخلي صحتك احسن ، او هاساعدك في شغلك .
لو ركزت هتلاقي ان الاسلوب ده او المنطق ده ، هو نفس المنطق او الفكر او المزاج بتاع الدول بتاعتنا . الدول اللي كانت بتتسمى زمان عالم تالت . و دلوقت مش لاقيين لها تصنيف من كتر ما هي بره اي تصنيف !
في الدول دي - اللي هي بالمناسبة ، متخلفة عن غيرها في كل حاجة ، رغم انها عايشة وهم القوة على شعوبها بس - الدولة عشان تحكم المواطن و تسيطر عليه ، و تضمن انه يمشي في طوعها ، و تحت سيطرتها ، لازم الانظمة تحط على المواطن كأنه فار في مصيدة . مش انسان في بلد بيحترمه و عاوز مصلحته !

فيلم الليلة من حلقة "الحراق".. NightCrawler

Nightcrawler.2014.720p

Nightcrawler.2014.480p

Nightcrawler.2014.360p