بارت8




درب كله اشهك وأبجي ، مادري سويته غلط لو صح ، بس جنت اريد اخلص نفسي ماريد ابتعد عن اهلي ولا اريد ازوج احد غير حسام ..

كلامه وخوفه وتردده خذلني حيل ، يمكن توقعت يكون طايش ويكلي اي يله ، توقعت ياخذني من ايدي ويركبني بالسياره ويعقد علي كبل ويحارب دنياا كله لاجل عيوني ..

بس تذكرت وصحيت اني ووين اني مو بفلم ولاومسلسل عربي مصري قديم...

اني عايشه بالواقع ، شلون صفعه صحتني على زماني ، انتي عايشه بالعراق ،

تردي مثل الابطال الي تقرين عنهم بالروايات او تشوفيهم بالمسلسلات ، لاا هذا واقع ، يجبن ويخاف احيانا الي تحبي ..

يغلط ويتصرف بغباء هم ، اااخ اااخ يالقهر ، جان هذا اول دروس الي تعلمتها ، هيه لاسرح بالخيال هوواي واصدك بكلمه احبج ..

درس تعلمته مو كلشي نشوفه او نسمعه صح ، الصح الوحيد هو تجربه جرب وشوف غير هيج لاا ..

دخلت لشارعنه وشهكه بصدري كل شوي التفت وراي اكول هسه يلحكني ، هسه جاي وراي بسيارتع ويكلي وياج اني ايمان ..

باجر رايح لعمامج واقنعهم ، بس ماكو ضليت واكفه بنص شارع على امل يلوح اثر سياروه ..

خابت امالي بالزايد ، دموعي خلصت واملي ماخلص وياه …

رجعت اجر بذيال الخيبه دخلت لبيت تعبانه جسمي منهك..

سديت باب الطرمه ، ودخلت امسح بدموعي ، بس رفعت راسي لان امي كاعده باب المطبخ ، وشاده عصابه على راسها ، عيونها حمر دم تباوعلي منتظرتني ..

نزلت دمعتي بخيبه ، فشلانه احجي ..

هزت راسها بعتب :- شفادتج روحه هاي هاا ، شفادتج غير بس وجع الكلب والدموع الي طاحت ..

مسحت دموعي رديت ، حاولت ، اني على الاقل حاولت ،

دخلت جوه .. تعديتها ومشيت ، ردت علي وحجت ايمااان ..

التفتت عليها دموعي واكفه بطرف رمشي ..

حجت صيري ذكيه يمااا بطلي عواطف ..

بجيت شسوي فهميني ، فرقد ماريده اكرهه امووت منهم ..

جرت كرسي وكعدت عليه تجر نفس كوه تعبانه :- حجت دكعدي نحجي ، اكعدي ..

كعدت كبالها ، حجت عمامج مايفكون عنه لا والله ، اعرفهم ، اعرفكم كلش زين ، واذا عبالج الاذيه عليج انتي ..

لا غلطانه الاذيه علينه كلنه انتي واني وخالج ولده الكل ، عمامج اجت اليمهم حجه ، يردون يطلعون حقد الماضي علينه ،

نترت :- شقصدج يماا شتردين بالضبط ..

- انتي وشطارتج ، تزوجين فرقد منا وتجيبي يعيش يمنه هناا ، هذا الحل الوحيد ..

بجيت وحسام ..

- دنعل ابو حسام ، شفادج حساام كوليلي ، شفتي من حسام غير مخابرات توالي اليل ليش تحجيني ، جوز فرقد قسمتج ياامي ، اخذي وجري لهناا ..

مااكدر ، مااحبه مااطيق اعيش وياه ..

- هواي مثلج وتالي بس تزوجت حبن ازواجهن ، جربي ياامي ، يطلع خوش ولد ..

- اضل اجرب اني كتلج مااحبه مااطيقه والله ، احب حسام ..

- خلي عقلج براسج لا اتخليني اطيح حظج ، شنوو احب حسام ، شوكت حبيتي اصلا ، ذاك اليوم تعرفتي علي ، مثل ماحبيتي تنسي ، شنو قابل زوجج ومخلفه منه وهيج متعلقه بي ، ماتموتين اذا عفتي ، جان متت بعد ابوج اني ..

خليت اديه على وجهي ابجي منهاره ، حجت ترجف وكوه حابسه دموعها ..

بعد عيني وقطعه من كلبي انتي ، الله يشهد علي رايده مصلحتج ومصلحه اهلي ، اذا نهو عليج لو لا سامح الله خطفوج اني شيضل بيه ، لو شتستفادين لو اخذوج يمهم جبر ..

دنجت راسي مااقانعه ..

رجعت جسمها ليوره تعبانه ، حجت دكومي ، جيبي دواي ، ضغطي جن صعد مره ثانيه تعبت امشي ..

كمت من يمها ، رحت طلعته من ثلاجه جبت الها ، عدها ابره لازم اضربها ، دارت ظهرها وكالت اضربيها يله ..

حجيت يااا يما اخاف ..

استغفرت ربها شلون يعني دخلتج دوره لغرز الابر هيج على خالي ..

ايدي ترجف اخاف لاتنكسر ..

دضربي ياامي والله مابيه حيل امشي للمضمد …

كوه ضربتها دمي جمد من الخوف ، وخرت كبل هااا توجع هاا بيج شي ..

مابيه مابيه ..

بيومها عمامي دكو علينه ياكدون علينه انو يوم الاحد العقد .

لا اني حكمت عقلي ولا اني رضيت وسكتت ..

عاطفيه بشكل والاخر شي اكول لو اموت ماخذه ، نوب حسام عافني ومادك علي ولا واساني ..

تخبلت رسمي ، ضغط ضغط يولد انفجر ، مالكيت نفسي غير شاربه علبه دوه كامله مال ضغط امي ..

مثل اي بنت تحب ، ومايزوجوها الي تحبه ، تجن وتتصرف بغباء ، ماحسيت الا اني بالمستشفى وامي فوكي تبجي ..

وجها مخرمش واحمر ، وجدي كاعد جوه لرجليه مدنج راسه على العكازه ..

فتحت عيوني مره ومرتين عرفت شبيه ، عرفت مامتت بعدني ، الالم الي بمعتي فضيح ، احس المعده مصلوخه لو مجرحه ..

كحيت بهدوء وبجيت من الالم ..

حست علي امي كابلتني تبجي وتعتب ، ليش يماا ما وكفت بعينج اني ، ماخفتي اموت وراج ، هالكد حسام عزيز عليج اكثر مني ..

ماحجيت بس ابجي وتألم ، جدي باوعلي بعتب وكوم امي من يمي ، يكللها عوفيها ، مو وكتها ..

لا عوفني ياابه بشنو قصرت وياج ، هيج اجازيني وماتفكرين بيه ، مافكرتي اذا لكيتج ميته شراح يصير بيه ، اصغيره انتي واعلمج ، هيج الغريب تحبي وتفضلي علي ..

ذاك اليوم عرفتي وهيج ما

تكدرين تعيشين بلاه واني عادي طزز بيه ، ربيت وكبرت هاي جزاتي ، حتى ماتزوجت حتى اربيج وادللج ..

ضليت ابجي بسكوت تعبانه ، طلعت امي تبجي وتشهك ، سمعت صوتها بره تحجي ..

وتكول لواحد ، عساها بحظكم وبختكم ، وثل كلامي لابوك وكله حوبت بتي تطلع بي انشالله ؛ جان ضاعت بت من ايدي شحصل منكم اني ..

صوت فراس يرد عليها ، بتج لو ممسويه مكسوره ماتنتحر ، لو ماعدها شي ماتتجرء وتنتحر ، لو الله اليعلم لاعبه شاطي باطي ويه صاحبها وراحت تخلص بعد مانكت بيها ..

جدي صاح بي ، انجب واحترم نفسك ، وصلت بيك تطعن بت عمك جان استحيت صدك انته بلا اخلاق ..

امي ردت تبجي ااااوف ربي كون تشوفني يوم بيهم ، طعنو باليتيم ربي شوفني بيهم يوم ..

فرقد رد بهدوء ، سدو سالفه ، البنيه مابيها شي ، واذا يقبلون نطلعها خلي نطلعها هسه يكون افضل ..

درت وجهي وغمضت عيوني ، للمغرب طلعوني على مسرليتهم ..

وفات السبت مثل سم ، احس معدتي نار وموجره ..

حتى للتواليت كوه اكوم ، دايخه ، وصداع ، وكل شوي خشمي يطك دم ، الاحد بالضبط ، اجه عمي ثامر وياه ايده اليمين عمي مضفر الي مايمشي منا لهنا اذا مايجره وياه ..

وياهم عمتي صابرين ، والله من اكول سحلوني سحل للمحكمه ماجذب ، بحيث واحد كاعد منا واحد.كاعد منا ..

حتى من دخلت للمحكمه مجلبين باديه اثنينهم ، اني شلوني عاد ، احجي لو اصرخ لو اعاند كلهن ماكوو …

كضيتها بجي وجهي اصفر كركم احس نفسي دايخه ، والالم الي بمعدتي كطعني ، اعثر وارجع اكوم ..

امي وراي تاكل بروحها ، ماتكدر تعاند تخاف لاتصير سلاح لو صدك يتهموني بتهمه ويلبسوني عار ..

ضلت بس تبالع بريكها ودمعتها بطرف عينها ،

جدي ساكت ، طلعت من يمه سااكت ويباوعلي بحسره ،

جرجروني مثل جاهل ، هيج مرمطوني منا ومناا ..

دخلنه للمحكمه ، وجهي بهت ، اديه يرجفن ..

ماصدك اخذلي ركن واخلي راسي بحظن امي واكمل بجي ..

امي دموعها تنزل بهدوء ، بس جانت متقويه لخاطري تكلي جيبي وجري لهناا ..

هذا فرقد امبين فقير ، انتي ذكيه خلي يتعلق بيج وجيبي يمنه ، لاتخافين اني وياج ،

امي جانت راسمه لعمامي شي ، وهمه راسمين شي ثاني ، واني من بين الرسمتين وكعت فرشه ملطخه بالاوان ..

صاحو اسمنه ، كوموني اثنينهم ، ياارب كون يصير انفجار وتتفركش ، يارب كون انجلط واموت والا ازوجه ..

فرقد واكف على صفحه ساكت ، جابلي بطل ماي مده الي بهدوء ، حجه اشربي ايمان وجهج بهت ..

درت وجهي عنه بزعل مقهوره ، حجه بت عمي اخليج بعيوني والله لاسوين هيج ليش هيج كارهتنه احنه هم اهلج ..

ماحجيت دخلت لغرفه القاضي ، القاضي باوع علينه ، عباله واحد من عمامي الي لازميني هو ابويا ..

من عرف عمامي حجه شبيكم لازميها بنت مريضه شي ؟؟! ، اكعدي بابا على كرسي ..

باوعلهم بريبه ، حجه شكوو حظرتج من ذو الاحتياجات خاصه ، ليش هيج شايليج ..

دمعت عيوني هزيت راسي لااا ..

عمي كال احنه عمامها سندها اليوم ، واكفين وياها على ابنه وضحك ، حجه اني ولي امرهاا وابوها انشالله ، والبنت عدها ضغط وخايفين عليها ..

هز القاضي راسه وسأل موافقه حظرتج ..

حجيت كوه اي ..

رد.كرر موافقه ..

باوعت لامي هزت راسها ..

كلت اي ..

عمي ضحك وطبطب على جتفي بت الغالي بت الغالي ..

خلصنه العقد وطلعنه ، امي نترت بيهم لهناا وفضت حلوو عنه يله عاااد ..

رد عليها عمي حظري البنت عفااف وجع راس مااريد لاسويلج كارثه بعزازج والله يله عااد ولي من وجهي لابارك الله بيجن ..

امي جرتني تغلط وتدعي عليهم بالمرض ، اني وراها شلون الجاهل يعتعتون بي منا ومناا ، مصدومه بالي سويته ، اني عقد علي هذا فرقد ..

اني صرت مزوجه ..

امشي واتعثر امي عاطت شبيج ضبي نفسج عاااد لاضلين هيج ، كاافيى عاد كبرتي دبري نفسج شوي ..

خليت اديه على وجهي ابجي ، صوجج انتي وجدو خليتوني مثل البزون العميه ماعرف اتصرف حجي ماعرف احجي بسببكم ..

جرتني تمشي وتبجي وياي ، وكفنه على شارع نريد تكسي نترت بيه كاافي كلت لزمي نفسج ..

رديت عليها :' وانتي شكو تبجين لعد ..

مسحت وجها حجت وجع لا تراددين ..

سكتت ودرت وجهي عنها مجتفه اديها وشهكه بصدري ..

صعدنه بالتكسي وهيه تردد بيج خير فري عقل فرقد وجيبي لهنا يمنه ، مبين الولد يحبج وفقير تكدرين علي انتي ..

ماحجيت ضليت امسح بدموعي واهمس ماريده ماحبه هيه كووه ..

- ضلي هيج لحد ماتاكلين خر**

لمن وصلت للبيت نزلت كبلها ، دخلت بسرعه جدي تلكاني ، هاا جدو ..

بجيت كبل حظنته جدو ماريده الله عليكم سوي شي ..

طبطب على ظهري حجه جدي جوز قسمتج هااي اذكري الله اكعدي ارتاحي فكري ،

ماحجيت بس ضليت ابجي ..

امي دخلت وراي نترت بيه كاافي ولج كااافي ، عقد عليج واحد جنه جاهل ماتكدرين علي ، ماتعرفين تشغلين عقلج وجيبي هنا ..

- نترت مااااحبه ..

- ماااريده كووه ..

- ردت علي شفادج التحبي هي طايحه الحظ ، داعى بيج اجه وجاب ابو واهله ، دسكتي ام الحب هو ياهو جاي يستاهل الحب ولي للغرفه وفكري عدل ، ايمان مابيه كلبي خلصان عمج الكلب يك

لي اشلفج انتي واهلج ترضيها ..

ترضين خالج يصير علي شي ، تعرفيني لو على كص ركبتي مارضه انطيج الهم يس الحقير غير هددني برهان ، الله لايوفقه ماعندي استعداد اخسر واحد بيكم ، هاي قسمتج امي بعد انتي وشطارتج وفرقد على نياته يجي وياج ..

ضليت بس ابجي ، ممقتنعه ، صدك مرت ذيج فتره ركض بركض ..

حسام دك مره مارديت امي ردت وضليت تحجي وترزل بي ، ومارد عليها وسدته بوجهه ..

.دك مره ثانيه شلته ورديت علي بعصبيه ، سالته شنو الحل عندك حل ..

سكت ..

حسام رد ، الكالي حل مو تحبني ..

شبيدي ..

روح لعمامي ، كللهم رايدهاا ..

