{تعاشب شاي}(574) السجان صديقي

https://www.youtube.com/watch?v=bVB0iyO131Q&list=PLBsIgVvbrncB0M8dlzAbvjl79Nu8v_BW4

تخيل لما دولة زي امريكا بجلالة قدرها ،، تصرف و تكلف و تبني معتقل بالشيء الفلاني .. علشان تلم فيه الناس الي قبضت عليهم بتهمة الارهاب و فين يوجعك ،،و بعدين تيجي تعين حارس طول بعرض علشان يبقي مسئول عن متهم منهم ،، يخوفه و يعذبه ويضربه و يهينه و يذله و يحرمه من ابسط حقوقه الانسانية ،، و بعد كده تكتشف ان الحارس بدل ما يعمل الحاجات دي كلها و يطلع المتهم من دينه ،، قام هو الي دخل دين المتهم ،، اكيد امريكا لما عرفت القصة دي استغربت اوي و قالت ايه ده ؟ ،، هو انا بنيت المعتقل بفلوس حرام ولا ايه ؟

{الأسبوع ف كيس}(261) سفينة مشيها بطال

https://www.youtube.com/watch?v=RA29pAgZ9GY&list=PLBsIgVvbrncAeJMvwCpzZg-ow581Oh13M

بمناسبة وقفة مهيب الركن المخيفة واستخدامه لسبابة احمد حلمي في فيلم جعلتني مجرما .. وهو بيهدد ويتوعد وفي نفس ذات الوقت وبنفس الصباع قال إننا مستمرين في المفاوضات..اللي هو انا مصمم اعملكو خرم في دماغكم..يحضرني في هذا المقام الرفيع قصة لجحا..اللي دخل الجامع يصلي ولما خرج ملقاش الشبشب.. فوقف في وسط الشارع يزعق ويهلل ويقول الشبشب ده لو مظهرش هعمل زي ما عملت قبل كده وقد أعذر من انذر..قام الحرامي قلق وحط الشبشب مكانه وجري..قام الناس قالوا لجحا شبشك اهوه يا جحا لقيناه..بس قولنا هو انت لما ملقيتش الشبشب قبل كده عملت ايه..قالهم ابدا روحت البيت حافي…

{تعاشب شاي}(575) القناة سلكت.. عقبال الريس

https://www.youtube.com/watch?v=kHMdaDopo5U&list=PLBsIgVvbrncB0M8dlzAbvjl79Nu8v_BW4

لو كان وقف قبطان السفينة "ايفير جيفن" في مؤتمر صحفي بعد تعويمها .. كان غالبا هيتسأل .. تحب تشكر مين بعد ما انتهت أزمة السفينة في قناة السويس ..
كان هيقف كده قبطان السفينة .. ويفرك في دقنه ويرفع حاجبه ويبص لفوق .. ويقعد يفكّر ..
فالصحافيين أكييد كانوا هيقلقوا .. ويفكروا يساعدوه ..
هشتكر هيئة قناة السويس؟
فكان هيقولهم لأ طبعا .. سفينة ووقفت في مجراهم المائي .. مين غيرهم مسؤول انه يحرّكها؟ محمد منير؟
فيسألوه طيب تشكر النظام المصري والرئيس عبد الفتاح السيسي؟
فكان هيقولهم لا للأسف مبحبش البلح ..
فالصحفيين كانوا هيجيبوا آخرهم .. يا عم خلّصنا بقى .. هتشكر مين ولا ان شاء الله عنك ما كنت شكرت ..
فكان هيقولهم .. "أشكر المد والجزر"

{تعاشب شاي}(576) إعلام البغال

https://www.youtube.com/watch?v=HzBNEatA-gY&list=PLBsIgVvbrncB0M8dlzAbvjl79Nu8v_BW4

بعيدا بقي عن الخلافات لازم نقول كلمة حق ،، و نحيي كرم جبر و احمد موسي و نشأت الديهي و كل الاعلاميين المصريين ،، الي رغم الهجوم الي حصل عليهم الفترة الي فاتت من ايمن منصور ندا استاذ الاعلام في جامعة القاهرة و الي مسح بيهم الارض و هزقهم و وصفهم لمؤاخذة بالبغال .. الا انهم لا اكتئبوا و لا انعزلوا و لا سابوا شغلهم و لا غابوا عن قنواتهم يوم واحد ،، و فضلوا مكملين في التطبيل بمنتهي الحماس و الاجتهاد زي الاول و اكتر شوية ،، و ده دليل كبير جدا علي اد ايه الناس دي اوساخ و جلدهم تخين و معندهمش دم و لا كرامة ،، شابوه يا جماعة بصراحة ..

