- صابرله عُمر والعَلي سَويته
شِلت منه الحِزن وبيتي خَليته
وغَمضت الگلب
اعمَى امشي كتله ويا
وسَعف فوك الجَمُر بهداي ، مَشيته
لأن مِنه الذَنب حاربتَه باليهوا
وبجَمرة حَبيبه الگلب چويته .

روحَ نيَتك صافية وتعرُف
شلون تروح
وتندّل يا حِلم من ليلك تشِگه
صَحرة بعين بدَوي اتمَنى روحِي تصيرَ
على حرورة رمُلهاا يطگ عشبَ خلگه
من أشوفك حسّبت حُضنك يصير گماط
وتدگ روحك صليبَ بحضنِي بالشبَگه
وأشِد من غيبتك ماصِخ طلع ملگاك
آنه مالحَ وأغزّر من أدوسّ الگاع
شني ما غزرت وياك بالمَلگة .

انه بلا وعِي مِن انطيتك الروحَ
وعقِل ما چان عندِي
وهسة فزيت
ما چذب وگلك باچر
أنساك
عِفتني وذكرّيات هواي خليَت
إذا كُل حايط البي
إسمك يطيحَ على هالحالة لازِم
نهدِم البيت .

بس بعد مااريدك .
شتريد اعيد المضى ؟
لو صرت بيت الشعر
صدگني مااعيدك .

بَعد لتوَدي طيفك ليَلي مابي شوگ
اجاني وباب جفنِي بوجه سديته .

كل الصار بيه حيل وياي
مستاهل بعد أكثر وأكثر
چي لين ما عرفت أحساب دنياي
أضوي لعد غيري خاف يعثر .

مثل ظلك چنت
بالخطوة نمشي اثنين
مشيت انت بظلام
وضيعت ظلك .

مِثل الخيط عايش
والحياة حُظوظ
لو تسكن شمَع
لو تسكن بسبحَة .

هوَ ذَنبي لا سكنت ويّ الأجوني
ولا تِبعت الراحلين
ولا انة خَالي ومَختلي ومِرتاح بَالي
ولا انة مِن العاشگين
ومَدري ليّلي شَلون اخلصه
لا سِهرت ويّ السهَارى
ولا انة مِن النَايمين .

تَمنيت الاصابع كون ألف بالأيد
لان بيه ألندم مو مال أعض خمسة!

الناس شافونا سوة
حسبونا من أهَل الهوى
مايدرون جامعنا جرح
وثنينا ندور دَوة .

خَل أگُلك
كُلشي عَني انه طيب
ما أنام
مّن أسمَع حچاية
تِغثني .

ردنا نعيش ضحكة
والزمن ماراد
وبدلنا الضحك بالبچي
وما عشنة
ردنا نموت سكتة
والزمن ماراد
مدري شراد
لا عشنة ولا متنا
ردنا نگوم گوة
وماگدرنا نگوم
وهدينا الحلم
والعوز چتفنا
وگالوا بأول الخمسين
يبدي الشيب
وگبل لانوصل العشرين
شيبنة
عشنة هواي
بس هواي ماعشنة .

بطرانَه الشَمِس
تچويني كُل يوم ، وانه حرورتي تچوي التنَانير
هو العَاش عُمره بضيم وهموم
عِنده الموت تسيورة خطَاطير !

اذا صار المواصل گوة ما اريد
المحنة البيها ذلة
أشلع جذرها
نگاط المغذي بسدية الموت
عمت عيني المن منتظرها .

هي فرصة وحدة
وبعدها أنا مثل السراب
تشوفني بس ما توصلني .

الوكت لاوانا بس أحنا لوينا
طحنا بحِزتة مثل المجانين
وفتحنا حلوگنا بس مو من الجوع
غضب من تنفك حلوگ الثعابين
أمس من وگفت الذلة على الباب
وگفنا برگبة الدنيا سچاچين .

ولا تچذب !
الچذب حبلة گصير
شحصل الچذاب من بيتة أحترگ ؟

وبركان عندي الحچي
بلساني اذا ينفجر
أبقى أحچي طگ بطگ .

سلامتهم
بعد ما أريد أحب و أنعاف
و چفوف الـ تسلم راح أچويها
أغمض عيني و أتذكر شگد وجوه
چانت تضحك بوچهي من ألاگيها

غالي أنتَ بس آخ شطحت ؟
طيحة جگارة وبالسجن
رايدها بس ما دنگت
ما أعرف أشيل الطايح ..