جايز من اهلي اروح لعمامج تخبلتي انتي ، عمامج ناس ايده والسلاح حتى ميتفاهمون ، احنه بعز طائفيه منو كال مايقتلوني ..

حجيت بعتب :- جايز مني لعد انته ..

ولا منج تعرفين شكد احبج ..

شلون تحبي شوفني شلون تحبي اثبتت لا تحجي حجي ماريد حجي ، اريد فعل اثبت ..

سكت مارد بس اسمعه يتنفس بقوه ..

سديت التلفون بوجه ، وغسلت ايدي منه ، عرفت صدك حبيت واحد جبان ، ورطت نفسي بواحد مابي خير وتعبت كلبي وياه ..

اجت مرت عمي ثامر ، هيه ابنها ، حجو ويه امي على تفاصيل ، كعدت هيه وياهم ومرت خالي ،

حبست روحي بالغرفه ، حتى اهلي ماخليتهم يشوفون وجهي ابد ، بعدها بلشت امي تجهز الي ، خالتي اجت وياها بناتها ، جانت تجيب اخبار واوامر عمامي ، فرقد اجه كم مره ومارضيت التقي بي كارهته كره العمى ..

يضل كاعد بالصاله بالساعات يم جدي ، ومايمل ، امي كم مره حجت اطلعي اله احجي وياه ليني كلبه حاولي تقنعي ياجل الزواج لو يسكن هنا يمنه بحجه ماكدر ابتعد عن امي ..

جنت اريد اعاقب امي عبالك ، شديت حتى ويه امي ، شفتها باعتني هيج ماحاربت مثل ماجنت اتصور ،

توقعت ماتخلين ازوج واحد منهم لو مدري شيسصير..

بس جن عمي ثامر مخوفها حيل النذل ، جانت تكعد ويه فرقد وتحجي وياه عادي هيه ، بس اني لاا ..

كمت تجهيز وتكلي تعاي شوفي شجبت الج ، ادير وجهي ..

نوب اتذكر سوالف اخت حسام على ترتيب غرفته اشبع قهر ، دوام اخذت اجازه بدون راتب لفتره بسبب بيت عمي ، وشرطهم ماداوم هالفتره ..

سكتت وسكتت ، وعفتهم يصرفون بكيفهم ، اذا هيه ام الحجايه الي ماتنكسر الي هيه امي ، مشو حجايتهم عليها ..

لحد يوم العرس ، عساه عزا انشالله ولاصار العرس ..

ماريد اذكر تفاصيله ولا اي شي يخصه ، صدكو وثقو بالله ، لمن تكرهين عرسج هوواي تفاصيل تنسيها بيومها ، وتغلسين عنها لان مايهمج انشالله يحترك العرس عادي..

لو عرسج بدشداشه هم ماتهتمين ، بس الي فرحانه بعرسها تتذكر تفاصيله وتهتم باحداثه وباصغر تفصيل ..

الا الي كاره عرسها هاي غير ، هاي مفتحه عيونها بس عميه ماتشوف ، جنت جسد بلا روح ، ماحس بشي اسمه فرح ، احساس بارد وغريب ، محد يصدك من اكول جنت اتمنى اموت بمكاني ما اطلع باب البيت وياهم …

لمن دخل فرقد ولزم ايدي ايده ترجف ، جف ايده بارد ..

عكس ايد حسام جانت دافيه ..

نزلت دموعي واني مدنجه ، سحبني من ايدي عليه ولزك زندي بزنده ، عبالك حطير منه ..

امي لبستني الغطا هيه واخوته ومشني ليجدام ..

اسمع صوت الطبل والموسيقا ، والطلق وجكليت الي انثر علينه ..

حسيت على حظنه من عرفت امي من عطرها حظنتها وانهاريت بالبجي ..

هيه تبجي واني وياها ، جدي كوه وخرها ، حظني كلي صيري سباعيه جدو ، صيري مثل امج لاتنكسرين ..

بست ايده وطلعت من البيت ، شدرانه هالبيت راح اغيب عليه سنوات ،

هلي شمدريني تالي سنيني حيكضي بس لوعات ..

لو ادري جان حظنت حياطينه هم ، جان خذت ذكره منه تسكن جروح كلبي وتسكت صوت الفكراك ..

ركبت سياره زفه وبصفي فرقد الي شايل جفيته البيضه ويمسح بعرك كصته ..

صعد فراس بالصدر ، التفت شاف فرقد وجه احمر ويمسح بالجفيه ..

شهك وفك عيونه ، لااا يالرعن هاي جفيه تمسح بيها عركم ، لو مممم ليش تحجيني هي اثول ، ضمها بجبك هاي مو هسه اطلعها ..

اندار علي حجه :- ماكو مستحه صفك باديه عرسان انتو بعد ..

اندار يسوق سياره ويحجي والله عاد شمحصلين احنه نتعب ونركص ونطبل الكم وانتو تاليتكم باليل محاضنين ودك بوس ..

عفست وجهي يييع قذر كبر ، التفتت على فرقد بسرعه مشمئزه ، ضحك كلي يشااقه ترة ..

بساع درت وجهي على جامه ..

حركت السيارات وراها سيارت الزفه ..

امي وراي واكفه باب بيتنه وجدو لازم جتفها كعدت بالارض تبجي منهاره خطيه ، لزمت جامه ابجي عليها ..

جرني فرقد شبيج اني امج وابوج ، قابل وين رايحه يمعوده اني هم اهلج ..

ابو بالصدر حجه عياره نسوان يمعود ، امك هم هيج جانت هسه تبع اهلها لخاطري …

ساعه ويله وصلنه للبيت ، طلعت روحي هالكت من البجي ، نوب بطني كطعتني من الالم ..

صعدت عندي الحموضه كتلتني ، متت بيومها نوب من ثكل المكياج ومن البدله ومن لزمه فرقد الي مجتفني عبالك راح انهزم منه ..

صعدوني كبل للغرفه ، دخلو همه ركص بالغرفه هجموها هجم ، الحجيه هيه وعصاتها بنصهم بناتهم للي حاى على جربايه صعدو يعلهلن ..

كمت حتى عيوني ماكدر افتحها اباوع بالوجوه

اريد امي اريد احد اعرفه ، بس خالتي واكفه بعيد عني ..

اختنكت نفس احسه انكطع عني ، رفعت ايدي اشر الها كووه همست خاااله .. خاله اختنكت ..

محد يسمع محد يحس ، هلاهل ، ركص بصوت عالي ودبج ، ريحه العرك ، لو البخور ، لو عطر الغرفه المبالغ بي ، لو الحر ونفس الي صار عليه حسره ..

كمت لحيلي داطلع انهزم من هالجو ، عثرت وكعت على وجهي غشيانه ..

احس خلص ، بعد مادري بنفسي ودنيا افترت بيه ، ماحس غير على بس صفكات على وجهي قويه و سطل ماي تكول مو كلاص ماي غركوني بي ..

من عدا الرج ، اكعددددي شبيج عروووس يمعوده فشلتينه ..

بجيت يماااا اريد امي عفيه حمووت ..

ردت وحده منهم عليش تموتين يماا توج يالله اجيتي يبوو يام فراس بدت عياره جنتج من هسه ..

المره ام فراس تقربت علي ، ياا حبيبه شبيج اسم الله يمه ..

فدوه خاله اريد امي رجعوني الها عليكم الله ،

يااشنرجعج يما عيب بعد ترجعين هسه مره مزوجه انتي ..

ضلت وحده ترادد وتكللها دشوفي شلون تفتت الكلب ، نوب خربت جدام العالم طيحت وجهنا ..

نترت بيها ام فراس ام مظهر شبيج خيه جنتج لو جنتي هيه جوزي منها دشوفي وجها صار كركم خطيه ..

كمت لحيلي كوه شالني اني والبدله صارت عباره عن لحاف ومنكع بالماي ..

نشفن وجهي والبدله بمنشفه لاصن دنيا عليه ..

ذيج تحجي وذيج اذم وكلهن فوك راسي ..

اريد مجال اشوف نفسي اشوف روحي ، ماكوو موتني والله ، لحد ما الحجيه سحلتهم وطردتهن بره كالت دنزف للولد يله ..

كعدتني ام فراس كالت يمه فرقد هساع يصعد ماوصيج بعد عينها لعمتج ، كلمه طيبه صدقه خووش يمه ..

سكتت مدمعه ..

حجت ترة فرقد طيب والله مو لان ابني واحمده لا وداعتج بس فقيييير بالكلمه زين يجي وياج ..

رمشت بهدوء كاطعه الامل ..

باستني وطلعت ، الحجيه سالتها ام فراس تنطيني جنتج جفيه ..

ردت لا حجيه غير كون امها موصيتها ومعلمتها ..

- وانتي تعتمدين على عفاف من امداج اي والله دروحي شكيلج وصله من وجه مخده ابيض من جرجف من طاح حظجن مايعتمد عليجن ..

اندارت علي واشرت بعصاتها ولج الولد يكلج موتي كول صار يكلج عيشي كول صار افتهمتي ..

ضليت اباوع بوجهه مبرطمه ..

نترت مو وياج ..

بجيت كبل ..

هو هاي احنه شحصلنه منج ، من اجيتي لحد هسه بجي ، دضلي هيج حد مايطيح حظج من امداج ..

خليت اديه على وجهي وابجي مخترعه عفيه دزولي على خالتي ، بطني توجعني ، فدوه بيبي عليج الله ..

كلشي مابيج ولج الولد راح ينزف تأدبي وصيري عاقله ..

لزمت بطني حموت والله توجعني ..

ماحجت ولا ردت علي اجت ام فراس جابت وصله وخلتها جوه المخده حجت هاي عمه الوصله مو تنسين من يسالج عليها فرقد دلي عليها ..

جرتها بيبي وطلعن واني اكوللهم بطني حجه حموت والله ..

كعدت بالارض ابجي لازمه بطني ، يمكن لان ماماكله من صبح توجعني مدري خوف ، مادري بس احسها كطعتني ..

سمعت صوت هلاهل وطبل ودبج جوه بعدين صعد على درج عرفت صعد فرقد ..

بماا جيت اتقيئ والله من خوفي ، لميت نفسي بصف الحايط وابجي ، حمووت موو اي شكو لعد هيج ديصير بي ..

يماا جدوو وين اريد امي جدو اي واحد ..

انفتحت الباب لميت نفسي حيل ، وارد اريد امي عفيه بطني توجعني ..

انسدت لزكت نفسي بالحايط ، حسيت واحد كعد كبالي من صوت ركبته الي طكت ..

غمضت حيل ودنجت راسي بين رجليه ..

ايده تخلت على راسي همس ايماان ..

اريد امي عفيه ..

صار تدللي ..

رفعت راسي وديني هسه حباب ..

مرام :



رجعت للبيت من المدرسة ضايجه حيل وخايفة احجي لاحد شلون شسوي اذا وصلت السالفة لابويه ما راح يرضى واني ما اريده يعرف ...امي اعرفها ما تدبر تسد سالفة ...بقيت حايرة شسوي لثاني يوم دا اطلع للدوام واني ما مسويه حل ...



شفت فراس بسيارته ديطلع من فرعنا وكف انتظرني يوصلني عادي بعائلتنا يوصلونا اي واحد منهم يكله ياخذ اللي على دربه ...



وصلنا باب المدرسة اني افكر شلون انزل وشراح اسوي ..تندمت لو ما مراددة لو ساكتة هسه شلون ...نبهني صوت فراس



-انزلي؟؟



-هااا...اي انزل!!



-شبيج مرام عندج شي محتاجه شي



هزيت راسي بساع معترفة



-انفصلت يومين ودزوا على ولي امري واخاف اكول لاهلي



-شسويتي؟؟



-ما سويت المديرة تكرهني دائما تكول عني وكحه مدري شبيها ويايه والبارحه تحاسبني عاللبس وتكلي انت مو مؤدبه



اني احجي وهو حاط ايده جوه خده ويراقبني



-هيج حجت وياج؟؟



-ايييي والله حتى خجلتني وتجر بيه من صدريتي واني تعصبت .....شمسويه الها



-امممم



-شبيك؟؟ما مصدكني



-باوعي راح انزل وياج واحل المشكلة يا مرام بس تره كلام مديرتج يحتاج تصفنين بي ليش من دون البنات انت



-هي ....



-لا تقاطعيني وصوتج انت فعلا عالي ما كذبت مديرتج



-مو لازم رجعني اذا تكعد ترزل بيه عبالي راح تساعدني



-اساعدج بطيحان الحظ مرام انتبهي لنفسج مو صغيرة انت ..وشوفي بنت عمي من الاخير اني تصرفاتج ما تعجبني



كتفت ايديه لصدري من شفته يرزل بيه ورجعت نفسي عالكشن باعتراض واباوع كدامي ساكته



-ابقي هنا شويه وارجع افوتج للصف ..بس تره مو كل مره مرام خليها ببالج مو كل مره ولا عبالج اني مثل غيري ولا تستغفلينا دير بالج ...كانت لهجته نخويف بس وين هو اني عين كح...على كولة عمتي صابرين !!



نزل وافتر من كدام السيارة عيونه عليه ...دقايق ورجع فتح الي الباب بدون كلام ....نزلت وراه امشي لداخل المدرسة ...فتت المديرة مبدلة النغمة والمدرسة الطلعتني البارحه تبرر بموقفها وهو ابو الراهي عليهن ...تركته ومشيت بالممر ناحية صفي وكل ما التفت اشوف عينه ورايه لحد ما دخلت



دخلت للصف والكل عيونهم تباوع الي كان بادي الدرس ومتوقعين ما اداوم مفصولة وانلغى حتى القرار ....كعدت بمكاني بهدوء وتكبر ..شكد كنت شايفة نفسي شفتها اضعاف ...وهاي صار اكو من يمشي الي اموري !!!






يوم يومين انضبطت وبعدها رجعت تفرعنت والمديرة تغلس عني وعن تصرفاتي ما اعرف شسوالها فراس ...بس استغليت الوضع

طلعت من الدوام بعد اسبوع وجان اشوف عادل منتظرني طرت بفرحتي ...كومه صار واني ما شايفته وهو هم كان متلهف عليه سولفنا هواي وكفنا بركن يم المدرسة يصير على فرع هادئ بعيد عن العين وبدون تردد قبلت ثاني يوم نلتقي بعد الدوام وهو يرجعني ...

وفعلا ثاني يوم صعدت وياه لا خوف ولا رادع مامنه حيل واكول هو يريد يخطبني ...اتفقنا يجيب اهله ويجون قبل امتحاناتي ...ووعدني كومه وعود خلاني اطير فوك الغيم ...كانت ملامح علاقة حب صادق ومصدكه بي كلش ...