{تعاشب شاي}(577) كامل الأوزار فتني!

https://www.youtube.com/watch?v=zbelcFREfsQ&list=PLBsIgVvbrncB0M8dlzAbvjl79Nu8v_BW4

كل حاجة في مصر بتتطور في عهد السيسي لكن في اتجاه صورة أسوأ من اللي كانت عليه قبل كده . يعني مثلا، زمان كان الرئيس مهما كان قمعي و مستبد بس بيراعي البسطا شوية و وبيمنع إجراءات اقتصادية قاسية لو هتحرك غضب الناس . دلوقت السيسي ولا بيهمه ، لدرجة انه قال لوزير البترول في يوم من الأيام : ارفع سعر البنزين يا مهندس طارق ميهمكش!
و زمان كان الوزير أي نعم جزء من منظومة مستبدة ، لكن كان بيجمل تصريحاته قدام وسائل الإعلام شوية حفاظا على المنظر .
دلوقت ، الوزير من دول ناقص يطلع مطوة من جيبه و يشوح بيها قصاد الكاميرات و يزعق و يقول : حد ليه شوق في حاجة يا حارة مفكيش راجل !
و زمان كانت الحكومة لما بتحصل كوارث بسبب سياساتها ، بتعمل منظر و تعمل حداد ، دلوقت يا باشا لو مات نص الشعب ، ولا بيهزنا ، المهم ان سيادة الرئيس عايش و بيكمل في انجازاته و مشروعاته ، و السادة المسؤولين عايشين ، و مكملين في تنفيذ الخطط العبقرية لسيادة الرئيس .
و يكش تولع !

فيلم الليلة من حلقة "الحراق".. A Few Good Men

A.Few.Good.Men.1992.720

A.Few.Good.Men.1992.480

A.Few.Good.Men.1992.360

{الحراق}(64) خلي امك تحمي الحدود! A Few Good Men

https://www.youtube.com/watch?v=u3Oqhw6YTek&list=PLBsIgVvbrncBJbmFFzhjJfzK9aLoMuouz

فيه جملة مشهورة – تم نسبها لناس كتير لكنها في الحقيقة لكاتب الماني نازي – بتقول (كلما سمعت كلمة ثقافة تحسست مسدسي)... الجملة وردت على لسان ضابط في مسرحية... وهي جملة بتلخص العقلية العسكرية في مواجهة كل ما هو مدني.
بس الأول...
خلونا نبتدي بقصة لطيفة قبل ما نخش في الجيش والسياسة ونعدي البراميل.
نيويورك هي عاصمة المسرح في العالم... وتعتبر قبلة كل الممثلين في سواء في أمريكا او أي دولة تانية بتتكلم انجليزي.. بالتالي دايما هتلاقي فيها الاف الممثلين الصغيرين اللي جم من جميع انحاء العالم وشغالين شغلانات بسيطة على أمل انهم في يوم من الأيام يقفو على خشبه المسرح ويبقو نجوم وكده.... حتي سواقين التاكسيات ... (او التكاسي او التوكوسة حسب انت منين في المحروسة)... وشيفات المطاعم وعمال الديلفري كلهم ممثلين منتظرين الفرصة...
واحد من الممثلين الصغيرين دول لقا فعلا شغلانه في مسرح برودواي .. اللي هو بدون جدال أعظم مسرح في العالم... بس للأسف الشغلانه دي كانت انه يقدم مشاريب للزباين!!