تاجلت خطوبتنا لبعد نجاحي بذيج السنة بحجة عدهم بناء وكل ما اشوفه يماطل ..علاقتنا وبعد هلكد وقت تطورت عادي يكمش ايدي لو يبوسها وعادي يعدل حجابي بايده وعادي يكرص خدي وهواي شغلات حرام بحرام بس وين العقل ماكو جنت بدون اي ذرة عقل وغضبت ربي بافعالي كلش هوايه ....

ونجحت الرابع بسنة بنص ٢٠٠٦ وحصلت من ابويه وعد اشتري الاحبه واريده ….

نزلت الموبايلات وعاجبني يصير عندي واحد واخذني بابا واشتريت كان بوقتها حديث يخبل LG ملون مو عادي ودفتري وبي شاشة خارجية ملونه ..

سويت فتنة بوقتها لان بنات عمي كلهن كامن يريدن يشترون واكيد مو مثل هذا !!

الدلال الزائد وعدم المحاسبة وايضا منع اي شخص من التدخل خربني حيل ... هسه تكولون ماكو هيج شي لا اكو هواي آباء يدللون هيج وخاصه لو كانت البنت الوحيدة وهذا معروف لكن المشكلة شلون هالبنت راح تتصرف ..

وشلون سلوكها يصير احترامها لابوها التعبان عليها ومربيها اني مع الاسف كنت اسفل سافلين ...لا فهم ولا حياء ولادين

يومية انتظر اهلنا ينامون وادك سوالف ويه الحبيب !!استغليت الثقة وغفلة الاهل ونسيت اكو الله يشوف ويحاسب ..

..ما حسيت بالوقت من مر..سنين مرت واني وياه تواصل نكطع فترات ونرجع ازعل اعترض اريد حل اريد خطوة تالية وهو يجيب ويتحجج وبديت الجا لضمياء وحجيت الها وهي بدل ما تمنعني لو تخوفني كانت تشجعني اكمل وياه وهي تدبر الي ؟؟

فراس ما احتك بيه بعد بس باله شي واني اعرفه عيونه وكلامه كله نغز ..اكره شخصيته لئيم ويحقر واني خايفة لا يوم يتقدم عادل هو راح يخرب..

وصار اللي خفت منه كوه قنعت عادل يخطب ويجون امه واخته انرفض قبل لا يوصلون لامي جدتي صارفت من يمها …

وكايلة الهن محجوزة المن محجوزة ليا نعا….ل بيهم تخبلت اشيل واركع بروحي ، وامي عرفت بيه رايدته لهذا الولد ولا همني واذا عرفت غير ام مطفيه لهسه ما حست ببنتها ؟؟

متت بيومها من القهر يعني شتريد مني هالعجوز المخرفة مو كافي مسممة عيشة ايمان عالبعد مو كافي يجبرونا على عيشة ما نريدها..

هي كوة ناخذ بنفس هالبيئة ال…….اني مو ذيج الفاهية اسكت الهم خاف عبالهم مثل ايمان يجروني مثل النعجة لذبحها!!

عبالي رجعة محمد السبب بخراب خطوبتي رحت اله مفورة واعصاب نار دكيت بابهم واعرف امه واخواته ماكو رايحات لبغداد اول ما فتح الباب انهديت بي رزالة ...

-تعرف انت شنو ...انت اكثر شخص بلا كرامة مقابلته بحياتي يا رجال ما اطيقك ما اريدك لو تصير وزير مو بس مهندس ما تملي عيني ما اريدك ..

هو فاتح عينه مو فاهم شي عبالك واني مستمرة لحد ما تجاوزت حدي عاط بيه ..

-ومنو جاي يمج انت ؟؟اطلعي بره يلا لا تخليني اضربج...بابا مو بحالج اني واخاف محد حچالچ های حلقة اني مو بحالج …

اباوع لايده بيها حلقة ذهب!!خرب؟؟شوكت ومنو؟؟؟؟؟

بارت9





وديني هسه حباب ..

جر نفس ساكت ، رديت الله يخليك مارايده زواج والله ..

كام لحيله ضايج ، دار ظهره وكعد على جربايه ..

- حجيت بتوسل :- فرقد ؟؟

اندار علي ، حجه كومي بدلي يله ، ابويا بره ماريد حجي زايد ينحجي عليه …

هزيت راسي برفض ، كمت لحيلي ، بداعت غواليك فرقد ، حباب ركضت لعند رجليه ..

ابوس رجلك ، كول لاهلك ماريدها الله يرضى عليك …

- دفعني ضايج تخبلتي انتي ، شنو الزواج لعبه عبالج ، هااا ترى تزوجتي وخلص شنو ردني لاهلي انتي ماتفكرين عقل ماكو ..

كومني لحيلي جرني يحجي وياي وينتر ، دنجت راسي ابجي ، مااريد عفيه ، مانطيتوني مجال حتى اتقبل ، مو هيج ..

وكف ونزل اديه عن ذراعي ، سكت ثواني ، حجه بهدوء :- معقوله تحبي هالكد ؟؟! ..

رفعت عيوني عليه ، شهكت ، رفع حواجبه :- وين واصله بينكم العلاقه وهالدرجه متأثره ، وتبجين وجهج مكلوب ازرك هيج ..

درت وجهي اتجنب شوفته الي ، عتني حيل من جتفي :- احجييي ، انسي ايمااان انسي افتهمتي دخلتي لبيتنه ودخلتي غرفتي خلص ، طلعتج منا مستحيل طلعتج تصير للكبر بس ، افتهمتي ..

وفضيني يله وراي طلعه ، ابويا هسه يتلكاني شكله كضتها بجي جرني يريد يرفع البدله ..

دفعته حيل ، :- وخرر وخرر شبيك ، مخبل انته وخر ، فرقد مو ضخم طوله وسط وحتى وزنه وسط ..

اطول مني بشوي يعني ، بس يبقه رجال وجرته الي تعثر وتوجع ، حاولت ادفع بي ، بس هو جلب ..

دفعني على الكاع وكعت على ظهري نوب بدله جبيره وثكيله حتى الحركه بيها صعبه ..

نمت على ظهري ابجي خليت اديه كباله :- حجيت فرقد والله امووت لا توصل بداعت امك..

شمر ملابسه ، نزل لارض عطت حيل يماماااا ..

عووفني ، هو خله ايده على حلكي :- يحجي بت الكلب فضحتينه ، شجاج ولج كلبه شبيج ..

بجيت :- وخرر وخروو عني ، عمه صابرين ، خاااله …

بعدني ادفع بي جابني بجف احس حتى سن بحلكي طك ، خنست ابجي لفيت وجهي باديه ادااري وجهي ، هو وكف ضل ساكت ماتحرك ، وخر اديه عني ،

ضكت ملوحه بحلكي وزفاره طعم دم ..

كام هو يلهث :- ياحيووانه اهلج ماعلموج ، لو امج الي مسويه نفسها فهيمه ماعلمتج ، الي يصير بين رجال والمره ، لو انتي كلشي عندج بالمكلوب حتى اخلاقج ..

- هااا عاط بيه مو وياااج ..

سندت نفسي ورجعت ليوره اردد وخر وخر ، اكتل روحي والله وخر ..

دنعل ابوج لابوو . دكتلي نفسج حتى تصيرين عار ، هسه اني اذا سالوني شكللهم ماقبلت الخانم هااا ، شكووول ..

لميت نفسي والبدله عليه ، ماحجيت بس ابجي ..

هو كعد على جربايه عصبي ويغلط علي ..

التفت علي بسرعه :- رد ولج خاف مو بنت انتي وهيج انكرصتي ..

ماحجيت ، عاط :- مو وياج كام لحيله تقرب علي بسرعه احجي ..

- لا والله لاااا ، بس مو هيج انطيني مجال ، الله يخليك ..

كوه احجي واجر النفس ، نوب حلكي يقطر دم ، هو صفن بوجهي ، دار وجهه ركض للستره طلع وصله ..

رجع بسرعه ، قدمها الي حجه تصخمي وامسحي دم بيها هناا ..

رفعت نظري علي وجهي كله دمع و كحل ، اخذتها من بهدوء مو فاهمه شي ..

توه امسح وجهي ودموعي ..

- نتر موو هذااا امسحي دم الي بحلكج انطي الوصله ..

لزمتها امسح شفتي توجعني احسها ورمت ، امسح على كيف لان متأذيه ..

جرها مني حيل ولزم راسي يفرك بحلكي يمسح.دم ، بجيت حيل متاذيه من الالم ..

- نتر وجع اوكفي عاد ، وخر من يمي يباوع بالوصله وعافس وجهه .

- كال على الله يصدكون بيها ، لو ما اظن بس ادعي لربج ، والا ترى ليلتج تصير مصخمه ، على راسي وراسج ..

بسرعه نزع ملابسه .

اني درت وجهي عني غاضة البصر عن منظره ،

نتر بيه :- هو ينزع كومي ذبي البدلة عاد ، لاتخليني اتخبل عليج كوومي شهل المياعه الي عندج كومي ..

سندت نفسي بالأرض اريد اكوم كوه ، دايخه ومسطوره ، هو صافن علي من داكوم بلع ريك ودار وجه عصبي ..

غير ملابسه ولبس دشداشه وكف جر بطل ماي من على الكومدي ، بلل شعره ومشطه ،

اني واكفه مثل الصنم لازمه بدلتي وشهكه بصدري ، اشهك ..

حجة :- يله عيوني ي الاخت ايمان غيري ملابسج ..

طبعا اكلج اخت ايمان باعتبار احنه حاليا متخاوين ، مابينه اي تزاوج ...عوج حلكه مو عاجبه نوب تخصر الي ..

اشر بدلي يله ..

- همست كوه ، مو على اساس اخوان شلون ابدل كبال اخويه ..

هاااا رفع حواجبه ، انتي راح تفريها علي ولج ، تجفي شري وخلصي يله اريد اطلع بره نسوان يدخلن ليمج يلكنج بالبدله واغسلي وجهج جنه جعب جدريه مصخم ..

ضليت واكفه والله استحي انزع جدامه نوب هذا واكف مختصر ويكلي يله فضيها عاد…

نزلت الاسقيات مال البدله فشلانه منه ، هو وكف يباوع ، والله صعبه الله يشهد يوم باليله اكعد ابدل جدام واحد حتى حجي مثل الاوادم ماحاجيه وياه ..

فزينه اثنينه على دكه الباب حيل وصوت الحجيه ، حجت هاا يمه بشر جن طوولت شجاكم العالم بره عيب جده يله ..

ضرب كصته حيل بجف ايده حجه هاااك استلم ، هاي اولها وفضينييي ..

نزعت البدله كوه ارجف ، اديه ثلجت عكس وجهي الي احس

ه نار تلهب ، همزين لابسه ستريج جوه البداله ، كبل جريت سيت نوم على جربايه ولبسته فوك الستريج ..

شمر علي بطل ماي نتر غسلي وجهج ..

بلتت خاولي وكعدت امسح بي وجهي مورم من البجي من عدا حلكي ، عيوني كل عين هالكبر من الدموع ، هو بس يتأفف غلست علي ..

كمت وانتبه عليه هو جر الفرشه من الجربايه وشمرها على كاع وخربط مخدات والجرجف ويسوي حركات بيهم ..

راسي احسه طبل والله ، كعدت على جربايه لازمه راسي ، الالم فضيع عندي ..

سمعت صوت فتحت الباب وطبتها حيل وراه ..

ثواني وطلعت صوت الهلاهل والرمي والديجي رجع اشتغل مره ثانيه .

تمددت على جربايه ميته تعب ، اريد انسى الي ديصير ، كون اختفي وارجع يم امي وجدو ..

انفتحت الباب بهوسه وهلاهل وصوت الحجيه تحجي ياا ولج ناايمه دكومي يمه كومي ناس اجت تبارك ..

بين واعيه وبي لا واحجي اريد انام وخرو عني ..

جرتني مرت عمي مظفر تصير خاله فرقد بنفس الوقت ..

حجت دكعدي فرك طرج اكعدي وكت نوم هسه يالعياره ..

كمت كوه مفتحه عيوني ، ام فرقد حجه مامتعشيه مو يمه اجيلج العشه تاكلين لكمه وجهج دعه كركم ..

ردت ام مظهر يا كركم ولج هاي من مكياج هيج حتى وجوهن خربنها بهل المليصه ..

حجت الحجيه وخر عنها يمعوده بت داعيه جنازه تعبانه ..

-حقها تتعب ، ضحكت وخلت اديها على حلكها ، اذا هيه وصل صوتها ليمنه ، حتى الي مايعرف عرف بسبب صوتها ..

دفعتها عني ورجعت تمددت ام فرقد كالت اطلعن بره خلي بت ترتاح ، جوكه مال نسوان لا وحده ولااثنين ، طلعن من يمي غطتني ام فرقد وطلعت ، اني مغمضه دموعي طلعن ، عفيه شكد بجيت ..

حتى خدودي حركني ، هسه جاي تتعذب مثلي يحسام لو عايش عادي ..

هم حسك كلبك اني ضعت من اديك لو مشت وياك دنيا ، مسحت دموعي ، شحصلو غير البواجي الي حبو الي مو الهم ..

ماحسيت غير وره كم ساعه فرقد يعس بيه ، فتحت عيوني بتعب هاا ..

- تتعشين ماماكله انتي من الظهر ..

جنت من صدك جوعانه بس نعاس غلب عليه ، حجيت تعبانه اريد انام ..

- غمضي واني اوكلج عود .. ابتسم ..

- هزيت راسي لاا …

دار وجهه ضايج هز راسه بكيفج شال الصينه وخرها عن جربايه ذبها بالارض وكعد ياكل لوحده ..

غمضت عيوني رجعت نمت ، جسمي مخلخل احس نفسي مفككه ، لثاني يوم حسيت من نفسي ساعه ب٩ ، كمت اتلفت فرقد مموجود ..

كمت لحيلي وخرت الفراش ..

راسي هالكبر احسه ، الغرفه فارغه بس اسمع اصوات جوه ، كمت لحيلي مشيت طلعت ملابس و منشفه ..

نوب الحمام بره الغرفه ، شفتها صعبه اطلع اسبح كبال احد بيهم ..

فتحت الباب على كيف مستحيه وخايفه ، مديت راسي طابق الثاني هادى بس الهوسه جوه ..

رجعت لمكانه خجلانه اطلع ، ضليت على كعدتي ساعه ، كل ماكول خلي اروح للحمام اكول لا خاف احد يشوفني ويسمعني كلام ..

تالي انفتحت الباب فجأه رفعت راسي كبل ..

لان فرقد حجه كعدتي عبالي نايمه لحد هسه ..

همست لا كاعده ، صار ساعه ، نزل نظره على الملابس الي بيدي ..

حجه خبله انتي صار ساعه كاعده وملابس بيدج ومادخلتي للحمام شبيج مناكل بشر ترى …

درت وجهي عني ضايجه افرك بيدي ، حجه دكومي كومي اسبحي يله وكت ريوك العالم تجي تبارك ..

مشيت اطلع واتلفت هو وراي يباوعلي ، ضايج ..

فتحت باب الحمام ودخلت بسرعه ، سبحت بسرعه بسرعه ربع ساعه ماطولت عبالك احد راح يجفت علي ..

لفيت نفسي ورجعت ركض للغرفه تلكيت اخت فرقد غصن ، من شافتني ابتسمت ..

مشيت ودخلت للغرفه ، لكيته مدد على جربايه وشايل الريموت يكلب بالقنوات ..

تالي ثبته على قناه مال الاغاني ، جانت طاشه بذاك الوكت ..

وكفت امشط واشوف هذني جماعه الردح والهز ، طالعات يركصن ، مدندشات بالذهب …

كل شوي عيني ترف عليهن ، خاب وحده منهم ذبت لحم كبر ، شبيها هاي ، حتى وجها عرك وكوه تتحرك ، من دهون ،،

اجاني صوت فرقد ، تعرفين تسوين هيج ..

التفتت علي ممفتهمه هاا ..

اشر براسه مبتسم تعرفين تركصين مثلهن هاا مو تعرفين ..

نزل نظره على ثوبي ، تغير لون وجهه رفع نظره علي ..

نطيته ظهري كبل هذا بس لاعباله اني كاوليه لو كح** مثل ذني ، والله يالله منين جايبي حتى يسألني هالسوال ..

كرر سؤاله مو احجي وياج تعرفين مو ، مادام *** ماكو خلي نصبر نفسنه بالهز شكلتي …

عفست وجهي يييع كبر شهل الالفاض ، درت علي قرفانه حجيت صح عقدت علي واني بحكم مرتك بس ملازم تحجي هيج جدامي ولا بهل طريقه ..

ضحك كعد على حيله ، :- مادامج بنت اصول وتعرفين بالالفاض ، ماتعرفين انتي مرتي وحقي عليج ..

بعدين تعاي يالفاض هاي ، هو هيج اسمه ، قابل احجيلج فصحه واكلج نكاااح طكها ضحكه ، يقشمر نوب صفك ايد بيد ويحجي كون يدري ابويا الا يعلكج من اذانج بس اني ساكت ..

بلعت ريك ، ذبيت المشط على الميز ولفين شعري ، نوب بطني تقرر من جوع ..

حجيت جوعانه ..

رد :- انزلي اكلي ..

- استحي ..

- مشكلتج ..

دنجت راسي مدمعه ، ياربي اول مره اجوع بحياتي ، حجيت صار يومين مماكله حتى دايخه ..

- حجه وشحصل اني ..

باوعت علي مقهوره ، فركت باصابعي ، جر نفس طويل

خله اديه جوه راسه ومدد على ظهره مبتسم ..

- ترضاها مرتك تضل جوعانه ..

- منو يكول مرتي شنو الي يثبت ..

- رفعت حواجبي ، مو سوينه عرس ..

ضحك لا انتي هبله رسمي والله ، اريد اعرف منو نطاج شهاده وسواج مهندسه بالله ..

عوجت حلكي نفسه الي نطاك شهاده معهد تقني ..

كعد الحيله ، تستصغريني يا اخت ايمان ..

سكتت ..

- تتباهين موو ..

- مارديت ، حسيت نفسي غلطت ليش اجادله بالله ..

- رد.كال تتعالين عليه بشهادتج …

- مو هيج بس جوعانه وانتي كعدت تتمصخر علي ..

كام من الفراش نكت ملابسه . نتر دمشي ننزل نتغده لاتسوينه بخله هم …

بس نزلت امه واخواته صبن الغده بسرعه رغم ساعه بال١١ بس همه يتغدون من وكت ..

خلنه جدامنه وكالو اكلو ..

ام فرقد مو اني اكول عليها فقيره لا المواقف تشهد الها ، مره مسكينه مضطهده من قبل عمي ، بحيث دخل يصيح فهيمه ماكو تصير بيبب هذا السريع من الخوف ..

وحتى بناته خطيه ، طلع ظالم على عايلته هم مو بس علينه ..

بس فراس هذا يمه سوسه راس البله جنه عمي ، يدخل يتهنتر ويطلع يتهنتر ، فرقد انتبهت علي مجنب الكل ، وكلامه قليل ..

بس هم عنده خباثه ، خباثه تطلع بس وياي ، تغديت وصعدت ..

تمددت انام شوي ، حسيت على احد.مد ايده علي ، غمضت عيوني عرفته من عطره ..

حجه كاعده موو ايمان ..

غمضت حيل وكمشت جسمي ..

- همس ادري بيج كاعده اكعدي خلي نتسامر مثل المزوجين نتحاظن صخام عزاا بعينج ..

مارديت ..

- انخمدتي موو عسى من طابوكه تنام على مخج بسيطه على اعلمج ..

عفته وسويت نفسي طينه نايمه كلش ..

سمعت هبد نفسه على فراش هبد ضايج ويغلط ..

- نذله ماتعرفين حقوق زوج ، مامتربيه صوج امج خلتج تدخلين كليه وماعلمتج ادارين رجال وشوفين طلباته ..

مانفهت علي ولا جادلته ، خفت ينكلب علي ، ساعه وهيج ورد رجع يرفع بثوبي ، لزمت ايده فرقد جووز مني ..

- لحد شوكت ..

د- رت وجهي علي مادري جوز مني يرحم اهلك ماريد عوفني على راحتي ..

- اخلي نفض سالفه وبعدها تتعودين ..

- ماراح اتعود اني مو صغيره ترى ، اذا صارت غصب اضل طول عمري كارهتك الله يخليك ..

- دفعني حيل وحجه لعد ماتنامين يمي بنفس الفراش ، اني مو حيوان اني رجال نايمه يمي وكل شوي رجليج طالعه لو صدرج شو حايط مثلا تنامين بالكاع ..

ماحجيت صدك شلت مخده حيل بعصبيه وذبيتها بالارض ونمت بدون غطا ولا فراش على زوليه ..

هو اسمع صوت نفسه وعصبي ويحجي ..

استمرت وياه هيج ، كل مايتقرب مني ابتعد وانفر ، مو كارهته بس لاا جنت ماطيقه ..

عطره . طريقه كلامه ، اسلوبه ، حتى نظرته ، احسها تخترقني ..

عده اسبوع ومرت السبعه بسرعه بسرعه ، امي ماجت لا حظرت بس مرت خالي اجت بسرعه وكالت جدج مريض وامج ماكدرت تجي بس جابت هدايه واجب ..

عرفت امي ماراح تجي كره بعمامي وحستهم شلون لوو ذراعها مارادت تخليهم يشوفوها مكسوره بيه ..

شوي وراحت مرت خالي ، نمت بحظنها ابجي ، كوه اصير طير واروح لاهلي ، همست الها حظنج بارد خاله ، اريد.حظن امي معقوله هيج تكطع عليه ..

طبطبت على جتفي حجت تجيج تجيج وين تروح يعني ، بس مقهوره هسه ، وحالها حاله ..

اذا تردين شي تقربت علي تهمس يم اذني مرلي ل خالتج خلي تخابرنه ماشي ..

هزيت راسي سلمت وطلعت ..

ضليت واكفه بالباب ابجي عليها ، سمعت صوت وراي ، يماا العياره وين عايشه يمه بالبر وهيج موتي نفسج لو ماحنه هم اهلج .

التفتت امسح بدموعي لان خاله فرقد ام مظهر ، ماحاجيتها ، مشيت ادخل جوه وهيه وراي نحجي ..

غصن شافتني حجت ليش تبجين ..

ماحجيت بس برطمت اشهك ..

حظنتني وحجت يمعوده احنه هنا هم خواتج ، ليش عازله نفسج تعاي ويانه من ننجمع غيري جو ..

دفعتنه ودخلت ام مظهر ، حجت فهيمه ام فراس وينج شنو هاي عيوني شلون جنه عدج الله هم بلاج بيها ..

المره بالصاله وحجت وردت هاا خيه هاا شاكيتلج اني دعوفي بت ..

عفتهن وصعدت فوك ، ضلت هيج جوه تحجي واسمع بيها ..

مرت عمي ثامر مره فقيره ، هيه وبناتها ، يس سبحان الله هاي تجي مثل الشيطان الي يوز ..

تكعد عينك عينك توز عمتي علي ، نوب طلعت سبعه وشافتني ماشتغل وياهن لان ميخلني بحجه للتعبين نفسج وشغل البيت ميرادله ..

هيه كبال عمي تكله جنتك كاعده وبناتك يخدمنها ، لو ترد تكول عمي هيه ام فراس جنه و ايمان العمه ، شو ام فراس هيه تخدم مو ايمان ..

عمي سمعني حجي وحتى رزل فرقد ، على شوف مرتك جايفه .

سكتت وكمت اساعدهن حتى لو مارضن كوه ادخل نفسي ..

مرام ...

ما كنت مستوعبة الموقف محمد تراجعت عن بيتهم ، ووكفت بالحديقة افرك بكصتي منو؟؟ كعدت على صبة الممشى ونزلت رجليه عالحديقة منو من ولد عمامي اذا مو هو!!

بعد افكر طلع كدامي ...شلت راسي لوجهه ابتسامته الخبيثة الدائمة ووكفته الاستفزازية ..

ايدي بجيوب التراك ويباوع باستكبار روحه ،حجيت متضايقة

-شكووو؟؟

-هههه سمعتي الخبر ؟؟

وكفت بجفلة اسال واتاكد : -انت؟؟

-اي اني اولى من الغريب ابن عمج..

-و...اجيت اكول وعمى!!بس ويامن فراس؟؟غيرت كلامي بلهجة اقل حد

ه :-اني ما اريد اتزوج

-هااا ما تريدين بس جايه لهنا متعاركه

-اي عبالي رجع لهالسالفة

-زين شبيج وما تتزوجين

-بعدني ويني وين الزواج اني ما بيه عالمسؤولية امي لسه تخدمني

تقرب وكعد يمي مبتسم ما يباوع لوجهي بس يسمعني

-منو كال الج رايد خدامة اني ؟؟

-أاأاقصد يعني ما ادبر

-اممممم...انت ما تدبرين ؟حجاها غير مقتنع
واخيرا اجا وقت المواجهة وياه وركز نظراته بعيوني وحاجاني

-شوفي بنت عمي ، كل الوكت الج تعلمي واكبري ،كل الوكت بس مال تكولين تصيرين لغريب ، ما تصيرين اخذيها مني حجايه!!

خليها براسج ...محمد خطب من كرايب امه ، و راح يتزوج عم قريب يعني بعد ماكو شي يمنع ..

كان مانعني وااكول عيب!!ولد عم احنا ... اشر على بيت عمنا ابو محمد

جان يحبج من وعينا عالدنيا يكول احبها مشاعره فضحها كدامج وانت شسويتي استغليتيها ومستغلة الكل هنا

خلاني اساله بغباوة تامه

-وانت؟؟؟يعني مو مثله

ضحك ضحكه طويلة وكام وكف :-احبج بنت عمي !!هواي احبج ...

كام وعافني وهو يضحك لحكته معصبة شلون اسلوب هذا؟؟

-تره ابويه موجود وعمامي محد يجبرني..

اندار عليه بغير وجه ..الوجه المعتاد عنده كله شر وحاجني بتهديد

-اذا جايزة من نفسج يا مرام تلعبين ويايه الا اذا جايزة اني مو محمد ... وانت تسميتي باسمي اصلخ جلدج والله ...افتهمتي ؟؟؟؟؟

اخر كلمه كالها بعيطة عصبية عروك رقبته برزت بيها ..

.تراجعت ولاول مره خفت من صدك ، صح الموقف كان اله رهبة بس بداخلي اكول اله نجوم السما تطولها وما يصير اللي ببالك ..

.ما اعرف ليش هالتمسك واني اعرف فراس مستحيل ينزل نفسه شنو الصار؟؟؟

اجيت انسحب وهاي خطتي الدائمة وياه ما اكدر اواجه واعرف شوره من راسه ومحد راح يوكفه اذا عاند ..

جرني وراه يمشي واني اتعثر واجر بايدي
-شبيك وين رايح عوفني!!

ساكت ويسحل بيه مثل النعجة وراه وصلنا لبيت عمي مضفر ....دخلنا وهو يصيح جدة ...جدااااااااا
سمعتنا وهي بالهول كالت اله هنا ولك شبيك يمه تعال هياتني...رحنا يمها

اول ما شافها فلت ايدي
-مرام تكول ليش خطبتها اني؟؟

الجدة:يااا شبيهن هذني ما يفهمن الف مره عدناها انت لفراس ، وبت عفاف لفرقد، وغصونه لغدير وشدن لمظهر ، والصغار كلمن مسميها باسم راعيها وابن عمها ، ساطرجن هوى شرجي لو الحجي ما ينفهم ؟؟

مرام:جدة ما اريد اتزوج بعدني صغيرة ...ومحمد؟؟

-مو ما ردتيه وسويتيلج طلابة وتخاربوا ولدي من وراج الولد خطب وهذا اني نطيتج اله

-شنو بكيفكم هي تقسمون اني ما اريد

-وليش داده؟؟

-صغيرة وابوي ما ينطيني واني ادرس

-عاب شكلج يولي بعمرج مخلفة مضفر وقاسم وحامل بابوج ، بعدها صغيرة لعد منو اليجوها المشاية بكل وكت ....

وفراس ما مستعجل ولا واكف عالعرس اليوم مو هيج؟؟اندارت اله ..

فراس:عود اكبري منا للعرس ..كالها مستهزأ واني اباوع لوجهه مبتسم ..

طلعت اركض وابجي ما اريده هي كوة ، تاليتني لفراس ..

فتت على بيتنا امي بالصاله ، وياها عمتي صابرين ، وكفت اعيط بوجهها ..

-تريدون احرك روحي ؟؟

انهبطت من شافت دموعي والبجي :-لج شكو شبيج ، يمه اسم الله شبيج وين جنتي؟؟

-شنو تقشمروني منو كال الكم اريد فراس اني منو انطاه ..

-يااا هاي منو كال الج ، تعاي اكعدي لا يصير بيج شي ، منو كال ابوج قابل ومو هسه السالفة ...

كنت ارجف وامي خافت عليه تكلي لا تتخربطين وعمتي حاطه رجل على رجل ، تشرب بالجاي وتتفرج حجت من يمها ..

-يمه يهالعيارة مالتجن ، لكت الها رجل كالت اعور ، اني لو يجبروني على ابن عمي اكيف اصلا اني احجزه مو هو هذا الحظ ، غير محد من ولد عمي ضل كلها اخذت ...