{تعاشب شاي}(578) من حقك أن تفخراااا

https://www.youtube.com/watch?v=mF7yQAXeUZg&list=PLBsIgVvbrncB0M8dlzAbvjl79Nu8v_BW4

لما بدأ العرض المهيب والاحتفال المبهر في شوارع خالية من المارة.. وفضائيات بتنقل الحدث..كان المسرح واحد لكن اختلفت مقاعد المتفرجين..فلو انت قاعد في مدرجات السيساوية هتلاقي الحياة زبادي خلاط ومصر بتفرح والتاريخ واخد الحاضر حضن مطارات..ومصر بتقدم رسالة أننا بلد الامن والامان والسيسي عمهم وحارق دمهم..ويا ويل اللي يقول كلمة تمس حالة الاورجازم الوطني اللي هما فيه دلوقتي..فيه تهمة جديدة لانج اسمها انت هكسوسي دلوقتي..ولو انت قاعد في مدرجات اللي ناقم على اي حاجة والسلام وخلقت لتعترض.. فأنت هتلبٌس كل اللي بيتفرج أو لمح من بعيد ان العرض عجبه ..تهمة أنه منافق ودولجي ومش بعيد امنجي ..وباع القضية وخان دم الشهداء ونسي المعتقلين..

{تعاشب شاي}(579) غدر الصحاب

https://www.youtube.com/watch?v=OZG-sWwlHLQ&list=PLBsIgVvbrncB0M8dlzAbvjl79Nu8v_BW4

اخص عليكم يا ولاد زايد ،، مكانش العشم و الله ،، بقي تبقوا شايفين بعنيكم السيسي و هو متنرفز و متعصب و بيهدد اثيوبيا علشان سد النهضة ،، و كل الدول العربية تنزل بيانات دعم لينا ،، و انتوا تفضلوا ساكتين و منفضين ،، و في الاخر تنزلوا بيان صايص و محايد و مالوش طعم زي مية الزير كده ،، خلاص ؟ التطبيع مع الصهاينة نساكوا حبيبكم السيسي بتاع الانقلابات ،، ما هو السد ده لو كان بيهدد اسرائيل مش مصر ،، كان زمان محمد بن زايد خد فاس و راح هده بنفسه ،، اه يا زمن ..

{تعاشب شاي}(580) فلوسك شغلتها و خسرت!

https://www.youtube.com/watch?v=_6r-areh9zU&list=PLBsIgVvbrncB0M8dlzAbvjl79Nu8v_BW4

كُنت قاعد في أمان الله .. فجالك واحد يقولك انت محدش بيحنو عليك ليه؟ .. قولتله أيوة فعلا .. أنا عايز شوية حنان .. قالك متخافش .. الحنان موجود .. دا انت نور عينيا .. فقولتله تسلم ايديك وعينيك .. اديني شوية حنان بقى .. فقالك هات الفلوس اللي معاك .. فروحت مديله .. ما انت عايز حنان بقى .. وراح قايلك أنا هاخد فلوسك أشغلهالك والفلوس تكسب والفلوس تجيب فلوس والعملية تحلو .. ومشي وسابك قاعد تحلم بالفلوس والحنان والمستقبل ..
ورجعلك في يوم يقولك .. هات فلوس.. فتقوله هو انت مش أخدت كل اللي حيلتي؟ دا انا مستنيك انت اللي تديني فلوس ..
فراح قايلك والله فلوسك شغلتها وخسرت معايا والنهاردة جاي أخود منك فلوس تانية عشان أشغلهالك ..
فتقوله منين .. مفيش فلوس .. معييش فلوس ..
فيبصلك كده بعدين يبص على بيتك .. ويسألك ..
ألا قوللي .. هو البيت ده مُرخّص؟

{تعاشب شاي}(581) البلح المسلح

https://www.youtube.com/watch?v=--qE0wMM-qw&list=PLBsIgVvbrncB0M8dlzAbvjl79Nu8v_BW4

السيسي بقاله كام سنة عمال يشتري بالفلوس الي معاه اسلحة من كل الاشكال و الانواع ،، مقاتلات علي قاذفات علي حاملات طائرات ،، مش مخلي حتة سلاح واحدة موجودة في اي دولة في العالم الا و بيشتريها ،، و فيه ناس كتير اوي مش قادرة تفهم هو بيشتري كل السلاح ده ليه يعني و احنا مبنحاربش اساسا ،، بس احنا مش عاوزين نظلمه ،، جايز لو دورنا كويس نكتشف ان فيه حرب دايرة في البلد و احنا مش واخدين بالنا ،، و جايز بردو يكون السيسي بيشتري السلاح ده لهدف شخصي ،، يكون بيصطاد بيه عصافير مثلا ،، او يكون عليه تار و بيجيب السلاح ده علشان يحمي نفسه ،، فيه احتمالات كتير اوي بصراحة بس احنا الي مش فالحين الا في الهجوم و الافترا علي الراجل