-ما اريد هي كوه

ضمياء واكفه وتفر بايدها مو عاجبها الحجي يعرفن مو سالفة ما اريد زواج بس اريد اللي ببالي

سويت نفسي مريضة ، ونمت بالهول وابجي لحد جية ابويه ، ومن شافني وضل يلح ويسال ، حجيت وياه وعود خجلانة ما اريد اتزوج ..

وهو حطني بحضنه حضني ويكول منو الينطيج ...

ما كان ببالي ابد غير اقنعه بعدين بعادل بس اهجج هذوله ، كل بالي من يروح فراس من دربي اصير لعادل ، ماكو بعد شي يمنع ..

هيج جنت افكر واظن ، ما فكرت ابدا بلحظه ممكن حياتي كلها تنقلب ...

وما مرت الايام الا بصعوبة ، فراس بعد الكلام سكت وانسحبوا ، بس ما فكوني من قيدهم ابدا ...

بقى كاعد واني كاعدة عند اهلي وابوي رفض احد يحجي بالزواج ، ولا يجيب طاريه كدامي ويكول الهم بنتي تعقدت من وراكم ...

عادل ما بطلت منه وبقيت بتواصل وياه ، عطلة واحنا ما نطلع وما كدرت اشوفه كل هالفترة من دز امه بعد ما كدرت الح يرجع يدزهن واعرف اذا رجعن هسه مو بصالحي !!

وبيوم صار ببيتهم عرس وبصفة اخته صديقة ضمياء عزموها واني ولفت نفسي اروح وياها بحجة عرس وخطيه واني وين طالعه ابوي سمح الي ...

مشيت للعرس واصلا جنت متواعدة وياه ....اول ما وصلنا للعرس دك الموبايل بايدي ضمياء خزرتني وتعرف منو !!ما همني اصلا....

تيهتها وكلت الها اروح للحمام ، ورحت لوره البيت دلاني وين منتظرني ورحت اله ...

بيوته

م واحد بصف الثاني ، بيت اخوه فارغ لان الكل بالحنة ، جرني واني اضحك وادفع بي مستحية وهو يحلف بيه اروح وياه ...

صرنا بالكليدور صرت اريد ارجع وهو مجلب ..

-شبيج ولج تعاي وين اشوفج بعد..

-مو هاي شفتني خل ارجع عفيه عادل استحي عيب !!

-دتعالي شويه يولي نبل شوگنا ..

-هههه يعني شنو ؟؟

-جرني لحظنه بقوه واني ارجف واضحك فرحانه بلهفته الحرام ...وره مده يلا ابتعدت الا تمالكت نفسي ودفعته بقوة ضايجه ..

-مو هسه هاي شبيك ميصير .

-ولج مرتي انت ؟؟

-وين مرتك شبيك عادل

-بعد ما اتحمل انتظار مرام ادز اهلي النوب ..

-لا مو كلت الك مو هسه ..

-لعد انطيني بوسه خجلت وهو عيونه وكحه ...جنت غارقة بالحرام والمصيبة اعرف حرام بس استسهلت لان شفت قبلها الاشنع ..شفت اخواني واطلعت على علاقة محرمه اباحت لعيوني هالشي ....

طلعت من بيت اخوه اعدل بروحي وهو ورايه يضحك !!

ايمان ...

طلعت سطله المسح امسح ، دمعتي بطرف عيني بسبب رزاله عمي ، دنجت امسح بالارض حيل معصبه ، سمعت ضحكه فراس وراي ، التفتت ..
لان واكف يم فرقد ويضحك ، فرقد عاقد حواجبه اشرلي كومي لا دنجين ..

لميت نفسي وكمت ،

امسح وعيوني علي ؛ فراس وله وضل فرقد ، جر كرسي وكعد كبالي ،

ماهتميت سويت نفسي ماشفته ، بالجامه مال الطباخ شفته ، عيني على جسمي من وره ؛ عدلت كعدتي وكما لحيلي ،

انداريت علي ، يجر نفس كوه ويحك بلحيته صافن بوجهي ..

خلصت تنظيف هو عينه طايره وراي ، وكفت اغسل اديه على مغسله ، حسيت شخص وراي ، رفعت راسي بالجامه لان هو ..

تقرب علي حيل وهمس ، كاافي ترى صار فوك ال١٠ مزوجين ، هاي مو حاله زودتيها ..

انداريت علي دفعته شوي اخلي مجال اريد اتحرك ، كتله شنوو ..

رفع حواجبه همس بعصبيه :- لا تستغبين ايماان ، ديني طاافر ديني طاافر من راسي ، وصلت حدها ..

- ااي شنو هيه ..

وكف جمد بمكانه ، ركز بوجهي ، فرك وجهه ، قرب اديه مني ويوضحلي ، ويحجي ويأشر بهمس ، نتقرب يعني نصير مره ورجال ، اتصيرين مرتي رسمي مو بس على ورق ..

كولي مافهمت الا اكوم افشر يله كولي ..

- جمدت بمكاني ضليت اتلفت يمنه يسرى بالله هذا مكان تكلي بي هيج موظوع ؟ظ مو كتلك انطيني مجال ..

- خير انشالله مجاليش تكونين نفسج لو تشترين الغرفه ست ايمان ..

اريد ارد و فاتت من يمنه شدن وسكتت ..

جريت نفس ، اشر اليوم ، باجر وراي شغل اني اطلع محافظات اليوم كون كلشي يتم ..

جسمي كزبر ، بالله هذا شاكله ، شلون اقنعه ياجلها ، بس حظي سبحان الله بذيج الحظه كعد ..

من اجه اليل هو مجرد مااجه من بره ، اشوفه دخل للحمام يسبح كبل ، وطلع يغني ويدندن ، نوب وكف يخلي عطر ، ويباوعلي بالمرايه يضحك ..

ركصلي بحواجبه ، بعدين بهت وجهه حجه شو ملابسه ..

- حجيت بضوجه شلبس ..

- اندار علي بسرعه صخام بعينج روب سيت من هالسوالف الي تسويها نسوان لزلمها ..

بلعت ريك وكفت متوتره افرك باصابعي ، حجيت هذا ..

وكف مخصر لاتكولين الي مجال وهالحجي تعبان خلص مايفيد بعد ، ترى حتى لو ممتقبله زواج عادي كلها هيج وبعدين تكومين انتي تردين وتركضين وراي ..

توه يكمل قاطعته جايتني الدوره ..

صفك باديه حيل ، صخااام بوجهج على هالخبر اذا صدك ..

- تنفست براحه شسوي يعني بيدي مثلا ..

- شو تعاي دشوف ..

- شتشوف ابتعدت وخرر شنو عيب عليك ..

- والله ماصدكج شنو انتي تضحكين علي ، شوو اشوف لو اتلمس بس ..

- وخر والقران اصرخ شبيك تخبلت ..

- لزمني ويريد يجر البجامه ..

- عطت ودفعته صدك تحجي دووخر ، شبيك بابا انته ..

- شنو شبيه عاط بوجهي ولج رجااال مزوج ماشايف من مرته شي ، حيوان انتي حيووان ..

- خليت ايدي على حلكه اااش عفيه اااش تريد تفضحنه شبيك على بختك ..

- دفعني حيل وخر ، خللللص نفذ صبري ويااج لهناا وبس كاافي ..

طلعت بسرعه متوجهه للباب حجت ابجي عفيه فررقد دكف يمعود .

بس فتح الباب حيل ، ولان مرت عمه مضفر ام مظهر تتكوم بالكاع ..

شهكت من شفتها ..

يتبع ....

بارت10



شفتها شهكت ، خليت ايدي على حلكي ..

هيه جن جانت تتصنت وكعت على وجها صاحت مخترعه :- يالله يمااا شبيك ..

وكف فرقد متصنم بمكانه التفت علي ، خزرني حجه وياها :- خالتي شسوين هناا هاا ..

وكفت وتنفض بملابسها :- ياايمه شبيك خرعتني .

- ياهو الي يخترع احنه لو انتي ، شجابج ليم غرفتنه شصعدج ..

- ياا غير اطمن عليكم سمعت صوت صياحك ، يايمه شبيك هذا هم سؤال ، خرعتني توه ادك الباب وانته فتحتها حيل فززتني كومتني بالارض ..

التفتت علي وتحجي :- ها وانتي شبيج تقدمت علي هاا شو ، ادور بوجهي وتجر بملابسي دفعت ايدها وخري رجاءا شنو هااي ..

التفتت على فرقد حجت ، ليش طالع صوتكم يمه ، شبيها وياك هاي العرمه ، كولي دربيها الك ..

فتحت عيوني ، هو يباوع بوجهي بغضب حجه ماكو شي خاله ،بيناتنه سالفه ، محتاجه شي انته ..

- سلامتك يروح خالتك ، تعال ننزل جوه شلك بوجع راس يم مرتك .. جرته وتريده ينزل وياها وتسأل بي شبيك ليش عصبي شسوتلك ..

وجهي صوفر ، ومشيت وراهم بخوف افرك باديه ، هو مشه يريد ينزل وياها ، همست فرقد بخوف ..

اندار على رافع حاجبه ، هيه ندارت علي حجت خييير شبيج شراايده منه فوك ماغاثته ...

ضجت حيل نترت بيها :- رجلي شنو شرايده منه ..

- هااا هسه صار عزيز عندج وانتي توه مشوطه الولد ..

ماحجيت عيوني اجت عليه اتوسله مايحجي شي ..

هو مانفه للي عافني ونزل وهيه وكفت غمتني ونزلت ، من كبر لهل خلقه اي والله ..

رجعت دخلت لغرفتي مغثوثه ، ماعدها بيت هاي طول اليوم يمنه ، كصتي عركت كلت هسه يخليها بحلك ابو ويفضحني والله ياكلوني اكل ..

نوب من هاي وهاي همه سالفه حسام ماناسيها ..

تمددت بفراشي خليت ايدي جوه راسي صافنه ، وين ارضك يحسام هسه ، هم نمر على بال ، لو لهتك دنياك ، لو بالاصل حبك جذب ..

غمضت عيوني اتهرب من وجع الكلب ، مشتاقه لاامي وجدو حيل ..

كلت بالكت باجر امر لخالتي واكدر اخابرها ..

نمت بمكاني ، باليل سمعت صوت الباب انفتحت وانسدت عرفته هو ، تمدد يمي يتأفف ، ماتحركت ضليت على نومتي ..

حسيت بايده البارده مشت على رجليه ، وترفع بملابسي غمضت حيل ، لمن رفعهن لزمت ايده وحجيت كتلك معذوووره ..

قرب وجهه من راسي من وره وهمس بس الزمج ماسوي شي ..

دمعت عيوني بهدوء وسكتت ، حظني من وره حيل ، جسمي كزبر لعبت نفسي ، نفسه يلفح بركبتي ، كوه لازمه نفسي مادفعه ..

ايده كل شوي ترفع بثوبي اكثر ، لو تتلمس فخذي ، ساكته و لازمه نفسي كوه ، من صعد ايده ليفوك دفعتها حيل جيت اكوم جلب بيه حيل ..

حجيت وخر ..

بس الزمج شبيج ..

نترت موو هيج لعبتها لنفسي ..

لزمني حيل مرد زندي رجلج رجلج يالحيوان شبيج ..

جرني حيل عليه ، فرقد معذوره شبيك …

ما*** بيج شبيج ، اوكفي خليت اديه على وجهي ابجي واردد وخرر عفيه وخرر ..

هو ماسمع رفع ثوبي وصله لبطني ، غمضت حيل وبجيت اشهك ..

ثواني وخر من يمي ، كمت كبل اريد اتقيئ ، هو تمدد على ظهره يتنفس بقوه ، اني كمت اريد اشمر ثوبي ..

نزعته بسرعه قرفانه وابجي ..

هو يهمس شبيج لو *** بيج جان شسويتي ..

مارديت ضليت اشهك واابجي ، امسح بجسمي مخترعه من الي سواه ، شهل قرف ياربي ، بسرعه لبست روب وطلعت للحمام اغسل ..

توه ادفع الباب ماكو مسدوه ..

عرفت اكو احد بالحمام .

رجعت للغرفه بسرعه ، لزمه وجهي ابجي ، لكيته كاعد لحيله يفر بوجهه ، دخلت وكعدت بالارض لميت نفسي ، حجه ليش هيج نافرتني ..

مارديت علي ، لميت ركبي لصدري ..

رد كرر ليش ؟؟! بعده بالج ذاك الطايح الحظ ..

بس اشهك ماحجيت ، حجه بنتره ، لو بي خير جان اخذج ، بس هاي انتن نسوان تحبن الي يهينجن تحبن الي ياذيجن .

رفعت راسي علي ، ليش انته قصرت ، لو اهلك ، ماكافي اخذتوني من حظن امي جبر ، حتى مخابره ماتخلوني احجي وياها ..

- اني واهلي ؟! صدك تحجين شفتي مني ومن اهلي ، هاي فوك الزين مالتنه وماردت ياخذج غريب ..

- الغريب قدرني وسالني راضيه او لاا ، انته شسويت كلي ..

- اني اخذتج وماجبرتج على شي ..

- والي سويته توه شيسموه ..

- رجال ويمه مره شيسوي يعني ، ماسويت شي وخليتج نفس مانتي بس هالوضع مايطول ، لكلشي حد ..

سمعت صوت باب الحمام انركعت ، شلت هدومي ومنشفه وطلعت بسرعه ، دخلت للحمام ، ذبيت ملابسي ، كمت اهوع اريد اتقيئ ، يييع ، ذبيتهم على صفه ، فتحت الماي وكعدت ،

بردااانه حيل ونوب لعبانه نفسي ، شعور يقزز ، ساعه وطلعت بعد ماليفت مرتين وغسلت جسمي بالشامبو كثر ماروحي ساحت ..

دخلت للغرفه ، هو نايم اسمع صوت نفسه منتظم ، بس لفيت منشفه على راسي ، جريت بطانيه فرشتها بالارض و جريت مخدتي و مددت، تعبانه نوب دايخه من البجي ، بسرعه نمت ،

ثاني يوم حسيت علي بالغرفه يكركع ، رفعت راسي بتعب ، لكيته مبدل ملابسه ، عدلت كعدتي شفت نفسي مغطايه بالبطانيه مالته ..

واكف يعدل بملابسه وداير ضهره علي ، حجه رايح للشغل خمس ايام وارجع ..

ماحجيت ، ضليت اباوعله بهدوء عاقده حوا

جبي .. التفت علي صفن بوجهي ، حجه تردين شي ..

هزيت راسي بتعب لااا ..

تقرب علي لميت البطانيه لصدري ضايجه ، وكف ماتقدم بعد ..

جر نفس ، شال الجنطه وطلع بسرعه ..

اني رجعت تمددت ، اسمع صوته جوه وضوت امه تحجي وياه ، الي اعرفه هو يشتغل يالمحولات ..

كل فتره يروح لمحافظه ، تمددت على صفحتي ، جسمي مكسر من نومه الارض ، تذكرت سوو اليارحه ..

لعبت نفسي ، مانطاني مجال ، اني مو حيوان يجيبو لحظيره جديده ولازم يتقبل ، بسرعه ويعيش عادي اني بشر احس وانقهر واضوج ..

باوعت للسكف ، مشتاقه لامي حيل ، حتى للدوام ..

صح اخذت اجازه بس اكيد هسه انتهت يرادلها تجديد ..

ماكمت من مكاني للساعه ٩ كمت من سمعت اصوات جوه وهوسه ..

لبست ملابس مستوره ولفيت شعري وطلعت ، لكيت بنات ينظفن ، وعمتي بالمطبخ ..

مديت راسي ، شافتني ابتسمت ، حجت تعاي يمه تريكي ،

مشيت اكعد يمها ، مديت ايدي على الجاي ودخلت الحجيه تمشي كوه وراها عمتي صابرين ..

بس رفعت راسي ، حجه شلونج ولج ..

حجيت هلا حجيه ..

وجعه عليش ماتمرين علي جليه حياا هااا ، لو الا اني اجي لهنا ..

سكتت دنجت راسي ..

ضحكت عمتي حجت ملتهه بزلمتها حجيه وبعدها عروس تستحي تطلع تعاي دصبلج جاي تعاي ..

فرشت الها والحجه نترت بيه دكومي فرشي الي يالعوبه ، هاي عمتج تركض جواي وانتي كاعده ..

وجهي انكلب ، اخذت دوشك من عمتي وفرشت الها ..

عمتي صابرين كرصتني من وره حجت والله خوش كفا عندج هالعرض ..

.دفعت ايدها بهدوء وجهي احسه نار ، الحجيه حجت جدامهن زلمتج شلونه رجال ابن رجال موو ..

هاا ..

- زلمتج نومته وياج شلونه ..

ضليت ارمش ، ضحكن عمتي وعمتي صابرين ويحجن يااا صدك تحجين حجيه ، تغير الوكت بعد مال هيج اسأله بعد ..

نترت بيه مو وياج يالفاهيه ..

اني والله مافهمت .. حجت بسرعهحتى اجفه شرها :- زين حجيه ينام زين ..

لفت الفوطه على وجها وضحكت خووش ، همه ولدنا كلها هيج ..

اشرت تعاي اكعدي اتريكي يله ، كعدت اكل خبز وجاي كوه ابلع ، عمتي صابرين اخذت رغيف الخبز مني ولفته واكلته كله بالكمتين .. رفعت ستكان الجاي اشرب ..

حجت الحجيه كبل :- حظري نفسج للحباله ، توه اشرب جاي واكول هيج وابزه كله بوجه عمتي صابرين ..

عاطت عمتي حجت يبوو احتركت امج يالرعنه ، كامت تنفض بنفسها اني اختنكت كمت ادك على صدري ..

ام فرقد وكفت وراي اطب على ظهري واني الشهكه دكت بكلبي متت ، ضليت اكح ، ام فرقد تكول يااا غصت بت ماتت زركت يالله ..

عمتي صابرين كامت بسرعه ، وتشلهت اردانها ، كالت ياا مو هيج دوخري ليغاد يافهيمه ، وخر ، لان ترفع ايدها ليفوك وجابتني بجمع على ظهري طلعت عيوني من راسي ..

شوي ويوكع راسي بنص صينه ويغمى عليه ، جرتني الحجيه تهفي بوجهي وتحجي اسم الله رحمن شبيج ، شهكت شكه موت يماااا دخيلك ربي متت ، عيوني تجر دمع ..
..

كعدت اجر بالنفس كوه ، لزمت صدري يوجعني وهنه كعدن يكملن اكلهن ، ورجعن يحجن اني حتى دخت احس راسي انسطر ، رديت جسمي على الحايط ، الحجيه عوجت حلكها طاح حظ بختك يافرقد ..

ها جبنه سيره الحباله واجيتي تفطسين لو وكفتي على باب ولاده شسوين ..

ضحكت عمتي صابرين حجت تزر* على روحها ..

درت وجهي اريد ابجي ، كمت من يمهن مقهوره ومختنكه ، حجت الحجيه وين موليه ولج مو جايه اشوفج ..

حجيت اروح انظف الغرفه حجيه ،

حجت وسالتني فرقد ماكلج شكد ويرجع للبيت ..

صفنت بوجها هااا ..

زلمتج ماكلج شوكت يرد شبيج ..

هزيت راسي نسيت نوب ، طار من بالي كلامه ، حجيت لاا باوعت لام فرقد فشلانه ..

حتت عمتي كبل ، لا ماكال عمه مو تدرين شغله مو ثابت ، شدارها بنت خطيه ، بس سمعت من ثامر يكول عدهم ست محولات كهرباء بالحله يردون يسووها ، ودازين علي جم يوم ويرجع ..

عوجت حلكها الحجيه ، اسالي زلمتج مره ثانيه ياجده ، لاتخلي هيج ..

هزيت راسي صار ، حجت عمتي اصعدي يمه ارتاحي اقصد نظفي يله روحي روحي ..

عفتهن وصعدت بسرعه ..

كعدت صدك انظف ، شفت عندي شغلات مشايفتها ..

خاصه جهاز اني ماجهزت ام جهزته ، وذهب ماعرف منو اخذه ، كل ذيج الفتره جنت اني شبه غايبه عن الوعي ويمشوني بكيفهم ..

لكيت علبه ذهب كلاده والتراجي ، ومحبس شايفتهن اني مال عرسي ذني ، غلقت العلبه وظميتها بالمجر ..

ملابس كون ماخذين الي ، رتبت والي وصخ طلعته للغسل هو والجراجف والوجوه مخاد ..

الارضيه مسحتها ورتبت الفراش ، حتى تحفيات مسحتهم ..

فتحت البلكونه اهوي الغرفه ، شفت الحجيه وعمتي راحن ، بس مرت عمي مضفر اجت باتجاهنا ، انعفس وجهي شكد اضوج منها ..

شلت الملابس الوصخه ونزلت اغسلهم جوه ..

سمعت حسها يم عمتي ، مادخلت ليمهم بس من بعيد حجيت لعمتي ، عمه عندي ملابس وين اغسلهم .. كالت بالحمام ..

ردت ذيج من يمها كرت عينج صار فوك الاسبوعين ماخذه وماتدرين وين تنغسل الملابس ..

ردت عمتي ام مظهررر خيه شلج لازم ..

خيه جنتج جايفه شنو ماجانت تغسل ملابس ، اكو وخده تسال هيج سوال لو سامعها غريب شيكول ..

ردت عليها بضوجه ،

البنات جان يغسلهن الها ، بت عروس خيه هم تستحي تنزل وتغسلهم بيدها ، شلج لازم جنتي وبناتي متراهمات لا دخلين نفسج ..

ضلي هيج ضلي جنتج راح تصعد عليج ، هاي فوك ماجاي انصحج .

اني بالمطبخ واسمع كلامها ، دمعتي طمت بعيني ، كعدت اجلف بيدي حيل وافرك ، لا اراديا بجيت ، وذيج بسمع اذني توز عمتي عليه ..

نوب شافت شدن تكللها هاي امج ماتفتهم مابراسها عقل انتن ضبنها ، من هسه احسن ماتترفع عليجن ، جم يوم وتلكنها تتهنتر براسجن ..

بت سكتت ماحجت نوب شبعت قهر لان ماردتها اني استحي احجي واخاف ، اخاف تصير مشكله عود ياهو يفزعلي ، ضليت ابجي واغسل بالهدوم ..

ذبيت حركتي بيهم اجلف حيل وانكت بيهن ، دخلت علي غصن حجت يااا ايمان شبيج ..

بجيت بحركه ، ذبيت الثوب من ايدي خليت اديه على وجهي ..

ياا عزه خيه ياهو ويااج ، تقدمت علي تحظني منوو وياج .

اريد امي عفيه ، مشتاقه لامي ..

ياعيني ، والله لو بيدي اخذج الها ، بس شسوي مو بيدي شي ..

اريد اخابرها على الاقل ..

سكتت ، حجت مرتبكه بس لا ازعلين ..

رفعت نظري عليها شنوو ..

والله ابوياا وصه امي مطلعين باب البيت ، باوعلتي بأسف ، بيت عمي ابو محمد عدهم تلفون بس ابويا مايرضه تطلعين ..

حجيت كليله راحت لخالتها شوي تشوفها مريضه ..

دارت وجها ابويا ماتمشي علي هيج سوالف ، واكو ميت الف واحد يفتن عليج اذا شافج بره البيت ..

دنجت راسي مقهوره كتلها اول وتالي اطلع قابل يحبسني هناا هم وراي دوام ودائره ..

رفعت حواجبها ، ليش فرقد ماكلج ..

على شنو ..

سكتت خلت ايدها على حلكها ، حجت اني اغسل وانتي اعصريهم شوو وخري اني انظف احسن منج ..

ابتعدت وهيه غلستهم خطيه حيل وبسرعه واني بس اعصر واخلي بالسطل ..

حجت وهيه تتلفت ، شلون جنتي عايشه هناك ..

وين ..

بيت جدج ..

ابتسمت جريت نفس ، حجيت بفرح اميرره اميييره من الاميرات والله ..

وكفت عن الشغل وحجت هيه تمسح كصتها بظهر ايدها ، عليج الله صدك ..

والله ، احلى لبس احلى مكياج احلى كشخه احلى اهل ، وكلها تحبني محد قصر وياي بشي ..

عوجت حلكها وعيونها لمعت ، فتحت حلكها تحجي ، من شافت مرت عمها مظهر مدت راسها حجت جاي اسون ، تالي دنجت بسرعه تكمل شغل ..

اني مارديت عليها ضليت واكفه اباوعلها بضوجه ..

ياا فلك طرج بت عفاف شغلتي بت عدج خدامه صدك فلا تستحين ..

يمه حجيها جمر يلجع بيه ، بس اخاف اتعاك وياها تبقه مره جبيره ..

شلت صطل اشر الهدوم وراي غصن حجت دررب خال درررب فكينه شووي ..

يا تطردني ولج غصييين ..

- لا اطرج ولا شي خاله بس خلي نفض شغلنه ..

ياشغل هذا وانتي صايره خدامه ..

- اخدم مرت اخوي ولا اخدم احد غريب مايغزر بعينه ..

- يااا ولج طال السانج هاي منو علمج ..

ماردت عليها طلعنه بره بالحديقه وهيه وكفت يم عمتي تاكل من جدريه وتحجي ..

وكفت اشر هدوم فرقد انكت واشر ..

حجت غصن وهيه تتقرب ، هم حبتي ايمان ..

وكفت اديه وكعت قراصات المنشر من اديه ، جريت نفس عميق التفتت عليها شلج بهج سالفه غصن ..

- بنات عم خيه بينه والله ماحجي ..

- ترى مزوجه اخوج اني ، سؤالج غلط ..

حجت وهيه تبلع ريكها ، حجت بتردد ترى فراس كال لفرقد ايمان عدها علاقه بواحد بالدوام لخاطر هيج مترضه تزوجك ..

وكفت بمكاني ، حجيت اااي ..

هيه وجها فشل ، حجت لا زعلين عليج الله ..

دمعت عيوني احجي ، اني كم مره شمرها فرقد الحجايه بوجهي ..

التفتت يمنه يسره ، كالت ترى كلها تعرف ..

وكفت متقلصه عصرت القميص بيدي حيل شايطه حجت بهدوء شنو يعرفون قصدج ..

حجت عدج علاقه بواحد وتردين تزوجي ..

انهظمت حيل ، كملت كلامها تكول على ساس شايفيكم سوه بالدائره ..

احس صارت عندي حموظه بالمعده ، رديت عليها شنو العيب والغلط بالموضوع ..

شهكت وخلت ايدها على حلكها يااا ولج عزاا ، هاي سالفه بنات تنكتل عليها ، هاي يعتبروها فضيحه …

رمشت بهدوء : الولد تقدملي ، جان رايدني بالحلال ، لا طلعت ولا طبيت وياه ، امي وجدي شهود على هالحجي ..

- هذا الكلام مايقتنع بي احد ايمان خاصه هنا عدنا ، سالفتج ويه حسام عليها كص ركاب وفضايح الج ولبنات العايله ..

دمعت عيوني ، منو كلج اسمه حسام ..

دارت وجها تشتغل حجت مو كتلج سالفت طشت هناا ، وفراس حجه للكل ، جان ناوي يكسر ظهرج بس الحمدلله عدت على خير ..

ذبيت الملابس من ايدي سالتها وشنو الي منعه باله ..

دارت علي وهيه تشر ، فرقد كللهم اني اريدها ، وبت رادت تزوج وسالفه ماصارت ، وهيه بت عمي اني المها مابيها شي ، حتى لو جانت تعرف شخص ثاني ، جانت نيتهم زواج مابيها شي حرام ..

كمت اشتغل وياها ساكته ، كوه كاتمه دمعه ماخليها توكع ، سكتنه من دخلت مرام ..

تمشي وتتمايل بجسمها ، حجت هلاوو شلونجن ..

غصن عوجت حلكها ..

ردت مرام كبر شبيج جنج مضروبه شرجي ، لو مامحصوره وضايجه اجي واكابلج ..

رديت عليها هلاا بيج ..

باوعتبي هااك شوف جنتكم احسن منكم تستقبل العالم ، شلونج عيوني شلون صخام وياج العقو اقصد زواج ..

بهت وجهي ، ابتسمت زين

انتي شلونج ..

باوعت علي من فوك ليجوه لا باين زين كلش ، حمواتج خما مضوجاتج ، اذا غثنج كولي الي حتى اوز جديتي عليهن ..

رديت لا خواتي ذني ..

وكفت تهز بجسمها حجت شدن وين ..

رديت جوه ..

ممم .. منو يمكم ..

ام مظهر ..

ااايع عوذه ،

صدك بس التفتنه هيه طلعت من باب المطبخ ، حجت مرام عوذه جبنه سيره قط اجه ينط يله باي ماريد الي هيج شوفه ..

عافتنه وكملت دربها لبيت عمي ..

خلصت شغل وياه غصن ودخلنه جوه ..

تجنبت مرت عمي مضفر تجنب كامل ..

مرام ...

عرس فرقد وايمان صادف ويه بداية العام ، واني على اخر حباية واناقه ..

ركصت هوايه وفرحانه والكل فرح عدا العروس ، كانت خايفة كعادتها كل ما اشوفها ، لا تعرف تمشي ولا تعرف تتصرف مدري شلون مكملة كلية ..

هاي لو شلون راح تدبر حياتها ويه رجال ، وبالعيال مثل بيت عمي ..

صح البنات عمي وامهن فقيرات وحتى فرقد هم زين وفقير سكوتي وخانس بس عدهم عمي ثامر وابنه المصيبة الكبرى فراس ابليس يتعوذ منهم ...