{تعاشب شاي}(582) ما نجيلكمش في انقلاب

https://www.youtube.com/watch?v=QGWMhruoKaI&list=PLBsIgVvbrncB0M8dlzAbvjl79Nu8v_BW4

احنا زعلانين من الشعب الأردني .. احنا كشعوب عربية زعلانين فعلا يعني
مكنش العشم والله .. بقى يبقى عندكم كل الأكشن ده في العيلة الملكية ومتحكولناش ..
فالشعب الأردني يستغرب .. أكشن ايه ونحكيلكم ايه .. سيبونا الله لا يسيئكم في الأحوال الاقتصادية اللي احنا واقعين فيها دي مش فايقين ..
يعني انتو مش عارفين ايه اللي بيحصل عندكم؟
لا والله ولا حد جابلنا سيرة ..
طيب يا جماعة بيقولوا ان كان هيحصل عندكم انقلاب .. وأخو الملك بيتآمر على الملك ..
بس متقلقوش على الاستقرار .. الاستقرار بخير وزي الفل .. ودي مش أول مرة يعني الشعوب العربية تتفاجئ بأحداث سياسية من النوع ده ..
احنا المفروض كبرنا وبقينا عارفين لوحدنا ان الشعوب العربية آخر من تعلم ..

{تعاشب شاي}(583) انسف حمامك القديم!

https://www.youtube.com/watch?v=QMhfn-5ziYs&list=PLBsIgVvbrncB0M8dlzAbvjl79Nu8v_BW4

من كام يوم طلع علينا وزير الخارجية المصري سامح شكري علشان يهاجم الاعلام و ينتقده ،، و يقول ان مصر محتاجة لآلة اعلامية جديدة لانج ،، علشان تظهر الانجازات و المجهود الخرافي الي الدولة بتعمله في كل الملفات ،، و خصوصا ملف حقوق الانسان ،، و الحقيقة ان التصريحات دي لما تطلع من واحد زي سامح شكري يا ما اشتغل في الاعلام و القنوات يبقي لازم نهتم بيها ،، ايه ده هو سامح شكري اشتغل في الاعلام ؟ ،،، كان مذيع في قناة و لا ايه ،، لا هو بصراحة مكانش مذيع في قناة بس قعد فترة طويلة جدا شغلته انه يرمي ميكرفون قناة اول ما يشوفه،.. يعني اكيد بيفهم في الاعلام برضه!

{تعاشب شاي}(584) أيتام على موائد اللئام

https://www.youtube.com/watch?v=A3GQrZisbm0&list=PLBsIgVvbrncB0M8dlzAbvjl79Nu8v_BW4

لما تشوف ولاد زايد قاعدين يعملوا مكاتب إقليمية للشركات العالمية ويستضيفوا معارض وينظمّوا مؤتمرات .. وعاملين فيها محمد منير وبيغنّوا يهمّنا الإنسان ولو ملوش عنوان .. بتبقي عايز تقولهم ما كفاية رأسمالية بقى .. دا انتوا قرّبتوا تبقوا رأسماليين أكتر من الرأسماليين نفسهم .. ولمّا بتشوفهم مضطهدين الشعب اليمني المسكين ومحاصرينه وبينتقموا منه بكل الطرق الوحشية بدون ذنب وكأنهم عايزين يبيدوه ..بتبقى عايز تقولهم كفاية نازية بقى .. سيبوا الشعب اليمني في حاله .. ده أنتو قرّبتوا تبقوا نازيين أكتر من هتلر ..
أمّا بقى لما بتشوفهم بينافسوا جيش الاحتلال على تركيع الفلسطينيين وبيطبّعوا مع الصهاينة وبيعادوا المقاومة والمناضلين في غزة وبيدعموا المستوطنات الصهيونية في الأراضي المُحتلة .. مبتبقاش عايز تقولهم أي حاجة الحقيقة .. لأنك بتبقى شاكك إن ولاد زايد صهاينة فعلاً .. ويمكن صهاينة أكتر من الصهاينة نفسهم كمان ..

فيلم الليلة لحلقة "الحراق".. Hacksaw Ridge

Hacksaw.Ridge.2016_720

Hacksaw.Ridge.2016_480

Hacksaw.Ridge.2016_360