المهم زفيناهم وهاي الفاهية مره تخرب ومره تكعد بعد تدبست الله يعينها ...

رجعت للبيت ويه ابوي بملابس العرس كاشخه ومجلبة بزنده وامي ورانا تمشي واني اغنيله وهو طاك ضحك

-گلي يا حلو منين الله جابك خزن جرح گلبی من عذابك وابوس بكتفه وهو مكيف..

ام غسان:ايييه ام لسان تلوگی اكثر بعد زيدي..

مرام:هااا ام غسونه شكلج غرتي لان اغني للحلو مالتج ..

الاب:ههههه اني حلو؟؟

-دهاك عيني وشوف بيها اذا شفت تكو احلى منك بهالدنيا....گمر...گمر تخبل

الام:عاد والله لا تبالغين حلو اي مو يشوف نفسه علينا

غمز الها ابويه وحاجاها
-وهو الگمر وین يكدر يشوف حاله على نجمته
وكفت منتفضة مو راضية

-عاد دكول هاي واكفه تتغزل بيها كدامي واني من الصبح لهسه اتلوگلك ما حصلت شي

باسني وجرني جوه ابطه ورجعنا نكمل الدرب وهو يراضي بيه وعود اني زعلت ...علاقتي بي كانت فوك الوصف ...

مشت الايام بدوامي ، والتهيت ينسوان اخويه ، متونسه عليهن ، صح بنات عم ، وجنه ربع ، بس مثل منكول جانت تجمعنه مصالح وخلصت ..

ولهنا بدت عركاتي وياهن ، وبكل عركه اني منتصر ، احنه يلمنهن الي ويجمعنهن مو يروح ابويا للشغل يستفردن بيه هنه واخواني ..

وهكذا هيه كضيناها ، يوم الهن ويوم الي ، وامي خطيه واكعه بالنص ، لا تكدر على جناتها ولا تكدر عليه وتزعلنؤ .

مره من مرات تلاغيت ويه ضمياء ، واكفه فوك راسي وتهدد بيه ..

ويجي غسان واكله شنو مالج جبير انتي ، ادري عمي طلع عينج ، انداريت عليها بهمه نطيتها دفعه كومتها بالارض وكعت تعيط مدري عياره مدري ضدك تاذت ، ذيج جنها ثور اسباني كامت بسرعه تعيط وتصيح دزت على علياء وعلى امها وهدن علي ،

طفرت كبل لبيت عمي ثامر بين تروح حاله منهن ، عفت امي وراي تتوسل بضمياء متزعل وتروح لبيت اهلها ..

دخلت لكيت ايمان لافه شعرها وتمسح بالارض والوجه احمر ، انقهرت عليها ، بعدين كلت شسويها خلي تتكوه شنو سالفه هيه مسحات مادبرهن ..

نوب كامت ولازمه ظهرها ، حجيت شلونج ولج ..

رفعت اديها بتعب هلاوو ..

عابت دكولي يااهلا يامرحباا نور بيت جيبيلي كلاص ماي غير خطار اني ..

تعبانه عفيه جوزي منا ..

كعدت كبالها خاله رجل على رجل ، حجيت الزوايه امسحي زوايه زين ، مو يضل وصخ محشر بيها ..

شو هاي كامت تبجي وتجلف حيل بالزوايه ..

ياخيه شبيج كتيتي دموعج ، شهل عيشه مقرفه الي انتي بيها ...

وذيج ماتحجي بس تبجي ..

شبيج ياهو وياج معقوله فرقد ضاربج ماتوقع هذا فقير ..

حجت من بين دموعها مشتاقه لامي صار شكد ماسامعه صوتها ممتعوده والله اغيب عنها هالكد ..

خليت ايدي على خدي يااعيني ، يله كلها كم يوم وتجيج لو فرقد ياخذج الهم ..

ماحجت ..

كتلها عمي مايرضه موو ..

دخلت شدن حجت هاا اليوم يمناا ..

اي زياره ..

هلا بيج .. غدير شلونه ..

زين بخير الله حاير وراي ابويا يشتغل ،.

هااا ما لم ايده ..

شيلم خيه اذا على زواجكم فا مو هسه بعد..

دارت وجها فشلانه ..

حجيت غرفته صغيره يراد يبني غيرها ويله واثاث وعرس كلها تريد ...

سكتت تبالع بريكها ودير بوجها على ايمان ..

صارت بعدها ايام شغلة بوقتها خلت جدتي واخواني كلهم يعيطون ، يعاركون بيه واني مو فاهمة الصار ، وكلهم يكولون لابويا شلون هيج مسوي ...

وهو يجاوبهم اضمن الحقوق للكل ما اعوفها مثل ايمان ...

ما فهمت عن اي حق يحجون بس ، الفهمته اني الي حصة ..حصة شنو ما اهتميت ، ما محتاجه ولا مقصر عليه حبيبي هو بشي..

كل الاشر عليه يجيني ليمي ولا يوم طلبت حاجه وما تنفذت ، بعد ما اهتميت شكاتب الي بوصية اسم الله كون ، ما نوصل ولا نشوف هاليوم ..

اصلا الكلمة "وصية"بوحدها خمشت روحي حسب اللي فهمته كاتب وصيه ومصدقها بالمحكمة ويم محامي

مرت الايام ركض بين دوامي وبين جهال اخواني اللي تعلقوا حيل بيه ..

وصار غيرهم وانهملوا واني اللي اداري واشيل واغسل ..

احبهم علول وحياوي ولد غسان الكبار هذوله صاروا عبالك ولدي ورغم خلافي ويه اهلهم وكرههم الي المحسوس بس ا

ولادهم مو مثلهم ابدا وخاصه علول شكل واطباع يشبه ابوي؟؟؟

........
رجع فراس تقدم وتحججت اني سادس ورحت لعادل سولفت بوقتها ضل يشجعني انتظره ، وبقيت مجلبة بامل كاذب ...

طلعات صارت بينا ، اوصل المدرسة ما اداوم واطلع وياه ..

كبرت بس ما فهمت ولا شغلت مخي كبر عمري واني لسه مراهقة غبية لا احسب حساب سمعه ولا غيرها ...

ومستغلة انشغال اهلنا بمشاكلهم وطمعهم بيت عمي نهبوا كاع بصفنا تابعة لناس وهجوا اصحابها ، نوب باكو محولات مال دوله ، وتبالشوا وياهم ...عشاير وكععدات ...

كنت ملتهيو بالسادس اريد انجح لخاطر ابويه بس ...وعلى امتحانات نص السنة اجتني ضربه اللي قضت على كل شي ......

ايمان ...

صعدت فوك للغرفه اسد شبابيك ..

توه وكفت اسد شباك شفت مرت عمي مضفر واكفه بالطابق ثاني وتباوعلي ، فززتني والله جنها فزاعه ، وين مادير وجهي هيه كبالي ، نوب بيتهم لزك بيت عمي ثامر ، بينهم كم متر ، وبيتهم مطل علينه على غلى البلكونات ..

سديت شباك حيل بوجها خازرتها سديت برده بسرعه ..

ايام مرت نمت لوحدي بالغرفه ، صح موحشه حيل ، مابيها حسن ولا نفس ، بس على الاقل ماكو واحد يتلمس بيه ، وكل شوي عاط بوجهي اريد حقييي ..

كرت عينك اني هم عندي حق وينه ، ابسط شي شوفت امي حسره علي ، حتى خالتي منعني عمي منها من موت كرفك ..

ممددت اتكلب ممغوصه وطالعه روحي ، ضليت بس اتكلب ممرتاحه ، اجه بالي ذاك ابو كلاص جاي وكفته بالباب ..

الابتسامه شاكه وجه ويباوعلي ويسال شلونج ..

لو من يسوي نفسه يشتغل بس يسترق نظر كل خمس دقايق ..

الي عيونه فاضحته وتصرفتته فاضحي ..

لو امي ، اااخ يايمه ، درت ظهري على يمنه ونمت ساكنه ، عيوني انترست دمع ، دمع الاشتياق ..

هم يشتاقون الي مثل ماشتاقلهم ، هم يحنون علي مثل مايحن كلبي ، هم يحسون بشوكي لو لاا ، بس اضن محد يحس بشوكي الهم بس الله ودمع العين ..

نمت بيومها ، ودموعي يابسه على وجهي ، كعدت صبح من حالي ، نزلت كالعاده ..

عمي موجود من شافني نتر جان نمت للظهر ليش كعدتي ..

عمتي غمزلتي بعينها سلمي علي ..

حجت صباح الخير ..

وجع كولي السلام عليكم ، هسه وكت صبح هسه هاا ..

دنجت راسي ، عمتي حجت جيبي خبز من مطبخ يمه اشرت روحي ..

عفتهم ومشيت ، احس جسمي هزل من قهري ، مشيت جبت الخبز خبيته يمهم ..

وجيت اطلع صاح عمي تعاي اكلي ولج لو تتنكسين منه .

ردت عمتي بت ماتتريك عيوني ، تكعد كبل على شغلها ..

صاح بيه ولي خلصي شغلج بالعجل ..

عفته وكملت دربي للمطبخ دمعتي بعيني بس اريد.حجه دابجي ..

شفتهم ملتهين بالريوك ركضت ليفوك بسرعه مقهوره ..
دخلت للغرفه اعدل بيها رغم نظيف بس الهي روحي ..

شفت ذهب الي جابو الي ، ما لبسته ولا خليته على جلدي ..

شلت التراجي خليتهم باذني ، باوعت عليهم حلوين ماشي حالهم ..

بقت ارتب ، فتحت كنتور فرقد شفت ملابسه ..

تلمستهم ، هدوم الشغل فوك وهدوم البيت مسفطه جوه ، من عدا جواريب خالهم بعلبه على صفحه بالكنتور ..

سديت باب الكنتور ..

شوي ونزلت ، اتلفت براسي ..

ضايجه حيل ومختنكه ..

كلت اسال عمتي على دوامي ..

لكيتها بالصاله ، حجيت عمه ..

اندارت عليه هاا يمه ..

كحيت متوتره اكولج عمه هذا شسمه ..

شنو يمه ..

دوامي ..

شبي ..

شوكت ارجع للشغل مليت من كعده ..

فهت بوجهي ، اجاني صوت فراس وراي فززني هذا يادوم ام الدياحه دوام بعد ماكو بححح ، تكعدين وتنجبين هنا بالبيت حالج حال بناتنه ..

يتبع ....

#البارت الحادي عشر -









عمي دخل وراه ، رافع حاجبه ، باوعت علي حجيت برهبه عمي وضيفتي ، قابل اتركها .



- منو خال بالج ترجعين الها , جوعانه هناا لو مصلخه و عايزه حتى تشتغلين ..



درت على مرت عمي ، دمعت عيني ، هيه سكتت شسوي ، حجيت وظيفتي حرامات تعب سنين يروح ..



عاط بيه فززني :- دوام شنوو مكرن اناا ادزج يم صاحبج تشتغلين ، لو عريانه ومالاكيه الي يصرف عليج ..



سكتت افرك باديه ، عمتي حجت بت من ضوجتها حجت ..



توها تكمل نتر بيها :- انتي لاضلين كل حجايه وثانيه دخلتي نفسج فهيمه ، لا اخليج وادوس بطنج ..



سكتت المره وخلت اديها على حلكها فشلانه اندار علي ، وصاح لج سالفه دووام مادووام بطليها لا ومحمد اخليج هنا واجنزج ، سالفتج قديمه ماناسيها ، بس سكتت لان صرتي مرت فرقد ، امي لو دوامي هاي شيلها من بالج ..



بجيت كبل ، شنو عمي قابل تمنعني عن امي ، كلشي هنا ممنوع شنو فصليه عدكم ..



نوب كلت هيج لو ابتليت ، تقدم علي وانعل والديج هم رفع ايده يريد يضربني ..



وكفت مرته بينه تكله استهدي بالرحمن يارجال كول يالله ..



نطاها دفعه وكعها عليه دنعل ابوج لابوهاا ، نسوان ماوراجن بس الهم حيوانات ، لا طلعلي يوميه بسالفه صفح ترة ماصافيلجن اناا ..



ضل يغلط طلع بره ، فراس وراه ، حجه كون الله ينطيني سلطه عليج ، ومحمد لافصخ عظامج ، بس المشكله امرج بيد مطي فرقد ..



عافنه وطلع عصبي هذا ثاني و يركع بالباب ، اني كعدت ابجي واشهك ، كتلها عمه صدك عود وضيفتي شلون ، تعبي هاي ، والله كوه كملت دراستي وتخرجت امي دفعت دم كلبها علي هيج كله يروح ..



غصن واكفه بالباب وجها احمر مقهور ، حجت لاتنقهرين ميخالف ..



المره ضلت ساكته حسيتها مقهوره ، حاجيتها عمه فدوه حاجي ، مستقبلي هذا ..



- ياعمه مو شفتي مايتحاجه مو نطاني دفعه جان كسرني ، هو مايحترمي حتى واني بهل عمر ..



ضليت اشهك وابجي مقهوره ، هيه سكتت ، دخلت مرت عمي مضفر حجت هاا هاا شبي ثامر ..



شافتتي ابجي .. حجت يبووو هو انتي بوومه يايوم شفتج تضحكين كاضيتها بس بجي …



نوب هضمتني حيل ، خلت شهكه تطلع من صدري ..



- غمتني من امداج تكطعين رزق انتي ..



ردت عليها غصن عماا شبيج ..



شباجه تكسر ضلوعج هاي بدل ماريد مصلحتكم ، الله يعبن اخوج عليها ..



كمت لحيلي اروح لغرفتي ..






فتت من يمها اهف بنفسي جرتني ياا ياا شو منيلج ذني ..

جرتني من جتفي وخرت شعري تشوف تراجي ..

نكتت ايدها حيل وصحت بوجها ، وابتعدت دووخري عني شبيج ..

- وجع دنشوف امج شجايبتلج ماشفنه بالعرس زين ..

نترت مو امي هذني مالي عرسي ..

فرت ايدها ياا مو امج اخذت ذهب عمج وفرقد ماشترو الذهب منهم …

فكيت عيني شنوو ..

عوجت حلكهاا ، خير انشالله تردين يجهزون منهم بعد مو زين لملم فضيحتج بالدائره ..

شهكت التفتت على عمتي ، شتدكول هااي ..

جرتني هي ولج تربيه سزز شنو هاي ..

دفعته حيل حجيت ويه مرت عمي شتكول هااي ..

مره صفنت بوجهي حجت ليش ماتدرين ..

لطمت على وجهي شدررري ، شنوو امي مجهزتني منهاا ..

سكتت المره وغصن جلبت بيه تحجي مالج شغل بيها يجي فرقد ويحجي وياج .

ردت ذيج من يمها :- شيحجي عيووني ، ليش يايوم شفتي ام فرقد اجت وجابت الج فلوس لو ذهب الحمدلله من امج جهزتج ودزتج النه هم عوزه نصرف عليج ..

عطت بيها جذااابه جذااابه على اي اساس تصرف من يمها شنو حابتكم امي ..

- حبتها حيه لامج ..

- الله لايوفقج شبيج وياي شبيج كارهتني ..

- بت جلبه لا تعيطين علي ، فكيت عيوني ، من حركت دمي نطيتها دفعه كلبتها ليوره هيه وكعت وكامت تعيط وكامتلي جلبت بيه ضرب وجر من شعري ..

اني ابجي واعيط واتمالخ وياه ..

وكعت بالارض ابجي غصن حظنتني وتدفع بمرت عمها ..

كمت لحيلي انهزم لغرفتي توه اصعد وجلبت بيه من شعري واريد تضربني اجت ضربه ترس على خشمي شوغت روحي ، وكعت دايخه بالارض ..

بس اشوف خيال بشر ودموعي تجري ، واحد يهز بيه ..

غمضت عيوني ، صوت مرت عمي مضفر براسي تعيط وتكول ضربتني مووتني ، تغلط علي يبوو تغلط علي وتضربني جنتج فهيمه تضربني ..

وووين يله حسيت على شي بارد ذبو بوجهي وشوي فتحت عيوني ..

لان امه محمد كلها فوك راسي ، الحجيه وعمتي صابرين و مرام وامها ..

عمتي دكول لغصن شيليها وياي دنصعدها مدام وعت بت لاتموت ..

بس كمت لحيلي خشمي كام يقطر دم ..

الحجه نترت ولج ايمان شلون تضربين مرت عمي ..

ماحجيت ..

عمتي صابرين ردت ايمان مو عيب ماتستحين ، شنو ممتربيه انتي .






انداريت عليها ابجي .. متربيه احسن تربيه ، بس الي ممتربي الي يعاير الناس ، من تجي مرت عمي وتكلي امج جهزتج ودزتج النه بلاش ، مو زين اخذناج وسترناح شايفين علي وهيج تحجي ..

ردت عمتي صابرين برد صدمني ..

قابل مجذبه هيه ، مو صدك امج الي جهزتج ثامر مادفع فلس من جيبه مهر عليج ..

فكيت عيوني ، احس الالم نزل من راسي لصدري وكلبي ، دخت دوخه ، جن ضغطي صفر ، استندت على غصن ماعرف شكول الهن ، هم اخاف احجي غير يندارن علي ويكتلني ..

بس ضلت دموعي تكت ، الاهانه الي اكلتها ما تنوصف ، احسهن عكارب والتمن علي ..

عرفت اذا اضل هيج ماعيش يمهن ، ياكلني واللخ اكل ، صعدت فوك وعفتهن يحجن ويرزلن بعمتي لان تفزعلي ، غصن حجت ليش تكامشتي وياها ..

ماحجيت بس ضليت ابجي ولازمه خشمي ..

حجت هسه تلوف سالفه عليج ، شيخلصج من ابويا ومن عمي ..

حجيت ابجي تعيررني حسستني اني رخيصه ..

حشاج بس هيه هذا طبعها جسره مو بيدها ..

دزي على خالتي عفيه ..

سكت ونجت راسها ..

الله يخليج ..

هزت راسها دشوف بالكت يلتهون اروح ركض وارجع ..

عافتني وطلعت جريت منشفه اخليها على خشمي الفالت دم ..

شوي وسمعت واحد فتح باب علي ، انداريت لان مرام ..

وكفت مخصره يااا كرت عينج ، اذا صدك سمعت كاتله ام مظهر طلعت هيه كاتلتج ، تقدمت علي تشوف خشمي ..

دفعت ايدها وامسح بدموعي ..

يبوو راح تكضين عمرج كلها تعوين ماشوفيها على كايمه وكاعده تهين بيج وترزل ، لان تدري اقوى شي عندج البجي ..

شسوي يعني اغلط عليها لو اضربها هو اني ممسويتبها شي وشوفي شسوت ، نوب تعايرني ، نزلت دموعي وامي نكتت بيه ، جذبت علي ، فوك مازوجتني لفرقد نوب تجهزني منها وتصرف من جيبها ..

امج هم معذوره خطيه جوز عمي ثامر ، الجخف رفض يجهزج وهيه ماحبت ينكسر خاطرج لو احد يعيرج عود اخذناج بعباتج جهزتج من الاحين حتى تنكسر عينهم ..

ماحجيت ضليت امسح بخشمي .

كالت تردين شي راح انزل بس حبيت اشوفج ..

دزي على خالتي حبابه ..

عوجت حلكها خالتج من الله ماحبها بس عود احاول ..

بعدين حجت ، اكولج صدك محمد تزوج ..

هزيت راسي سمعت اي تزوج وحده من كرايبنه ..

مم الله يوفقه ..

نزلت وراحت ، دقايق اسمع صوت عمي مضفر جوه يعيط ويصيح ، ويصيح وينهاا بت عفاف ولج قندره شلون تضربين تاج راسج ..






كمت بسرعه قفلت باب الغرفه خفت لا يدخلون علي والله اموت بيدهم ..

هرج دنياا هرج ، نوب ندار من جهه البلكونه يصيحون علي ويغلطون ايمااان ولج ضاربه تاج راسج لان حجت ماضيج ولج ..

غطيت راسي حيل وسكتت ..

بذيج الحظه حتى كرهت امي وزعلت منها ليش هيج رخصتني ، ليش هيج سوت بيه ، شنو جابرها ، ليش قللت من قيمتي جدامهم شناقصني ..

حبست روحي بالغرفه ميته بجي ، حسيت نفسي ماسوه فرنك حتى عرس وتجهيز مثل العالم ماحصلت ، قللو مني عبالك جايه من شارع ..

لو بلا اهل ، منطيني هديه ..

عليمن اعتب على امي لو على جدي شلون رضا بهل حجي هذا ، خليت راسي بحظني صدعت ..

حساام ااخ منك يااحسام يااجباان ، ضليت اشهك مابراسك خير مو رجال ..

منين اتلكاها من كلبي الي ياذيني لو من كرامتي ، لو من فرك امي وجدي ..

رحت للحمام غسلت وجهي ونكعت شعري ورجعت للغرفه ..

ضليت هيج ، لا يوم ولا يومين ، كارهتهم كلهم ، عمي اسمع يصيح وينهااا ليش ماتنزل جوه شعدها فوك وزلمتها ومو هنا ..

ترد عمتي تكله خلصت تنظيف وشغل وصعدت تنظف غرفتها ..

الحق ينكال جانت مره طمطم الي ، وعلى نياتها ماذتني ابد حتى بناتها فقيرات ، يمكن الله رحمني بيهن ..

فد يوم عمي وله للشغل واجت غصن تركض كالت ابوي طلع هو وفارس البسي برجلي ويله نركض لخالتج شوي ..

ماجذبت خبر والله ، يادوب خليت شحاطه برجلي وركضت ، عمتي صاحت وراي يمه ايمان شالج ..

لا يجي زلمتج غفل غير يتخبل علينه اذا شافج مفرعه ..

لبست شال براسي ومشيت بسرعه ..

ردت صاحت ورانه ، لا تبطن يمه لايجي ثامر ..

هزيت راسي اي اي عمه صار ..

نركض ونتلفت ، نوب على حظنه طلعت ظمياء و مرام بوجهنه ..

وجهي اصفر ، بس ماحجن ضلت عينهم علينه ، مشيت لبيت خالتي واتلفت عليهن ..

بس دخلت وشفت خالتي بجيت ..

هيه اخترعت يماا اسم الله شبيج ..

خاله ليش مسألين علي ليش امي ماتسال ..

ياخاله يابعد عيني تعاي جلي تعااي حظتنتي تبوس بيه وتمسح بدمعي ..

حجت يايمه مااجي من وره عمج وحجيه ،

رديت وامي شنو نستني ..

عليمن تجي يماا عمج طاردها وكايللها لا توصلين ..

ليش ماحجت وكالت جهزتج مني ليش رخصتني ..

ياجهاز هذاا ..

مو امي مجهزه منها كلشي ذهب وغرفه مو عيب خاله ليش هيج ، شمرتني شمر دافعه الهم دياخذوني شنو ..






خلت ايدها على وجها صفنت يااا خاف عمج هذاا ، امج ماسوي هيج ، الا اذا عمج لاوي ذراعها ..اكيد هددها برهان ..

والله كلشي اتوقع منه ..

خابريها خاله بس احجي وياها ..

ركضت تجيب تلفون وتخابر عليها ماكوو رد يدك وماكوو ..

كالت اكيد يم برهان وهل ماسمعت ..

دكت على بيت خالي وشالو ، كالتهم عفاف وين ..

حجو مو هنا الحجي مريض واخذته للمضمد ..

كالت خوش وصلو سلامي الها وكلولها بتج تسال عليج خلي تمر عليها ..

اني كاعده يمها واديه ترجف دغنتي غصن وتكلي ولج يله ..

كمت لحيلي كتلها اذا حاجتج كليلها ايمان تكول زعلانه عليها دمرتني بسوليتها هاي حتى وظيفتي بطلوني منها .

كامت لحياها على بختج يما امج مره فقيره لا حول ولاقوه هذا عمج راس بلا ، اكيد هددها برهان وخوفها ..

.ماحجيت جرتني غصن ورجعنه نركض للبيت ، ضليت طول اليوم انتظر مخابرتها ، لو خبر منها ..

بس ماكو ، حتى لو اكو خالتي هم ماتجي لهنا ، بسبب عمي ونحاسته ، فرقد طول فوك ال١٠ ايام ،

وره العشه صعدت للغرفه بعد مانظفت مطبخ ويه شدن ، ساعه ب٩ تقريبا ، اسمع صراخ بيت عمي ابو غسان ..

بغرفتي وصل صوت يمي ..

صوت يفزز حتى نايم سابع نومه ، فتحت شباك اشوف شكو ، اشوفلك غسان و اخو غافر يركضون حيل بره البيت حفاي ...

وراهم مرت عمي ام غسان تصرخ وكعت بالحديقه تلطم ، جسمي كزبر اسم الله رحمن يمااا دخيلك ياربي ..

نزلت ركض لكيت بيت عمي راكضين جدامي ، بس غصن واكفه بالباب ترجف ..

حجيت شكوو شنو ..

ردت تبجي مادري مادري عمي ابو غسان مدري شبي خابرو ابويا كلوله الحك اخوج ..

خفنه نوصل لبيت عمي اني وغصن ، بس نسمع صوت صراخ وعياط جريتها وكتلها امشي نروح خلي نشوف شكو ، طلعنه نركض عليهم ..

دخلنه لبيتهم نسوان مجموعات بالحديقه ومكابلات ام غسان الي ملخه وجها و تعيط وكبالها بيبتج سارده ثوبها ..

من يمي رجليه خدرن وكعدت بالارض ارجف ، شكلهم يخوف وبجيهن مايطمن ، خاب صوت مرام ..

التفتت عليها مددت بالارض وتصرخ يااابه ، عيوني ياابه ..

من يمي بجيت جن عندي هم عزيز وراح ..

لمن دخل غدير يلطم على راسه ويكلها ماات يماا ماات ابو بيتج ، انكتل يماا غدرو بابويا ..

كبت عيطتهن ، ذيج تلطم حيل وذيج السردت ثوبها ..

ومرام كامت لحيلها تريد تطلع تركض تروح لابوها ..






رجليه انشلن اخذت ركن ابجي مخترعه ، ناس تتراكض ممصدكه ابو بيتها راح ، وناس كلبها تجوه بهل خبر ،

جرو مرام جر يرجعوها للبيت ، وهيه نامت بشارع تصرخ الا تودوني لابويا ، كتلوو ابوياا بسببهم مات ..

خليت اديه على اذني ، صوت بجيها يوجع الكلب حيل ، ما فقدت عزيز قبل صدك ، حتى ابويا من مات جنت اصغيره ، بس صراخهن والمهن حسيت بي ، وجعهن طلع ويه صرخه سمع ناس كلها ..

انقهرت بشكل علي ، صح علاقتي بيهم كلهم معدومه ، بس الحق ينكال مااذاني ابد ، اشوفه دائما من يشوفني يبتسم بوجهي ويكلي شلونج بابا وبس ..

ماتقربت علي ولا هو هم ، من راح حيل شفتها صعبه ، حتى لو جان عدوك من تسمع بموته تنقهر وتشوفها حيل توجع ..

مسأله الموت مو مساله هينه ، صح هو نهايه الموت لقاء ويه الخالق وبعض الاحباب الي رحلو قبلنه ، بس تبقى الفكره مؤلمه ، فكره وداعهم للابد ..

مرت ايام فاتحه ، كئيبه ، مريره ، شوفت بعض ناس انهارت وخارت قواهم ، مرام ام السان اختفت ، بقه بس هيكل بشر يتنفس ، امها ماحزنت بهل شكل ..

حتى الحجي نسته ، كلها تحاجيها ماترد ، ضليت اكعد كبالها ابجي مره على امي ، مره على نفسي ، ردتها حجه حتى اطلع الي بصدري ...

فرقد شفته بيوم الفاتحه اجه ، مانتبها علي ، بس باين جاي وسابح ومبدل ، كلها مخصره بسلاحها ،

من عمي ثامر راس البلا ، لفراس ل فرقد لعمامي الكل ، مسلحين طول اليوم ، حتى من ينامون ينامون لو بسطح لو بالجادر ،

اني كضيتها مجلبه بذيال عمتي لو خالتي وياهن وياهن ..

فاتحه انصبت بالشارع ، وفاتحه نسوان جوه ..

مرام ......

شايلين النعش واني اركض حافية ، من يم باب الاكامية حد ما نزلوه عالارض ، اخر طبه واخر يوم والموادع حان ...

شمرت نفسي فوك التابوت بطبه ، واني اكطع بروحي
يريدون يبعدوني عنه ما يكدرون ...

فاقدة ملخه نفسي صار ايام بالمستشفى وما خلوني اروح اله الجلاب ، شلت نفسي وركعتها عالكاع

-ولكم مات وما شفته ولكم مات

كمت ادفع باديهم عني اريد افتح نعشه ، واني اصيح بويه وارجع اصيح عليهم ، وشوغة روحي توصل للسما ...

ما خلوني اشوفه اسمعهم يكولون تتخبل هاي ، جروني جر مانعيني ، امي نايمه على طرف بعيد مني شمرت نفسي بحضنها ...

راح ابوي وراح عزي ودلالي ، شالوه وطلع اخذوه ، ابويه انكتل ظلم لا اله بيهم علاقة..

ولا دخل وياهم ولا راد عداواتهم وحقارتهم ، ويه الناس كان مانعهم ودوم ضدهم ....